Lucas 1

Teófilo jä'ä nejk yajktunikex

1Nimay jä jayeta tjanipëëmete jäts tjaatat wintsoj tiuune kiojtse juu kujk Kunu'kxtee tun mëët ïïm, 2we'en ixu'n ëëts ojts nyajktumumatyek pën ojts t'ix tjawa wintsoj ojts tsyoontejk wa'nits yajktunipëjkte jäts t'awanetat jä oy kets jä oy ayuuk. 3Ëts nawye'en, ntukukotsep ëts mits Teófilo, të ëts nyajktïwa nyajktumtsa wintsoj ojts tsyoontejk, we'en ëts nwimmay npayo'oy jäts mits ntunijayat tïw tïjkx, 4jäts xnijawat tso tïwa ixwa juu kujk myajk'tuuk'ix.

Ku jä ángel t'awana jäts kä'äxwaamp jä Juan yajknëpätpa

5Jä juunt jä'ä Herodes yajkutujk jäm Judea. Jäm tu'k ijt jä Tee' tsyiina juu txëë Zacarías, Abías jä jyaye. Jä ijt xyëë tye'extëjk, Isabel jä'ä Aarón tyaatsk'ap. 6Oy jaye jä'äta Kunu'kxtee wyinkujkm kyutiuuntep jä kyutujken jäts jä pyawaanen wa'ats oy wa'ats tsuj. 7Ka' y'unek pënta paatty ku Isabel tunipëman ja ijt jäts ka' unejkat; jäts mëjaywan jääta. 8Tu'k jä xëë juma Zacarías tyuketaake tsyapkotset jäp tsaptïjkp, 9we'en wintsoj ijt tu'nta jä'ä teetëjkta, jäts tyuketaake Zacarías tyëkat jäp tsaptïkp jäts jä poom tyajkjoket juma kunu'kx ijt. 10Ku'ts jä'ä poom tyajkjek jäp tsaptïkp, jäts jä nimay jaye tsyapkotsta jäp tsaptëjk tajukp. 11Wa'nit jä'ä mëjWintsën y'ángel ojts jyeya juma Zacarías, jäm akayentso tyena juma jä poom jokpäjtken. 12Ku jä Zacarías t'ixpaaty jä ángel, ojts tu atïwa jäts mëjk tsye'ke. 13Jäts jä ángel ojts nyë'ëmxe:

—Ka' mtsë'ka Zacarías, tëë jä'ä Kunu'kxtee t'amotenäx mits jä m'amoten pëjk'tsowen, jä mte'extëjk Isabel mowaanep tu'k jä'ä unejk, jä'ä xyëëjap Juan. 14Mpaatep mits jä jotkuken mëët jä xoontken, may jaye tuxoontejktap ku jä'ä kyä'äxet, 15jä m'unek nimëj jä'ä nëjkx ijt Kunu'kxtee winkujkm. Ka y'uuket myujket, oyam jä'ä kya kyë'ëxnim myëëtan jä kunu'jkx poj. 16Jä'ä tyunep jats may jä Israelitas t'awimpitetat jä Wintsën Kunu'kxtee. 17Yë Juan twinjayepap jä Kunu'kxtee y'unek, we'en jä kunu'kx poj tmëëta jä mëjken we'en ixu'n ijt jä'ä kukeyepa Elías, jä'ä tyunep jäts jä unektee mëët jä y'unek nyay oy kotsetenet jäts jä'ä ka'oyjayep oy winmaayen tpaatat. Jä juan tka'amayep jä kajpen jäts nyaajk'oyetat jäts jä Kunu'kxtee y'ayuuk tkupëjktat.

18Zacarías tyajktïwa jä ángel:

—¿Wintsoj ëts jantsy'jawat yë xaja? Mëjaywan ëëts mëët nte'extëjk.

19Jä ángel y'atsoowe:

—Ëts Gabriel, jä'ä ëts ntuump tso Kunu'kxtee xpawany, xmoopy ëts jä Kunu'kxtee kyutujken, jä'ä ëts xkäxp jäts mits nmënakyotset jäts nyaket nam ayuuk. 20Pën ka' xjantsy'jawa ëts n'ayuuk, wa mtanet xäm uum, ka' m'uk kotsnet koonem jä xëë paatet jäts kyutyunjet.

21Jäts jä kajpen jaye t'aax ijta jä Zacarías, jäts nyajktïwxeta tiëx kya pitsem jäp tsaptïkp te tyanyoojkne. 22Ku ojts pitsemne, jäts uum tjätne; jäts ojts twinmoteta jäts t'ix jä wision jäp tsaptïpk wa ojts kyotsne y'aa kyëë tyak yoyne, jeky ijt uum ka' kyets.

23Ku ojts tyuunk pyuukne jäts jä Zacarías nyëjkxne tyëjkwintem. 24Ku yëë xaa nyax, wa'nit jä Zacarías tye'extëjk Isabel mëtax tyaan; muwooxk poo jä Zacarías kya pitsem tyëjkjootm myay tya': 25Paaty ëts we'en jä Wintsën xtun jäts jä jaye ëts xtsojktat.

Tu'k jä ángel t'awana jäts kä'äxwaamp jä Jesús

26Ku Tuttejk po'o, jä'ä Kunu'kxtee ojts tkex jä y'ángel Gabriel jäm kajpen Galilea ijt jootm juu kyuxë'ëtep Nazaret, 27jä'ä tyunike'exp jä kiixte'ex juu txëë María ka'nem jä ya'atyëjk tmëët tsïïna, jä'ä wyena t'atsoowne jä'ä ya'atyëjk juu txëë Jose jäts tmënapyëket, jä yajkutujkpa David tyaatsk'ap. 28Jäts jä'ä ángel jyay María tyëjkwiinte jäts tnïmye:

—Tëë jä Kunu'kxtee mkunu'kxe, jä mëjWintsën mëët mits m'it.

29Jäts jä María ojts tu atïwa jä ayuuk, jäts payotyëka tiëx ëts yëë xkotspeekx. 30Jäts jä ángel ojts nyë'ëmxe:

—María, ka' mtsëka, tuxoontke jä Kunu'kxtee myaayen. 31Xyam mtanet mëëtax: Mpaatwampy tu'k jä unek, wa xyëjap Jesús. 32Ni mëë ijtet jä ya'atyëjk, jä'ä tkuxëëtat Kunu'kxtee y'unek juu tmëët jä nimëjen, jäts jä mëjWintsën Kunu'kxtee tyukotspatwä'anye yajkutujkpa, ixam ijt jä David, 33we'en wintsoj yajkutuket xëmakëxm jäm Jacob kyapën këxm. Jä kyutujken ka' nikëxen tmëtat.

34María tyaktïwa jä ángel:

—¿Ka' ëts pen nya'atyëjk, wintsoj jawe we'en tiunjet?

35Jäts jä ángel y'atsëw:

—Jä Kunu'kx poj mtujä'yap, jä Kunu'kxtee myawo ju wa'ajts këxm jä'ä mni'äpap. Paaty jä maax juu kä'äxwaamp jä'ä yajkxemoet wa'ats jä Kunu'kxtee y'unek. 36Nawye'en jä mukä'äx Isabel pyatwäämpy jä'ä y'unek. Oyam jä tmyëjaywene; jä juu tïtep jäts ka' y'unejka. Tujtek po'an tsëmit jä maax. 37Oyxekëxep jä'ä Kunu'kxtee.

38Wa'nit jä María tnïmye:

—Jä'ä Wintsën tyuumpa ëts n'it; we'en jä Kunu'kxtee tune mëët ëts; we'en ixu'n mits mwa'any, wa'nit jä ángel nyëjkxne.

María tku ix jä Isabel

39María jatye nïkx jäm kajpen këxm jä'tu'k it kopkëxm jäm Judea, 40ku jäm tyëke Zacarías tyëkjootm jäts tkotspeekx jä Isabel. 41Ku Isabel ojts tmote jä María kyotspookxen, jäts jä maax ojts xyoontek jäm jyotm, jäts ojts tyutëkjä jä Kunu'kx poj. 42Wa'nit jä Isabel mëjk kyets jäts tnïmye:

—Jä Kunu'kxtee te mkunu'kxe niyujk katii nijum jä te'extëjkta, tëë jä m'unejk yajkunu'kx. 43¿Pën ëtse, jäts ëts xnijä'yat xku'ixet ëts jä nWintsën tyaak? 44Wa'ajts jatye ku nmote jä mkospokxen, ëts n'unek xyoontek ëts njotm. 45Kunu'kx mits ku xjantsyjawa jäts kutyunjep jawe, ju mëjWintsën kyetsp.

46María wya'any:

Ëts njaawe'en tyukukotsep jä Kunu'kxtee nimëjen.

47Ntuxoonkept ëts jä Kunu'kxtee nitsooken,

48ku ëts jä Kunu'kxtee te xwinken jäts ets x'ixpaaty, ayowa tuumpa ëts n'it,

xyam tkotsukwantat jäts tkots ijtat jäts xoon ëts;

49të jä nimëj juu oyxekexep niyuk ëts xtuuna jä myaayen pyutë'ken.

Wa'ajts jä Kunu'kx xyëë.

50Kunu'kxtee ijtp jä tmëëta jä tumo'ten

pen pën twintsejkep.

51Tyuump jä Kunu'kxtee mëët jä kyutujken,

tyajkwintoke jä winmayenta jä ju mëj këxm nayjawetep,

52tyajkwintoke jä yajkutujkpatëjkta jä ka' oy jaye

jäts tyajkëxemputek jä oy jaye.

53Pyutëjkep jä ayoow jaye

jäts jä juu jotkuk nayjawetep ka' jä tputëjke.

54Pyutëjke jä kyapën Israel, jä'ä tyuumpa,

ka' ojts tjatyoke jä'ä myaayen myëët jä tumooten.

55We'en jä kyotstany tyajkktaany mëët ïïm jä ntaatsk'ap Abraham,

56María tyaany mëët Isabel jäm tyëkjootm tuujk po'o ju'n, wa'nit tyëkjootm wimpijtne.

Juan yajknëpätpa kye'ex

57Ku ojts pyuukne jä xëë po'o ku jä Isabel y'unek kyä'äxwaane, jäts kye'ex jä y'unek. 58Wa'nit jä'ä myutëjktemta, jä'ä muwu'kta nyëjkxte ku'ixpa, ku ojts tnijaweta jäts jä kunu'kxpa jä'ä ojts tyuuk ixe jä tumo'ten, wa'nit ojts tmëët xoontejkta. 59Ku tutujtek xëë tyajknëkxte jä maax unejk jäts tsujket, we'en tsojkte jäts tyee txëëpëjket Zacarías. 60Jäts jä tyaak wya'any,

—Ka'. Wa yëë xyëjap Juan.

61Jäts ojts y'atsowta:

—Nipën muwuka we'en tka' xëëjä.

62Wa'nit jä jayeta jä y'aa kyë'ë tjä tyajkyo'yta tjä yajktïweta jä unek tee, tii xëëpëëmawa'any. 63Jäts jä unejktee t'amote tu'k jä pëjye'tsaa jäts yukjä'et, jäts jyaay: Jä'ä xyëjap Juan. Nijum ojts tu'atïweta. 64Jatye Zacarías ojts kyots pïjk, jäts ojts mëjk t'ajoota jä Kunu'kxtee. 65Nijum jä jaye wa'ajts atïwa ojts tjaweta, jäts tkotsta tmatyëjkta atïwa tï tyune jäm jä tu'k it kopk'akujkm Judea. 66Pënjäty ojts tmoteta kë'ëm tmumayta tmu'tata: ¿Pën it'wa'any yë maax? Jäts jä mëj Wintsën tïwa tyajkjay'ixe jä nyimëjen, jäts jä myaayen yëë këx.

Yëë Zacarías y'ïw

67Jä Zacarías, jä pïjk unejk tyee, jä kunu'kx poj jä'ä mooyep jä mëjken jäts jä winmayeen, jäts ojts tnaskotsa jä Kunu'kxtee y'aa y'ayuuk, jäts wya'any:

68Kunu'kx it jä'ä Wintsën, Kunu'kxtee jyaa Israel,

jä'ä tnimets jäts juyimpitet jä kyapën.

69Të ïïm xtunikäxem jä nimëj yajktsoojkpa,

David tyaatsk'ap, jä'ä tyuumwa.

70We'en jekan jä'ä kotstan tyajktaany

jä'ä ojts twaanya jä Kunu'kxtee kyukexepa:

71Ku jä kamäjxpa xkamäjkxem jä'ä ïïm xkuwaanmep

nijum juu xkamäjkxem juu xwiink'ixem,

72myetap jä ni'ixkitaken mëët jä jayeta juu jekan juukyete naaxwiinete

ka' jä'ä tjatyokewet jä y'oyen pyëkminen.

73We'en jä kojtstany tyajkktaany

mëët ïïm jä tee' Abraham:

yajkjatep jä'ä:

74Njuukyemet nitiya nkatsemet,

yajkakëxep jä'ä winëëmpa,

jäts jä'ä mutuunmep,

75jä'ä këx mjuukyat oy aa oy ayuuk xpaattet

win xëë, ïïm it'met jä'ä mëët.

76Jäts mits n'unejk,

yajk'anaxpa m'ijtet mëët jä Kunu'kxtee juu wa'ats këxm,

mits winjayëpap jä Wintsën,

nyëë' tyuu xyajk'oyat,

77jäts xtuujk nijawat jä kyapën

jäts Kunu'kxtee token määkxpa jä'ä

jäts tmoet jä nitsooken.

78Jäts ïïm jä nKunu'kxtee mëj jä tumo'ten tjakyep,

jäm tsapjotm xtunikaxem jä nitsooken we'en ixu'n it jya'wiw,

79jäts tmoet jä ajätejk

juu akoots'itep juukyetep,

jä'ä wintupëken moojetap

jäts tpaattat jä oy në'ë' oy tuu.

80Jä pijk'unejk yääjk'atëëtsp jä'ä, myeet jä kunu'kx poj mëjkpëjk'atëëtsp jä'ä, jäm jä jyuukye apajk it jootm, konem ojts jä xëë tpaaty jäts nyajknikäxe may jaye winkujkm jäm Israel kyajpenkëxm.

বর্তমানে নির্বাচিত:

Lucas 1: LKMIXHUI

হাইলাইট

কপি