Mata 4

Əbay sitene a dzik à Yesuw

Markus 1:12-13; Luka 4:1-13

1I dəba mifefile ata ya tsara ka, Mezite Mesife Mbulum a da à Yesuw a kusak diriŋ, dite ka, Əbay sitene ma dzik riŋ à ŋgat i fata. 2A ndza riŋ i fata mehinne dzik faɗ. I huɗ mehinne ata ya tserdze ka, aka mə̀ndzər dukw mezime tsidze, may a wurawa ahər hinne. 3Əbay sitene a samata kataya ka, a sìrìkaha a təv ŋgar. A daha, a gwaɗar: «Na kù gwa, iye Kəla Mbulum ka, gwaɗa a kur aaha ma ne ɗaf, dite ka zəm.» 4Yesuw a niw bazlam ŋgar ata, a gwaɗar aaka: «Mewetse ŋa a riŋ i wakita Mbulum ka, a gwa: <Mburma a ndze a aà bəra ka, nda ɗaf ɗekɗek tsa. A ndze a ka, nda bazlam ana Mbulum a tsik a ya tserdze.> «*fa*

5I dəba ŋa ya, Əbay sitene ata a da à ŋgat a batsah kwite Yeruzalem. A daha, a tsəl à ŋgat aka zligiɗìŋ aka gər ga Mbulum batsah ŋana. I fata ka, a hitse à ŋgat aka tsèke zəraŋaŋŋà ŋana. 6A gwaɗar asa: «Na kər Kəla Mbulum kaɗəŋ ndzer ka, ndàb a bəɗ i faha ya, aɗaba mewetse ŋa a riŋ i wakita Mbulum ka, a gwa: <Mbulum a slir a gà gawla ŋgar a aɗaba kər, a gweɗe a ter a: Dumaha, kətsawum ŋgat aà gəza mbulum a tsìfèk a bəɗ. Ka tə lak aba aà kur, duwa ma ndzak tsa.> «*fb* 7Yesuw a gwaɗar aaka asa: «A riŋ mewetse ŋa i wakita Mbulum mbaŋa, a gwa ka: <Ka ti dzik à Mbulum Batsah yak ŋa tsa.> «*fc*

8Tsam ka, i fataya tsara ka, Əbay sitene ata a da à ŋgat a gər kwite zùbəl ŋa duwa saləllà. Ti ndzeha a fata ka, a dza ba aà meɗifer à mekwere ana ika gər ahəɗ a, nda gà dukw ana iɗəm ŋgwal ŋa lele ya tserdze. 9A gwaɗar: «Gà dukw aaha fit dze ya ka, i vilekiŋa, na kàa dziŋ gurmits a bəɗ, kàa zàmbaɗa à iye ya.» 10I fataya ka, Yesuw a gwaɗar kuɗa: «I sər kər ka, Əbay sitene. Da i təv ga ya, aɗaba mewetse ŋa a riŋ i wakita Mbulum ka, a gwa: <Say ki zèmbeɗe a ka, à Mbulum Batsah yak ŋa ilik, na ki ger a meslire ya, tsəka, wura a ŋgiɗ a riŋ tsa.> «*fd* 11Əbay sitene ata a tsaraka kataya tsara ka, ŋgwìɗik a məsak à ŋgat, a da i təv ŋgar a. Tsam ka, gà gawla Mbulum tə dara a təv ŋgar a, ta ger gər lele kuɗa.

Mege megemir Yesuw ana a dza ahər ba ika ahəɗ Galile ya

Markus 1:14-15; Luka 4:14-15

12Akahər ata ka, ta gəs Yuhana, gədzə̀zl ti tike ŋgat a daŋgay. I dəba ŋa ya, Yesuw a tsaraka ta gwa là, tàa gəs Yuhana ka, a hitsera i fataya, a mah ba, a da aka ahəɗ Galile. 13I təv ana a riŋ a de a mba ya ka, a da nda kwite ŋgar Nazaret. I dəba ŋa ya, a miyak à kwite Nazaret ata asa. A ta mendze a Kafarnahum aà gùva duluv Galile. I fata ka, ahəɗ gà Zabulun nda Naftali. 14A ge kataya ka, kamala ana a riŋ mewetse ŋa i wakita Ezaya, mala məma à guma Mbulum ana a tsik akahər ata ya, a gwa:

15«A kurum gà mburma ana ika ahəɗ gà Zabulun

nda Naftali, nda gà na mandza ŋa aà gùva vatwa

mada a duluv batsah ŋana ya,

dite nda gà na ika lìdè dulwa Yurdan a.

A kurum ata mandza ŋa ika ahəɗ Galile ya tserdze,

dite asa ka, kà sərum Mbulum tsiye.

16Ama gà mburma ana i lùvùŋ kataya ka,

ta ŋget a a dzaydzay kweɗek kweɗek hinne.

Tar ana hìrzìzìmme mandza ŋa

aà huɗ sìsiye məməta,

ti ne kamala ana tar gà məməta ŋa ya ka,

a ge a terehe a dzaydzay.»*fe*

17Daga akahər ata tsara na Yesuw a dza ba aà metsìkè bazlam Mbulum a mburma ya. A gwaɗawa a tar ka: «Mbəɗum à madzala gà gər kurum a təv Mbulum, aɗaba mekwere ŋgar ana a kwere a ya ka, aka à mendzera.»

Yesuw a zal a gà ɓəzla magàsà kilif faɗ

Markus 1:16-20; Luka 5:1-11; Yuhana 1:35-51

18I dəba ŋa ya, Yesuw a da aà gùva duluv Galile. A sùwaya i fata ka, aka le aà gà wele duwa sula nda damər ŋgar. I ŋgiɗ ka, Simun ana ti ɗer Piyer a, tar nda damər ŋgar Andire. Tar riŋ ta pìl a à ndzàràwà tar a yam a duluv ata, aɗaba megemir tar ka, magàsà kilif. 19Yesuw a gwaɗa a taraha aɗəm: «Dumara, tàkwa, zazamum iye. I ne à kurum a gà ɓəzla mayahara mburma i luvuŋ a, kamala kilif aaha kurum riŋ ihər ki geswimere a i yam a, dite ka, gà mburma ata ibam, tə dara a təv dzaydzay ŋa ya.» 20I dəba bazlam ŋgar ata ya tsara ka, gà wele ata ta məsak aba à gà ndzàràwà tar a fataya, tə zazam ŋgat.

21A da aka miɗ zaakwa asa ka, aka ŋgataha a gà mìsle ŋgiɗ sula asa, a gà Zakup nda damər ŋgar Yuhana, gà ɓəza Zebede. Tar riŋ i slə̀làh yam i duluv nda gà tsir tar ata tserdze, tì lèmbeɗe a à gà ndzàràwà tar mbaŋa. Yesuw a zal a taraha aɗəm. 22Gà wele ata ta hitsera iɗəm a. Ta məsak aɗəm à tsir tar Zebede tsara, nda gà slə̀làh yam tar ata fit. Tar ŋa tə da nda gà Yesuw tserdze.

Yesuw a tsik guma ŋgar a mburma, dite a mbala

à gà ɓəzla dukw məməta

Markus 1:39; 3:7-8,10-11; Luka 4:44; 6:17-19

23Aləka i dəba ŋa ya, Yesuw a suwaya ika ahəɗ Galile tserdze. A tsikewa guma ŋgar a mburma i gà ga mahàmà a Mbulum. A tsikewa a tar bazlam ŋgwal ŋa ana biy mekwere Əbay Mbulum a asa mbaŋa. A mbala à gà ɓəzla dukw məməta, nda gà mburma ana gà magàha a bəɗ ŋa ya fit dze. 24I dəba ŋa ya, mege dukw ŋgar ata a ɗe zləm tsikw aka ahəɗ Siriya ana a mbeha a Galile ata ya. Tə tsaraka kataya ka, tə daha, tə ndzakaha gà ɓəzla dukw məməta ŋgiɗ pampam a təv ŋgar, gà na ndelèɓ ndelèɓ ti sèwèrewa are hinne i dukw məməta tar a, nda gà na sitene i ba tar a, dite nda gà na a beye à tar a dala ya, nda gà ɓəzla videl tserdze, a mbala à tar.

25I dəba ŋa ya, gà mburma mbə̀rzə̀zza hinne tə dawaha a təv ŋgar, tə zazamawa ŋgat, i Galile i fata, tsikw ara aka ahəɗ ana gà kwite iɗəm kurwa ya, dite nda gà na i Yeruzalem a, nda gà asiŋ ŋa ana a riŋ ika ahəɗ Yuda ya, nda gà mburma ana ika lìdè dulwa Yurdan a tserdze.

বর্তমানে নির্বাচিত:

Mata 4: gnd

হাইলাইট

কপি