ငဝ်ႈၵမ်ႇၽႃႇ 16
16
ႁႃႇၵရႃႉတင်းဢီႉသမေႇလႃႉ
1 ၸႃႇရေး မေးဢႃႇပြမ်ႇၼၼ်ႉဢမ်ႇမီးတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းလႄႈတီႈမၼ်းၼၼ်ႉ မီးမႄႈယိင်းၶႃႈဢၼ်လႆႈၸိုဝ်ႈ ႁႃႇၵရႃႉ ၵူၼ်းမိူင်းဢေႇၵိပ်ႉတူႉၼၼ်ႉၵေႃႉၼိုင်ႈဢေႃႈ။- 2ၸႃႇရေးၵေႃႈလၢတ်ႈတီႈဢႃႇပြမ်ႇလႄႈဝႃႈ၊ ထႃႇဝရႃႉၽြႃးဢမ်ႇပၼ်ဢၶႂၢင်ႉတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းတီႈၵဝ်ၶႃႈ။ ပိူဝ်ႈၼႆလႄႈ ၶဝ်ႈၸူးၵႃႈတီႈမႄႈယိင်းၶႃႈၵဝ်ၶႃႈတႃႉ။ ၵဝ်ၶႃႈၸၢင်ႈၶႄးတၵ်းလႆႈလုၵ်ႈလႆႈလၢင်းတီႈမၼ်းၼၼ်ႉဢေႃႈ ဝႃႈၼင်ႇၼႆလႄႈဢႃႇပြမ်ႇၵေႃႈထွမ်ႇဢဝ်ၵႂၢမ်းၸႃႇရေးၼၼ်ႉဢေႃႈ။- 3ၼင်ႇၼၼ်လႄႈ ဢႃႇပြမ်ႇယူႇၵႃႈၼႂ်းမိူင်းၶႃႇၼၢၼ်ႇသိပ်းသွင်ပီႊယဝ်ႉ၊ ၸႃႇရေးမေးဢႃႇပြမ်ႇၼၼ်ႉ ၸင်ႇဢဝ်မႄႈယိင်းၶႃႈမၼ်းႁႃႇၵရႃႉၵူၼ်းဢေႇၵိပ်ႉတူႉၼၼ်ႉသေလႄႈ ဢၢပ်ႈပၼ်တီႈၽူဝ်မၼ်းဢႃႇပြမ်ႇႁႂ်ႈလႆႈဢဝ်ႁဵတ်းမေးဢေႃႈ။- 4မၼ်းၼၼ်ႉၵေႃႈၶဝ်ႈၸူးၵႃႈတီႈႁႃႇၵရႃႉလႄႈ ႁႃႇၵရႃႉပႃးပတိၵ်ႉသၼ်ႇထေႇဢေႃႈ။ မိူဝ်ႈဢၼ်မၼ်းႁူႉလွင်ႈဢၼ်မၼ်းပႃးပတိၵ်ႉသၼ်ႇထေႇၼၼ်ႉၸိုင်၊ မၼ်းႁဵတ်းဢမ်ႇပေႃးၼင်ႇႁိုဝ်တီႈၸဝ်ႈၼၢင်းမၼ်းဢေႃႈ။- 5ၸႃႇရေးၵေႃႈလၢတ်ႈတီႈဢႃႇပြမ်ႇလႄႈဝႃႈ၊ ႁႂ်ႈဢပႅတ်ႈဢၼ်ၵဝ်ၶႃႈလႆႈၶၢမ်ႇၼႆႉ မီးၵႃႈၼိူဝ်ၸဝ်ႈႁဝ်းသေၵမ်းလူၺ်ႈ။ ၵဝ်ၶႃႈဢဝ်မႄႈယိင်းၶႃႈၵဝ်ၶႃႈ ဢၢပ်ႈပၼ်ၵႃႈၼႂ်းဝၢင်ႈႁူဝ်ဢူၵ်းၸဝ်ႈႁဝ်းယဝ်ႉ။ မိူဝ်ႈဢၼ်မၼ်းႁူႉလွင်ႈဢၼ်မၼ်းပႃးပတိၵ်ႉသၼ်ႇထေႇၼၼ်ႉၸိုင်၊ မၼ်းႁဵတ်းဢမ်ႇပေႃးၼင်ႇႁိုဝ်တီႈၵဝ်ၶႃႈလူင်ပႄႇ။ ႁႂ်ႈထႃႇဝရႃႉၽြႃးၸီႇယၢင်ႇဢမူႉ ဝူင်ႈၵၢင်ၵဝ်ၶႃႈတင်းၸဝ်ႈႁဝ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။- 6ဢႃႇပြမ်ႇၵေႃႈလၢတ်ႈတီႈၸႃႇရေးလႄႈဝႃႈ၊ တူၺ်းလူး၊ မႄႈယိင်းၶႃႈမႂ်းၼၼ်ႉမီးယူႇၼႂ်းမိုဝ်းမႂ်းဢေႃႈ။ မႂ်းၶႂ်ႈႁဵတ်းၸိူဝ်ႉၼင်ႇႁိုဝ်တီႈမၼ်းၵေႃႈႁဵတ်းသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ ၸႃႇရေးၼိၵ်ႈၸၢၵ်ႈငႅၼ်းသႄးမႄႈယိင်းၶႃႈၼၼ်ႉလႄႈ မၼ်းၼၼ်ႉဢွၵ်ႇသေၵႃႈတီႈၸဝ်ႈၼၢင်းမၼ်းလႄႈ ပၢႆႈၵႂႃႇတၢင်ႇတီႈသေဢေႃႈ။
7တမၢၼ်ႇၵၢင်ႁၢဝ်ထႃႇဝရႃႉၽြႃးထူပ်းႁၼ်မၼ်း ၵႃႈတီႈႁိမ်းၼမ်ႉမေႃႇဢွၵ်ႇႁူးၵႃႈတီႈထိူၼ်ႇ တီႈသဵၼ်ႈတၢင်းဢၼ်ၵႂႃႇၸူး ဝဵင်းသူႉရႃႉၼၼ်ႉသေယဝ်ႉ၊- 8ထၢမ်လႄႈဝႃႈ၊ ႁႃႇၵရႃႉ မႄႈယိင်းၶႃႈၸႃႇရေးဢိူၺ်း၊ မႂ်းလုၵ်ႉသေၵႃႈတီႈလႂ်မႃး၊ တၵ်းၵႂႃႇၵႃႈတီႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈဢွၵ်ႇပၢႆႈသေၵႃႈတီႈၸဝ်ႈၼၢင်းၶႃႈၸဝ်ႈၸႃႇရေးမႃးၶႃႈဢေႃႈ၊ ဝႃႈၼင်ႇၼႆဢေႃႈ။- 9တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊ ၶိုၼ်းမိူဝ်းၸူးၵႃႈတီႈၸဝ်ႈၼၢင်းမႂ်းသေလႄႈ ၶၢမ်ႇတၢင်းဢၼ်မၼ်း ဢုပ်ႉပိူင်ႇလူးၵွၼ်ႇတႃႉ၊ ဝႃႈၼင်ႇၼႆဢေႃႈ။- 10ၵမ်းၼၼ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃးသမ်ႉလၢတ်ႈလႄႈဝႃႈ၊ ၵဝ်တၵ်းႁႂ်ႈၸိူဝ်ႉၶိူဝ်းမႂ်းယႂ်ႇၽႄႈၼမ်ၵိုၼ်းမႃးတေႃႇထိုင်ႁွတ်ႈ ထၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈဢေႃႈ၊ ဝႃႈၼင်ႇၼႆဢေႃႈ။- 11တမၢၼ်ႇၵၢင်ႁၢဝ်ထႃႇဝရႃႉၽြႃးသမ်ႉလၢတ်ႈတီႈမၼ်းထႅင်ႈလႄႈဝႃႈ၊ တူၺ်းလူး၊ မႂ်းပႃးပတိၵ်ႉသၼ်ႇထေႇလႄႈတၵ်းၵိူတ်ႇလဵင်ႉလုၵ်ႈၸၢႆးမႃးဢေႃႈ။ လုၵ်ႈၸၢႆးၼၼ်ႉၸိုင်၊ မႂ်းတၵ်းလႆႈႁွင်ႉႁဵၵ်ႈၸိုဝ်ႈ ဢီႉသမေႇလႃႉဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးလႆႈႁူႉလႆႈငိၼ်း လွင်ႈတုၵ်ႉၶႃႉတၢင်းၽၢၼ်မႂ်းယဝ်ႉ။- 12မၼ်းတၵ်းပဵၼ်ၸိူဝ်ႉၼင်ႇလီႈ ဢၼ်ရိူင်းၵျၢမ်းၼၼ်ႉၵႃႈၼႂ်းၵူၼ်းတင်းလၢႆဢေႃႈ။ ၶႅၼ်မၼ်းမိုဝ်းမၼ်းတၵ်းႁဵတ်းရၢၼ်ႇ ယူႇၽၢႆႇၼိုင်ႈတင်းၵူၼ်းတင်းသဵင်ႈတင်းလူင်လႄႈ ၶႅၼ်မိုဝ်းၵူၼ်းတင်းသဵင်ႈတင်းလူင်ၵေႃႈ တၵ်းႁဵတ်းရၢၼ်ႇ ယူႇၽၢႆႇၼိုင်ႈတင်းမၼ်းဢေႃႈ။ မၼ်းတၵ်းလႆႈယူႇၵႃႈတီႈႁိမ်းပီႈႁိမ်းၼွင်ႉမၼ်းတင်းသဵင်ႈတင်းလူင်ၼၼ်ႉဢေႃႈ၊ ဝႃႈၼင်ႇၼႆဢေႃႈ။
13 ႁႃႇၵရႃႉႁွင်ႉႁဵၵ်ႈၸိုဝ်ႈထႃႇဝရႃႉၽြႃး ဢၼ်မွၵ်ႇလၢတ်ႈၸိူဝ်ႉၼင်ႇၼၼ်ၼၼ်ႉလႄႈဝႃႈ၊ ၸဝ်ႈပဵၼ်ၽြႃးပဵၼ်ၸဝ်ႈ ဢၼ်ၶႃႈၸဝ်ႈလႆႈႁၼ်ယဝ်ႉ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ မၼ်းဝႃႈ၊ ဝၢႆးသေၵဝ်ႁၼ်မၼ်းၸဝ်ႈယဝ်ႉၼၼ်ႉ ၵဝ်ယင်းႁၼ်ၵႃႈတီႈၼႆႈယူႇလူးၵွၼ်ႇႁိုဝ်။ ဝႃႈၼင်ႇၼႆဢေႃႈ။- 14ဢဝ်ၸၢပ်ႈလူၺ်ႈလွင်ႈၼၼ်ႉလႄႈ ႁွင်ႉႁဵၵ်ႈၸိုဝ်ႈၼမ်ႉမေႃႇၼၼ်ႉ ပေႇလႁေႇရွႆႇဢေႃႈ။ မီးဝူင်ႈၵၢင်ဝဵင်းၵႃႇတေႇသႃႉ တင်းဝဵင်းပေႇရိတ်ႉဢေႃႈ။
15ဝၢႆးၼၼ်ႉ ႁႃႇၵရႃႉၵိူတ်ႇလဵင်ႉလုၵ်ႈၸၢႆးတီႈဢႃႇပြမ်ႇဢေႃႈ။ ဢႃႇပြမ်ႇၵေႃႈႁွင်ႉႁဵၵ်ႈလုၵ်ႈၸၢႆးဢၼ်ႁႃႇၵရႃႉ ၵိူတ်ႇလဵင်ႉမႃးၼၼ်ႉ ၸိုဝ်ႈဢီႉသမေႇလႃႉဢေႃႈ။- 16ဢႃႇပြမ်ႇၼၼ်ႉ မိူဝ်ႈဢၼ်ႁႃႇၵရႃႉၵိူတ်ႇလဵင်ႉလုၵ်ႈၸၢႆး ဢီႉသမေႇလႃႉၼၼ်ႉၸိုင် ဢသၢၵ်ႈလႆႈပႅတ်ႇသိပ်းပၢႆႁူၵ်းပီႊဢေႃႈ။
বর্তমানে নির্বাচিত:
ငဝ်ႈၵမ်ႇၽႃႇ 16: CBMS
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
