मत्ती 3
3
बप्तिस्मा याछ युहन्नौ प्रचार
(मर्कूस १:१-८; लुका ३:१-१८; युहन्ना १:१९-२८)
1वास्टै वर्ष न्हुइङ बप्तिस्मा याछ युहन्ना यहूदियुङ उजाड ठावाङ राहा, र इट डेचै प्रचार जाट्की ठाला, 2“लहो पापको डासार परमेश्वर पट्टी ल्हेस्नी, हीजैडेनाङ स्वर्गौ राज्य खेरेप राम्हने।” 3यशैया अगमवक्तै र इसे न युहन्नौ बारेयाङ अघीलकीङ न इट डेमन्या:
“उजाड-ठाँवाङ काट जना च्याक्चओ सोर,
‘परमप्रभुओ लाम तयार जाट्नी,
र होसकुङ लाम सोझो खास्नी।’#यशैया ४०:३”
4युहन्नै उँटौ भुट्लौ जाछ बढीन बील्न्हन्या, र कम्मराङ छालौ पेटी छ्याक्न्या अनी सलह र जङ्गलुङ मह ज्यामन्या। 5यरूशलेम सहर, यहूदिया र यर्दन नदि वरीपरीयुङ पट्ट न भर्मीको युहन्ना लेठाङ राहा। 6होटै लाहा-लहो पापको स्वीकार जाट्चै यर्दन नदियाङ युहन्ना लकीङ बप्तिस्मा ला।
7टर फरीसी र सदुकीको मध्याङ वास्टै जना बप्तिस्मा लाकी राछै जाट्च डाङार युहन्नै होखुरीककी डेया, “ए बीसालु बुलौ मीजाको, परमेश्वर लकीङ राखी पाच क्रोध लकीङ भोग्डीस्की नाखुरीककी सुये चेतावनी याहा? 8साँच्ची न नाखुरीकै लहो पाप डासार परमेश्वर पट्टी लहो मीमन ल्हेटाक्च हो डेनाङ होसे अनुसार काम जाटार टान्हाक्नी। 9‘कान अब्राहामौ सन्तान हो’ डेनाङ न नाखुरीक परमेश्वरलकीङ राछ दन्ड लकीङ भीस्की डीन्ल्हे डेम माआरमीट्नी। साँच्ची न ङा नाखुरीककी डेले, परमेश्वरै इसे ल्हुङ्को लकीङ र अब्राहामौ लागी सन्तान खास्की य्होक्ले। 10सीङौ म्यार्टुङकी फुस्कीयो लागी चाँहा न होच्यो जराङ आउरा पर्न भ्यामने। होटबाटै सेछ मीस्या मास्याटाक्च पट्ट न म्यार्टुङकी फुसार म्हेयाङ लोम्होकाले।
11“नाखुरीकै लहो पापको डासार परमेश्वर पट्टी ल्हेसा डेच कुरा टान्हाकीयो लागी ङा चहीँ नाखुरीककी डीयो बप्तिस्मा याल्हे, टर ङा डेनाङ न्हुइङ राछ काट जना ले, होसको ङा डेनाङ शक्तिशाली ले, होसकुङ जुत्ता बुच योग्यौ र ङा माले। होसकै नाखुरीककी पवित्र आत्मा र म्हेये बप्तिस्मा याल्हे। 12होसकुङ टाप्च न्हाङ्ल्या होसकुङ न मीहुटाङ ले र लहो खलाकी सफा जाट्ले, अनी गहुँ ढुकुटीयाङ जम्मा जाट्ले टर भुस चहीँ सेन्र मासीच म्हेयाङ सीकाक्ङ याल्हे।”
येशूओ बप्तिस्मा
(मर्कूस १:९-११; लुका ३:२१-२२; युहन्ना १:३२-३४)
13होडीक बेला युहन्ना लकीङ बप्तिस्मा लाकी डेम येशू गालील लकीङ यर्दन नदियाङ राहा। 14टर युहन्नै होसकोकी इट डेयार रोकडीकी पा, “बरु ङाकी टी नाको लकीङ बप्तिस्मा लाकी आवश्यक ले। हीजै नाको टी ङा लेठाङ राहा ट?” 15येशूये होसकी डेया, “चँहुङ लागी याङ्च न छान्की यान्ही। हीजैडेनाङ इटजाट्न न कानै परमेश्वरौ पट्ट न इच्छाकी पुरा जाट्की पर्ले।” टब इसे कुरा सेयार युहन्ना मन्डीया।
16येशू बप्तिस्मा लार तुरुन्तै डीलकीङ ख्योहा, होडीक न बेला स्वर्ग फोसा र होसकै परमेश्वरौ आत्मा ढुकुरौ रुपाङ म्हाका राहार लाहा मीटाक बाछ डाङा। 17अनी होडीक न बेला स्वर्ग लकीङ याङ्च आवाज सेया, “इसे ङौ जाक्ङ सेच मीजा हो, ङा इसे खाटा साफ्फी मार्हाङ्ने।”
বর্তমানে নির্বাচিত:
मत्ती 3: EMGP
হাইলাইট
শেয়ার
কপি
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
