मत्ती 18
18
गोदोब्न्हङ्री ङ्हच्छ्यङ् खल?
(मर्कुस् ९:३३-३७; लुका ९:४६-४८)
1हुजु बेलोरीनो डबमा खज्यीम् येसुत, “स्वर्गइ य्हुल्री गोदोब्न्हङ् ङ्हच्छ्यङ् खल तब?” बी ङ्योत्ज्यी। 2ओसेम् येसुचे ज्यीद कोल गीत ङ्होत्ज्यीम् थेङ्यीमाकी गुङ्री रप्पुङ्जेत्ज्यी। 3ओसेम् थेङ्चे सुङ्ज्यी, “देमेन्नो ङ एङ्यीमात पङ्ब, एङ्यीमाकी सेम् पोज्यीम् चु कोलमा र्हङ्ब अतज्यी पङ्सम् एङ्यीमा खेमेनो पर्मेस्वर्की य्हुल्री वङ्म्यङ्स्ये अरे। 4होत्तज्यीम् खल म्ही चु कोल र्हङ्ले नम्र तब हुजु स्वर्गइ य्हुल्री गोदोब्न्हङ्री ङ्हच्छ्यङ् तस्ये मुब। 5ओसेम् ङइ मीन्री चोतेबे कोल गीत ग्रहन् स्य्हेङ्बलचे ङतेएनो ग्रहन् स्य्हेङ्ब।
पाप्री दोःनलबे परीक्षा
(मर्कुस् ९:४२-४८; लुका १७:१-२)
6 “तर खल्चे पङ्लेनो ङत बीस्वास् स्य्हेङ्बे चोतेबे ज्यीदमा न्हङ्री गीत पाप् स्य्हेङ्नलज्यी पङ्सम् थेइ खारीरी ङ्हच्छ्यङ् र्हन्द च्योज्यीम् समुन्द्रन्हङ् युलाब ज्यब तब। 7धीक्कार् चु जम्बुलीङ्त! तलेपङ्सम् म्हीमात पाप्री फसइतीबे तम्मा चु जम्बुलीङ्री मुब। परीक्षामा खनो-खब, तर धीक्कार्, हुजु म्हीत खल्चे ल्हो-ल्होत पाप्री दोनलब!
8 “एइ या वुइ कङ् खचुचे पङ्लेनो एत पाप् स्य्हेङ्न लसम् एइ या वुइ कङ् खजु य्हीन्लेनो पाप् स्य्हेङ्न लबलत थाज्यीम् ख्लागो। यातेङ् कङ् ङ्य्हीतेङ् बक्च्य खेमेएनो अस्यीबे मेन्हङ् दोःब बीमम् खोरातेङ् डुडे तज्यीम् खेमेएनो अबेबे जीवन्री वङ्ब ज्यब। 9ओसेम् एइ मीःचे एत पाप् स्य्हेङ्न लसम् एइ मीःत तेत्ज्यीम् ख्लागो। मीः ङ्य्हीतेङ् छ्यम् खेमेएनो अस्यीबे मे मुबे नर्करी ङ्यीब बीमम् मीः गी कन तज्यीम् खेमेएनो अबेबे जीवन्री वङ्ब ज्यब।
म्हबे ग्युःकी अर्त
(लुका १५:३-७)
10 “होसीयार्ले टीउ, चु ज्यीद कोलमान्हङ्री गीतेएनो हेल थलउ। ङ एङ्यीमात पङ्ब, थेङ्यीमात स्य्हप्तो स्य्हेङ्बे स्वर्गदुत्मा स्वर्गरी मुबे पर्मेस्वर् अपइ ङोन्री मुब। 11[तलेपङ्सम् म्हीइ ज म्हबलमात थर्नलबरी युबल य्हीन्ब।]
12 “एङ्यीमा ता म्हेन्ब? खल् ङ्ह ग्युः मुबे म्हीचे ग्युः गी म्हज्यी पङ्सम् थेचे ता लब? थेचे खल् ब्लीस्यी चुर्कु ग्युःमात चरन्री पीत्थेन्ज्यीम् म्हबे ग्युः गीत म्हइबरी अङ्य्ही स्यीम्? 13ओसेम् थेचे हुजु ग्युःत यङ्ब बीसेम् खल् ब्लीस्यी चुर्कु अम्हबे ग्युःमाकी लागीरी बीमम् हुजु यङ्बे ग्युः गीकी लागीरी य्हक्को तङ्स्ये मुब। 14होलेनो चु ज्यीदमा न्हङ्री गीएनो नास् अतखइ पङ्बे सेम् स्वर्गरी स्य्हुःबे एङ्यीमाकी अपल मुब।
पाप् स्य्हेङ्बे बीस्वासी
(लुका १७:३)
15 “ओसेम् कोइ बीस्वासीचे एइ बीरुद्दरी पाप् स्य्हेङ्ज्यी पङ्सम् ए थेज ङ्यीज्यीम् थेइ दोस् ङोन्पीनो। थेचे एइ तम् ङ्येन्ज्यी पङ्सम् थे एइ अले तस्ये मुब। 16तर एचे पङ्बे तम् अङ्येन्ज्यी पङ्सम् ल्हो-ल्हो गीते ङ्य्हीते म्हीत बोर्ज्यीम् ङ्यीउ ओसेम् थेइ दोस् ङोन्पीनो। तलेपङ्सम् ङ्य्हीते सोम्ते साक्षीमा ग्यम्से जम्म तम्मा पक्क तथोब। 17ओसेम् थेचे थेङ्यीमाकी तम्एनो अङ्येन्ज्यी पङ्सम् मन्डलीरी ङ्यीज्यीम् जम्म तम् पङ्पीनो। ओसेम् मन्डलीचे पङ्बे तम् अङ्येन्ज्यी पङ्सम् थेत पर्मेस्वर्त अस्येःबे म्हीतेङ् तीरो दुत्पे म्हीमात र्हङ्ब स्य्हेङ्खइ।
18 “देमेन्नो ङ एङ्यीमात पङ्ब, एङ्यीमाचे चु जम्बुलीङ्री ता खीःब हुजु स्वर्गरीएनो खीःस्ये मुब। ओसेम् एङ्यीमाचे ता चु जम्बुलीङ्री फ्रेन्ब, हुजु स्वर्गरीएनो फ्रेन्स्ये मुब। 19ओसेम् ङ एङ्यीमात देबेएनो पङ्ब, चु जम्बुलीङ्री एङ्यीमान्हङ्री ङ्य्हीलनो सेम् गी तज्यीम् ता पङ्लेनो र्हीत्ज्यी पङ्सम् ङइ स्वर्गइ अपचे एङ्यीमाकी लागीरी हुजु न्हङ्जेत्स्ये मुब। 20तलेपङ्सम् खन ङइ मीन्री ङ्य्ही वुइ सोम् र्हुब तब, ङ थेङ्यीमाकी गुङ्री तस्ये मुब।”
क्षमा अपीन्बे योक्पोइ बारेरी अर्त
(लुका १७:४)
21हुजु लीप्चे पत्रुस् येसुज खज्यीम् ङ्योत्ज्यी, “प्रभु, खल्चे पङ्लेनो ङइ बीरुद्दरी पाप् स्य्हेङ्स्यीनो टीज्यी पङ्सम् ङचे थेत गदे ख्यप् क्षमा स्य्हेङ्थोब? ङ्यीस् ख्यप् सम्म?”
22येसुचे थेत सुङ्ज्यी, “ङ एत पङ्ब, ङ्यीस् ख्यप्कीनो अय्हीन्, तर एचे सत्तरी गुन ङ्यीस् ख्यप्! 23होत्तज्यीम् स्वर्गइ य्हुल् ग्यल्बो गीचे र्हङ्की योक्पोमातेङ् हीसाब् कीन्ब र्हङ्ब य्हीन्ब। 24हुजु ग्यल्बोचे र्हङ्की हीसाब् कीन्ब तीप्मम् हजार् च्यी म्हर्की पइस छ्य मुबे योक्पो गीत थेइज बज्यी। 25तर हुजु योक्पोतेङ् छ्य फाबे टङ अरेबल तज्यीम् हुजु ग्यल्बोचे थेतेङ् थेइ म्रीङ् ओसेम् ज-जमे ओसेम् थेइ जम्म स्हेःमा चुङ्ज्यीम् छ्य फागो बी कुल्ज्यी। 26ओसेम् हुजु योक्पोचे ग्यल्बोइ ङोन्री पुइ जुःज्यीम् फ्या लज्यीम् पङ्ज्यी, ‘ङत तोवरेत् ब्रेन्जेतो, ङ थेङ्की जम्म छ्य फास्ये मुब।’ 27ओसेम् ग्यल्बोइ सेम्री दय खज्यीम् थेइ छ्य जम्मनो क्षमा पीन्ज्यीम् य्हर्पुङ्ज्यी।
28 “तर हुजु योक्पो डोङ्ज्यीम् य्हर्बे बेलोरी थेचे थेतेङ् बक्च्य लक् स्य्हेङ्बे योक्पो गी दोज्यी। हुजुचे थेत मन्नङ् म्हुइकी टङ छ्य फाथोब मुबल। थेचे हुजुत खार ङ्य्हेप्ज्यीम्, ‘एचे ङइ फाथोबे छ्य ग्योन् फाको’ बी पङ्ज्यी। 29ओसेम् थेइ हुजु र्हो योक्पोचे पुइ जुःज्यीम् फ्या लज्यीम् पङ्ज्यी, ‘तोव दीन् ब्रेनो, ङचे फाथोबे एइ जम्मनो छ्य फापीन्स्ये मुब।’ 30तर थेचे अङ्येन्, ओसेम् छ्य अफागते सम्म हुजु योक्पोत जेल्न्हङ् युलाज्यी।
31 “हुजु ङ्य्हीतेङ् बक्च्य लक् स्य्हेङ्बे ल्हो-ल्हो योक्पोमाचे चु जम्मनो तम् म्रङ्ज्यीम् थेङ्यीमात सेम्री य्हक्को दुख तज्यी। ओसेम् थेङ्यीमा ग्यल्बोज ङयीज्यीम् हुजुरी तबे जम्मनो तम्मा स्येत्पीन्ज्यी। 32हुजु लीप्चे ग्यल्बोचे हुजु योक्पोत ङ्होत्ज्यीम् पङ्ज्यी, ‘ओ दुस्ट योक्पो! एचे ङत फ्या लज्यी, ओसेम् ङचे एत जम्मनो छ्य क्षमा पीन्ज्यी। 33ङचे एत दया स्य्हेङ्ब र्हङ्लेनो एचेएनो र्हङ्तेङ् बक्च्य लक् स्य्हेङ्बे योक्पोत दया स्य्हेङ् अथोबल?’ 34ओसेम् ग्यल्बोत बोमो रप्ज्यीम् हुजु योक्पोत जम्मनो छ्य अफागदेसम्म जेल्री च्युप्ज्यीम् दन्ड पीनो बी जेल्की हकीम्त कुल्ज्यी।”
35हुजु लीप्चे येसुचे डबमात सुङ्ज्यी, “एङ्यीमाचे जम्मतनो सेम् य्हङ्सेनो क्षमा अपीन्ज्यी पङ्सम्, स्वर्गरी स्य्हुःबे ङइ अपचेएनो एङ्यीमात होलेनो स्य्हेङ्स्ये मुब।”
বর্তমানে নির্বাচিত:
मत्ती 18: WTDG
হাইলাইট
শেয়ার
কপি
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
