Markə 7
7
Kwata' wa vun fur sôwâ mə kəmbara
(Mat 15.1-9)
1Kul sôwâ Zuwif mə ɗe kə Farisiyen kə sôwâ məsin mə du sum pay zu dan dlay car kuni wə so Jeruzalem ɓa mbə hay' Zezu. 2Handay we sôwâ məsin mə du sum ta zə Zezu wə ti kwati kə ɓa day, dan kol ce' ndə məni vun fur nday ta' ne ndaya.
3Kul sôwâ Farisiyen kə sôwâ Zuwif daŋ' cu ti kuni kwati dan kol ɓa ce' ndə məni vun fur nday wə ta' nə mi, zə handay daŋ' wə ta zə vun fur ba mbri randay, 4ɓay kəri məni handay la' gewa lumo si, handay cu ti kwati məto', say handay mbi tu copo. Handay kaw dan vun fur məsin cem cem juk, ce' ndə dan kol timbi, kə dənay, ɓay tasawa.
5Zə rum, kul Farisiyen kə sum pay zu dan dlay ci kuni vun Zezu: «Zə mi sum ta zə ru cu ta zə vun fur bambi ramba mi, ama handay wə ti kwati kə ɓa day su?» 6Zezu ɗam vun ndaya: «Hi sum vur vuru! Bə ka' dan mə ɗe kə Esaya ka' dan mə njeŋ wa ri kəri məni mum wây' wə du ɗerwa umu:
Sôwâ məni kuni wə man mbâ kə ɗike vun,
ama vunduk nday seŋ kə rini.
7Handay man bur kə vun uray,
zə handay wə ta' dan ɗik sumra'a#Esa 29.13.
8Hi wə ar dan dlay Ifray njay kə hay', ɓay hi wə faŋ ta zə vun fur mə sumra'a.»
9Zezu faŋ la' ne ndaya: «Hi we yel vaɗ dan dlay Ifray si njeŋ kədan hi faŋ ta zə vun fur mi! 10Zə Moyizə ini: "A mbâ ba wû kə ya wû", ɓay kəreme: "Swə məni ge nê' ba um ko ya um, bə rum də fe mara#Psi 20.12; 21.17; Lev 20.9; Ddd 5.16."» 11Ama mə hi, hi wə ini: "Swə la' la' ne kə ba um ko kə ya umu: «Kwa man məni na gak kawɓa ri kə ndi, kwa rum nəKorbaŋ, (məni wa' dan ini: "na ne zə Ifray si"), 12hi cu ar vari ne kə bə rum kədan nə kaw ɓa ba um ko ya um za' mi. 13Kə vari məni nə hi wə ɗənok dan Ifray kə vun fur mi məni hi wə ta' ne kə sôwâ məsini. Ɓay hi wə gi kwa məsin juk ra' nji kə mə ndani na'a.»
Kwa məni wə ɗənok swa
(Mat 15.10-20)
14Kəki rum, Zezu ɗe raw sôwâ kərem ɓay la' ne ndaya: «Hi daŋ', i mun dan man, ɓay i mun zu dan mə ni na: 15Kwa daŋ' məni car mbə rəka mbə ze vun swə cu gak ɗənok bə rum mi. Ama kwa məni wə pâ mbə vunduk swə, kwa rum gak ɗənok bə rumu. [16Swə la' kə hum mun dan kəta' si, say bə rum nə munu#7.16 Ri ɗerwa Mak 7.16, cu wə du ɗerwa məni wây' cem cem məsin kuni mi.!]»
17Kəri məni Zezu ɓul nji kə raw sôwâ, mum ze ta rawti so, sum ta zə rum ci vun rum wa dan mə gəgan rumu. 18Zezu ɗam vun ndaya: «Hi ta', hi dan wa su? Hi cu mun i kwa daŋ' məni car mbə rəka mbə ze vun swə cu gak ɗənok bə rum mi nə mi su? 19Zə kwa rum cu ze də vunduk rum mi, ama wə ze də rawti bə rum, ɓay kəki rum kwa rum pâ də rəka.» (Kə dan mə ni nə, Zezu ta' i kwati daŋ' ɓay kədan ti). 20Mum faŋ la' ne ndaya: «Kwa məni wə pâ mbə vunduk, kwa rum gak ɗənok bə rumu. 21Zə kwa məni car mbə wə rawti swə, pâ mbə vunduk rum, mum nə ɗik dan mə bro', gi kwa mə kə zur, kəy hura, ci mar, 22gi nja, səna' kwa, gi ɓê', gi vur vur, gi kwa mə dan vari, gi sây', ge dan mə bro' wa sôwâ, mbra' tu, kə gi kwa mə laya. 23Kwa mə bro' mə ndani kuni daŋ' wə wur mbə rawti swə ɓay wə ɗənok bə rumu.»
Ma nya Fenisi ve Zezu
(Mat 15.21-28)
24Kəki rum, Zezu 'ya mbə han ta nya məni so Tir. Mum ze ta rawti so ɓay mum cu wa' i swə ɗaw we i mum wə so rum mi, ama kə ndi nə daŋ' mum cu gak pe' tu rum mi. 25Kəri rum, ma məsin mun dan Zezu, ɓay kəkor sar, ta mbə kuduk nya kor rum, zə vay sə mə ma kə gam wa sa. 26Ma rə zə saŋ sôwâ Grek, ta vra' wə Fenisi, nya Siri. Ta o Zezu kədan nə mbə 'way gam wa vay sa. 27Ama Zezu ɗam vun sa: «Əŋ ar daw sumra' ti ndak nday cop ri', zə cu ɓay kədan tle kwati daw sumra' ne kə daw də mi.» 28Ta ɗam vun rumu: «Kəzin' Bârî, ama daw də gak ti bubuɗ kwati məni daw sumra' ar njay zə tablə.» 29Zə rum, Zezu ɗam vun sa: «Zə dan ɗam maŋ, əŋ də ye, gam pâ mbə wa vay maŋ rə si.» 30Ta faŋ ta so sə, ɓay za' vay sə bar wa la'a. Gam nə pâ mbə wa sə si.
Zezu ar hum ndumu
31Kəki rum kərem, Zezu 'ya mbə nya məni so Tir wə han, ta pâ so Sidoŋ, kə nya məni so mə mbri guɓ wə han, ɓay mum gaŋ ta day vun ya mbi Galile. 32Sôwâ məsin mbə hay' Zezu kə ndum məni cu gak ge dan njeŋ mi, ɓay handay o num kədan nə cin ɓa wa rumu. 33Zezu faŋ kay' num ta rəka kə rum kə ɗaw rum, seŋ kə raw sôwâ. Mum cok daw ɓa ta zra hum ndum na. Mum tup mê' ɓay ɗak se'le ndum kə vay ɓa rumu. 34Zezu faŋ tle i ta fray, tlaw, ɓay la' ne kə ndumu: «Efata», məni wa' dan ini: «A mun hum ye!» 35Kəkor sar, hum ndum nə ar, se'le rum gbol', ɓay mum dle kə ge dan kə vari rumu. 36Zezu dlay nday kə gbəgboŋ kədan kuni in dan rum ne kə swə ɗaw mi. Ama kə ndi nə daŋ', handay pla' dan rum kporo. 37Kwa rum jin' wa ne nday juk, ɓay handay ini: «Kwa məni mum gi daŋ', ɓaya! Mum ar hum ndum, ɓay mum gbol' se'le sôwâ məni cu dan məta'a!»
বর্তমানে নির্বাচিত:
Markə 7: KMN
হাইলাইট
শেয়ার
কপি
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
