Matyo 4

Satan mɔɔmə koʼ Yeso

(Mak 1.12-13; Luk 4.1-13)

1Ambə Yeso ney kɔʼnə mmuu n Kəzə̀ mə, Zay kə Zow kə n ney ndòw wi n mbvən ə ntsaŋ nə̀ Satan mɔɔmə koʼ wi. 2Tə̂ n loʼ fu, bam idzuu n tsə̀ tə nsə n tsuʼu tə, zə̂ə way fə kə loʼ kə nə ntsuʼu nghəm nkaykə. Ambə tə mayyə tsunə, dzəŋ n kaʼ wi nə̀ u zabə wə. 3Satan n ndòw bə, zey ni mɔm koʼ wi, dza tə̀ wi nə̀, “Abə wə ndzəm loʼnə Waa Kəzə̀, dza tsu nə̀ tay ghən a fəd doʼo kɔʼ baa kə nkala.” 4Yeso n dza tə̀ wi nə̀,

“Ghə tɔɔ naŋa n màʼlə K-a-zə̀ nə̀,

‘Wù kad muu way nə̀ à loʼ kəbaa,

Wù muu n ghɔɔmə tey tədzəm tə shiə bənə n dzuu i Kəzə̀.’”

5Satan n ney ndòw wi n Yerosalem, naʼ i Zow zə, ney kɔʼ ndòw wi n ndɔŋɔndɔŋɔ fə tow kə Ndaw Kəzə̀, 6dza tə̀ wi nə̀, “Abə wə̀ ndzəm loʼnə Waa Kəzə̀, taa shi tsu ndòw fa, n təŋkey, ghə tɔɔ naŋa n màʼlə K-a-zə̀ nə̀,

‘Zə̀ kə i tsəʼlə tsu kəlaŋ tə̀ tsətəndəghə tə wi tə, ghə i keyyə wɔ

Ghə î kwɔɔ keeli kɔʼɔ wɔ n wɔɔ, kə̂ wə̀ nə tsɔbənə ghow kə nə itay.’”

7Yeso n beeli dza ndòw tə̀ wi nə̀, “Ghə tɔ̀ɔ naŋa soʼo n màʼlə K-a-zə̀ nə̀, ‘Kə̂ wə nə mɔm koʼonə Mûkəbii, tə̀ loʼnə Zə̀ kə kə̀.’”

8Satan n ney kɔʼ ndòw wi n kaʼ ù dabə dabə wə, dii ndòw wi n naʼa tə mbi tən tədzə̀m, n ghaʼ i ghə zə, 9dza tə̀ wi nə̀, “Nàʼa tən tədzə̀m sa, mə i fuunu tə̀ wɔ abə wə təm bənə nguʼ tə n tənə mə, ngɔɔmə bə mə.” 10Yeso n dza tə̀ wi nə̀, “Mbad nuu fa n səə mə, Satan! Ghə tɔɔ naŋa n màʼlə K-a-zə̀ nə̀,

‘I ngɔɔmə Mûkəbii, Zə̀ kə kə̀,

Wə̀ i fwaʼa tə̀ wi n nəŋə wi.’”

11Satan n daŋŋə zə̀ghə tsu wi, tsətəndəghə tə Kəzə̀ tə n bə gaamə kɔʼ wi.

Yeso kaʼ fwàʼ kə wi n Galili

(Mak 1.14-15; Luk 4.14-15)

12Nghee tə̀ Yeso zow tsunə nə̀ ghə n kwu fii naŋa Jɔn n ndaw tsaʼ, tə n nuu ndòw n naʼ i Galili. 13Tə n ka muu dzə n Nazaled, ndòw muu ndòw n Kapenum, n nguŋ ə nyi i Galili, n dəŋə kə Zebulun nsə Naftali. 14Zə â shi sey ni ghəŋə nə̀ ghəə zey wù tûm ə Kəzə̀ Ayzaya â dzanə nə̀ i bə shi isəŋə nə̀,

15“Ghə̂ a Zebulun, ghi ghə̂ a Naftali ghə,

Ghə loʼnə n jìi ə inyi n nguŋ ə dzuu Jodan i loʼ zey tɔŋŋə n Galili, naʼ i ghə̂ ghən ghə way ghə̂ a Təjuu ghə.

16Ghə̂ ghey ghə â muunə nə kələm,

N koʼ daa kə səŋi kə.

Tsuʼ wə n na zow n kow ghə̂ ghey ghə â loʼnə nə kələm, ləmmə kə ivə.”

17Ni zey tsu n nəŋə i tii zə, Yeso n kaʼ ndòw ni naʼa tûm Kəzə̀ dza nə̀, “Kwey nuu bə na fə̀ŋ tə ghaa tə n ghəə a bəbə ghə, n təŋkey, fɔ̀ɔ wə idəŋ wə n shɔd.”

Yeso tɔŋɔ ngəd tə wi tə sə isə tə

(Mak 1.16-20; Luk 5.1-11)

18Nghee tə Yeso bwey tsəghənə n nguŋ ə nyi i Galili, tə n kòʼ ndòw ghə̂ a loʼ ghə abəghə nə̀ a loʼ awaazə, tɔŋŋə Shimun ghə â tɔŋŋə soʼonə wi nə̀ a lòʼ Pita, ghî waazə wi Andria. Ghə â loʼ nə inyi, ghə maʼlənə wûu u tətsəghə wə, kuum nə̀, ghə â loʼ ghə̂ a kwɔɔ a tətsəghə ghə. 19Tə n dza tə̀ ghə nə̀, “Dzûmə bə na mə, mə i ghəŋŋə ghaa nə̀ ghaa i loʼ ni ghəŋə nə̀ ghə̂ ghə i dzûmə mə.” 20Ghə n daŋŋə zə̀ghə tsu wûu tə ghə fu, nuu ndòw n baa wi.

21Ambə Yeso nuu tsunə fu, kəŋə ndòw isə, tə n koʼ kpiʼi ndòw waazə à loʼ ghə abəghə, tɔŋŋə Jeyms ghi Jɔn, waa a Zebedi. Ghə n loʼ nə kəfən ghi bày ghə Zebedi ghə faalənə wûu tə tətsəghə tə ghə tə. Yeso n tɔŋɔ tsu soʼo ghə. 22Ghə n daŋŋə naŋa sə tsu bày ghə nsə fən key, nuu ndòw n baa wi.

Yeso naʼlə ndòw tûm i dzuŋu zə, baŋŋə ndòw soʼo aghə̂

(Luk 6.17-19)

23Yeso n bwey ngəə tsəghə ndòw mboʼo Galili idzəm, dii ndòw aghəə n Ndaw tə udzəŋi tə ghə̂ a Təjuu, naʼlə ndòw soʼo Tûm i dzuŋu zə bòʼ Fɔɔ u Kəzə̀, baŋŋə ndòw lii tə tədzaŋa tə tədzəm n kow ghə̂ ghə. 24Zɔŋ u wi wə n fuŋ ngəə tsəghə ndòw naʼ i Sirya idzəm, ghə̂ ghə n ney bə ghə̂ a dzaŋa ghə adzəm n səə wi, tɔŋŋə ghə̂ ghey ghə â fɔɔbənə n wɔ lii tə tədzaŋa tə, a ghey ghə â khənə zay u bəbə wə, a ghey ghə bwuunə bwuu kə, a ghey ghə kpu doʼonə n bad kə uwû kə, tə̂ n baŋŋə ghə adzəm. 25Nɔɔ kə aghə̂ kə n dzəŋi bə n baa wi, bwey dzûmə ndow wi. Ghə â nuu bə n mboʼo Galili, mboʼo Dekapolis#4.25 Tənaʼa ighəm, naʼ i Yerosalem, Judeya, nsə n mboʼ zey i loʼnə n nguŋ ə dzuu Jodan i loʼ zey.

বর্তমানে নির্বাচিত:

Matyo 4: WEH

হাইলাইট

কপি