मत्ती 1
1
येशूओ वंशावली
(लुका ३:२३-३८)
1अब्राहाम र दाउदौ मीजा, येशू ख्रीष्टौ वंशावली: 2अब्राहामौ मीजा इसहाक लेया, इसहाकौ मीजा याकुब, याकुबौ मीजाको यहूदा र मेन डाजेभाइको लेया। 3यहूदौ तामार पटीयुङ मीजा फारेस र जाहेर, जाहेरौ मीजा हेस्रोन, हेस्रोनौ मीजा आराम, 4आरामौ मीजा अम्मीनादाब, अम्मीनादाबौ मीजा नहसोन, नहसोनौ मीजा सल्मोन, 5सल्मोनौ राहाब पटीयुङ मीजा बोअज, बोअजौ रुथ पटीयुङ मीजा ओबेद, ओबेदौ मीजा यीसै हो, 6र यीसैयो मीजा दाउद लेया।
दाउदौ मीजा सोलोमन लेया। सोलोमनौ मोइ चहीँ उरीयाहौ मास्टो लेया। 7सोलोमनौ मीजा रहबाम, रहबामौ मीजा अबीया हो, अबीयौ मीजा आसा, 8आसौ मीजा यहोसापाट हो, यहोसापाटौ मीजा यहोराम, यहोरामौ मीजा उज्जीयाह हो, 9उज्जीयाहौ मीजा योटाम, योटामौ मीजा आहाज हो, आहाजौ मीजा हीजकीया, 10हीजकीयौ मीजा मनस्से हो, मनस्सौ मीजा आमोन र आमोनौ मीजा योसीयाह लेया। 11बेबीलोनाङ यहूदीकोलाक बन्दी खासार आल्छ बेलाङ योसीयाहौ मीजा यकोनीयास र मेन भाइको जन्मडीस्नन्या।
12होटै न्हुइङ बेबीलोनाङ बन्दी खासार आल्र्हखीङ यकोनीयासौ मीजा सालटीएल जन्मडीसा, सालटीएलौ मीजा यरुबाबेल हो, 13यरुबाबेलौ मीजा अबीउद, अबीउदौ मीजा एल्याकीम, एल्याकीमौ मीजा आजोर हो, 14आजोरौ मीजा सादोक, सादोकौ मीजा आखीम, आखीमौ मीजा एलिउद हो, 15एलिउदौ मीजा एलाजार, एलाजारौ मीजा मत्तान हो, मत्तानौ मीजा याकुब, 16र याकुबौ मीजा योसेफ हो। योसेफौ मास्टो चहीँ मरीयम लेया र इसे न मरीयमौ कोखीङ मुक्ति याछ ख्रीष्ट डेच येशूओ जन्म छाना।
17इटजाट्न अब्राहाम लकीङ दाउदसम्म चौध पुस्ता छाना, र दाउद लकीङ इस्राएलीको बेबीलोनाङ बन्दी खासार आल्छ बेलासम्म चौध पुस्ता न छाना। अनी होडीक बेलालकीङ मुक्ति याछ ख्रीष्ट जन्मडीस्च बेलासम्म फेरी चौध पुस्ता न छाना।
येशू ख्रीष्टौ जन्म
(लुका २:१-७)
18अब येशू ख्रीष्टौ जन्म इसे कीसीमै छाना: होसकुङ मोइ मरीयमौ योसेफखाटा ब्याहा जाट्की ङेम्ह भ्यामन्या, टर होखुरीकुङ ब्याहा छान्की डेनाङ अगाडी न मरीयम पवित्र आत्मा लकीङ गर्भवती छान्नन्या। 19योसेफ धर्मी भर्मी लेया। होटबाटै होचे भर्मीकुङ मीहासाङ मरीयमकी अप्ठ्यारोवाङ मापार्च मीमन जाटार सुटुक्क डास्च निर्णय जाटा। 20टर याङ्च विचार जाट्न ङुनाङ परमप्रभुओ काट स्वर्गदूतै योसेफकी माङ्नामाङ डेया, “ए दाउदौ मीजा योसेफ, मरीयमकी मास्टौ रुपाङ स्वीकार जाट्की नाङ माबीर्हीयो, हीजैडेनाङ होच्यौ गर्भाङ लेच मीजा चहीँ पवित्र आत्मालकीङ ङुच हो। 21होचे काट लेन्जा मीजा जन्मडीले, र नीये होसे बालखौ म्यार्मीन येशू#१:२१ येशू येशू म्यार्मीन चहीँ हिब्रु सब्ड “यहोसु” लकीङ राछ हो इच्यो अर्थ “परमप्रभुये जीवाक्ले” डेच हो। डाकी। हीजैडेनाङ होसकै लहो भर्मीकोलाक होखुरीकुङ पापलकीङ छुटकारा याल्हे।”
22परमप्रभुये अगमवक्तालकीङ ङाक्च वचन पुरा छान्की डेम इसे छान्च हो: 23“ङोस्नी, कन्या मास्टो जजा गर्भवती छान्ले र होचे काट लेन्जा मीजा जन्मडीले। होटै भर्मीकै होसकोकी इम्मानुएल डेले।#यशैया ७:१४” इम्मानुएलौ अर्थ चहीँ “परमेश्वर कानकोखाटा ले।”
24योसेफ रीङ्हा, र परमेश्वरौ स्वर्गदूतै माङ्नामाङ मेल्हाकी डेच कुरा मन्डीयार मरीयमकी लहो मास्टौ रुपाङ स्वीकार जाटा। 25टर मरीयमै मीजा माजन्मडीठर योसेफै होसखाटा सहवास माजाटा। अनी मरीयमै मीजा डीन्र्हखीङ योसेफै होसे बालखौ म्यार्मीन येशू डा।
বর্তমানে নির্বাচিত:
मत्ती 1: EMGP
হাইলাইট
শেয়ার
কপি
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
