Luk 20

1Ka pə re yi ka ȧrey ŋin mɔ mɔ thəksa aŋfəm ka ȧŋseth ŋa Kuru, ɔ tɔri ŋa sɔ ȧkɛra kəfinɔ ka Kuru-e, aŋfode-o, aŋkarmɔkɔ-o yi aŋbȧki aŋ der ro ŋɔŋ, 2kaŋ pa ro ŋɔŋ, Tɔri su afɔsɔ areke mȧ mə yɔ mȧtȧy ame, thalɔm kanɛ yi kɔn ɔwe sɔŋ mu aŋfɔsɔ aŋe-e? 3kɔ lasi ɔ pa ro ŋaŋ, Minɛŋ sɔ i ti yif nu apa ŋin, ɔwa gbakia mi nu. 4Ȧŋbaftisəm ŋa Yɔn aŋ wur ro riyana thalɔm ka afəm-i? 5kaŋ fɔflanɛ aŋ pa, Bepi sə pa, Ka ȧriyana-e, ɔ tə pa, To som mən nə te kɔ lanɛ-e? 6Kɛrɛ bepi sə pa, Ka afəm-e, aŋfəm bɛ aŋ tə ləməs su məsar, ȧtesoma-e aŋ lanɛ kəpa Yɔnȧŋ ɔ yi unabi. 7kaŋ lasi kəpa aŋ tɛ hɛ ro aŋ wur. 8Ka Yisɔsȧŋ ɔ pa, Minɛ sɔ i tɔri hɛ nu ko afɔsɔ mə i yɔ mȧtȧy ame.

9kɔ təp tə kəfɔf aŋlomɔ aŋe ka aŋfəm. Wuni lɔm ɔ tɛp yɛt ɛgbam rə kɔr, kɔ tey akɔr kati rə abȧf, kɔ kɔnɛ ka athɔf alɔm ta alɔkɔ awoni. 10Ɔwa ka ȧŋlɔkɔ ŋa kapim məkomi ɔ som ȧbɔy ka aŋbȧf kȧmȧ aŋ yer kɔ mȧkomi məlɔm ma akɔr kati; kɛrɛ aŋbȧf aŋ sap kɔ, aŋ ter kɔ ɔ kȧlanɛ kəte ba koko. 11kɔ kȧl som ȧbɔy alɔm; kɔnɔ sɔ aŋ sap kɔ, aŋ sambos kɔ, aŋ ter kɔ ɔ kȧlanɛ kəte ba koko. 12kɔ kȧl som ɔwe bekȧ asas, kaŋ yɔ kɔ ɔbaŋ, aŋ wurɔ kɔ. 13Ɔmariki ka akɔr ka ɛyɛt ɛgbam ɔ pa, To mə i yɔ-e? I ti som ɔwan uruni kȧmi ubɔthər; sɔthlɔm aŋ tə wop kɔ yiki. 14Kɛrɛ ma aŋbȧf aŋ nənk kɔ-e, aŋ kɔ nəŋkanɛ, aŋ pa, Ɔwe mə re ba akɔr-e, kɔnɔ ɔwe, maŋ dif kɔ nu, kȧmȧ sə sɔthɔ akɛŋ. 15Ɔwa aŋ wurɔ kɔ ka akɔr ka ɛyɛt ɛgbam, kaŋ dif kɔ. To ɔmarki ka akɔr ka ɛyɛt ɛgbam mɔ yɔ ŋa-e? 16Ɔ tə der, ɔ tə dim aŋbȧf aŋe, ɔ tə sɔŋ akɔr ka ɛyɛt ɛgbam rə afəm alɔm. Maŋ təl ti-e aŋ pa, Saki ti Kuru. 17kɔ kəli ŋa ɔ pa, Ko yi ȧte mən ȧtȧ a gbal kəpa,

Aŋsar aŋa aŋsȧl aŋ pɛnsa,

Ŋi gbeŋ, a kȧl səki ŋi rȧbomp ra aŋkoŋ-e?

18Wuni o wuni ɔwe mə fumpɔ ka aŋsar ŋati, ɔ tə simətha, kɛrɛ wuni o wuni ɔwe mə aŋ fumpər-e, aŋ tə gbəm kɔ sər mɔ kəbof.

19Ɔwa aŋfode abana yi aŋkarmɔkɔ aŋ thɛns tə kəwop kɔ ka ȧŋlɔkɔ ŋati gbeŋ, kɛrɛ aŋ nesa aŋfəm kotȧy-e aŋ sɔthnɛ kəpa ɔ fɔf aŋlomɔ aŋe ta ȧtȧ ŋaŋ. 20kaŋ səth kɔ, ɔwa aŋ som atombəla aŋa yɔ mɔ afəm alompi kȧmȧ aŋ gbəli gbip tapa tɔŋ, kȧmȧ aŋ lȧnki kɔ ka aŋfɔsɔ ŋa ɔgbəka. 21kaŋ yif kɔ aŋ pa, Karmɔkɔ, sə tȧrȧ ti kəpa mə fɔf ɔwa mə thəksa ɔlompi, mə yɔ hɛ agbȧy ka wuni o wuni, kɛrɛ mə thəksa aroŋ ra Kuru təteŋ. 22Pə yi ɔlompi ta ȧtȧ su tə kəsɔŋ ɛfȧk ka Sisar-i, thalɔm pə lomp hɛ-i? 23Kɛrɛ ma ɔ tȧrȧ masɔth ma ŋaŋ-e, ɔ pa ro ŋaŋ, To som nə gbɔns mi-e? 24Tɔri mi nu akɔpɔ abana ŋin. Ko mȧbȧlȧnɛ-e, yi mȧgbal ma kanɛ aŋ ba-e? kaŋ pa, Ama Sisar. 25kɔ pa ro ŋaŋ, Tiyȧŋ sɔŋ Sisarȧŋ ɛyɛt ɛyɛ yi ɛya Sisar, ɔwa ka Kuru ɛyɛt ɛyɛ yi ɛya Kuru. 26Aŋ gbəli hɛ wop mapa mɔŋ rodi ka aŋfəm, kaŋ kabanɛ aŋgbaki ŋɔŋ, kaŋ taŋk.

27ASadusi alɔm aŋ der ka Yisɔs, aŋa pɛnsa kəpa kȧyokanɛ kə yi hɛ. Kaŋ yif kɔ, 28Karmɔkɔ, Mosis ɔ gbal ta ȧtȧ su, Bepi uwɔnt ka wuni ɔ fi-e, ɔ ba ubɛra kɛrɛ ɔ ba hɛ wan, ta ɔwɔnt kɔŋ ɔ nȧntȧ ɔrani kati, kȧmȧ ɔ koməs awuth ta ɔwɔnt kɔŋ. 29Ɔwa aŋ la yi awɔnt tȧmthədɛrəŋ. Ɔtɔtɔkɔ ɔ nȧntȧ, kɔ fi kəte ba awuth. 30Ɔwa bekȧ ŋarəŋ sɔ; 31ka ɔwe bekȧ asas-e ɔ nȧntȧ kɔ; ya pə taŋanɛ, ŋa tȧmthədɛrəŋȧŋ aŋ fi aŋ tey hɛ awuth. 32Kədarəŋ kati ɔbɛra sɔ ɔ fi. 33Tiyȧŋ ka kȧyokanɛ ka aŋfi-e, ɔrani ka kanɛ mɔ yi-e? Ȧtesoma-e ŋa tȧmthədɛrəŋ aŋ nȧntȧ kɔ.

34Ka Yisɔsȧŋ ɔ pa ro ŋaŋ, Aŋwuth ŋa ȧdȧru are aŋ nȧntȧ, ɔwa a baləs ŋa; 35kɛrɛ aŋfəm aŋa yi abeki tə kəsɔthɔ ȧdȧru araŋ yi kȧyokanɛ ka aŋfi-e, aŋ nȧntȧ hɛ, ɔwa a baləs hɛ ŋa; 36ȧtesoma-e aŋ gbəli hɛ sɔ fi, aŋ yi mɔ aŋmȧleka; aŋ yi awuth ŋa Kuru, maŋ yi aŋwuth ŋa kȧyokanɛ ka rafi. 37Kɛrɛ hali Mosisȧŋ ɔ tɔri ta kȧyokanɛ ka aŋfi ka ɔdɛr ka aŋgbɔfɔŋ, ma ɔ tela ɔMarki ɔKuru ka Ebraham, ɔKuru ka Aysakȧŋ yi ɔKuru ka Yekɔb. 38Ɔwa kɔnɔ ɔ yi hɛ ɔKuru ka aŋfi, kɛrɛ ɔka aŋkəli, ȧtesoma-e aŋfəm bɛ aŋ ŋesəm ro rɔŋɔŋ. 39Ka aŋkarmɔkɔ alɔm aŋ lasi kɔ aŋ pa, Karmɔkɔ, mə po fɔf ɔfinɔ. 40Kədarəŋ kati aŋ mintha hɛ sɔ yif kɔ tȧy o tȧy.

41kɔ pa ro ŋaŋ, To som aŋfəm aŋ pa ɔKrayst ɔ yi ɔWan ka Debid-e? 42Debidȧŋ kɔŋ kɔnɔnɛ ɔ pa ka ȧŋSams,

ƆMariki ɔ pa ka ɔMarki kȧmi,

Yirȧ ka kȧta kȧmi kədiɔ,

43Haŋ i yɔ aŋtheranɛ a mu aŋgbeth ŋa ȧtȧtək ta mu.

44Debidȧŋ ɔ bont kɔ Mariki. Ɔwa to mɔ kȧl yi ɔwan kɔŋ-e?

45Ɔwa ka katəl ka aŋfəm bɛ, ɔ pa ka aŋkarande ŋɔŋ, 46Pɛndaf nu aŋkarmɔkɔ aŋa fela tə kəkɔth rə suma təbɔli, ɔwa aŋa bɔthər ɛkori ka ɔdɛr ɔthila, yi tawaŋ tətɔtɔkɔ ka ɛseth ɛgbanɛ, yi ɔdɛr ɔtɔtɔkɔ ka ɛmet. 47Aŋ ləsər ɛseth ya ȧŋbora, ɔwa rə kəkɔnthɔsnɛ aŋ ramnɛ ɔwoni. Aŋe aŋ tə tha sɔthɔ mətheri məbana.

বর্তমানে নির্বাচিত:

Luk 20: TMNNT

হাইলাইট

কপি