Lukase 8

Panzwě pie ée nzèm Yěsô pâ ngàŋ ntúm yé

1Yěsô gÿo ne ńgwá ńgiŋe tsɛ̀ɛ metÿǒsoŋ mbàa tsɛ̀ɛ melá’ ńtsẅii Nkʉ̀ Mbòŋo ńdɔgɔ ńda’te pá’ nò *lefùɔ Ssé áa pú’u. Pâ *ngàŋ ntúm yé ntsɔ̀b pʉ́a nê legém gwɔ́ nùɔ. 2Tsɔ́ ntá’ pànzwě gwɔ́ yɔ́b nùɔ, ńgwɔ́ pie à la zoŋ meguɔ ná pɔ́b, ńgÿo pie à la jwoŋ *messé tepòŋ mie é laa ná pɔ́b ńně ḿbue wɔ́b. Wɔɔn laa Malîɛ múɔ Magdala gẅie à la jwoŋ *messé tepòŋ sɔɔn mbʉ́a ná ye, 3ńgÿo Jâne, nzwě Shuza gẅie à laa mentsindá fùɔ *Herôd, tà mbɔɔ Sesánɔɔn, ńgÿo petsɔ́ pànzwě. Pɔ́ metsèm gwɔ́ nzèm Yěsô ńdɔgɔ nkáb yɔb ńtóonte Yěsô lâ *ngàŋa kwò yé nà fa’a yɔ́b.

Esaga nò nà mbyè mmó

(Matio 13.1-9; Malékuse 4.1-9)

4Yěsô ne ńgiŋe pú’u, anùɔ lá’ fó meshÿó meshÿó ńtó. Á gÿo ńdɔg *sagá nò ńgɔɔn ngie: 5Atsɔ̌ nyìŋ lǎ’ ńgʉa mma’ mbyè mmó, ńtóo ma’á, tsɔ́ memvòm gwe ngʉ̀ŋe mánzsé, mé lɔg mekwò ńneŋ, meshʉ́ŋ tó ńdagte ḿpfɛ́. 6Etsɔ́ memvòm gwe nà jʉ’ ye metóon, ńtóo lésá’, ńzág ntse, ńgwóon ńjúm. 7Metsɔ́ memvòm gwe tsɛ̀ɛ megǐ tepòŋ, pâ pɔ̌ pú ńdu ssé, legǐ tepòŋ fóme mɛ̌. 8Metsɔ́ memvòm gwe ná jʉ’ʉ tsetsá’a mbòŋo, ńgú’, ńgÿo ńzém, tà’ letsiŋé ná mvòm nkÿo. Yěsô gɔɔn pú’u, ngie, nyìŋ lɔɔn ńgẅiin metuŋó lélɔg ńjú’u nò á jú’.

À kɔ́ gÿo tá Yěsô lɔg pɔ́ sagá nò e shwóŋe?

(Matio 13.10-13; Malékuse 4.10-12)

9 *Megàŋa kwò Yěsô gÿo ńzɛ́te yé ngie à kyagte mmó gie yɔɔn *sagá nò ŋwɛ́ lɔgɔ ńgɔɔn é shwóŋó wɔ́b. 10Á gɔɔn mbwo pɔ́b ngie: E Ssé la gÿo ngie pi pɛ zɔ zsé nò nénʉ́ nà lefùɔ sé sie ée lelyěen. Tá á gʉa ná petsɔ́ pʉ̀a pɔ́ jú’ yɔ́b pɔ́ ndà’ sag legʉa, ńké tè jú’u mmó gie mé lɔgɔ ńgɔɔn wɔ́. Á lɔgɔ ḿbumte ná pá’ mé la ŋwe’e tsɛ̀ɛ ŋwà’ne Ssé ngie: «Pɔ́ ge ne líe jʉ’ pɔ́ le gyá, é ne jú’u, pɔ́ le jú’ tà ńjú’ wɔ́»

Yěsô kyɛ’té sagá nò nà mbyè shúm

(Matio 13.18-23; Malékuse 4.13-20)

11Á cʉ́’ʉ lékyagte yɔɔn sagá nò ńgɔɔn ngie: Mbyè mmó lɔgɔ ńgwɔ́ shwóŋè Ssé. 12Ngʉ̀ŋe mánzsé gẅie tsɔ́ memvòm gwě wó, ée pʉ̀a pie pɔ́ jú’u shwóŋè Ssé, tá Sátà tó fó ntʉ́m pɔ́b ńkẅile, ḿbɔ́gɔ légwɔ́ gie pɔ́ ge zẅíŋ, E Ssé gÿo pɔ́ tsẅɛ́. 13Ajʉ’ ye metóon é gwɔ́ pʉ̀a pie pɔ́ jú’u shwóŋè Ssé, ésẅɛte ńzẅíŋ nê lekág tá á té lyɛ menŋaŋ wɔ́, ńgwɔ́ pʉ̀a lyɛ̌’ɛ lá’, ngɔ́’ gwɔ́ tà ńtó, pɔ́ gwóon ńgwá’. 14Mbyè mmó gie é gwě tsɛ̀ɛ megǐ tepòŋ, lɔgɔ ńgwɔ́ pʉ̀a pie pɔ́ jú’, ńgÿo ńzye lémÿɔg menò nzsè nzsè, ńzye lékwaŋte nkáb pɔ́ leńnéŋe mbòŋo ndùmo ssé tsetsá’, ashwóŋè Ssé gwóon ḿbyé té gÿo tsɔ́ mmó tsɛ̀ɛ ntʉ́m pɔ́b. 15Mbyè mmó gie e gwě nà tsetsá’a mbòŋo lɔgɔ ńgwɔ́ pʉ̀a pie pɔ́ jú’u shwóŋè Ssé, ńzẅíŋ lê ntʉ́m mbòŋo, ńgÿo pá’ á ne ńzɛ́te, ḿbiŋ ne ńkaga tʉ̀ lékú’te fʉ̀’ ntsèm, ḿbiŋe ne ńzéme ntɔ̌ɔn.

Esagá nò ná lâm

Pi laga twó gí nà ntí gie pi lɔgɔ ńjú’u nò Ssé

(Malékuse 4.21-25)

16Ńgwɔ́ nyìŋ le lyɛɛ lâm ńdɔg ngwʉ̌ŋ ńkábte wɔ́, ndʉŋ ndʉŋ pá’ à lɔɔn ńgwɔ́ mé le lyɛɛ lâm ńtÿɔ́gɔ kesse kǔ wɔ́. Mé lyɛɛ lâm ńtÿɔ́gɔ ndùm tápele, tà nyìŋ gwaa kúu ndá ńne ńgyá kyɛ̀’. 17Pi zsé ngie, ammó gie áa lyɛ̌’ɔɔn ńgwɔ́ lelyěen, á ge lá’ kẅɛɛ mángyɛ̌, tsɔ́ nò té wó gie à lɔɔn ńgwɔ́ á lyeen tà mé le lá’ ńzsé tà shwóŋó mángyɛ̌ wɔ́ wɔ́. 18N dɔgɔ shwóŋó gẅi ngie pi lag twó sí nà ntí gie pi lɔgɔ ńjú’u shwóŋè Ssé, nyìŋ lɔɔn ńgẅiin mmó, mbà mé ge kẅi’i. Tá ńké ńgʉa ná nyìŋ gẅie à tè mmó gẅiin, mbà mé ge kẅé méjʉ’ gẅie à kwǎŋ ngie à gẅiin.

Má pà Yěsô pâ mefɛ́ pé ée pà wɔ̌?

(Matio 12.46-50; Malékuse 3.31-35)

19Yěsô ne ńda’te shwóŋè Ssé mbwo lá’ pú’u, má we pâ mefɛ́ pé tóo légyá yé, ńké tè ku’u létó tà ńkúu jʉ’ gie aa wó wɔ́, ńtí lá’ légyɔ́ɔn. 20Mé tó, ńgɔɔn né Yěsô ngie: Má ɔ̀ pâ mefɛ́ pú ée pi ně fa’a légyá ɔ́. 21Á tsɔ́’ ngie: Má wɔ̀ɔn pâ mefɛ́ pɔ́ɔn ée pʉ̀a pie pɔ́ jú’u nò Ssé, ńgÿo pá’ á ne ńzɛ́te.

Yěsô gÿǒ fefà láŋte

(Matio 8.23-27; Malékuse 4.35-41)

22Yěsô pâ *ngàŋa kwò yé fó lyɛ̌’ ńkúu tsɛ̀ɛ kanú’, á gɔɔn né pɔ́b ngie pege gʉa tà ńkúu nà yetsɔ̌ nzǐŋ, pâ pɔ̌ gʉa. 23Pɔ́ ne ńgee, Yěsô lyé. Mé gwaa gyá tsɔ̌ máamáa fóm tó, ńzye lépʉe ntse, é ně ńkwɔ́’ɔ ńkúu tsɛ̀ɛ kanú’ tà á cʉ́’ʉ méjʉ’ à lúe. Pɔ́ pɔ́gɔ légʉa ntse, 24ńzyeen yé, ńgɔɔn ngie: Andè, Andè, pege kwě tà ńdem. Yěsô zyeen, ńdu ssé, ńcÿɔ́gɔ́ fóm pɔ́ ntse. Afóm zá’a, ntse tyé, ejʉ’ láŋte lê kěm. 25Á zɛ́te wɔ́b ngie: Akɔ́ gÿǒ pi tè gíŋe ńzáb ntʉ́m ná mèŋ wɔ́? Tá pɔ́ ne ńcÿɔ’ɔ cÿɔ’, ésele ńgɔɔn tsetsɛ̀ɛ pɔ́b ngie: Yɔɔn lìi nyìŋ gwɔ́ pɔ́ lêkɔ́ tà ńgɔɔn nò mbɔɔ fóm pɔ́ ntse jú’u ncwò wé?

Yěsô zoŋó nyìŋ gẅie messé tepòŋ lá kúu ná ye

(Matio 8.28-34; Malékuse 5.1-20)

26Pâ *ngàŋa kwò yé gʉa tà ńkúu Garazania, é ngwòŋ gẅie mé fó nzǐŋ ye pàga ngwòŋ Galilea, é gwɔ́ nà yetsɔ̌ nzǐŋ. 27Yěsô kẅɛɛ tsɛ̀ɛ kanú’, atsɔ̌ nyìŋ tÿǒsoŋ kẅɛ ńzá’a yé, ńgwɔ́, mbà *messé tepòŋ léen ḿbue yé tà á cʉ́’ʉ ńgwá ńgiŋe pɔ́ tè jÿɔ̌g nzsǒ, ḿbiŋe ńdá’a pɔ́ jʉ’ gie mé túŋo mepfó wó, mbà à la lá’ ńgwá’ mbʉ̀a ye.

28Á lêen ńgyá Yěsô, ńtó ńnuŋe mekwò yé, ńga’te ńdɔg ngyè tetʉ́ʉ ngie: Yěsô Míŋ Ssé gẅie à pi’i kɔ̀ɔkɔ́ɔ, ɔ̀ kẅé kɔ́ mbwo mèŋ? E sẅiŋté ɔ́, te ńnéŋe wɔ̀ɔn tsɛ̀ɛ ngɔ́’, 29ńgɔɔn pú’u, mélà’mie á la gwaa gwɔ́, mbà Yěsô cÿɔ̌g yɛ̌ *ssé tepòŋ ngie e fóo ná yé ńkẅɛ. E *ssé tepòŋ ŋwɛ́ laa pá’ɔɔn, mbà é zyě ńtó, ḿbége yé. E lɔ̌ɔn ńgwɔ́ tà ńgwoon yé, á lu ssé ńkÿo, mé jwoŋo yé ńgwoon, ńdɔgɔ metsɛ̂n ńkwɛ́ɛ yé, ńnéŋe *kɔ̌’ mekwò ye. Á zá’te tsɛ̂n, ḿbwɔ́’ɔ *kɔ̌’, e ssé ŋwɛ́ lɔgɔ yé ńkÿo pɔ́ ne nkwòŋo tsẅɛ. 30Yěsô zɛ́te nyìŋ ŋwɛ́ ngie: Lezíŋ shú ée le wɔ̌? Á gɔɔn ngie: Menùɔ. À lɔ̌ɔn ńgɔɔn pú’u, mélà’mie *messé tepòŋ ŋwɛ́ laa ná ye tà ńgyɔ́ɔn gyɔ́ɔn. 31*Messé tepòŋ ŋwɛ́ sẅíŋte Yěsô ngie, tà á túmo wɔ́b tsɛ̀ɛ pÿé. 32Á gwaa gwɔ́, etsɔ́ nùɔ mekúnɔ́ɔn gwɔ́ jʉ’ó, ńně ńgwá ńkʉ́’ʉ ḿpfɛ́ɛ shúm ndùm lekwɛ́. *Messé tepòŋ ŋwɛ́ sẅíŋte Yěsô ngie à zẅíŋ, pɔ́ gʉa ńkúu nà mekúnɔ́ɔn. Á zẅíŋ. 33Pɔ́ lêen ńké fó ná nyìŋ awɛ̌ ńkẅɛ, ńgʉa ńkúu nà mekúnɔ́ɔn. Pɔ́ fó nkʉnkʉ́ŋe ńtága, ńzẅɛ ḿbʉle tsɛ̀ɛ letʉ̀ŋ, ńnú ntse ńkwéte. 34Epʉ̀a pie pɔ́ la ne ḿbyɛ́bɛ mekúnɔ́ɔn gyá pú’u, ńtága ńkÿo, ńgʉa ńdɔgɔ yɔɔn nò saa jʉ’ tsɛ̀ɛ tÿǒsoŋ mbɔɔ tsɛ̀ɛ melá’. 35Alá’ jú’, ḿbú ńkẅɛ, ńtóo légyá yɔɔn nò, ńgʉa tà ńkúu jʉ’ gie Yěsô laa wó, ńgyá nyìŋ gẅie *messé tepòŋ ně ńkẅɛɛ ná yé lá ńnéŋe lejʉ́ŋ Yěsô, mbà à zeŋé, legye sé piŋ tà á ma’ nzsǒ. Pɔ́ gyá pú’u, ḿbú ńcÿɔ’. 36Epʉ̀a pie é ne ńgyá nzyète nò píte pá’ á ně ńcʉa tá nyìŋ gẅie *messé tepòŋ ke ńgwɔ́ ná yé la, á zeŋe.

37Epʉ̀a ná wɛ̌ shÿó metsèm zye lécÿɔ’, ḿbɔ́g pɔ́g tà sẅíŋte Yěsô ngie à fó nà wɔ́b shÿó ńgʉa. Yěsô lêen ńké ńkúu tsɛ̀ɛ kanú’ légʉa, 38ńně ńgee, nyìŋ gẅie *messé tepòŋ ně ńkẅɛɛ ná yé lá, sẅíŋte yé ngie pɔ́ yé gʉa. Tá Yěsô lʉ’ ńgɔɔn né yé ngie: 39Piŋ pɔ́ le mbʉ̀a gù, éshwóŋó lá’ máa nò mbòŋo gẅie Ssé gÿǒ ná gù. Nyìŋ wá lêen ńké ńgʉa, ńdɔgɔ nò gie Yěsô ně ńgÿo ná yé la ésaa lá’.

Yěsô sa’á guɔ pɔ́ legwé

(Matio 9.18-26; Malékuse 5.21-43)

40Yěsô piŋ nzèm tà ńkúu nà yetsɔ̌ nzǐŋ, alá’ gwɔ́ wó, mbà á ně ńdá’ ńzye lézẅí’te yé, pɔ́ gyá yé ḿbú ńkág tɛ’. 41Atsɔ̌ ndÿò tsɛ̀ɛ *ndá cú’tè pà Yuda tó, lezíŋ sé gwɔ́ le Yayelo, ńnuŋe mekwò Yěsô, ḿbú’ mbwó mbwo yé ngie à tó tà ńkúu ndá yé, 42ńgie míŋ we cʉ’ʉ́ ńkwé kwě. Aa ndà’ míŋ we, ńgwɔ́ múɔ manzwě, tà ńgẅiin ngù’ ntsɔ̀b pʉ́a.

Yěsô jú’ pú’u, ńdu Ssé pɔ́ yé gʉa, alá’ zse nzèm ye, ńtÿɔ́’ɔ yé ńnéŋe soŋ tà jʉ’ cʉ́’ʉ sẅíbe sẅibé. 43Tsɔ̌ manzwě gwɔ́ yé nùɔ, ńgẅiin guɔ máshuɔ, mbà á gegé yé gege ngù’ ntsɔ̀b pʉ́a nê legém, ńké tè zá’a, mbà pàgÿo meffò léen ńzoŋ yɔ́b kékáŋ tà ńkʉ́a, á pú sẅiŋ sé shúm ntsèm ntsèm pɔ́ mǒ, ńké te zeŋe. 44Á ná’te, éfóo nzèm, ńtó ńkíbe tsɔ̌ɔn nzsó Yěsô. Aguɔ yé gwóon ḿmag. 45Yěsô zɛ́te ngie: Awɔ̌ kibé wɔ̀ɔn? Awɔ̌wɔ́ɔ ně ḿmoŋe moŋe. Piɛ gɔɔn ngie: Andè, mé ne sẅɛ́ɛ gú nzẅìŋ yɔɔn, ɔ̀ zɛ́te ngie mé gɔɔn ngie aa wɔ̌? 46Yěsô cwoŋo ńgɔɔn ngie: Nyìŋ kibé wɔ̀ɔn. N jǔ’ pá’ metʉ̀ mɔ́ɔn fa’a fà’. 47Manzwě wa, gyá pá’ Yěsô vɔ̌g ńzsé, ńzye lévɛ, ńtó ńnuŋe mekwò Yěsô, ḿbú ḿbíte mvfò lá’, éshwóŋó yé mmó gie á ně ńgÿo tá á kíbe yé, ńkíbe yé pú’u, ńzeŋe. 48Yěsô gɔɔn né yé ngie míŋ wɔɔn, ntí gie ɔ̀ lɔ̌g ńzáb ntʉ́m ná mèŋ gÿǒ ɔ̀ tsẅɛ́, gʉa né mbʉ́lè, 49ńně ńgɔɔn mbwo yé pú’u, nyìŋ fóo mbʉ̀a Yayelo ńgɔɔn né Yayelo ngie, tè gíŋ ńgege Ndè sẅɛ̀ɛ sẅɛ̀ɛ, míŋ ɔ̀ kwě. 50Yěsô tʉ́a tuŋó ńjú’, ńgɔɔn né Yayelo ngie: Tè pɔ́g, záb pɔ́ ntʉ́m ɔ́ ná mèŋ, míŋ ɔ̀ ge tsẅɛ́. 51Yěsô gʉa tà ńkúu mbʉ̀a Yayelo, ńtɔ’ ngie tà tsɔ̌ nyìŋ ndyɛ̀’ɛ kúu ndá tà ndí’ ndà’ Piɛ, ńgÿo Jâg, pɔ́ Jâŋ, ńgÿo tá múɔ pɔ́ má múɔ. 52Alá’ la gwaa gwɔ́, mbà á zyě lé lʉa legwé. Yěsô gɔɔn ngie, tà mé gíŋe ńdʉa, múɔ kaa kwé, à lye lyě. 53Mé jú’ ńgẅe yé gẅe, mélà’mie pɔ́ la ne ńzsé ngie à kwǎ’ ńkwé. 54Tá’, Yěsô ké ńgʉa gʉa tà ńkúu pɔ́ jʉ’ gie múɔ la nuŋe wó, ńkíbe pwo yé, ńdɔg ngyè tetʉ́ʉ ngie: Míŋ wɔ̀ɔn, zyeen. 55Jʉ́jʉ́ŋ we gwóon ḿbiŋ, á pʉ́’ʉ nnɛ́, Yěsô tsẅi ngie mé náa mmó à jÿó. 56Tá múɔ pɔ́ má múɔ gyá, á kʉ’ʉ wɔ́b. Tá’ Yěsô tɔ’ ngie tà pɔ́ ke shwóŋó nyìŋ mmó gie á cʉ̌a.

বর্তমানে নির্বাচিত:

Lukase 8: NGBM

হাইলাইট

কপি