يوحنا 1
1
أَوَاڒ ن أَربِّـي نتَّا ذ نُّوْر نتَّا ذ ثُوْذَارْث
1ذݣ ومزْوَارُو يدْجَا وَاوَاڒ.
أَوَاڒ نِّي يدْجَا اَك أَربِّـي.
أَوَاڒ نِّي ذ نتَّا إِݣ يدْجَان ذ أَربِّـي.
2ذݣ ومزْوَارُو يدْجَا اَك أَربِّـي.
3زَّايس إِي د يخْڒق أَربِّـي مَارَّا،
أُو بْڒَا اَوَاڒ نِّي وَار تِيڒِي ؤُڒَا ذ يجّن ن ثْمسْڒَايْث زِي مِين د يخْڒق.
4ذَايس إِي ثدْجَا ثُوْذَارْث،
أُو ثُوْذَارْث نِّي نتَّاث ذ نُّوْر إِ يِوْذَان.
5نُّوْر نِّي يتْشعْشِيع ذِي ثَادْجسْت،
ثَادْجسْت نِّي وَار ذَاس ثْزمَّر.
6يُوْسَا-د يجّن ن ورْيَاز يسّكّ-يث-يذ أَربِّـي قَّارن-اَس يَحْيَى. 7نتَّا يُوْسَا-د ذ شَّاهذ حمَا اَذ يشْهذ إِ نُّوْر، حمَا س شْهَاذث نّس اَذ اَمْنن مَارَّا يوْذَان. 8نتَّا يَحْيَى وَار يدْجِي شَا ذ نُّوْر؛ لَّا، يُوْسَا-د اَذ يشْهذ إِ نُّوْر، 9يعْنِي نُّوْر نِّي نِيشَان تُوْغَا د يتَاسن غَار دُّنشْت-أَ اَذ يشعْشع خ كُڒ بْنَاذم.
10نُّوْر نِّي تُوْغَا ئِدْجَا ذِي دُّنشْت. وَاخَّا ذ نتَّا إِݣ يݣِّين دُّنشْت، أَيثْبَاب ن دُّنشْت وَار ث سِّينن شَا. 11يُوْسَا-د غَار ثْمُوْرْث نّس، أَيثْبَاب ن ثْمُوْرْث نّس وَار ث قْبِيڒن شَا. 12يِنِّي إِي ث يقبْڒن ؤُمْنن زَّايس زݣ يِيسم نّس، يُوْشَا-ٱسن نتَّا ثِزمَّار حمَا اَذ ذوْڒن ذ ثَارْوَا ن أَربِّـي. 13يِيْنَا وَار د خْڒِيقن شَا عْلَاحْسَاب دُّوْرِّيث ؤُڒَا عْلَاحْسَاب مِين تخْس دَّات ؤُڒَا عْلَاحْسَاب ڒْخَاضَر ن ورْيَاز؛ لَّا، ذ أَربِّـي إِي ثن د يجِّين.
أَوَاڒ ن أَربِّـي نتَّا ذ سِيذِيثْنغ عِيْسَى لْمَسِيح
14أَوَاڒ-أَ يذْوڒ ذ بْنَاذم، ئِزْذغ جَارَانغ. نشِّين نࢲْرَا لْعَظَمَا غَارس يدْجَان، لْعَظَمَا-يَا ثدْجَا غَار مِّيس وَاحْذس ن بَابَاس. نتَّا يشُّوْر س اَرْضَا ذ لْحَقِيقَا. 15ئِشْهذ خَاس يَحْيَى، ئِتْبرَّاح ينَّا: "ذ وَا إِي خف تُوْغَا سِّيوْڒغ نِّيغ-اَوم اَذ د يَاس يجّن منْبَعْد إِ نش، وَلَكِن نتَّا يمْغَار خَافِي مِينْزِي تُوْغَاث قْبڒ مَا ٱذ يڒِيغ نش."
16س لْبَرَكَا نّس ثَمقّْرَانْت يبَرك-اَنغ مَارَّا س اَرْضَا خ اَرْضَا. 17شَّرِيعَا ن أَيث-إِسْرَائِيل ثمُّوْش خ وفُوْس ن مُوْسَى. اَرْضَا ذ لْحَقِيقَا نِثنْتِي ؤُسِينْت-يد خ وفُوْس ن عِيْسَى لمَسِيح. 18ؤُڒَا ذ يجّن وَار يࢲْرِي أَربِّـي عَمَّارْص. مِّيس وَاحْذس إِݣ يدْجَان ذݣ وُوْڒ ن بَابَاس ذ نتَّا إِي ذَانغ د يسْمظْهَارن سِيذِي أَربِّـي.
نَّبِي يَحْيَى يسوْجَاذ اَبْرِيذ إِ لْمَسِيح
19ذ ثَا ذ شْهَاذث ن يَحْيَى وَامِي غَارس د سّكّن يسْرَائِيلِيْين شَان ن ڒْفُقَهَا ذ شَان ن شُّرْفَا ن أَيْث-لَاوِي زِي ثنْدِينْت ن لْقُدْس حمَا اَث سّقْسَان نَّان-اَس مِين ثعْنِيذ شك؟
20يَحْيَى وَار يِنْكَر شَا يخف نّس، يعْتَرف-اَسن ينَّا-ٱسن: "نش وَار دْجِيغ شَا ذ لْمَسِيح."
21نَّان-اَس: "ئِي مِين ثعْنِيذ، مَا ذ نَّبِي إِلْيَاس؟"
ينَّا-ٱسن: "مَاشِي ذ نش."
نَّان-اَس: "شك، مَا ذ نَّبِي إِي قَّارن اَذ د يَاس؟"
ينَّا-ٱسن: "لَّا."
22نَّان-اَس: "ئِي شك، مِين ثعْنِيذ؟ حمَا أَ نَاف مِين غَا نِينِي إِ يِنِّي إِي ذَانغ د يسّكّن، مِين ثقَّارذ خ يِيخف نّش؟"
23يَارَّا خَاسن س وَاوَاڒ ن نَّبِي ؤُمِي قَّارن إِشَعْيَا ينَّا قْبڒ:
"نش ذ ثْمِيْجَّا يتْڒَغَان ذِي ڒخْڒَا ثقَّار:
سْوجْذث اَبْرِيذ نِيشَان إِ سِيذِي أَربِّـي."
24يِنِّي إِي غَارس د يسّكّن نِثْنِي زِي ڒْحِزب ن يفَرِّيسِيْين. 25نَّان-اَس: "مڒَا شك وَار ثدْجِيذ شَا ذ لْمَسِيح نِغ ذ إِلْيَاس نِغ ذ نَّبِي إِي د غَا يَاسن، مَايمِّي شك تْطهَّارذ إِ يوْذَان س وَامَان؟"
26ئِنْدق-د يَحْيَى ينَّا-ٱسن: "نش تْطهَّارغ إِ يوْذَان س وَامَان، وَلَكِن ذَانِيتَا يجّن ذِي ڒْوسْط نْوم وَار ث ثسِّينم شَا. 27ذ نتَّا إِي د غَا يَاسن منْبَعْد إِ نش، وَار سْذِيهِيدْجغ اَذَاس فسْيغ ؤُڒَا ذ يفِيڒَان ن ثْسِيڒَا نّس."
28مَارَّا مَانَايَا يوْقع ذݣ وبِيلَاج ن بَيْت عَنْيَا اَجمَّاض إِ يِغْزَار ن لْأُرْدُن مَانِي إِݣ يتْطهَّار يَحْيَى إِ يِوْذَان س وَامَان.
نَّبِي يَحْيَى يشهّذ خ سِيذِيثْنغ عِيْسَى ذ مِّيس ن أَربِّـي
29ثِيوشَّا نّس يَحْيَى يتْوَاڒَا عِيْسَى يݣُّوْر-د غَارس، ينَّا: "خْزَرث، ذ وِين ذ يزْمَار ن أَربِّـي إي غَا يكّْسن ڒْمُعْصِيّث خ يِوْذَان مَارَّا. 30ذ وِين إِي خف تُوْغَا سِّيوْڒغ نِّيغ-اَوم: أَذ د يَاس منْبَعْد إِ نش يجّن ن ورْيَاز، وَلَكِن نتَّا يمْغَر خَافِي مِينْزِي تُوْغَاث قْبَڒ مَا ٱذ يِڒِيغ نش. 31تُوْغَا نش س يِيخف ينُو وَار ث سِّينغ شَا مِين يعْنَا، وَلَكِن ؤُسِيغ-د اَذ طهَّارغ إِ يوْذَان س وَامَان حمَا اَذَاسن د يبَان نتَّا إِ أَيث-إِسْرَائِيل."
32يَحْيَى يشْهذ خَاس ينَّا: "ࢲْرِيغ أَرُّوْح ن أَربِّـي يهْوَا-د زݣ وجنَّا يݣَّا اَم يِجّن ن ثذْبِيرْث ثْمَارْس خ عِيْسَى. 33تُوْغَا نش وَار ث سِّينغ شَا مِين يعْنَا، وَلَكِن ذ أَربِّـي إِي ذَايي د يسّكّن اَذ طهَّارغ إِ يِوْذَان س وَامَان، نتَّا ينَّا-ٱيِي: ونِّي غَا ثࢲرذ يهْوَا-د خَاس أَرُّوْح يمَارْس خَاس، ذ نتَّا إِي غَا يطهَّارن إِ يِوْذَان س أَرُّوْح يقدّْسن. 34نش ࢲْرِيغ مَانَايَا س يِيخف ينُو، شهّْذغ خَاس بلِّي نتَّا ذ مِّيس ن أَربِّـي."
ئِمحْضَارن يمزْوُوْرَا ن سِيذِيثْنغ عِيْسَى
35ثِيوشَّا نّس عَاوذ يبدّ ذِنِّي يَحْيَى اَك ثْنَاين ن يمحْضَارن نّس. 36وَامِي يُوْفَا عِيْسَى يعْذُو سّنِّي ينَّا-ٱسن: "خْزَرم، ذ وِين ذ يزْمَار إي د يسّكّ أَربِّـي." 37كَّرن ثْنَاين نِّي ن يمحْضَارن وَامِي ذَاس سْڒِين يسَّاوَاڒ خ عِيْسَى، ذْفَارن-ث.
38ئِنقْڒب عِيْسَى غَار ذفَّار يُوْفِي-ثن ذفَّارن-ث-يذ ينَّا-ٱسن: "مِين تْرزُّوم؟"
نَّان-اَس: "آ رَاڤِي، مَانِي تِيڒِيذ؟" (أَوَاڒ-أَ رَاڤِي يخس اَذ يِينِي لْمُعَلِّم.)
39ينَّا-ٱسن: "أَرَاحمْ-د اَذ تخْزَرم." رُوْحن اَكِذس ࢲْرِين مَانِي يتِيڒِي. ثْسَعَّات عْڒَاين ذ اَرْبعَا ن وعشِّي، سّنِّي سنْسن اَكِذس نْهَار نِّي.
40ئِجّن زِي ثْنَاين نِّي ن يمحْضَارن قَّارن-اَس أَنْدْرُوْس، ؤُمَاس ن سِمْعَان بُطْرُس، يسْڒَا إِ وَاوَاڒ ن يَحْيَى يذْفَار عِيْسَى. 41ڒخْدّنِّي يُوْفَا ؤُمَاس سِمْعَان ينَّا-ٱس نُوْفَا لْمَسِيَا. (أَوَاڒ-أَ لْمَسِيَا يخس اَذ يِينِي لْمَسِيح.) 42ئِسِّيوض-يث-يذ غَار عِيْسَى. وَامِي ث يࢲْرَا عِيْسَى ينَّا-ٱس: "شك ذ سِمْعَان مِّيس ن يُوْحَنَّا، زِي سَّا اَڒ ثْسَاونْت اَذَاش تْڒَغَان صِفَاس." (أَوَاڒ-أَ صِفَاس يخس اَذ يِينِي بُطْرُس.)
43ثِيوشَّا نّس عِيْسَى يخس اَذ يرَاح غَار ثْمُوْرْث ن لْجَالِيل. ئِرُوْح يُوْفَا يجّن قَّارن-اَس فِيلِيپَّـاس ينَّا-ٱس: "ذْفَار-اَيِي-د!"
44فِيلِيپَّـاس نتَّا زِي بَيْت صَيْدَا، أَبِيلَاج ن أَنْدْرُوْس ذ بُطْرُس. 45فِيلِيپَّـاس يُوْفَا يجّن قَّارن-اَس نَاثْنَاهِيل ينَّا-ٱس: "نُوْفَا ونِّي إِي خف يُوْرَا مُوْسَى ذِي شَّرِيعَا، مِيخف ؤُرِين لْكُتُب ن لْأَنْبِيَا. نتَّا ذ عِيْسَى زݣ وبِيلَاج ن نَّاصِيرَا ذ مِّيس ن يُوْسف."
46ينَّا-ٱس نَاثْنَاهِيل: "مِين يصبْحَان زِي نَّاصِيرَا!؟"
ينَّا-ٱس فِيلِيپَّـاس: "أَرَاح-د، أَذ تخْزَرذ."
47عِيْسَى يࢲْرَا نَاثْنَاهِيل يݣُّوْر-د غَارس ينَّا: "وَانِيتَا نِيشَان زِي أَيث-إِسْرَائِيل، وَار ذَايِس بُو يخَارْوِيضن."
48ينَّا-ٱس نَاثْنَاهِيل إِ عِيْسَى: "مِينْزِي ذَايِي ثسّْنذ؟"
ينَّا-ٱس عِيْسَى: "ࢲْرِيغ-ش سْوَادَّاي إِ ثْشجَّارْث ن ثَازَارث، قْبڒ مَا ش د يڒَاغَا فِيلِيپَّـاس."
49ينَّا-ٱس نَاثْنَاهِيل إِ عِيْسَى: "آ لْمُعَلِّم، قَا شك ذ مِّيس ن أَربِّـي، شك ذ اَزدْجِيذ ن أَيث-إِسْرَائِيل."
50ينَّا-ٱس عِيْسَى: "مَا ثُوْمْنذ وَامِي ش نِّيغ ࢲْرِيغ-ش سْوَادَّاي إِ ثْشجَّارْث ن ثَازَارث؟" ينَّا-ٱس: "عَاذ اَذ تࢲرذ كْتَار زِي مَانَايَا. 51أَقَا تسْڒَام ڒْحَقّ: أَذ تࢲرم اَجنَّا ينُوْرْزم، لْمَالَائِكَاث ن أَربِّـي تَاڒِينْت هوَّانْت-يد خ مِّيس ن بْنَاذم."
বর্তমানে নির্বাচিত:
يوحنا 1: ريف
হাইলাইট
শেয়ার
কপি
Want to have your highlights saved across all your devices? Sign up or sign in
