လူႉၵႃႇ 23

ၶဝ်ဢဝ်ၸဝ်ႈယေႇသူႉၵႂႃႇဢၢပ်ႈတီႈၶုၼ်ပီႉလတ်ႉ

(တူၺ်း၊ မၢတ်ႈ 27:1-2၊11-26။ မႃႇ 15:1-15။ ယူဝ်း 18:28-19:16)

1မိူဝ်ႈၼၼ်ႉ ၶဝ်တင်းသဵင်ႈတင်းလူင်လုၵ်ႉလႄႈဢဝ်မၼ်းၸဝ်ႈၵႂႃႇၵႃႈတီႈ ၶုၼ်ပီႉလတ်ႉသေယဝ်ႉ၊- 2တၢင်ႇဢပႅတ်ႈလႄႈဝႃႈ၊ ႁဝ်းၶႃႈထူပ်းႁၼ်လွင်ႈဢၼ်ၵေႃႉၼႆႉ ပႅတ်ႉလႅၼ်ၵူၼ်းဝၢၼ်ႈၵူၼ်းမိူင်းတင်းလၢႆလႄႈ ႁၢမ်ႈတၢပ်ႈႁႄႉၶႅၼ်လွင်ႈဢၼ်တၵ်းလႆႈသၢၵ်ႈၶွၼ်ႇတီႈၶုၼ်ႁေႃၶမ်းၵေႇသႃႇလႄႈဝႃႈ၊ ၵဝ်ပဵၼ်ၸဝ်ႈၶရိၸ်ႈဢၼ်ဝႃႈ ၶုၼ်ႁေႃၶမ်းၼၼ်ႉဢေႃႈ၊ ဝႃႈၼင်ႇၼႆၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။- 3ၶုၼ်ပီႉလတ်ႉၵေႃႈထၢမ်တီႈမၼ်းၸဝ်ႈလႄႈဝႃႈ၊ မႂ်းၸႂ်ႈၶုၼ်ႁေႃၶမ်းႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ မႅၼ်ႈၵႃႈၼင်ႇဢၼ်ၸဝ်ႈထၢမ်ၼႆႉယဝ်ႉ၊ ဝႃႈၼင်ႇၼႆဢေႃႈ။- 4ၶုၼ်ပီႉလတ်ႉၵေႃႈလၢတ်ႈတီႈ ယိတ်ႈပရေႃးႁဵၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊ ၵဝ်ဢမ်ႇထူပ်းဢပႅတ်ႈၼႂ်းၵေႃႉၼႆႉသေၸိူဝ်ႉသေပိူင်၊ မိူဝ်ႈဢၼ်ဝႃႈၼင်ႇၼႆၸိုင်၊- 5ၶဝ်ၼၼ်ႉယဵင်ႈၶႅၼ်းႁဵတ်းတင်းသဵင်ဢၼ်ႁႅင်းၼႃႇလူင်လၢင်ႁွင်ႉသႅၼ်ႇလႄႈဝႃႈ၊ ၵေႃႉၼႆႉသင်ႇသွၼ်သုင်းမႃႉပၼ်ၸႃႉၸဵမ်မိူင်းၵႃႇလီႉလႄးပုၼ်ႉလႄႈ တေႃႇထိုင်ႁွတ်ႈၵႃႈတီႈၼႆႈ ၸွတ်ႇတူဝ်ႈၵႃႈၼႂ်းမိူင်းယူႉတႃႉ ၵူႈတီႈၵူႈလႅၼ်လႄႈ ပဵၼ်ၵေႃႉဢၼ်တိုၵ်းယူင်းၸူဝ်းဢဝ်ၵူၼ်းတင်းလၢႆၶႃႈဢေႃႈ၊ ဝႃႈၼင်ႇၼႆဢေႃႈ။- 6ၶုၼ်ပီႉလတ်ႉငိၼ်းၵႂၢမ်းၼၼ်ႉသေယဝ်ႉ၊ ထၢမ်လႄႈဝႃႈ၊ ၵေႃႉၼႆႉပဵၼ်ၵူၼ်းၵႃႇလီႉလႄးႁိုဝ်။ ဝႃႈၼင်ႇၼႆလႄႈ၊- 7မိူဝ်ႈဢၼ်ႁူႉ ပဵၼ်ၵူၼ်းဢၼ်ၶုၼ်ႁေႇရူတ်ႈဢုပ်ႉပိူင်ႇၸိုင်၊ ႁႂ်ႈဢဝ်မၼ်းၸဝ်ႈၵႂႃႇသူင်ႇၵႃႈတီႈၶုၼ်ႁေႇရူတ်ႈ ဢၼ်မႃးမီးယူႇၵႃႈၼႂ်းဝဵင်းယေႇရူႉသလႅမ်ႇ ၼႂ်းၶိင်ႇမိူဝ်ႈၼၼ်ႉၼၼ်ႉဢေႃႈ။

8ၶုၼ်ႁေႇရူတ်ႈၼၼ်ႉ ႁၼ်ယေႇသူႉသေယဝ်ႉ၊ မီးၸႂ်ဢၼ်သိူဝ်းပျေႃႇၼႃႇလူင်လၢင်ဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ငိၼ်းသတၢင်းသဵင်ၶၢဝ်ႇလွင်ႈမၼ်းၸဝ်ႈလႄႈ မီးဢလူဝ်ႇၶႂ်ႈႁၼ်မၼ်းၸဝ်ႈႁိုင်ၼႃႇလႄႈ မုင်ႈထႃႈမွင်းထႃႈလွင်ႈဢၼ်တၵ်းလႆႈႁၼ်မၼ်းၸဝ်ႈၼႄပျႃး ၼီႉမိၵ်ႈလၢၵ်ႈၶၼႃႇသေၸိူဝ်ႉသေပိူင်ယူႇဢေႃႈ။- 9မိူဝ်ႈၼၼ်ႉပိၵ်ႉသမ်ႉၶုၼ်ၼၼ်ႉတွင်ႈထၢမ်မၼ်းၸဝ်ႈၼမ်ၼႃႇသေၵေႃႈ၊ မၼ်းၸဝ်ႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်း။- 10ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းထုတ်ႇၵျၢမ်းတင်းလၢႆလုၵ်ႉလႄႈ တၢင်ႇဢပႅတ်ႈတီႈမၼ်းၸဝ်ႈႁႅင်းယႂ်ႇၼႃႇဢေႃႈ။- 11ၶုၼ်ႁေႇရူတ်ႈဢိၵ်ႇတင်းၵူၼ်းသိုၵ်းတင်းလၢႆ ယင်းဢမ်ႇၼပ်ႉဢမ်ႇၶၢၼ်းႁဵတ်းပျၢၵ်ႈတီႈမၼ်းၸဝ်ႈလႄႈ ႁႂ်ႈမၼ်းၸဝ်ႈၼုင်ႈၶူဝ်းဢၼ်ႁၢင်ႈလီႁၢင်ႈငၢမ်းၼၼ်ႉသေယဝ်ႉ၊ ႁႂ်ႈဢဝ်ၶိုၼ်းမိူဝ်းသူင်ႇပၼ်တီႈၶုၼ်ပီႉလတ်ႉဢေႃႈ။- 12ဝၼ်းၼၼ်ႉ ၶုၼ်ပီႉလတ်ႉ တင်းၶုၼ်ႁေႇရူတ်ႈ ၵေႃႉၼိုင်ႈလႄႈၵေႃႉၼိုင်ႈ ၶိုၼ်းႁဵတ်းၵေႃႉႁဵတ်းသေႈၵၼ်ဢေႃႈ။ မိူဝ်ႈဢွၼ်တၢင်းၼၼ်ႉ၊ ၶဝ်ဢမ်ႇထုၵ်ႇဢမ်ႇပေႃးၵၼ်။- 13ၵမ်းၼၼ်ႉ ၶုၼ်ပီႉလတ်ႉႁွင်ႉဢဝ်ယိတ်ႈပရေႃးႁဵၵ်ႈလူင် ဢိၵ်ႇတင်းၶုၼ်တီႈလုမ်းလူင်တင်းၵူၼ်းတင်းလၢႆၸိူဝ်းၼၼ်ႉမႃးလႄႈ၊- 14လၢတ်ႈဝႃႈ၊ သူဢဝ်ၵေႃႉၼႆႉမႃးသူင်ႇပၼ်တီႈၵဝ်ၸိူဝ်ႉၼင်ႇ ၵေႃႉဢၼ် ႁႂ်ႈၵူၼ်းဝၢၼ်ႈၵူၼ်းမိူင်းတင်းလၢႆပုင်ႇၵၢၼ်ႇၼၼ်ႉဢေႃႈ။ တူၺ်းလူး၊ ပိၵ်ႉသမ်ႉၵဝ်ၸႅတ်ႈထၢမ်မၼ်းၵႃႈတီႈၽၢႆႇၼႃႈသူသေၵေႃႈ၊ ၵဝ်ဢမ်ႇထူပ်းဢမ်ႇႁၼ်ဢပႅတ်ႈဢၼ်သူတၢင်ႇတီႈမၼ်းၼၼ်ႉ ၵႃႈၼႂ်းမၼ်းၼႆႉသေၸိူဝ်ႉသေပိူင်။- 15ၶုၼ်ႁေႇရူတ်ႈၵေႃႈဢမ်ႇထူပ်း။ ၵဝ်ႁႂ်ႈသူဢဝ်ၵႂႃႇသူင်ႇၵႃႈတီႈၶုၼ်ၼၼ်ႉယဝ်ႉ။ တူၺ်းလူး၊ ၵေႃႉၼႆႉဢမ်ႇႁဵတ်းလွင်ႈတၢင်းဢၼ်ထိူၵ်ႈၶၢမ်ႇတၢင်းတၢႆၼၼ်ႉသေၸိူဝ်ႉသေပိူင်။- 16ပိူဝ်ႈၼႆလႄႈ ၵဝ်တၵ်းသင်ႇသွၼ်မၼ်းလႄႈပွႆႇလွတ်ႈသေဢေႃႈ၊ ဝႃႈၼင်ႇၼႆဢေႃႈ။- 17ၼႂ်းပွႆးၼၼ်ႉ၊ ပေႃးဢမ်ႇပွႆႇလွတ်ႈၵူၼ်းၵေႃႉၼိုင်ႈတီႈၵူၼ်းတင်းလၢႆၸိုင်၊ ဢမ်ႇလႆႈယူႇ။- 18ၵူၼ်းတင်းသဵင်ႈတင်းလူင်ၵေႃႈၽွမ်ႉၵၼ်ႁွင်ႉသႅၼ်ႇလႄႈဝႃႈ၊ ဢဝ်ၵေႃႉၼႆႉဢွၵ်ႇပႅတ်ႈသေၵမ်းၶႃႈ။ ပွႆႇလွတ်ႈပၼ်ပႃႇရပ်ႉပႃႉၼၼ်ႉတီႈႁဝ်းၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။- 19ပႃႇရပ်ႉပႃႉၼၼ်ႉၸမ်ႉ၊ ပဵၼ်ၵေႃႉဢၼ်ၶင်ဝႆႉၵႃႈၼႂ်းထွင်ႇ ၵွပ်ႈပိူဝ်ႈလွင်ႈဢၼ်မၼ်းပုင်ႇၵၢၼ်ႇၵႃႈၼႂ်းဝဵင်း ဢိၵ်ႇတင်းလွင်ႈဢၼ်ဢဝ်ဢသၢၵ်ႈၵူၼ်းတၢႆဢေႃႈ။

20ၶုၼ်ပီႉလတ်ႉၼၼ်ႉ ပိူဝ်ႈဢၼ်ၶႂ်ႈပွႆႇလွတ်ႈယေႇသူႉလႄႈ သမ်ႉၶိုၼ်းလၢတ်ႈတီႈၶဝ်ထႅင်ႈဢေႃႈ။- 21ၶဝ်ၵေႃႈႁွင်ႉသႅၼ်ႇလႄႈဝႃႈ၊ ၵေႃႉၼႆႉၸိုင်ဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈသေၵမ်းၶႃႈ။ ဢဝ်တွၵ်ႇဝႆႉသေၵမ်းၶႃႈ၊ ဝႃႈၼင်ႇၼႆဢေႃႈ။- 22ၶုၼ်ပီႉလတ်ႉၵေႃႈလၢတ်ႈတီႈၶဝ်ထူၼ်ႈထိုင်သၢမ်ပွၵ်ႈလႄႈဝႃႈ၊ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်။ ၵေႃႉၼႆႉလႆႈႁဵတ်းဢပႅတ်ႈဢၼ်လႂ်ယဝ်ႉ။ ၵဝ်ဢမ်ႇထူပ်းဢမ်ႇႁၼ်ဢပႅတ်ႈဢၼ်ထိူၵ်ႈၶၢမ်ႇတၢႆၼၼ်ႉတီႈမၼ်းသေၸိူဝ်ႉသေပိူင်။ ပိူဝ်ႈၼႆလႄႈ ၵဝ်တၵ်းသင်ႇသွၼ်မၼ်းလႄႈပွႆႇလွတ်ႈသေဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 23ၶဝ်ၼၼ်ႉၵျူဝ်းၸႃးႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇယွၼ်းဢဝ် ႁႂ်ႈဢဝ်မၼ်းၸဝ်ႈတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈၼၼ်ႉလႄႈ သဵင်ၶဝ်ဢိၵ်ႇတင်းသဵင်ယိတ်ႈပရေႃးႁဵၵ်ႈလူင်ၸိူဝ်းၼၼ်ႉပႄႉၼႅင်ႇသေဢေႃႈ။- 24ၶုၼ်ပီႉလတ်ႉၵေႃႈ ၸီႇယၢင်ႇႁႂ်ႈပဵၼ်ၸိူဝ်ႉၼင်ႇဢၼ်ၶဝ်ယွၼ်းဢဝ်ၼၼ်ႉလႄႈ၊- 25ပွႆႇလွတ်ႈၵေႃႉဢၼ်ၶင်ဝႆႉၵႃႈၼႂ်းထွင်ႇ ၵွပ်ႈပိူဝ်ႈလွင်ႈဢၼ်မၼ်းပုင်ႇၵၢၼ်ႇဢိၵ်ႇတင်းလွင်ႈဢၼ်ဢဝ်ဢသၢၵ်ႈၵူၼ်းတၢႆၼၼ်ႉ ၸွမ်းၼင်ႇဢၼ်ၶဝ်ယွၼ်းဢဝ်ၼၼ်ႉသေယဝ်ႉ၊ ဢဝ်ယေႇသူႉဢၢပ်ႈပၼ်ၸွမ်းၼင်ႇဢလူဝ်ႇၶဝ်ၼၼ်ႉဢေႃႈ။

ၸဝ်ႈယေႇသူႉလႆႈၶၢမ်ႇတွၵ်ႇဝႆႉၼိူဝ်သဝ်မႆႉ

(တူၺ်း၊ မၢတ်ႈ 27:32-44။ မႃႇ 15:21-32။ ယူဝ်း 19:17-27)

26ၼႂ်းမိူဝ်ႈဢၼ်ၶဝ်ဢဝ်မၼ်းၸဝ်ႈဢွၵ်ႇၵႂႃႇယူႇၼၼ်ႉၸိုင်၊ ၶဝ်တီႉၵမ်ဢဝ် သီႉမုၼ်ႇၵူၼ်းမိူင်း ၵူႉရေႇၼေႇ ဢၼ်လုၵ်ႉသေၵႃႈတီႈဝၢၼ်ႈထိူၼ်ႇမႃးၼၼ်ႉၵေႃႉၼိုင်ႈလႄႈ ဢဝ်သဝ်လၵ်းဝႃးၵၢပ်ႈတၢင်ႇသႂ်ႇၵႃႈၼိူဝ်မၼ်း ႁႂ်ႈမၼ်းႁၢပ်ႇဢဝ်ၸွမ်းပႃႈလင် ယေႇသူႉၵႂႃႇဢေႃႈ။

27ၵူၼ်းဢၼ်ၸူႉဢၼ်တုမ်ၼမ်ၼႃႇဢိၵ်ႇတင်းမႄႈယိင်းဢၼ်ႁွင်ႉႁႆႈမေႃးမႄး ၵွပ်ႈပိူဝ်ႈမၼ်းၸဝ်ႈတင်းလၢႆၼၼ်ႉ ဢွၼ်ၵၼ်ၸွမ်းပႃႈလင်မၼ်းၸဝ်ႈၵႂႃႇဢေႃႈ။- 28ယေႇသူႉဝၢႆႇတူၺ်းၶဝ်သေလႄႈလၢတ်ႈဝႃႈ၊ လုၵ်ႈယိင်းဝဵင်းယေႇရူႉသလႅမ်ႇတင်းလၢႆၶဝ်ဢိူၺ်း၊ ယႃႇပေႁွင်ႉပေႁႆႈၵွပ်ႈပိူဝ်ႈၵဝ်။ ဢွၼ်ၵၼ်ႁွင်ႉႁႆႈၵွပ်ႈပိူဝ်ႈတူဝ်ၸဝ်ႈၵဝ်ႇ ဢိၵ်ႇတင်းၵွပ်ႈပိူဝ်ႈလုၵ်ႈလၢင်းတူဝ်ၸဝ်ႈၵဝ်ႇတင်းလၢႆတႃႉ။- 29လွင်ႈမၼ်းၸမ်ႉ ၶိင်ႇၵႃႇလႃႉဝၼ်းဢၼ်တၵ်းလႆႈလၢတ်ႈလႄႈဝႃႈ၊ မႄႈယိင်းဢၼ်မၼ်လႄႈဢမ်ႇမီးလုၵ်ႈၼၼ်ႉမီးမင်ႇၵလႃႇဢေႃႈ။ တွင်ႉဢၼ်ဢမ်ႇပႆႇတွၼ်ႉပႃးပတိၵ်ႉသၼ်ႇထေႇသေပွၵ်ႈ ဢိၵ်ႇတင်းၼူမ်းဢၼ်လုၵ်ႈဢွၼ်ႇဢမ်ႇပႆႇတွၼ်ႉၸုပ်ႇၵိၼ်သေပွၵ်ႈၼၼ်ႉမီးမင်ႇၵလႃႇဢေႃႈ၊ ဝႃႈၼင်ႇၼႆၼၼ်ႉတၵ်းႁွတ်ႈမႃးဢေႃႈ။- 30မိူဝ်ႈၼၼ်ႉ ၶဝ်တၵ်းႁွင်ႉတီႈလွႆတင်းလၢႆလႄႈဝႃႈ၊ ၶႅၼ်းတေႃႈတူၵ်းမႃးသႂ်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ တၵ်းႁွင်ႉတီႈၵုင်းတင်းလၢႆလႄႈဝႃႈ၊ ၶႅၼ်းတေႃႈႁူမ်ႇသုမ်ႇႁဝ်းၶႃႈဝႆႉသေၵမ်းၶႃႈ၊ ဝႃႈၼင်ႇၼႆဢေႃႈ။- 31လွင်ႈမၼ်းၸမ်ႉ ပေႃးႁဵတ်းၸိူဝ်ႉၼင်ႇၼႆၵႃႈၼႂ်းတူၼ်ႈဢၼ်လိပ်းၸိုင်၊ ၵႃႈၼႂ်းတူၼ်ႈဢၼ်ႁႅင်ႈၼၼ်ႉတၵ်းပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။

32မိူဝ်ႈၼၼ်ႉ ၵေႃႉဢၼ်ပဵၼ်ၵူၼ်းႁၢႆႉသွင်ၵေႃႉၵေႃႈ၊ ၶဝ်ၼၼ်ႉဢဝ်ဢွၵ်ႇၵႂႃႇလူၺ်ႈၵၼ်တင်းမၼ်းၸဝ်ႈႁႂ်ႈလႆႈဢဝ်တၢႆဢေႃႈ။

33မိူဝ်ႈဢၼ်ၶဝ်ႁွတ်ႈထိုင်တီႈဢၼ်လႆႈၸိုဝ်ႈၵွၵ်းႁူဝ်ၼၼ်ႉၸိုင်၊ ၶဝ်ဢဝ်ၵူၼ်းႁၢႆႉၸိူဝ်းၼၼ်ႉ တွၵ်ႇဝႆႉၵႃႈတီႈၽၢႆႇၶႂႃၸဝ်ႈၵေႃႉၼိုင်ႈ ၵႃႈတီႈၽၢႆႇသၢႆႉၸဝ်ႈၵေႃႉၼိုင်ႈၵႃႈၼိူဝ်သဝ်လၵ်းဝႃးၵၢပ်ႈလူၺ်ႈၵၼ်တင်းမၼ်းၸဝ်ႈဢေႃႈ။- 34ယေႇသူႉၵေႃႈဝႃႈ၊ ဢူဝ်းပေႃႈ၊ ပွႆႇလွတ်ႈဢပႅတ်ႈၶဝ်ၼႆႉသေၵမ်းတီႈၶႃႈ၊ ၶဝ်ၼႆႉဢမ်ႇႁူႉလွင်ႈဢၼ်ၶဝ်ႁဵတ်းတီႈၶႃႈ၊ ဝႃႈၼင်ႇၼႆဢေႃႈ။ ၶဝ်ဢဝ်ၶူဝ်းၼုင်ႈမၼ်းၸဝ်ႈတူၵ်းၸႃႇၵွၵ်ႈ#23:34 တူၵ်းၸႃႇၵွၵ်ႈ - ၶႂ်ႈဝႃႈ တူၵ်းလိၵ်ႈတူၵ်းလၢႆးသေလႄႈ ၽႄမႅင်ႇပၼ်ၵၼ်ဢေႃႈ။- 35ၵူၼ်းတင်းလၢႆၵေႃႈ ၸုၵ်းလႄႈတူၺ်းယူႇဢေႃႈ။ ၶုၼ်တီႈလုမ်းလူင်တင်းလၢႆၵေႃႈ ႁဵတ်းပျၢၵ်ႈတီႈမၼ်းၸဝ်ႈလႄႈဝႃႈ၊ ၵေႃႉၼႆႉၸၢင်ႈၵႄႇၶျွတ်ႈဢဝ်ပိူၼ်ႈဢေႃႈ။ ပေႃးပဵၼ်ၸဝ်ႈၶရိၸ်ႈၵေႃႉဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၸိုင်၊ ႁႂ်ႈတူဝ်ၸဝ်ႈၵဝ်ႇ ၵႄႇၶျွတ်ႈဢဝ်တူဝ်ၸဝ်ႈၵဝ်ႇသေၵမ်းတႃႉ၊ ဝႃႈၼင်ႇၼႆဢေႃႈ။- 36ၵူၼ်းသိုၵ်းတင်းလၢႆၵေႃႈမႃးတီႈမၼ်းၸဝ်ႈလႄႈ ႁဵတ်းပျၢၵ်ႈၶူဝ်မၼ်းၸဝ်ႈယူႇ၊ ဢဝ်ၼမ်ႉပုင်းယေႇပၼ်တီႈမၼ်းၸဝ်ႈယူႇသေလႄႈ ဢွၼ်ၵၼ်လၢတ်ႈလႄႈဝႃႈ၊- 37ပေႃးမႂ်းၸႂ်ႈၶုၼ်ႁေႃၶမ်းယူႉတႃႉၸိုင်၊ တူဝ်ၸဝ်ႈၵဝ်ႇ ၵႄႇၶျွတ်ႈဢဝ်တူဝ်ၸဝ်ႈၵဝ်ႇသေၵမ်းတႃႉ၊ ဝႃႈၼင်ႇၼႆဢေႃႈ။

38လိၵ်ႈဢၼ်ဢဝ်တင်းၵႂၢမ်း ႁေႇပြႄး တင်းၵႂၢမ်းႁေႇလသႃႉ တင်းၵႂၢမ်းရူဝ်းမႃႉ ၽုၺ်ႇၼႄဢပႅတ်ႈမၼ်းၸဝ်ႈလႄႈဝႃႈ၊ ၵေႃႉၼႆႉ ပဵၼ်ၶုၼ်ႁေႃၶမ်းယူႉတႃႉဢေႃႈ၊ ဝႃႈၼင်ႇၼႆၼၼ်ႉၵေႃႈမီးဝႆႉၵႃႈၼိူဝ်ႁူဝ်မၼ်းၸဝ်ႈဢေႃႈ။- 39ၼႂ်းၵူၼ်းႁၢႆႉသွင်ၵေႃႉဢၼ်ႁွႆႈဝႆႉၼၼ်ႉ၊ ၵေႃႉၼိုင်ႈသႄႉသွမ်းမၼ်းၸဝ်ႈလႄႈဝႃႈ၊ ပေႃးမႂ်းၸႂ်ႈၸဝ်ႈၶရိၸ်ႈၸိုင်၊ ၵႄႇၶျွတ်ႈဢဝ်တူဝ်ၸဝ်ႈၵဝ်ႇဢိၵ်ႇတင်းႁဝ်းၼႆႉသေၵမ်းတႃႉ၊ ဝႃႈၼင်ႇၼႆဢေႃႈ။- 40ၵေႃႉၼိုင်ႈၸမ်ႉ၊ သင်ႇသွၼ်မၼ်းၼၼ်ႉလႄႈဝႃႈ၊ မႂ်းၶၢမ်ႇတၢမ်ႇဢပႅတ်ႈမိူၼ်ၸိူဝ်ႉၼင်ႇမၼ်းယူႇလႄႈ မႂ်းဢမ်ႇၵူဝ်ၽြႃးပဵၼ်ၸဝ်ႈႁိုဝ်။- 41ႁဝ်းၼႆႉပိူဝ်ႈဢၼ်လႆႈၶၢမ်ႇတၢမ်ႇဢၼ်ထိူၵ်ႈတၢၼ်ႇၵၼ်တင်းလွင်ႈတၢင်းဢၼ်ႁဝ်းႁဵတ်းမႅၼ်ႈၼၼ်ႉလႄႈ လႆႈၶၢမ်ႇၸွမ်းၼင်ႇတြႃးဢေႃႈ။ ၵေႃႉၼႆႉၸမ်ႉ၊ ဢမ်ႇႁဵတ်းဢပႅတ်ႈသေၸိူဝ်ႉသေပိူင်၊ ဝႃႈၼင်ႇၼႆသေယဝ်ႉ၊- 42လဝ်ႊလၢတ်ႈတီႈယေႇသူႉလႄႈဝႃႈ၊ ၸဝ်ႈႁဝ်း၊ မိူဝ်ႈဢၼ်မိူင်းၸဝ်ႈႁဝ်းတႄႇပဵၼ်ယူႇသေလႄႈၸဝ်ႈႁဝ်းမႃးၼၼ်ႉၸိုင်၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵဝ်ၶႃႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 43ယေႇသူႉၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ဝၼ်းမိူဝ်ႈၼႆႉမႂ်းတၵ်းမီးလူၺ်ႈၵၼ်တင်းၵဝ် ၼႂ်းၽုင်ႇပႃႇရတီႉသူႉပုၼ်ႉဢေႃႈ၊ ဝႃႈၼင်ႇၼႆဢေႃႈ။

လွင်ႈတၢင်းတၢႆၸဝ်ႈယေႇသူႉ

(တူၺ်း၊ မၢတ်ႈ 27:45-56။ မႃႇ 15:33-41။ ယူဝ်း 19:28-30)

44ၶိင်ႇၼၼ်ႉပဵၼ်ႁူၵ်းၼႃႇရီႇၸမ်ၸမ်လႄႈ၊ ပဵၼ်ဢၼ်လပ်းသိင်ႇၵႂႃႇၽိတ်းၽိတ်းတင်းမိူင်း တေႃႇထိုင်ႁွတ်ႈၵဝ်ႈၼႃႇရီႇဢေႃႈ။- 45ဢရွင်ႇၵၢင်ဝၼ်းလပ်ႉႁၢႆၵႂႃႇဢေႃႈ။ ၽႃႈၵင်ႈၼႂ်းႁိူၼ်းပိၵ်ႈမၢၼ်ႇၸဝ်ႈၼၼ်ႉသိၵ်ႇၶၢတ်ႇၵႂႃႇဢေႃႈ။- 46ယေႇသူႉၵေႃႈႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇသေယဝ်ႉဝႃႈ၊ ဢူဝ်းပေႃႈ၊ ၵဝ်ၶႃႈဢဝ်ၸႂ်ဝီႉၺိၺ်ႇၵဝ်ၶႃႈ ဢၢပ်ႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆလႄႈထွတ်ႇၸႂ်မၼ်းၸဝ်ႈသေဢေႃႈ။

47တပ်ႉမူးၵေႃႉၼိုင်ႈႁၼ်လွင်ႈတၢင်းဢၼ်ပဵၼ်မႃးၼၼ်ႉသေယဝ်ႉ၊ ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊ ၸႂ်ႈတႄႉ၊ ၵေႃႉၼႆႉပဵၼ်ၵေႃႉဢၼ်သိုဝ်ႈတေႃႇတႄႉဢေႃႈ၊ ဝႃႈၼင်ႇၼႆဢေႃႈ။- 48ၶဝ်ၸိူဝ်းဢၼ်မႃးလူမႃးတူၺ်း လွင်ႈတၢင်းၼၼ်ႉတင်းသဵင်ႈတင်းလူင်၊ မိူဝ်ႈဢၼ်ႁၼ်လွင်ႈတၢင်းၸိူဝ်းၼၼ်ႉယဝ်ႉၸိုင်၊ ဢွၼ်ၵၼ်တူပ်းႁူဝ်ဢူၵ်းသေလႄႈၶိုၼ်းမိူဝ်းၵႂႃႇဢေႃႈ။- 49ၶဝ်ၸိူဝ်းဢၼ်မိုတ်ႈဢၼ်ၵိုဝ်းမၼ်းၸဝ်ႈ ဢိၵ်ႇတင်းမႄႈယိင်းဢၼ်လုၵ်ႉသေၵႃႈတီႈမိူင်းၵႃႇလီႉလႄး ၸွမ်းပႃႈလင်မၼ်းၸဝ်ႈမႃးၸိူဝ်းၼၼ်ႉ ၸုၵ်းယူႇတီႈဢၼ်ၵႆသေလႄႈတူၺ်းယူႇဢေႃႈ။

တၢင်းဢၼ်သၢင်းၵျူဝ်ႇတူဝ်တၢႆၸဝ်ႈယေႇသူႉ

(တူၺ်း၊ မၢတ်ႈ 27:57-61။ မႃႇ 15:42-47။ ယူဝ်း 19:38-42)

50မိူဝ်ႈၼၼ်ႉ ၵူၼ်းဢၼ်လႆႈၸိုဝ်ႈယူဝ်းသႅပ်ႈ ဢၼ်ပဵၼ်ၶုၼ်တီႈလုမ်းလူင် ဢၼ်ပဵၼ်ၵူၼ်းလီမျၢတ်ႈၵူၼ်းသိုဝ်ႈတေႃႇ၊- 51ဢၼ်ပဵၼ်ၵေႃႉဢၼ်ဢမ်ႇႁပ်ႉတုင်းဢဝ်လွင်ႈဢၼ်ၶုၼ်တီႈလုမ်းလူင်တၢင်ႇၵေႃႉၸိူဝ်းၼၼ်ႉ တိူင်ႇပၢင်ႇလႄႈၸီႇယၢင်ႇ၊ ဢၼ်ပဵၼ်ၵူၼ်းဝဵင်းဢရီႉမသႄး မိူင်းယူႉတႃႉလႄႈ ပဵၼ်ၵေႃႉဢၼ်မုင်ႈထႃႈမွင်းထႃႈမိူင်းၽြႃးပဵၼ်ၸဝ်ႈယူႇၼၼ်ႉ၊- 52ၶဝ်ႈၸူးတီႈၶုၼ်ပီႉလတ်ႉသေလႄႈယွၼ်းဢဝ် တူဝ်တၢႆယေႇသူႉဢေႃႈ။- 53မၼ်းၶျႃးတူဝ်တၢႆမၼ်းၸဝ်ႈလူင်းယဝ်ႉၸင်ႇ ဢဝ်တင်းပိၵ်ႈၶျေႃးၶဵၼ်းႁေႃႇသေလႄႈဢဝ်သႂၢင်းသႂ်ႇဝႆႉၵႃႈၼႂ်းၶုမ်သၢင်းၶႅင်းမၢၵ်ႇႁိၼ် ဢၼ်ဢမ်ႇပႆႇတွၼ်ႉသၢင်းၵျူဝ်ႇပိူၼ်ႈသေပွၵ်ႈၼၼ်ႉဢေႃႈ။- 54ဝၼ်းၼၼ်ႉၸမ်ႉ၊ ပဵၼ်ဝၼ်းၽိတ်ႈလႄႈ ၸမ်ၶိင်ႇဝၼ်းၵမ်သိၼ်ဢေႃႈ။- 55မႄႈယိင်းဢၼ်လုၵ်ႉသေၵႃႈတီႈမိူင်းၵႃႇလီႉလႄး မႃးလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉ ၸွမ်းလႄႈလူတူၺ်းသၢင်းၶႅင်းမၼ်းၸဝ်ႈ ဢိၵ်ႇတင်းလွင်ႈဢၼ်ဢဝ်တူဝ်တၢႆမၼ်းၸဝ်ႈဝႆႉၸိူဝ်ႉၼင်ႇႁိုဝ်ၼၼ်ႉဢေႃႈ။- 56ၶဝ်ၼၼ်ႉၶိုၼ်းမိူဝ်းၵႂႃႇသေယဝ်ႉ၊ မႄးႁႅၼ်းၼမ်ႉမၼ်းႁွမ်တင်းၼၢမ်ႇသႃႇဝႆႉလႄႈ ၵႃႈၼင်ႇဢၼ်ပိင်းၺၢပ်ႈၸဝ်ႈမီးဝႆႉၼၼ်ႉ ၼႂ်းဝၼ်းၵမ်သိၼ်ယင်းဢမ်ႇႁဵတ်းတၢင်းႁဵတ်းလႄႈယူႇဢေႃႈ။

বর্তমানে নির্বাচিত:

လူႉၵႃႇ 23: CBMS

হাইলাইট

কপি