लूका 15

म्‍हाट्‍च भेडौ उदाहरण

(मत्ती १८:१२-१४)

1कायाक कर सोट्‍चको र अरु पापीको पट्‍ट न येशूओ शिक्षा सेकी डेम होसको लेठाङ राहा। 2होटै फरिसीको र धर्मगुरुको इट डेम गन-गन जाट्‍की ठाला, “इसे भर्मीये च पापीकोलाक जाक्‍ले र होखुरीकखाटा काठोवाङ ङुम ज्‍याले गाले” 3होसकै होखुरीककी इसे उदाहरण सेटाक्‍चै डेया, 4“नाखुरीक मध्‍याङ सुओर काट सय भेडाङ काट म्‍हाटा डेनाङ होच्‍यो मीमुरुङै उनान्‍सयकी चरनाङ न डासार म्‍हाट्‍च भेडाकी माडुप्‍ठर पाम माह्‍वाले र? 5होटै म्‍हाट्‍च भेडाकी डुप्‍रखीङ होचे काँधाङ घ्‍याप बुवार माह्राङ्‌छै होसकी राक्‍ले। 6होटै इमाङ राहार होचे लहो लाफाको र छिमेकीकोलाक आर्घाले, होटै होखुरीककी डेले, ‘ङाखाटा माह्राङ्‌नी। हीजैडेनाङ ङौ म्‍हाट्‍च भेडा डुप्‍मने।’” 7ङा नाखुरीककी डेले, “पश्‍चात्ताप जाट्‍की मापर्च उनान्‍सय जना धर्मीकोलाक डेनाङ पश्‍चात्ताप जाट्‍च काट पापीयो लागि स्‍वर्गाङ बाड्‍को खुसी मन्‍डीले।”

म्‍हाट्‍च सिक्‍कौ उदाहरण

8 होटै येशूये डेया, “काट जना मास्‍टोखाटा दश वटा चाँदीयो सिक्‍का लेया। होडीक मध्‍याङ काट सिक्‍का चहिँ म्‍हाटा डेनाङ बत्ती ढाकार होचे होसे माडुप्‍ठर इम सीट्‍चै मापाले र? 9सिक्‍का डुप्‍रखीङ होचे लहो लाफाको र छिमेकीकोलाक आर्घार डेले, ‘ङाखाटा माह्राङ्‌नी, हीजैडेनाङ ङौ म्‍हाट्‍च सिक्‍का ङै डुप्‍नने।’ 10ङा नाखुरीककी डेले, इटजाट्‍न पश्‍चात्ताप जाट्‍च काट पापी भर्मीयो लागि परमेश्‍वरौ स्‍वर्गदूतौ म्‍याहासाङ आनन्‍द छान्‍ने।”

म्‍हाट्‍च मीजौ उदाहरण

11येशूये फेरि डेया, “काट भर्मीयो नीस लेन्‍जा मीजा लेया। 12कायाक कान्‍छा मीजै चहिँ बोइकी डेया, ‘बोइ, ङौ भाकाङ पर्च जति अंश ङाकी चाहाँ न यान्‍ही’ डेम ङेहा। होटै बोये मेखोल्‍हौ सम्‍पत्ति मीजाकी पुङ्‌ङ याहा।”

13 “नीस सोम याक न्‍हुइङ न मेन भागुङ पट्‍ट न सम्‍पत्ति बुवार होसे कान्‍छा मीजा लोस देशाङ नुङा। होचे होला पट्‍ट न सम्‍पत्ति मोज मज्‍जा जाटार भुरुका। 14होचे पट्‍ट न पैसा खर्च जाट्‍न भ्‍यामन्‍या। होडीक न बेला होसे देशाङ बाड्‍को अनिकाल पर्‍या। र होचे हीर ज्‍याकी माडुप्‍म दु:ख डीन्‍हा। 15होटै होसे देशुङ काट जना भर्मीलेठाङ होसे काम ङेखी डेम नुङा। होसे भर्मीये लहो ह्‍याङ वाक आर्छाकी डेम होसकी बीर्न्‍हका। 16होचे वाकै ज्‍याच चारो ज्‍याम मीटुक ह्रासाक्‍की मीमन जाट्‍नाङ र सुयेर होसकी ज्‍याच गाच हीर माह्‍या।

17 “होडीक बेला होच्‍यो बल्‍ल चेत राहा र होचे मेल्‍है-मेल्‍हाकी न इट डेया, ‘ङौ बोयो इमाङ काम जाट्‍च वास्‍टै नोकरकै ह्रास्‍ठर ज्‍याम र ओबारीले तर ङा चहिँ इला मीटुक रन्‍छीम सीकी पाम ङुमे। 18ङा ङाल्‍हौ बोइ लेठाङ नुङार डेले, “बोइ, ङै परमेश्‍वरौ र नाकुङ विरुद्धाङ पाप जाट्‍नने। 19अब ङा नाकुङ मीजा डेकी ज्‍योस्‍च र माले, ङाकी नाकुङ नोकरकोलाक लेखा न आर्मीटार डानी।”’ 20होटै न्‍हुइङ होसे सोवार लहो बोइ लेठाङ ल्‍हेस्‍न नुङा। तर बोये होसकी लोसीङ न राछै जाट्‍च डाङार चीन्‍डीया। आसकुङ मीमन मायै न्‍हेपार मीजाकी डुप्‍की डेम माह्राङ्‌छै खेर्न नुङा र अङ्‌गालो कार मीगालाङ चुम्‍हा।”

21 ‌“मीजै बोइकी इट डेया, ‘बोइ, ङै स्‍वर्ग र नाकुङ म्‍याहासाङ पाप जाट्‍नने। ङा फेरि नाकुङ मीजा डेकी ज्‍योस्‍च माले।’ 22तर बोये लहो नोकरकोलाक आर्घार डेया, ‘पट्‍ट डेनाङ सेछ बढीन छिटो राकार इसकी बील्‍हाक्‍ङ यान्‍ही। इच्‍यौ मीहुटाङ गोठ्‍ली र मीकुवाङ जुत्ता काम यान्‍ही। 23होटै पट्‍ट डेनाङ ढेस्‍च पशु साट्‍नी र मीजा ल्‍हेस्‍च बाटै काल्‍हाको ज्‍याम-गाम माह्राङीङ। 24हीजैडेनाङ इसे ङौ मीजा सीमन्‍या, फेरि जीवामने। म्‍हाट्‍नन्‍या र डुप्‍मने!’ होटै होखुरीक ज्‍याचै-गाचै माह्राङ्‌खी ठाला।

25 “होडीक बेला जेठा मीजा चहिँ ह्‍याङ काम जाट्‍की नुङ्‌न्‍या। होसे ल्‍हेसार इम छेवाङ टाह्रानाङ बाजाको आर्म्‍हाट्‍च सेया। 26होटै होचे काट नोकरकी आर्घार गीना, ‘इला ही छान्‍न न ले?’ 27होचे होसकी डेया, ‘नाकुङ भाइ सन्‍चन ल्‍हेसार राम्‍हने। होटबाटै नाकुङ बोये पट्‍ट डेनाङ ढेस्‍च पशु साटार ज्‍याचै-गाचै माह्राङ्‌ङ न ले।’ 28तर होसे साह्रै मीरीस ख्‍योहा, र इमाङ पर्की न मामन्‍डीया। होटबाटै बोइ राहार होसकी होम्‍की ठाला।

29 “तर होचे बोइकी डेया, ‘ङोस्‍नी, ङै इडीको वर्षसम्‍म नाकुङ काम नोकरै लेखा न जाट्‍न ङुमने। नाकै डेच पट्‍ट न मन्‍डीया तर ङाकी सेन र लहो लाफाकोखाटा भोज ज्‍यार माह्राङ्‌खी डेम काट पाठा र माह्‍यामने।’

30 “तर नाकुङ सम्‍पत्ति वेश्‍या मास्‍टोकोखाटा लग्‍डीसार भुरुक्‍च मीजा रान्‍हाङ चहिँ नाकै कोक्‍ङ डाच ढेस्‍च पशु होच्‍यो लागि डेम साटा। 31होटै बोये होसकी डेया, ‘मीजा, नाङ च सधैँभरि ङाखाटा न ले। होटै ङौ पट्‍ट न सम्‍पत्ति नुओ न होनी। 32तर काल्‍है माह्राङ्‌खी न पर्ले, हीजैडेनाङ इसे नुओ भाइ सीमन्‍या, फेरि जीवामने। म्‍हाट्‍नन्‍या र डुप्‍मने’।”

বর্তমানে নির্বাচিত:

लूका 15: EMGP

হাইলাইট

কপি