मत्ती 17
17
येसुइ स्य्हल् पोबल
(मर्कुस् ९:२-१३; लुका ९:२८-३६)
1डुरेत् लीप्चे येसुचे पत्रुस्तेङ् याकुब् ओसेम् याकुब्की अले युहन्नत थेङ्तेङ् बक्च्य नोम्ज्यीम् खुसुक्ले नोबे गङ् गीरी स्येःजेत्ज्यी। 2हुजुरी डबमाचे च्यान-च्याननो थेङ्की ल्हीः पोज्यी। थेङ्की स्य्हल् दीनी र्हङ्ले सर्ज्यी ओसेम् थेङ्की न्हम्ज तर्-तर्ले सर्ज्यी। 3होले तब साच्चेनो मोसातेङ् एलीया येसुतेङ् तम् लटीबल म्रङ्खज्यी। 4चु म्रङ्ज्यीम् पत्रुस्चे येसुत पङ्ज्यी, “प्रभु, ङ्यीमा चुरी तब ज्यब तनेम्, थेङ्की थुः मुसम् चुरी ङ गोर सोम् स्य्हेङ्स्ये मुब, गी थेङ्की लागीरी, गी मोसाइ लागीरी, ओसेम् गी एलीयाकी लागीरी।”
5पत्रुस्चे चोले तम् पङ्न-पङ्ननो सर्बे मुक्प खज्यीम् थेङ्मात उप्ज्यी, ओसेम् हुजु मुक्प न्हङ्चे चोतेबे केत् युज्यी, “चु ङइ म्होइबे ज य्हीन्ब, थेतेङ् ङ य्हक्को तङ्बल मुब, थेइ तम् ङ्येनो।” 6चु केत् थ्येःब बीसेम् डबमा लोङ्ज्यीम् सरी पब्लु लज्यी 7तर येसु ब्योन्खज्यीम् थेङ्यीमात छुजेत्ज्यीम्, “रेःगो, थलोङो” बी सुङ्जेत्ज्यी। 8ओसेम् थेङ्यीमाचे तोर् च्यामम् हुजुरी येसु बीम खलेएनो अम्रङ्।
9थेङ्मा गङ्चे क्रसु स्येःटीबे बेलोरी येसुचे थेङ्यीमात, “म्हीइ ज स्यीब ग्यम्से असोगते एङ्यीमाचे ता म्रङ्ज्यी हुजुइ बारेरी खल्तेएनो थस्येतो” बी कुल्जेत्ज्यी।
10ओसेम् डबमाचे येसुत ङ्योत्ज्यी, “धर्म लोप्पोन्माचे मुक्ती न्हङ्बे ख्रीस्ट् बीम ङोन्ग्यम् तले एलीया खनोथोब बी पङ्ब?” 11येसुचे थेङ्यीमात सुङ्ज्यी, “य्हीन्ब, एलीया देम्मेन्नो खस्ये मुब, ओसेम् थेचेनो जम्म तम्मा टोप् स्य्हेङ्स्ये मुब। 12तर ङ एङ्यीमात पङ्ब, एलीया खज्यीन्बल मुब, ओसेम् म्हीमाचे थेत अस्ये, ओसेम् म्हीमाकी सेम्री ताता स्य्हेङ्गे म्हेन्ज्यी थेत होलेनो स्य्हेङ्ज्यी। म्हीइ जचेएनो थेङ्यीमा ग्यम्से होलेनो दुख नाथोस्ये मुब।” 13हुजु लीप्चे येसुचे बप्तीस्मा पीन्बे युहन्नइ बारेरी तम् लजेत्पल टीम् बी डबमाचे गोज्यी।
येसुचे म्हङ् स्यप्पे ठीटत फेन्न लजेत्पल
(मर्कुस् ९:१४-२९; लुका ९:३७-४३)
14येसुतेङ् थेङ्की डब सोम् य्हक्को म्हीमा मुबे ग्लारी ब्योन्युमम् म्ही गी येसुइ ङोन्री पब्लु लज्यी, 15ओसेम् पङ्ज्यी, “प्रभु, ङइ जत दया स्य्हेङ्जेतो, थे स्ह स्यप्ज्यीम् य्हक्को दुख नाटीबल मुब, ओसेम् थे य्हमम् मेरी छ्योङ्ब, य्हमम् यीरी छ्योङ्ब। 16ङचे थेत थेङ्की डबमाज बज्यी, तर थेङ्यीमाचे थेत फेन्न लअखम्।” 17येसुचे सुङ्ज्यी, “ओ बीस्वास् अरेबलतेङ् अज्यबे सेम् मुबे म्हीमा एङ्यीमातेङ् ङ खेमसम्म टीब? ङचे एङ्यीमात खेमसम्म नाब? हुजु ठीटत चुरी ङज बोउ।” 18हुजु लीप्चे येसुचे म्हङ्त बराजेत्ज्यीम् हुजु ठीट ग्यम्से ल्हब्ल्हजेत्ज्यी, ओसेम् हुजु बेलोरीनो ठीट फेन्ज्यी।
19हुजु लीप्चे डबमा येसुज खुसुक्ले खज्यीम् थेङ्त, “ङ्यीमाचे हुजु म्हङ्त तले तेत्लाब अखम्बल?” बी ङ्योत्ज्यी। 20येसुचे सुङ्ज्यी, “एङ्यीमातेङ् योःब गदे बीस्वास् अरेबल तज्यीम् य्हीन्ब। ङ एङ्यीमात देमेन्नो पङ्ब, एङ्यीमातेङ् पासइकी फुम् गी गदे ज्यीद बीस्वास् मुसम् चु गङ्त ‘चु ग्ला ग्यम्से य्हरो’ पङ्ज्यी पङ्सम् य्हर्स्ये मुब। ओसेम् एङ्यीमाचे स्य्हेङ् अखम्बल तेएनो तस्ये अरे। 21[तर होतेबे म्हङ्मी प्रार्थनातेङ् ङ्यीम्बु टीज्यीम्कीनो तेत्प खम्ब।”#१७:२१चु पद् य्हक्को बर्स ङोन्ग्यम्की बाइबल्मारी ब्रीबल अरे।]
येसुचे देबेएनो थेङ् स्यीस्येकी बारेरी सुङ्बल
(मर्कुस् ९:३०-३२; लुका ९:४३-४५)
22येसुतेङ् थेङ्की डबमा गालील् प्रदेस्री र्हुब तबे बेलोरी थेङ्चे डबमात सुङ्ज्यी, “म्हीइ जत चुङ्ज्यीम् म्हीमाइ यारी सोप्तीस्ये मुब। 23ओसेम् म्हीमाचे थेत सेत्स्ये मुब, तर थे सोम्रेत्कुनो स्यीब ग्यम्से सोस्ये मुब।” चु थ्येःज्यीम् डबमा य्हक्को दुखी तज्यी।
येसुचे पर्मेस्वर्की दीम्की तीरो फाजेत्पल
24ओसेम् येसुतेङ् थेङ्की डबमा कफर्नहुम्री दोखब बीसेम् पर्मेस्वर्की दीम्की तीरो दुत्पलमा खज्यीम् पत्रुस्त, “एङ्यीमाकी लोप्पोन्चे पर्मेस्वर्की दीम्की तीरो#१७:२४ पर्मेस्वर्की दीम्की तीरो- यहुदीमा जम्मचे बर्सइलनो यरुस्लेम्री मुबे पर्मेस्वर्की दीम्त र्हो लबरी तीरो फाथोबे मुबल। फाब वुइ अफा?” बी ङ्योत्ज्यी। 25पत्रुस्चे जोहप् पीन्ज्यी, “फाजेत्प, तले अफाब?”
ओसेम् पत्रुस् दीम्न्हङ् वङ्ब बीसेम् ङोन्ग्यम् येसुचे पत्रुस्त ङ्योत्जेत्ज्यी, “सीमोन्, एचे ता म्हेन्ब? चु जम्बुलीङ्की ग्यल्बोमाचे तीरो र्हङ्की दीम्की म्हेम्य ग्यम्से दुत्प वुइ ल्हो-ल्होमा ग्यम्से दुत्प?” 26पत्रुस्चे जोहप् पीन्ज्यी, “ल्हो-ल्होमा ग्यम्से” ओसेम् येसुचे सुङ्ज्यी, “होलेपङ्सम् र्हङ्की दीम्की म्हेम्यमाचे तीरो फाअथो। 27तर ङ्य्हङ् चु म्हीमात पेत्न अल। होत्तज्यीम् पत्रुस् ए ग्येरी ङ्यीज्यीम् क्यो पीतो। गोदोब्न्हङ् ङोन्ग्यम् स्यप्पे तर्ङ तेत्ज्यीम् हुजु तर्ङइ सुङ् फेङो। तर्ङइ सुङ्री म्हुइकी पइस यङ्स्ये मुब। हुजु पर्मेस्वर्की दीम्की तीरो दुत्पलमाज बोर्ज्यीम् ङ्य्हङ् ङ्य्हीइ तीरो फाको।”
বর্তমানে নির্বাচিত:
मत्ती 17: WTDG
হাইলাইট
শেয়ার
কপি
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
