ယူဝ်းႁၢၼ်ႇ 7

ၸဝ်ႈယေႇသူႉၶဝ်ႈပွႆးသုမ်ႉထဵင်ၸဝ်ႈ

1လိုၼ်းၼၼ်ႉ ယေႇသူႉလႄႇလဵပ်ႈၵႃႈၼႂ်းမိူင်းၵႃႇလီႉလႄးၼၼ်ႉယူႇဢေႃႈ။ ၵွပ်ႈပိူဝ်ႈဢၼ် ၵူၼ်းယူႉတႃႉတင်းလၢႆ ၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆယူႇလႄႈ မၼ်းၸဝ်ႈဢမ်ႇမီးဢလူဝ်ႇၶႂ်ႈလႄႇလဵပ်ႈ ၵႃႈၼႂ်းမိူင်းယူႉတႃႉ။

2မိူဝ်ႈၼၼ်ႉ ပွႆးဢၼ်ၵူၼ်းမဵဝ်းယူႉတႃႉၶၢမ်ႇဢၼ်ဝႃႈ ပွႆးႁဵတ်းသုမ်ႉထဵင်ၼၼ်ႉၸမ်တၵ်းပဵၼ်ဢေႃႈ။- 3ပိူဝ်ႈၼႆလႄႈၼွင်ႉၸၢႆးၸဝ်ႈတင်းလၢႆ လၢတ်ႈတီႈမၼ်းၸဝ်ႈလႄႈဝႃႈ၊ ၼင်ႇႁိုဝ်တပႄးတပၢၼ်းမႂ်းတင်းလၢႆ တၵ်းလႆႈႁၼ်လွင်ႈတၢင်းဢၼ်မႂ်းႁဵတ်းၸိူဝ်းၼၼ်ႉၸိုင်၊ ဢွၵ်ႇသေၵႃႈတီႈၼႆႈလႄႈ ၵႂႃႇၵႃႈတီႈမိူင်းယူႉတႃႉပုၼ်ႉသေၵမ်း။- 4ၵေႃႉဢၼ်မီးဢလူဝ်ႇၶႂ်ႈႁူင်ႁၢင်းသႃႈၸွတ်ႇၼၼ်ႉၸမ်ႉ၊ ဢမ်ႇၸၢင်ႈႁဵတ်းသေၸိူဝ်ႉသေပိူင် ၵႃႈၼႂ်းတီႈဢၼ်လပ်ႉဢၼ်သိူင်ႇ၊ ပေႃးမႂ်းႁဵတ်းလွင်ႈတၢင်းၸိူဝ်းၼႆႉၸိုင် ၼႄပျႃးတူဝ်ၸဝ်ႈၵဝ်ႇထၢင်ႇထၢင်ႇသႃးသႃး ၵႃႈၼႂ်းလေႃးၵႃႉၼႆသေၵမ်းဝႃႈၼႆ၊- 5ပိူဝ်ႈဢၼ်ၼွင်ႉၸၢႆးၸဝ်ႈၸိူဝ်းၼၼ်ႉဢမ်ႇယုမ်ႇမၢတ်ႈမၼ်းၸဝ်ႈလႄႈ ၶဝ်ၸင်ႇ၊ ဝႃႈၼင်ႇၼႆဢေႃႈ။- 6ယေႇသူႉၵေႃႈလၢတ်ႈလႄႈဝႃႈ၊ ၶိင်ႇၵဝ်ဢမ်ႇပႆႇႁွတ်ႈပႆႇထိုင်။ ၶိင်ႇသူၸမ်ႉ၊ ထုၵ်ႇဝႆႉမီးယူႇၵူႈၶိင်ႇၵူႈၶႃႈဢေႃႈ။- 7ၵူၼ်းလေႃးၵီႇတင်းလၢႆဢမ်ႇၸင်းသူလႆႈ၊ ၸင်းၵဝ်ဢေႃႈ။ လွင်ႈမၼ်းၸမ်ႉ ၵဝ်ၶၢမ်ႇသၢၵ်ႈသေႇလွင်ႈဢၼ်တၢင်းၵမ်တၢင်းၵျၢင်ႉၶဝ်ႁၢႆႉမိူၵ်ႈၼၼ်ႉဢေႃႈ။- 8သူၵႂႃႇၵႃႈတီႈပွႆးပုၼ်ႉတႃႉ။ ပိူဝ်ႈဢၼ်ၶိင်ႇၵဝ်ဢမ်ႇပႆႇပျေႉၸုမ်ႇလႄႈ ၵဝ်ဢမ်ႇၵႂႃႇၵႃႈတီႈပွႆးၼၼ်ႉ၊- 9ဝႃႈၼင်ႇၼႆသေယဝ်ႉ၊ ယူႇၵႃႈၼႂ်းမိူင်းၵႃႇလီႉလႄးၼၼ်ႉဢေႃႈ။- 10ၼွင်ႉၸၢႆးၸဝ်ႈၸိူဝ်းၼၼ်ႉ ၵႂႃႇၵႃႈတီႈပွႆးၼၼ်ႉသေယဝ်ႉ၊ မၼ်းၸဝ်ႈၸင်ႇၵႂႃႇဢမ်ႇထၢင်ႇဢမ်ႇသႃးမိူၼ်ၸိူဝ်ႉၼင်ႇဢၼ်ၵႂႃႇတဵတ်ႇတဵတ်ႇဢေႃႈ။

11ၵူၼ်းယူႉတႃႉတင်းလၢႆ ႁႃမၼ်းၸဝ်ႈၵႃႈၼႂ်းပွႆးၼၼ်ႉလႄႈတွင်ႈထၢမ်ဝႃႈ၊ မၼ်းမီးၵႃႈလႂ်၊ ဝႃႈၼင်ႇၼႆဢေႃႈ။- 12ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ၊ ဢဝ်လွင်ႈမၼ်းၸဝ်ႈသေလႄႈ ပဵၼ်ဢုၵ်းဢုၵ်းဢၢင်ႇဢၢင်ႇၵၼ်ယူႇဢေႃႈ။ ၵမ်ႈၽွင်ႈဝႃႈ၊ မၼ်းပဵၼ်ၵူၼ်းလီဢေႃႈ၊ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ ဢမ်ႇၸႂ်ႈၵူၼ်းလီ။ မၼ်းပႅတ်ႉလႅၼ်ၵူၼ်းတင်းလၢႆဢေႃႈ၊ ဝႃႈၼင်ႇၼႆဢေႃႈ။- 13ၼႂ်းဝႃႈၼၼ်သေၵေႃႈ ပိူဝ်ႈဢၼ်ၵူဝ်ၵူၼ်း ယူႉတႃႉၸိူဝ်းၼၼ်ႉလႄႈ ၽူႈလႂ်သေၵေႃႉသေၵူၼ်းဢမ်ႇႁတ်းလၢတ်ႈလွင်ႈမၼ်းၸဝ်ႈလႅင်းလႅင်း။

ၸဝ်ႈယေႇသူႉသင်ႇသွၼ်ၼႂ်းၵျွင်းၽြႃး

14မိူဝ်ႈဢၼ်ယင်းတိုၵ်ႉၶၢမ်ႇပွႆးၼၼ်ႉ ယူႇၼၼ်ႉၸိုင် ယေႇသူႉၵႂႃႇၶိုၼ်ႈၵႃႈၼႂ်းပိၵ်ႈမၢၼ်ႇၸဝ်ႈသေလႄႈ သင်ႇသွၼ်သုင်းမႃႉပၼ်ဢေႃႈ။- 15ၵူၼ်းယူႉတႃႉၸိူဝ်းၼၼ်ႉဢၢမ်းလႄႈဝႃႈ၊ ၵေႃႉၼႆႉယင်းဢမ်ႇသွၼ်လိၵ်ႈလႄႈ ႁဵတ်းၸိူဝ်ႉၼင်ႇႁိုဝ်လႄႈ မၼ်းမေႃလိၵ်ႈၼင်ႇႁိုဝ်၊ ဝႃႈၼင်ႇၼႆဢေႃႈ။- 16ယေႇသူႉၵေႃႈၶိုၼ်းလၢတ်ႈလႄႈဝႃႈ၊ တေႇသၼႃႇဢၼ်ၵဝ်ႁေႃးလၢတ်ႈၼႆႉ ပဵၼ်တေႇသၼႃႇၵဝ်ဢမ်ႇၸႂ်ႈ။ ပဵၼ်တေႇသၼႃႇ ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။- 17ပေႃးသေၵေႃႉသေၵူၼ်းမီးဢလူဝ်ႇၶႂ်ႈၸွမ်းဢလူဝ်ႇၸဝ်ႈၸိုင်၊ တေႇသၼႃႇၼႆႉပဵၼ်တေႇသၼႃႇၽြႃးပဵၼ်ၸဝ်ႈႁိုဝ်။ ၵဝ်ၼႆႉႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇႁိုဝ် ဝႃႈၼႆ၊ တၵ်းႁူႉဢေႃႈ။- 18ၵေႃႉဢၼ်ႁေႃးလၢတ်ႈၸွမ်းၼင်ႇ ဢလူဝ်ႇတူဝ်ၸဝ်ႈၵဝ်ႇၼၼ်ႉ ၸၢင်ႈႁႃမုၼ်သရေႇတူဝ်ၸဝ်ႈၵဝ်ႇဢေႃႈ။ ၵေႃႉဢၼ်ႁႃမုၼ်သရေႇၵေႃႉဢၼ်ပွႆႇၸႂ်ႉတူဝ်ၸဝ်ႈၵဝ်ႇမႃးၼၼ်ႉၸမ်ႉ၊ ပဵၼ်ၵေႃႉဢၼ်လီယုမ်ႇဢေႃႈ။ ၼႂ်းၵေႃႉၼၼ်ႉဢမ်ႇမီးတၢင်းဢၼ်ဢမ်ႇတြႃး။

19 မူဝ်းသေႇပၼ်ပိင်းၺၢပ်ႈတြႃးတီႈသူဢမ်ႇၸႂ်ႈႁိုဝ်။ တြႃးၼၼ်ႉၸိုင်၊ ၼႂ်းသူၼႆႉၽူႈလႂ်ဢမ်ႇၵမ်ဢမ်ႇၵျၢင်ႉသေၵေႃႉသေၵူၼ်း။ ႁဵတ်းႁိုဝ်လႄႈသူၵျၢမ်ႇႁႃႁႂ်ႈလႆႈဢဝ်ၵဝ်တၢႆၼင်ႇႁိုဝ်။ ဝႃႈၼင်ႇၼႆဢေႃႈ။- 20ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ မႂ်းပဵၼ်ၵေႃႉဢၼ်ၽီႁၢႆႉၶဝ်ႈဢေႃႈ။ ၽူႈလႂ်ၵျၢမ်ႇႁႃႁႂ်ႈလႆႈဢဝ်မႂ်းတၢႆ၊ ဝႃႈၼင်ႇၼႆဢေႃႈ။- 21ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၵဝ်ႁဵတ်းလွင်ႈတၢင်းဢၼ်ၼိုင်ႈၵူၺ်းလႄႈ သူၵႃႈမီးတင်းသဵင်ႈတင်းလူင် မီးတၢင်းဢၼ်ဢၢမ်းၼႃႇဢေႃႈ။- 22မူဝ်းသေႇၼၼ်ႉပၼ်တြႃးတၢင်းဢၼ်ထိူဝ်ႁိမ်းတီႈသူဢေႃႈ။ မိူဝ်ႈဢၼ်ၵဝ်ဝႃႈၼင်ႇၼႆၸိုင်၊ လႆႈပဵၼ်မႃးၵႃႈတီႈမူဝ်းသေႇၼၼ်ႉ ဝႃႈၼႆ ၵဝ်ဢမ်ႇၶႂ်ႈဝႃႈ၊ လႆႈသိုပ်ႇလူင်းမႃးၵႃႈတီႈပူႇမွၼ်ႇၸိူဝ်းၼၼ်ႉဢေႃႈ။ ပိူဝ်ႈၼႆလႄႈ သူပၼ်တၢင်းဢၼ်ထိူဝ်ႁိမ်းၼႂ်းဝၼ်းၵမ်သိၼ်ဢေႃႈ။- 23ပေႃးၵူၼ်းၶၢမ်ႇတၢင်းဢၼ်ထိူဝ်ႁိမ်းၼႂ်းဝၼ်းၵမ်သိၼ် လွင်ႈၼင်ႇႁိုဝ်တြႃးမူဝ်းသေႇတၵ်းဢမ်ႇလႆႈလူႉၸိုင်၊ ပိူဝ်ႈဢၼ်ၵဝ်ႁႂ်ႈ ၵူၼ်းတင်းတူဝ်တင်းၶိင်းလီမႃးၼႂ်းဝၼ်းၵမ်သိၼ်လႄႈ သူတၵ်းလႆႈမီးတၢင်းဢၼ်ၸႂ်မႆႈၶႆႈၸႃႉတီႈၵဝ်လူးၵွၼ်ႇႁိုဝ်။- 24ယႃႇပေၸီႇယၢင်ႇၸွမ်းႁၢင်ႈၸွမ်းၽၢင်။ ၸီႇယၢင်ႇၸွမ်းၼင်ႇတြႃးတႃႉ၊ ဝႃႈၼင်ႇၼႆဢေႃႈ။

မၼ်းၸဝ်ႈပဵၼ်ၸဝ်ႈၶရိၸ်ႈႁိုဝ်

25မိူဝ်ႈၼၼ်ႉ ၵူၼ်းဝဵင်းယေႇရူႉသလႅမ်ႇၵမ်ႈၽွင်ႈၵေႃႈ လၢတ်ႈလႄႈဝႃႈ၊ ၵေႃႉၼႆႉပဵၼ်ၵေႃႉဢၼ် ၶဝ်ႁႃႁႂ်ႈလႆႈဢဝ်တၢႆၼၼ်ႉဢမ်ႇၸႂ်ႈႁိုဝ်။- 26တူၺ်းလူး၊ မၼ်းႁေႃးလၢတ်ႈထၢင်ႇထၢင်ႇသႃးသႃးလႄႈ ၶဝ်ယင်းဢမ်ႇလၢတ်ႈႁႄႉလၢတ်ႈၶႅၼ်ၵႃႈသင်တီႈမၼ်းလူင်ပႄႇ။ ၶုၼ်တင်းလၢႆႁူႉလွင်ႈဢၼ်မၼ်းၼႆႉပဵၼ်ၸဝ်ႈၶရိၸ်ႈယဝ်ႉ ဢမၢၼ်ႇၶၼ်ပဵၼ်ႁိုဝ်။- 27ၼႂ်းဝႃႈၼၼ်သေၵေႃႈ ႁဝ်းႁူႉလွင်ႈဢၼ်မၼ်းၼႆႉ ပဵၼ်ၵႃႈတီႈလႂ်မႃးၼၼ်ႉယူႇဢေႃႈ။ မိူဝ်ႈဢၼ်ၸဝ်ႈၶရိၸ်ႈမႃးၼၼ်ႉၸိုင် မၼ်းၸဝ်ႈပဵၼ်ၵႃႈတီႈလႂ်မႃးဝႃႈၼႆ၊ ၽူႈလႂ်သေၵေႃႉသေၵူၼ်းတၵ်းဢမ်ႇလႆႈႁူႉ၊ ဝႃႈၼင်ႇၼႆဢေႃႈ။

28ၼႂ်းမိူဝ်ႈဢၼ်ယေႇသူႉသင်ႇသွၼ်သုင်းမႃႉပၼ်ၼႂ်းပိၵ်ႈမၢၼ်ႇၸဝ်ႈယူႇၼၼ်ႉၸိုင်၊ မၼ်းၸဝ်ႈႁွင်ႉသႅၼ်ႇလႄႈဝႃႈ၊ သူႁူႉၵဝ်ယူႇဢေႃႈ။ ၵဝ်ပဵၼ်ၵႃႈတီႈလႂ်မႃးၵေႃႈသူႁူႉယူႇဢေႃႈ။ ၼႂ်းဝႃႈၼၼ်သေၵေႃႈ ၵဝ်မႃးၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ ၵေႃႉဢၼ်ပွႆႇၸႂ်ႉၵဝ်မႃးၼၼ်ႉ ပျေႉၸုမ်ႇတင်းသဵတ်ႈၸႃႇဢေႃႈ။ ၵေႃႉၼၼ်ႉၸိုင်သူဢမ်ႇႁူႉ။- 29ၵဝ်ၸမ်ႉ၊ ႁူႉဢေႃႈ။ လွင်ႈမၼ်းၸမ်ႉ ၵဝ်လုၵ်ႉသေၵႃႈတီႈၵေႃႉၼၼ်ႉမႃးဢေႃႈ။ ၵေႃႉၼၼ်ႉၵေႃႈပွႆႇၸႂ်ႉၵဝ်မႃးဢေႃႈ။ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၼၼ်ႉၸိုင်၊- 30ၶဝ်ႁႃႁႂ်ႈလႆႈတီႉဢဝ်မၼ်းၸဝ်ႈဢေႃႈ။ ၼႂ်းဝႃႈၼၼ်သေၵေႃႈ ပိူဝ်ႈဢၼ်ၶိင်ႇမၼ်းၸဝ်ႈဢမ်ႇပႆႇႁွတ်ႈပႆႇထိုင်လႄႈ ၽူႈလႂ်သေၵေႃႉသေၵူၼ်းဢမ်ႇတီႉဢမ်ႇဢဝ်။- 31ၶဝ်ၸိူဝ်းဢၼ်ပႃးၼႂ်းၵူၼ်းဢၼ်ၸူႉဢၼ်တုမ်ၼၼ်ႉၵမ်ႈၽွင်ႈယုမ်ႇမၢတ်ႈမၼ်းၸဝ်ႈလႄႈ လၢတ်ႈဝႃႈ၊ မိူဝ်ႈဢၼ်ၸဝ်ႈၶရိၸ်ႈမႃးၼၼ်ႉၸိုင်၊ မၼ်းၸဝ်ႈၼၼ်ႉတၵ်းၼႄပျႃးၼီႉမိၵ်ႈလၢၵ်ႈၶၼႃႇ ဢၼ်ယဵင်ႈၶႅၼ်းၼမ်ၼႃႇသေၼီႉမိၵ်ႈလၢၵ်ႈၶၼႃႇ ဢၼ်ၵေႃႉၼႆႉၼႄပျႃးၸိူဝ်းၼႆႉလူးၵွၼ်ႇႁိုဝ်၊ ဝႃႈၼင်ႇၼႆဢေႃႈ။

32မိူဝ်ႈဢၼ်ၽႃႇရီႉသႄးတင်းလၢႆ ငိၼ်းၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ ပဵၼ်ဢုၵ်းဢုၵ်းဢၢင်ႇဢၢင်ႇၵၼ်ယူႇ ၵွပ်ႈပိူဝ်ႈမၼ်းၸဝ်ႈၸိူဝ်ႉၼင်ႇၼၼ်ၼၼ်ႉၸိုင်၊ ယိတ်ႈပရေႃးႁဵၵ်ႈလူင် ဢိၵ်ႇတင်းၽႃႇရီႉသႄးၸိူဝ်းၼၼ်ႉ ပွႆႇၸႂ်ႉၵူၼ်းဢွၼ်ႇတင်းလၢႆ ၵႂႃႇႁႂ်ႈလႆႈတီႉဢဝ်မၼ်းၸဝ်ႈဢေႃႈ။- 33ယေႇသူႉၵေႃႈလၢတ်ႈလႄႈဝႃႈ၊ ၵဝ်ၼႆႉယူႇလူၺ်ႈၵၼ်တင်းသူႁိုင်ၵမ်းဢွၼ်ႇၼိုင်ႈၵူၺ်းသေယဝ်ႉ၊ တၵ်းလႆႈၵႂႃႇၵႃႈတီႈၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။- 34သူတၵ်းႁႃၵဝ်ဢေႃႈ။ ပိၵ်ႉသမ်ႉႁႃသေၵေႃႈ ဢမ်ႇလႆႈထူပ်းလႆႈႁၼ်၊ တီႈဢၼ်ၵဝ်မီးၼၼ်ႉ။ သူဢမ်ႇႁွတ်ႈဢမ်ႇထိုင်လႆႈ၊ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်၊- 35ၵူၼ်းယူႉတႃႉၸိူဝ်းၼၼ်ႉ၊ ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်လႄႈဝႃႈ၊ ၼင်ႇႁိုဝ်ႁဝ်းတၵ်းဢမ်ႇထူပ်းဢမ်ႇႁၼ်ၸိုင်၊ မၼ်းတၵ်းၵႂႃႇၵႃႈတီႈလႂ်။ တၵ်းၵႂႃႇၵႃႈတီႈၶဝ်ၸိူဝ်းဢၼ်ၽၢတ်ႇၽႄၵၼ်ယူႇၵူႈတီႈၵူႈလႅၼ် ၼႂ်းၵူၼ်းႁေႇလသႃႉတင်းလၢႆသေလႄႈ ႁေႃးလၢတ်ႈတြႃးတီႈၵူၼ်းႁေႇလသႃႉၸိူဝ်းၼၼ်ႉယူႇႁိုဝ်။- 36ၵႂၢမ်းဢၼ်မၼ်းလၢတ်ႈလႄႈဝႃႈ၊ သူတၵ်းႁႃၵဝ်ဢေႃႈ။ ပိၵ်ႉသမ်ႉႁႃသေၵေႃႈဢမ်ႇလႆႈထူပ်းလႆႈႁၼ်။ ၵႃႈတီႈဢၼ်ၵဝ်မီးၼၼ်ႉသူဢမ်ႇႁွတ်ႈဢမ်ႇထိုင်လႆႈ၊ ဝႃႈၼင်ႇၼႆၼၼ်ႉ ၶႂ်ႈဝႃႈၸိူဝ်ႉၼင်ႇႁိုဝ်၊ ဝႃႈၼင်ႇၼႆဢေႃႈ။

37ၼႂ်းဝၼ်းဢၼ်ယႂ်ႇမျၢတ်ႈ ဢၼ်ပဵၼ်ဝၼ်းလိုၼ်းလင်သုတ်းပွႆးၼၼ်ႉ၊ ယေႇသူႉၸုၵ်းယူႇသေလႄႈ ႁွင်ႉလၢတ်ႈလႄႈဝႃႈၸမ်ႉ၊ ပေႃးသေၵေႃႉသေၵူၼ်းယၢၵ်ႇၼမ်ႉၸိုင်မႃးတီႈၵဝ်လႄႈၵိၼ်တႃႉ။- 38ၵေႃႉဢၼ်ယုမ်ႇမၢတ်ႈၵဝ်ၼၼ်ႉၸမ်ႉ၊ ၵႃႈၼင်ႇဢၼ်ၵျၢမ်းလိၵ်ႈမႃးၼၼ်ႉ၊ ၼမ်ႉႁွင်ႈဢသၢၵ်ႈတင်းလၢႆ တၵ်းဢွၵ်ႇသေၵႃႈၼႂ်းတွင်ႉမၼ်းလႄႈ လႆၵႂႃႇယူႇဢေႃႈ၊ ဝႃႈၼင်ႇၼႆဢေႃႈ။- 39မိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉၸိုင်၊ မၼ်းၸဝ်ႈဢဝ်လွင်ႈဝီႉၺိၺ်ႇၸဝ်ႈဢၼ်ၶဝ်ၸိူဝ်းဢၼ်ယုမ်ႇမၢတ်ႈတင်းလၢႆ၊ တၵ်းလႆႈၶၢမ်ႇၼၼ်ႉလႄႈဝႃႈဢေႃႈ။ ပိူဝ်ႈဢၼ်မုၼ်ၽုင်းယေႇသူႉ ဢမ်ႇပႆႇပေႃႇပႆႇဢွၵ်ႇလႄႈ တီႈဢၼ်တၵ်းပၼ် ဝီႉၺိၺ်ႇဢၼ်မူတ်းၸၢင်ႇၸဝ်ႈဢမ်ႇပႆႇမီး။

40ၶဝ်ၸိူဝ်းဢၼ်ငိၼ်းၵႂၢမ်းမၼ်းၸဝ်ႈၸိူဝ်းၼၼ်ႉ ၵမ်ႈၽွင်ႈၵေႃႈဝႃႈ၊ ၵေႃႉၼႆႉပဵၼ်ပရေႃးၽႅတ်ႈဢၼ်တၵ်းမႃးၼၼ်ႉၸႂ်ႈတႄႉ၊ ဝႃႈၼင်ႇၼႆဢေႃႈ။- 41ၵမ်ႈၽွင်ႈၵေႃႈဝႃႈ၊ ၵေႃႉၼႆႉပဵၼ်ၸဝ်ႈၶရိၸ်ႈဢေႃႈ၊ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ ၸဝ်ႈၶရိၸ်ႈတၵ်းပေႃႇဢွၵ်ႇမႃး ၵႃႈၼႂ်းမိူင်းၵႃႇလီႉလႄးႁိုဝ်။- 42ၵျၢမ်းလိၵ်ႈမီးမႃးလႄႈဝႃႈ၊ ၸဝ်ႈၶရိၸ်ႈၼၼ်ႉတၵ်းလႆႈပေႃႇဢွၵ်ႇမႃး ၵႃႈၼႂ်းၸိူဝ်ႉၶိူဝ်းတႃႇဝိတ်ႈ တီႈဢၼ်တႃႇဝိတ်ႈယူႇဝၢၼ်ႈပႅတ်ႉလႁႅမ်ႇၼၼ်ႉဢေႃႈ၊ ဝႃႈၼင်ႇၼႆဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။- 43ၼင်ႇၼၼ်လႄႈၵူၼ်းၸိူဝ်းၼၼ်ႉၽၢတ်ႇၽႄၵၼ်ၵွပ်ႈပိူဝ်ႈမၼ်းၸဝ်ႈဢေႃႈ။- 44ၵူၼ်းၵမ်ႈၽွင်ႈမီးဢလူဝ်ႇၶႂ်ႈတီႉဢဝ်မၼ်းၸဝ်ႈဢေႃႈ။ ၼႂ်းဝႃႈၼၼ်သေၵေႃႈ ၽူႈလႂ်သေၵေႃႉသေၵူၼ်းဢမ်ႇတီႉဢမ်ႇဢဝ်။

ၵူၼ်းဢွၼ်ႁူဝ်မဵဝ်းယူႉတႃႉၶဝ်ဢမ်ႇယုမ်ႇမၢတ်ႈ

45မိူဝ်ႈၼၼ်ႉၵူၼ်းဢွၼ်ႇၸိူဝ်းၼၼ်ႉ ၶိုၼ်းမိူဝ်းၸူးၵႃႈတီႈယိတ်ႈပရေႃးႁဵၵ်ႈလူင် ဢိၵ်ႇတင်းၽႃႇရီႉသႄးၸိူဝ်းၼၼ်ႉလႄႈ ၶုၼ်ၸိူဝ်းၼၼ်ႉၵေႃႈတွင်ႈထၢမ်လႄႈဝႃႈ၊ ႁဵတ်းႁိုဝ်လႄႈ သူဢမ်ႇဢဝ်မၼ်းမႃးၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 46ၵူၼ်းဢွၼ်ႇၸိူဝ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၽူႈလႂ်သေၵေႃႉသေၵူၼ်းဢမ်ႇပႆႇတွၼ်ႉႁေႃးတွၼ်ႉလၢတ်ႈၸိူဝ်ႉၼင်ႇဢၼ်ၵေႃႉၼၼ်ႉႁေႃးလၢတ်ႈၼၼ်ႉသေပွၵ်ႈၶႃႈ၊ ဝႃႈၼင်ႇၼႆဢေႃႈ။- 47ၽႃႇရီႉသႄးၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ သူၵေႃႈၶၢမ်ႇတၢင်းဢၼ်ပႅတ်ႉဢၼ်လႅၼ်ယဝ်ႉႁိုဝ်။- 48ၼႂ်းၶုၼ်ဢိၵ်ႇတင်းၽႃႇရီႉသႄးတင်းလၢႆ ၵေႃႉဢၼ်ယုမ်ႇမၢတ်ႈမၼ်းၼၼ်ႉမီးသေၵေႃႉသေၵူၼ်းႁိုဝ်။- 49ၵူၺ်းၵႃႈၵူၼ်းဢၼ်ဢမ်ႇႁူႉတြႃးၼမ်ၼႃႇၸိူဝ်းၼႆႉ ပဵၼ်ၵေႃႉဢၼ်လႆႈၶၢမ်ႇတၢင်းၵိၼ်ႇတၢင်းဝႃႈဢေႃႈ၊ ဝႃႈၼင်ႇၼႆဢေႃႈ။- 50ၼီႉၵေႃးတိၼ်ႇဢၼ် မႃးၵႃႈတီႈမၼ်းၸဝ်ႈၼႂ်းၶိင်ႇၵၢင်ၶိုၼ်း ဢၼ်ၶဝ်ႈပႃးၵႃႈၼႂ်းၶုၼ်ၸိူဝ်းၼၼ်ႉၵေႃႈ လၢတ်ႈလႄႈဝႃႈ၊- 51တြႃးႁဝ်းၼႆႉ၊ ၸူဝ်ႈဢၼ်ဢမ်ႇပႆႇၸႅတ်ႈတူၺ်းၵူၼ်းလႄႈ ႁူႉဢမူႉမၼ်းယဝ်ႉၼၼ်ႉ ၸၢင်ႈၸီႇယၢင်ႇဢွၼ်တၢင်းႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 52ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ မႂ်းၵေႃႈပဵၼ်ၵူၼ်းမိူင်းၵႃႇလီႉလႄး ႁိုဝ်။ လွင်ႈဢၼ်ပရေႃးၽႅတ်ႈ သေၸဝ်ႈသေပႃး ဢမ်ႇပေႃႇဢမ်ႇဢွၵ်ႇမႃးၵႃႈၼႂ်းမိူင်းၵႃႇလီႉလႄးၼၼ်ႉၸိုင်၊ ၸႅတ်ႈထၢမ်ႁႃတူၺ်းလူးၵွၼ်ႇတႃႉ၊ ဝႃႈၼင်ႇၼႆသေယဝ်ႉ၊- 53ၵူႈၵေႃႉၵူႈၵူၼ်း ၵႂႃႇၵႃႈတီႈႁိူၼ်းတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းသေဢေႃႈ။

বর্তমানে নির্বাচিত:

ယူဝ်းႁၢၼ်ႇ 7: CBMS

হাইলাইট

কপি