मत्ती 3

यूहन्ना बपतिस्मा दाता का प्रचार

(मर 1:1-8; लूका 3:1-9,15-17; युहन्ना 1:19-28)

1तिनु दूसौ दा यूहन्ना बपतिस्मा दाता आयौ यहूदिया प्रदेश कै उजाड़ जौगैह दा प्रचार कौरदा लागा। 2“पाप कौरणै छोड़े दैव, जिथुखै स्वर्ग का राज्य नेड़िक आए गौआ।” 3ऐजा सैजाई औसौ जैसकै चौर्चा यशायाह पौरमेशवर कै बातौ बौताणौवाल़ै कै दवारा कौरे राए थी कै:

“उजाड़ जौगैह दा ऐक बौईदणो वाल़ै का शब्द शुणी रौआ, कै प्रभु कै खातीरदारी कारिए आपणै मनो कै तैयार कौरौ,

औरौ तैसकै आणौ कारिए आपी खै सुधारौ।”

4ऐजा यूहन्ना ऊँटौ कै बाल़ो कै बुणेयोंदे खोटणो बाम्बौ थिया, औरौ आपणै कमर दा चामड़े का पाटा बानै राखौ थिया, तैसका खाणा जोंगलो का मौं औरौ चिचलै थिए। 5तोबै यरूशलेम शहर औरौ सौबै यहूदिया प्रदेश औरौ यरदन नोंदी कै नेड़िक कै सौबै देश कै लोग तैसकै धोरे आए। 6औरौ तिनुऐ आपणै-आपणै पापौ खै मानेबा यरदन नोंदी दा तैसी कैईंदा बपतिस्मा लौआ।

7जोबै तैणै बौहितै फरीसी औरौ सदूकी लोगौ खै बपतिस्मा लोणो कारिए आपणै धोरे आन्दै बैई दैखै औरौ तैणै तिनुकै बौल़ौ, “तुऐं लोग शोंगोऊं कै नानड़िया जैशणै जोहरिले औसौ, तुऔं कै कुणै बौल़ौ कै आणौवाल़ै गुस्से शै दोऊड़ो? 8आपी खै साबित कौरौ कै तुऐं आपणै पापौ कै छोडे़बा पौरमेशवर कै ढौबौ फैरै गौवै। 9औरौ ऐजौ नै सोंचैया कै तुऐं ऐजौ बौलेयौ बौचै सौकौ कै अब्राहम अमारा बुड़ेईक औसौ। हांव तुऔं खै बुलू, की पौरमेशवर इनु पाथरो कौरेयौ अब्राहम कारिए तिथमुंजी दै वंश पौयदा कौरे सौकौ। 10इथकारिए ऐबै तुऐं पौरमेशवर कै न्याय कारिए तैयार रौया जिथुखै कुराड़ी डाल़ो कै जोड़ो पांदी राखै राए, इथकारिए जू डाल़ आछा फोल़ नै लियाला सैजा काटा जांदा औरौ आगै मुंजी बैगाया जांदा।”

11“हांव तुऔं पाणी लैई बपतिस्मा दैंदा, जिनुवै आपणै पाप छोड़ेयौ पौरमेशवर कै ढौबौ मन राए लाए, पौरौ जू मैरै बाद आणौवाल़ा औसौ, सै मुं दा शौकतीशाली औसौ; हांव तौ तैसकै जूते कै तशमै खौलणौ कै लायक बै ना आथी, सै तुऔं खै पवित्र आत्मा औरौ आगै लैई बपतिस्मा दैंदा। 12तैसकौ छाज तैसकै हाथौ दो औसौ, औरौ सै आपणौ खल़याण आछै शै साफ कौरदा, औरौ सै आपणै गियुँ खै तौ आपणै कोठारो दै कौठै कौरदा, पौरौ भूसो खै तियौं आगी मुंजी जोल़ादा जू आग कौलोंई ना हिशदै।”

यूहन्ना दवारा यीशु मसीह कै बपतिस्मा दैणा

(मर 1:9-11; लूका 3:21-22)

13तैसी सौमय यीशु गलील जिले शै यरदन नोंदी कै किनारे यूहन्ना बपतिस्मा दाता कै धोरे बपतिस्मा लोन्दा ओऊवा। 14पौरौ यूहन्ना बपतिस्मा दाता तैसीखै ऐजौ बौलेयौ रोकदा लागा, “कै मुखै तौ तैरै हाथौ लैई बपतिस्मा लोणो कै जौरुरत औसौ, औरौ तू मैरै धोरे आए रौआ?” 15पौरौ यीशुए तैसीखै ऐजा जोवाब दिया, “ऐबै तू ऐशैखैई हौणौ दै, जिथुखै आमुखै ऐशैखैई सैजौ सौबै पूरु कौरणौ जू पौरमेशवर कारिए जौरुरी औसौ।” औरौ तोबै यूहन्नाए तैसकै बात मानै पाए।

16औरौ यीशु बपतिस्मा लोयो तौलोंई पाणी मुंजीदा ऊबा ओऊवा, औरौ तैसी कारिए स्वर्ग खौलै गौ, औरौ तैणै पौरमेशवर कै आत्मा खै कबूतर कै जैशणै उतौरदे औरौ आपी पांदी आन्दै बैई दैखै। 17पौरमेशवरे स्वर्ग पौरैशौ यीशु खै बुलो, “ऐजा मैरा लाड़कु बैटा औसौ जैसी दा हांव बैजाए खुशी औसौ।”

বর্তমানে নির্বাচিত:

मत्ती 3: SRXNT

হাইলাইট

কপি

Want to have your highlights saved across all your devices? Sign up or sign in

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

सिरमौरी नौवाँ नियम সম্পর্কে আরও জানুন