Markə 9
9
1Zezu faŋ la' ne ndaya: «Na in mi ne kəzin', sôwâ məsin wə du sôwâ məni kuni cu də mar cop, dan we ri məni Ifray wə də suk jwə kə gbəgboŋ wa nday nə mi.»
Zezu faŋwa tu rumu
(Mat 17.1-13; Luk 9.28-36)
2Kəki rum bəka kanki', Zezu tle Piyer, kə Zakə ɓay Zaŋ ɓay ur ta wa igway' məni mbuɗ ɗew' ɗew' kə ɗaw ndaya. Mum faŋwa tu rum kor ndaya#2Pi 1.17-18. 3Mbraw um təŋ kə wəɗi ɓay faŋ mə ɓu kep kepe. Swə ɗaw wa nya cu gak kol mbraw par mə ɓu ndəna' mi. 4Kəki rum, sum ta zə rum mə hinji' we Eliya kə Moyizə wə ge dan kə Zezu. 5Zə rum, Piyer la' ne kə Zezu: «Bə ta' kwa, ɓay kədan namba ke tira! Namba də kaw jew hinji': ɗaw zə ru, ɗaw zə Moyizə, ɓay ɗaw zə Eliya.» 6Piyer cu we i mum in dan ma su wa kwa rum mi, zə kwa rum gi wəlok ne nday juku. 7Dləmbur mbə kəmbo' nday, ɓay wor car mbə du dləmbur ini: «Məni nə Vay man məni na ba. I mun vun rumu!» 8Kəri rum sar, sum ta zə Zezu kar ri hay' nday, ama handay cu we swə ɗaw mi, say Zezu ɗaw rum kə ndaya.
9Kəri məni handay wə dam wa igway' mbə nya, Zezu dlay nday kə gbəgboŋo: «I in dan kwa məni hi we nə ne kə swə ɗaw mi, hâ bəka məni Vay sumra' də car mbə mara.» 10Handay kaw dan rum wə vunduk nday, ama handay ci vun kuni mbok nji: «Zezu wa' in ma kəri məni mum in i Ifray də par Vay sumra' mbə mar nə su?» 11Handay faŋ ci vun rumu: «Zə mi sum pay zu dan dlay wə in i say Eliya də mbə cop su#Mal 3.23; Mat 11.14?» 12Mum ɗam vun ndaya: «Kəzin', Eliya də mbə cop kədan mum gila' kwa daŋ'ŋ. Ama zə mi Ɗerwa Ifray wə in i Vay sumra' də ce boni juk, ɓay sôwâ də um jeɗ su? 13Ama na in mi ne: Eliya mbə si, ɓay sôwâ gi kwa daŋ' məni handay wa' wə tu rum, ce' ndə məni Ɗerwa Ifray in wa rumu.»
Zezu 'way gam wa vay mə nji
(Mat 17.14-21; Luk 9.37-43)
14Kəri məni handay mbə day hay' sum ta zə rum məsin, handay we raw sôwâ ɓa reŋ wa nday, ɓay sum pay zu dan dlay wə dan kə ndaya. 15Kəkor sar, sôwâ məsin du nday we Zezu, ɓay dan rum dam nyî ndaya. Handay pik ne ta hay' Zezu kədan handay kaw jeɓ rumu. 16Zezu ci vun sum ta zə rumu: «Hi wə way dan wa dan mi kə nday su?» 17Swə ɗaw du raw sôwâ ɗam vun rumu: «Bə ta' kwa, na mbə nu kə vay man, zə mum kə gam wa rumu. Gam nə wə um tak dan ge dana. 18Kəri daŋ' məni gam wə um tle, mum um ge də nya. Vay nə wə ci kukup vun, cwə se', ɓay tu rum co' satəraka. Na ci vun sum ta zə ru kədan handay 'way gam rum, ama handay cu gak 'way num mi.» 19Zezu la' ne ndaya: «Hi sum dan ô! Na də suk kə ri hâ day ka su? Na də reɗ vunduk rin wa ri hâ day ka su? I mbə nan kə vay na.» 20Handay mbə num kə vay na. Kəri məni gam nə we Zezu, mum tle vay nə kə gbəgboŋ, ɓay vay nə nde ta nya. Mum ge farga' kə ci kukup vunu. 21Zezu ci vun ba vay na: «Kwa rum təŋ um gi kə ma su?» Ba vay nə ɗam vun rumu: «Təŋ num kə nyêwe. 22Ɓay sem raw gam wə um pla' də ku ɓay də mbi kədan mum um ci. Ama ha la' gak gi kwa məsin zə rum si, a we ca wa mba, ɓay a kawɓa mba!» 23Zezu ɗam vun rumu: «Ha gak si su? Kwa daŋ' gak gi zə swə məni ve nan si.» 24Kəkor sar, ba vay nə ka' dana: «Na ve nu si! A kawɓa rin kədan na də kofo wə du dan məni na ve na!»
25Zezu we raw sôwâ wə ne mbə hay' ndaya. Zə rum, mum dlay gam nə kə gbəgboŋo: «Ha gam məni wə tak vay nə dan ge dan kə mun dan, na dlay nu: A pâ mbə wa vay nə ɓay a faŋ dok ze wa rum za' mi!» 26Gam nə ka' dan, mum tle vay nə kə gbəgboŋ, ɓay pâ mbə wa rumu. Vay nə faŋ ce' ndə mar, hâ sôwâ juk məni wə han ini: «Mum mar si.» 27Ama Zezu tle ɓa rum kaw num car fray, ɓay vay nə ca kə sem rumu.
28Zezu kə sum ta zə rum cok kuni ta rawti so. Kəri məni handay kə rum ɗaw nday, handay ci vun rumu: «Zə mi namba cu gak 'way gam rum mi su?» 29Zezu ɗam vun ndaya: «Kədan swə gak 'way gam mə nda nay' na, say kə o Ifraya.»
Zezu in dan wa mar um kə pâ mbə mar um kəreme
(Mat 17.22-23; Luk 9.43-45)
30Handay 'ya mbə han, ta pâ nya Galile ɓay Zezu cu wa' i swə ɗaw we ri məni mum wə də han nə mi. 31Zə mum wə ta' kwa ne kə sum ta zə rum ɓay wə du kwata' um, mum ini: «Sôwâ də ar Vay sumra' də ɓa sôwâ məsini. Handay də um ci, ɓay kəki rum bəka hinji', mum də car mbə mara.» 32Ama sum ta zə rum cu mun zu dan rum mi, ɓay handay wə ne wəlok dan ci vun rumu.
Sa nə suk toŋ mə du mba su?
(Mat 18.1-5; Luk 9.46-48)
33Handay ta day so Kapernawum. Kəri məni handay cok ta rawti so, Zezu ci vun ndaya: «Hi ci vun kuni mbok nji wa dan mi wə vari su?» 34Ama handay gay' ɓaw' ɓaw', zə wə vari handay ci vun nji mbok nji: «Sa nə suk toŋ mə du mba su#Luk 22.24?» 35Zezu faŋ suk ta nya. Mum ɗe sum ta zə rum mə guɓ wa hoɓ ɓay la' ne ndaya: «Swə la' wa' kədan mum suk toŋ si, say bə rum faŋ vay nyêw du sôwâ daŋ' ɓay nə faŋ swə mə kəki wə du sum sin daŋ'ŋ#Mat 20.26-27; 23.11; Mak 10.43-44; Luk 22.26.» 36Kəki rum, Zezu kawɓa vay nyêw ɓay mbə kor nday kə rumu. Mum tle vay nə kaw mbə vunduk rum ɓay la' ne ndaya: 37«Swə məni ve vay nyêw ce' ndə vay məni nə zə rin, bə rum ve nana. Ɓay swə məni ve nan, bə rum cu ve nan taw mi, ama mum ve swə məni sin nan nə ta'a.»
Swə məni cu suk sây' mba mi bə rum kə mba
(Luk 9.49-50)
38Zaŋ in ne kə Zezu: «Bə ta' kwa, namba we swə məsin wə 'way gam kə semɗe ru, ɓay namba tak num, zə mum cu du mba mi.» 39Zezu ɗam vun ndaya: «I tak num mi, zə swə məni gi yew kə semɗe rin cu gak faŋ ge dan mə bro' wa rin ga'ri mi. 40Zə swə məni cu ge dan bro' wa mba mi nə kə mba. 41Ɓay swə məni ne ni mbi ce zə hi sôwâ Kris, na in mi ne, kəzin', bə rum də fe bal cik umu.»
Dan ɓu sôwâ nde də du kwa mə bro'o
(Mat 18.6-9; Luk 17.1-2)
42«Swə məni ɓu vay nyêw ɗaw du daw məni ve nan məni kuni nde də du kwa mə bro', pram zə bə rum sôwâ jew gway' vəna wə jewre rum ɓay tle num ge də ya mbi. 43Ɓa ru la' wû ɓu kədan ha nde du kwa mə bro' si, a hay ye. Pram zə ru kədan ha də ke kə nyî mə də hâ so Ifray kə rəɓo pâ məni ha də ke kə ɓa mə hoɓ ɓay də ze ri ku məni cu mar i mi kə ndi nə si. [44Wə ri rum, ŋgun məni wə ti tu han cu mar mi, ɓay ku rum cu mar i kpe mi#9.44 Ri ɗerwa rum cu wə du ɗerwa məni wây' cem cem məsin kuni mi..] 45Sem ru la' wû ɓu kədan ha nde du kwa mə bro' si, a hay ye! Pram zə ru kədan ha də ke kə nyî mə də hâ so Ifray kə lem pâ məni ha də ke kə sem mə hoɓ ɓay də ze ri ku kə ndi nə si. [46Wə ri rum, ŋgun məni wə ti tu han cu mar mi, ɓay ku rum cu mar i kpe mi#9.46 Ri ɗerwa Mak 9.46, cu wə du ɗerwa məni wây' cem cem məsin kuni mi..] 47I ru la' wû ɓu kədan ha nde du kwa mə bro' si, a par ye! Pram zə ru kədan ha də ze wə Jwə Ifray kə i mə ɗaw pâ məni ha də ke kə i mə hoɓ ɓay də ze ri ku kə ndi nə si. 48Wə ri rum, ŋgun məni wə ti tu cu mar mi, ɓay ku rum cu mar i kpe mi#Esa 66.24.» 49«Zə ku də ge wa sôwâ daŋ' ce' ndə vu wə ge wa mbara. 50Vu nə kwa mə ɓay na, ama vu la' so' walak um si, hi gak gi ma kədan hi um gi faŋ walak kərem su? I ke kə vu wə vunduk ri, ɓay i gay' heɓ kə nji mbok nji#Mat 5.13; Luk 14.34-35.»
বর্তমানে নির্বাচিত:
Markə 9: KMN
হাইলাইট
শেয়ার
কপি
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
