ယူဝ်းႁၢၼ်ႇ 2

ပွႆးသွင်ႇမင်ႇၵလႃႇၼႂ်းဝဵင်းၵႃႇၼႃႉ

1မိူဝ်ႈဢၼ်ထိုင်ႁွတ်ႈသၢမ်ဝၼ်းၸိုင်၊ ၶဝ်ၶၢမ်ႇပွႆးသွင်ႇမင်ႇၵလႃႇ ၵႃႈၼႂ်းဝဵင်းၵႃႇၼႃႉ မိူင်းၵႃႇလီႉလႄးယူႇလႄႈ ၵႃႈတီႈပွႆးၼၼ်ႉ မီးမႄႈၸဝ်ႈ ယေႇသူႉဢေႃႈ။- 2ယေႇသူႉတင်းတပႄးၸဝ်ႈတင်းလၢႆၵေႃႈ ၶဝ်ႁွင်ႉပၢင်းၵႂႃႇၵႃႈတီႈပွႆးၼၼ်ႉဢေႃႈ။- 3မိူဝ်ႈဢၼ်ၼမ်ႉၸပိတ်ႈသဵင်ႈၵႂႃႇၸိုင်၊ မႄႈၸဝ်ႈယေႇသူႉၵေႃႈမွၵ်ႇလၢတ်ႈတီႈမၼ်းၸဝ်ႈလႄႈဝႃႈ၊ ၶဝ်ဢမ်ႇမီးၼမ်ႉၸပိတ်ႈယဝ်ႉ၊ ဝႃႈၼင်ႇၼႆဢေႃႈ။- 4ယေႇသူႉၵေႃႈလၢတ်ႈလႄႈဝႃႈ၊ မႄႈယိင်းဢိူၺ်း၊ မႂ်းၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်။ ၶိင်ႇၼႃႇရီႇၵဝ်ဢမ်ႇပႆႇႁွတ်ႈပႆႇထိုင်၊ ဝႃႈၼင်ႇၼႆဢေႃႈ။- 5မႄႈၸဝ်ႈၵေႃႈလၢတ်ႈတီႈၵူၼ်းၸႂ်ႉၵူၼ်းသွႆၸိူဝ်းၼၼ်ႉလႄႈဝႃႈ၊ သူႁဵတ်းၸွမ်းၵႃႈဢၼ်မၼ်းၼႆႉၸႂ်ႉႁဵတ်းတင်းသဵင်ႈတင်းလူင်ၼၼ်ႉတႃႉ၊ ဝႃႈၼင်ႇၼႆဢေႃႈ။- 6ၵႃႈတီႈၼၼ်ႈ မီးမေႃႈမၢၵ်ႇႁိၼ်ႁူၵ်းလုၵ်ႈ ဢၼ်ၶဝ်ႈသေသွင်သၢမ်တၢင်ၸမ်ၸမ်ၼၼ်ႉ တမ်းဝႆႉယူႇပုၼ်ႈလွင်ႈၼင်ႇႁိုဝ် တၵ်းႁႂ်ႈမူတ်းသႂ်ၸွမ်းၼင်ႇထုင်းၸၢမ်ႇ ၽႃႇသႃႇယူႉတႃႉၼၼ်ႉဢေႃႈ။- 7ယေႇသူႉၵေႃႈလၢတ်ႈတီႈၶဝ်ၼၼ်ႉလႄႈဝႃႈ၊ ဢဝ်ၼမ်ႉသႂ်ႇၼႂ်းမေႃႈၼမ်ႉၸိူဝ်းၼႆႉႁႂ်ႈတဵမ်ဝႆႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင် ၶဝ်ၼၼ်ႉဢွၼ်ၵၼ်ဢဝ်သႂ်ႇထၼ်ႈပေႃးၸမ်တၵ်းလူၼ်ႉဢေႃႈ။- 8မၼ်းၸဝ်ႈၵေႃႈလၢတ်ႈလႄႈဝႃႈ၊ တေႃႈလဵဝ်ၼႆႉတဵၵ်းလႄႈ ဢဝ်ၵႂႃႇၵႃႈတီႈၵေႃႉဢၼ်ဢုပ်ႉၼိူဝ်ပွႆးပုၼ်ႉတႃႉဝႃႈၼႆ၊ ၵႃႈၼင်ႇဢၼ်ဝႃႈၼၼ်ႉ၊ ၶဝ်ဢဝ်ၵႂႃႇဢေႃႈ။- 9ၵေႃႉဢၼ်ဢုပ်ႉၼိူဝ်ပွႆးၼၼ်ႉၸိမ်းတူၺ်းၼမ်ႉဢၼ် ႁႂ်ႈပဵၼ်ၼမ်ႉၸပိတ်ႈၼၼ်ႉလႄႈ ပိၵ်ႉသမ်ႉၵူၼ်းၸႂ်ႉၵူၼ်းသွႆဢၼ်တဵၵ်းၼမ်ႉၸိူဝ်းၼၼ်ႉႁူႉလွင်ႈဢၼ်လႆႈၼမ်ႉၸပိတ်ႈၼၼ်ႉၵႃႈတီႈလႂ်ၼၼ်ႉသေၵေႃႈ၊ ပိူဝ်ႈဢၼ်ၵေႃႉဢၼ်ဢုပ်ႉၼိူဝ်ပွႆးၼၼ်ႉ ဢမ်ႇႁူႉလႄႈမၼ်းႁွင်ႉလၢတ်ႈတီႈၵေႃႉဢၼ်သွင်ႇမင်ႇၵလႃႇၼၼ်ႉလႄႈဝႃႈ၊- 10ပိူၼ်ႈတၢင်ႇၵေႃႉတၢင်ႇၵူၼ်းၸမ်ႉ၊ ၵေႃႉလႂ်သေဢမ်ႇဝႃႈ ၸၢင်ႈသႂ်ႇတမ်းပၼ်ၼမ်ႉၸပိတ်ႈဢၼ်လီဢွၼ်တၢင်းလႄႈ ၵိၼ်ဢိမ်ႇယဝ်ႉၸင်ႇ သႂ်ႇတမ်းပၼ်ၼမ်ႉၸပိတ်ႈဢၼ်ဢမ်ႇလီဢေႃႈ။ မႂ်းၸမ်ႉ၊ ဢဝ်ၼမ်ႉၸပိတ်ႈဢၼ်လီသိမ်းဝႆႉႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉယဝ်ႉ၊ ဝႃႈၼင်ႇၼႆဢေႃႈ။- 11ၼင်ႇၼၼ်လႄႈ ယေႇသူႉၼႄပျႃးၼီႉမိၵ်ႈလၢၵ်ႈၶၼႃႇဢၼ်ၼႆႉဢၼ်ပဵၼ်ဢွၼ်တၢင်းပိူၼ်ႈၵႃႈၼႂ်းဝဵင်းၵႃႇၼႃႉ မိူင်းၵႃႇလီႉလႄးလႄႈႁႂ်ႈမုၼ်ၽုင်းၸဝ်ႈထၢင်ႇသႃးဢေႃႈ။ တပႄးၸဝ်ႈၸိူဝ်းၼၼ်ႉၵေႃႈယုမ်ႇမၢတ်ႈမၼ်းၸဝ်ႈဢေႃႈ။

ၸဝ်ႈယေႇသူႉႁႂ်ႈၵျွင်းပိၵ်ႈမၢၼ်ႇၸဝ်ႈမူတ်းၸၢင်ႇ

(တူၺ်း၊ မၢတ်ႈ 21:12-13။ မႃႇ 11:15-17။ လူႉ 19:45-46)

12လိုၼ်းၼၼ်ႉ ၸႃႉၸဵမ်မၼ်းၸဝ်ႈလႄႈ မႄႈၸဝ်ႈ၊ ၼွင်ႉၸၢႆးၸဝ်ႈတင်းလၢႆဢိၵ်ႇတင်းတပႄးၸဝ်ႈၸိူဝ်းၼၼ်ႉလူင်းၵႂႃႇၵႃႈတီႈဝဵင်းၵပိူဝ်ႇၼေႇဢုမ်ႇဢေႃႈ။ ၶဝ်ဢမ်ႇယူႇၵႃႈတီႈဝဵင်းၼၼ်ႉႁိုင်ၼႃႇလူင်လၢင်လႄႈ၊- 13မိူဝ်ႈဢၼ်ၸမ်တၵ်းထိုင်ၶိင်ႇပွႆးပႃႉသၶႃႇယူႉတႃႉၸိုင်ယေႇသူႉၶိုၼ်ႈၸူးၵႃႈတီႈဝဵင်းယေႇရူႉသလႅမ်ႇဢေႃႈ။- 14မၼ်းၸဝ်ႈထူပ်းႁၼ်ၶဝ်ၸိူဝ်းဢၼ်ၶၢႆသူဝ်းဝူဝ်း ၼူၵ်ႉတူႈ ဢိၵ်ႇတင်းၵူၼ်းဢၼ်လႅၵ်ႈငိုၼ်းတင်းလၢႆၼင်ႈလႄႈ မီးယူႇၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉသေယဝ်ႉ၊- 15ဢဝ်ၸိူၵ်ႈဢွၼ်ႇႁွမ်းၵၼ် မႄးႁဵတ်းၶိူင်ႈပိူင်ဢၼ်တၵ်းလႆႈယႅၼ်ႉၽတ်ႉၶဝ်ၼၼ်ႉယဝ်ႉၸင်ႇ ႁေႃႈၶဝ်တင်းသဵင်ႈတင်းလူင် ဢိၵ်ႇတင်းသူဝ်းဝူဝ်းတင်းလၢႆဢွၵ်ႇသေၵႃႈတီႈ ၼႂ်းပိၵ်ႈမၢၼ်ႇၸဝ်ႈၼၼ်ႉလႄႈ ဢဝ်ငိုၼ်းၵူၼ်းလႅၵ်ႈငိုၼ်းၸိူဝ်းၼၼ်ႉ ထွၵ်ႇပႅတ်ႈသေလႄႈဢီးၶူင်ႇတၢင်ႇငိုၼ်းၶဝ်ၼၼ်ႉၶႂမ်ႈပိၼ်ႈပႅတ်ႈဢေႃႈ။- 16တီႈၶဝ်ၸိူဝ်းဢၼ်ၶၢႆၼူၵ်ႉတူႈၸိူဝ်းၼၼ်ႉၵေႃႈ၊ မၼ်းၸဝ်ႈလၢတ်ႈလႄႈဝႃႈ၊ ဢဝ်ဢုၵ်ႉၸႃႇၶွင်ၸိူဝ်းၼႆႉၵႂႃႇသေတႃႉ။ ယႃႇပေဢဝ်ႁိူၼ်းပေႃႈၵဝ်ႁဵတ်းႁိူၼ်းၶူဝ်းၵုၼ်ႇၶူဝ်းသိၼ်၊ ဝႃႈၼင်ႇၼႆဢေႃႈ။- 17မိူဝ်ႈၼၼ်ႉ တပႄးၸဝ်ႈၸိူဝ်းၼၼ်ႉ ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၵျၢမ်းလိၵ်ႈမီးမႃးလႄႈဝႃႈ၊ ၸႂ်ဢၼ်ၸပ်းဢၼ်ၸွႆးယၢပ်ႇၸႂ်လူၺ်ႈလွင်ႈႁိူၼ်းၸဝ်ႈႁဝ်းၼႆႉၵိၼ်ၵဝ်ၶႃႈတီႈၶႃႈဢေႃႈ၊ ဝႃႈၼင်ႇၼႆၼၼ်ႉဢေႃႈ။

18ၵူၼ်းယူႉတႃႉတင်းလၢႆၵေႃႈလၢတ်ႈလႄႈဝႃႈ၊ ပေႃးတၵ်းႁဵတ်းၸိူဝ်ႉၼင်ႇၼႆၸိုင်၊ မႂ်းတၵ်းၼႄပျႃးၼီႉမိၵ်ႈလၢၵ်ႈၶၼႃႇဢၼ်လႂ်တီႈႁဝ်း၊ ဝႃႈၼင်ႇၼႆဢေႃႈ။- 19ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ပိၵ်ႈမၢၼ်ႇၸဝ်ႈၼႆႉၸိုင်သူၵိူၼ်ႇယႃႉပႅတ်ႈသေတႃႉ။ ၼႂ်းသၢမ်ဝၼ်းၵဝ်တၵ်းမႄးႁဵတ်းဢေႃႈ၊ ဝႃႈၼင်ႇၼႆဢေႃႈ။- 20ၵူၼ်းယူႉတႃႉၸိူဝ်းၼၼ်ႉၵေႃႈလၢတ်ႈလႄႈဝႃႈ၊ လႆႈႁဵတ်းပိၵ်ႈမၢၼ်ႇၸဝ်ႈၼႆႉသီႇသိပ်းပၢႆႁူၵ်းပီႊတဵမ်တဵမ်ဢေႃႈ။ မႂ်းၸမ်ႉတၵ်းမႄးႁဵတ်းၼႂ်းသၢမ်ဝၼ်းၵူၺ်းႁိုဝ်၊ ဝႃႈၼင်ႇၼႆဢေႃႈ။- 21ၵူၺ်းၵႃႈမၼ်းၸဝ်ႈဢဝ်လွင်ႈတူဝ်မၼ်းၸဝ်ႈဢၼ်ဝႃႈပိၵ်ႈမၢၼ်ႇၼၼ်ႉလၢတ်ႈဝႃႈဢေႃႈ။- 22ပိူဝ်ႈၼႆလႄႈ ဝၢႆးသေမၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းယဝ်ႉၼၼ်ႉ၊ တပႄးၸဝ်ႈၸိူဝ်းၼၼ်ႉၶုၵ်းၸႂ်လႆႈၶႆႈၸႂ်ထူပ်းၵႂၢမ်းမၼ်းၸဝ်ႈလၢတ်ႈဝႆႉၼၼ်ႉလႄႈယုမ်ႇဢဝ်ၵျၢမ်းလိၵ်ႈဢိၵ်ႇတင်းၼုၵ်ႈၵပၢတ်ႈယေႇသူႉဢေႃႈ။

23မိူဝ်ႈဢၼ် ယေႇသူႉ မီးၵႃႈၼႂ်းဝဵင်းယေႇရူႉသလႅမ်ႇ၊ ၼႂ်းပွႆးပႃႉသၶႃႇၼၼ်ႉၸိုင် ၵူၼ်းၼမ်ၼႃႇလႆႈႁၼ်ၼီႉမိၵ်ႈလၢၵ်ႈၶၼႃႇဢၼ်မၼ်းၸဝ်ႈၼႄပျႃးၸိူဝ်းၼၼ်ႉသေယဝ်ႉ၊ ႁွတ်ႈထိုင်တၢင်းဢၼ်ယုမ်ႇမၢတ်ႈမၼ်းၸဝ်ႈဢေႃႈ။- 24ၼႂ်းဝႃႈၼၼ်သေၵေႃႈ၊ယေႇသူႉဢမ်ႇဢၢပ်ႈတူဝ်ၸဝ်ႈၵဝ်ႇတီႈၶဝ်။ လွင်ႈမၼ်းၸမ်ႉ မၼ်းၸဝ်ႈႁူႉၵူၼ်းတင်းသဵင်ႈတင်းလူင်ယူႇဢေႃႈ။- 25ပိူဝ်ႈဢၼ်မၼ်းၸဝ်ႈႁူႉၵႃႈဢၼ်မီးၵႃႈၼႂ်းၵူၼ်းယူႇလႄႈ မၼ်းၸဝ်ႈဢမ်ႇလူဝ်ႇၽူႈလႂ်သေၵေႃႉသေၵူၼ်းပုၼ်ႈဢၼ်တၵ်းၶၢမ်ႇသၢၵ်ႈသေႇလွင်ႈၵူၼ်း။

বর্তমানে নির্বাচিত:

ယူဝ်းႁၢၼ်ႇ 2: CBMS

হাইলাইট

কপি