Matiye 28
28
Ifray par Zezu mbə mara
(Mak 16.1-10; Luk 24.1-12; Zaŋ 20.1-10)
1Kəki fəta pemây sôwâ Zuwif, dimaŋsə kə bəka ceɗ, Mari mə so Magdala kə Mari məsin mbə kuni kədan handay kar vun zra mara. 2Kəkor sar, nya nyen kə gbəgboŋo: Vay sin Bârî mə wafray car wafray dam mbə nya, mum ɓuru gway' rum ta kə hay' ɓay suk wa rumu. 3Tu rum wəɗi ce' ndə wəɗi buŋô, ɓay mbraw tu rum mə ɓu ce' ndə fut mbrawa. 4Kwa rum gi wəlok ne kə soje mə ji ri juk, hâ tu nday təŋ kə nyen, ɓay handay faŋ ce' ndə mara. 5Vay sin Bârî mə wafray nə la' ne kə rawkwa kuna: «Mə hi, i ne wəlok mi. Na we si hi wə keɓ Zezu, swə məni handay ke gay' num wa gu. 6Mum cu ti za' mi, mum car mbə mar si ce' ndə məni mum ini. I mbə ye. I kar ri məni mum ke bar han nə ye. 7I də ga'ri in ne kə sum ta zə rumu: "Mum car mbə mar si, ɓay mgbaŋ ni nə mum dle də nya Galile cop kə ri. Hi də um we wə hana." Dan məni na wa' dan mi in ne na.»
8Zə rum, rawkwa kuni 'ya mbə vun zra mar kə ɗəma. Wəlok gi nday juk, ɓay handay tuk kəɗam juk ta'a. Handay ne kədan handay də in dan rum ne kə sum ta zə Zezu. 9Kəkor sar, Zezu mbə ndewa kə nday ɓay ini: «Soko mi ye!» Handay ta ta hay' rum ɓay handay kaw sem rum ɓay bur numu. 10Kəki rum Zezu la' ne ndaya: «I ne wəlok mi. I də in ne kə daw ba man kuni də nya Galile: Handay də man we wə hana.»
Dan məni soje mə wə ji vun zra mar ini
11Kəri məni rawkwa kuni wə vari ɓo, soje məsin wə du soje məni wə ji vun zra mar gewa mbə so ɓay in dan kwa daŋ' məni gi nə ne kə sum rôwâ mə du sum po' furu. 12Sum rôwâ mə du sum po' fur ɓa kə sum rôwâ mə du sôwâ Zuwif. Kəki məni handay kawvun ɗaw, handay ne səlay ɓayrum ne kə soje kuni, 13ɓay la' ne ndaya: «I də in i sum ta zə Zezu mbə kə dukri ɓay tle hura mar rum kəri məni namba wə nde sene. 14Ɓay toŋ nya rum la' mun dan rum si, namba də ge dan mə njeŋ rum, ɓay dan mə kəcik rum cu də ke wa ri mi#Mat 26.32; Mak 14.28.» 15Soje kuni ve səlay rum ɓay gi kwa rum ce' ndə məni sum rôwâ kuni in ne ndaya. Ndəna', dan rum pla' wə du sôwâ Zuwif hâ tama.
Zezu ta' tu rum ne kə sum ta zə rumu
(Mak 16.14-18; Luk 24.36-49; Zaŋ 20.19-23; Sin 1.6-8)
16Sum ta zə Zezu mə guɓ wa ɗaw 'ya ta nya Galile, wə wa igway' məni Zezu ke ta' ne ndaya. 17Kəri məni handay we num, handay bur num, ama sôwâ məsin du nday way dan rumu. 18Zezu mbə hay' nday ɓay la' ne ndaya: «Ifray ar gbəgboŋ mə wafray kə mə nya daŋ' ne nana. 19Zə rum, i də hay' sôwâ nya məsin daŋ', ɓay i gi nday faŋ sum ta zə rini. I gi baptem ne nday kə semɗe Bəba, kə semɗe Vay, ɓay kə semɗe Simbeɗ mə Kəleŋ#Sin 1.8, 20ɓay i ta' kwa daŋ' məni na ta' ne ni nə ne nday kədan handay ta zə rumu. Ɓay i we: Na də ke kə ri bəka daŋ' hâ ndo' nya.»
বর্তমানে নির্বাচিত:
Matiye 28: KMN
হাইলাইট
শেয়ার
কপি
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
