MATIU 7

Nungaa Wekeisia Lɛɛla

(Luk 6.37-38,41-42)

1“Baa nungaa wekeisia lɛɛ, aako Ngewɔ aa bi lɛɛ. 2Gbamaile kitii na lɔɔ ba tewe nungaa wekeisia ma ta lɔ Ngewɔ a jia la a bie, tawao bi dangaa ti ma Ngewɔ bɛɛ a dalɔ bi ma. 3Gbɛe bi kaawolei na gbema i bi ndewehindoi yama kɛɛ bi gbewe gbi ngulu-gɛkɛɛ na va i bi nda yaamɛi? 4Ba yee gu bi nde bi ndewei ma bɛɛ, ‘Kɔnɛɛ, gbɛɛ ngi kaawolei na gbua bi yama,’ kɛɛ bɛɛ gu a ngulu-gɛkɛɛ na lɔlaa i bi nda yaamɛi? 5Bia baayamɔ lɔ hɔɔ a bie! Ngulu-gɛkɛɛ gbua pɛiŋ bi nda yaamɛi, ta lɔ ba gu a hinda lɔla gbalauŋ kaawolei gbuava bi ndewei yama.

6“Hani na ndaheingɔ Ngewɔ ma waa fe ngilangaa wɛ. Wu na wiengaa, ta wotelɔ ti gbundɛ wu ma. Waa wu hani baagbangɔi nasia gula ndondɛngaa gulɔ, wu na wiengaa, ta nyiminyimilɔ lekee ma a gɔwɔ.

Yesu Yɛ A Fɛɛli, A Kɔkɔli, A Ndalewe

(Luk 11.9-13)

7“A fɛli, wa majɔlɔ; a kɔkɔli wa tɔlɔ; a pɛlei laalewe, ta ndawolɔ wu wɛ. 8Numui na lekee a fɛli, a majɔlɔ, numui na a kɔkɔli, a tɔlɔ, pɛlei a lawolɔ numui na wɛ a ndalewe. 9Wua kɛkɛngaa a wue, wu yilayee a kɔtu velɔ ngi loi wɛ ji a ngi vɛli a mɛhɛɛ? 10Ɔɔ, wa kaali nyamu velɔ ngi wɛ ji a nyɛɛ vɛli? 11Kia bɛɛ wu nyamungɔ wu bɛɛngɔe a hani yekpengaa vela wu leengeisia wɛ. Wu Kɛkɛ na i Ngelegoohu i leweni poloŋ wu ma a hani yekpengaa vela nasia wɛ ta ngi vɛli!

12“Faale na gbi bi longɔ nungaa ti pie a bie, tamia ba pie a tie; Mojisi jawei yeembui lɔ kɛɛ kaai na Ngewɔ lutuisia ti kɛni.

Pele Yagbɛɛngɔi

(Luk 13.24)

13“A wuaa a kata laama gbɛɛngɔi wee, gbamaile katei lamɛi na a li a numu jahama ngawɔlɔngɔe tawao pelei a li na ya gbalauŋ, tawao numu gboto mia ta jia la. 14Kata lamɛi na gbɛɛngɔe a li a numu kunafɔ lɛɛvui hu tawao pelei na a li na ya kpuya tawao nasia ta yeepelei na lɔ tii gbotoni.

Ngulii Tia Ngi Wɛi

(Luk 6.43-44)

15“Wu valangɔ i yɛla ndɛɛ Yewɔ lutuisia va; ta walɔ wu gama ti mayeingɔ nyɔlɛɛ makɛ yekpe hu kia mbalangaa ti na, kɛɛ sawo, ti liisia hu, ti yɛni a fula vuhaingaa lɔ. 16Wa ti gɔɔ ti wiehindei ma lɔ. Ngaali yeyakɔ ɛɛ wua a glepii tawao ngaali wulu ɛɛ wua a figi. 17Ngulu yekpei a wua a nguluwa yekpei lɔ, kɛɛ ngulu heegbɛngɔi a wa a ngulu-wa nyamui lɔ. 18Ngulii na kpenkpengɔ ɛɛ gu a wua a ngulu-wa nyamu, tawao ngulii na ii gbekpeni ɛɛ gu aa wua a ngulu-wa yekpe. 19Ngulu gbi lekee ii wɛilɔ a ngulu-wa yekpe ta pɔlɔ ti pili ngɔmbui hu. 20Faale, wa ndɛɛ lutuisia gɔɔ ti wiehindeisia ma lɔ.

Nasia Ta Wua Ngelegoohu

(Luk 13.25-27)

21“Nasia ta nya loli tɛɛ ‘Ndemɔi, Ndemɔi,’ ti gbi ii le ta yɛ wuaama Ngelegoohu Mahayɛi hu, kɛlee nasia ta nya Kɛkɛ na i Ngelegoohu ngi liima hindei wie. 22Watii na kpɛmbo-volei a hiti, numu gboto ta ndelɔ nya ma tɛɛ, ‘Ndemɔi, Ndemɔi, muii Ngewɔ yiɛi leni nungaa ma bi biyei hu, tawao bi gbayei hu muii ngafa nyamu gboto gbuani nungaa hu, tawao muii kabande hinda gboto wieni bi biyei hu?’ 23#Saam 6.8 Faale nga ndelɔ leeŋ ti ma ngɛɛ, ‘Ngii wu gɔɔ; a gbua mbei, wu hinda nyamu wieblɛi jisia.’

Pɛlɛ Loblaa Feleisia

(Luk 6.47-49)

24“Faale na, numu gbi lekee a nya layie jisia mɛni, i ti wie, ngi wiengɔe kia taamɔ nɛmahu lewengɔ yila i yɛ na i ngi wɛlei loni fawa gɔtii hu. 25Njɛi i wɛilɔ wa, njɛisia ti ve hulewengɔ, vivii i gula, ti gbi ti hɔwɔ pɛlei na ma kɛɛ ii gulani, ajifa kpujangɔ yɛla fawei hu lɔ.

26“Kɛɛ numu gbi lekee a nya layie jisia mɛni kɛɛ ɛɛ ti wie, ngi wiengɔe kia taamɔ wuhubangɔ yila i yɛ na, i ngi wɛlei lo ŋanyaŋanyɛi hu. 27Njɛi i wɛilɔ wa, njɛisia ti ve hulewengɔ, vivii i gula, ti gbi ti hɔwɔ pɛlei na ma kɛ i gulanga; tawao i nyanilɔ kpɛmgbɛjɛɛ!”

Kpayei Na I Yɛ Yesu Wɛ

28Kia Yesu i kpɔyɔni a njɛpɛi jisia lela, fahii gbi ti wuhu i wuilɔ pelei na va i yɛ nungaa gaa la. 29Ajifa i ti gaailɔ kia numui na i na kpaya ngi wɛ, ii wieni kia Sawei Yeekamɔɛisia ti yɛ nungaa gaa.

বর্তমানে নির্বাচিত:

MATIU 7: MENNT

হাইলাইট

কপি