OKHUCHIAKA 13
13
Aburamu na Loti babukhana
1Aburamu yarula Emisiri nende omukhasiwe halala nende biosi ebiayali n'nabio natsia enandete wesibala sia Kanaani, ne Loti yatsia halala n'naye. 2Aburamu yali omuhinda okhusila. Yali nende amakondi, tsimbusi nende tsing'ombe, ma nende efetsa netsahabu. 3Yamala narula habwene yaho natsilil'la nende oluchendo nahengele Betseli. Yoola habundu ahali hakari wa Betseli nende Ai aheliheema lilie liali olwokhuranga 4ahayali niyombokha olusambwa. Habwene yaho yamwekayakaya OMWAMI.
5Loti naye khandi yali nende amakondi, tsimbusi nende tsing'ombe, halala nende amaheema. 6Esibala yisio sisiabahela bosi khulwokhumenyamwo tawe, sichila bali nende ebiayo ebinji ma sibaali abanyala okhumenya halala tawe. 7Obusoolo bwamala nibubaho hakari wabaayi bemiruko chia Aburamu nende abaayi bemiruko chia Loti. Olwene yilwo Abakanaani nende Abaperisi bali nibasimenyele musibala yisio.
8Kho Aburamu nabool'la Loti mbu, “Ifwe khuli abata, ne sikenyekhanga obusoolo bubeho hakari wabandubo nende abanje tawe. 9Yanza khwabukhane. Wele ahotsia. Notsia khumukhono musaatsa ne nase nzia khumukhono mukhasi.”
10Loti yachinguula tsimoni tsitsie nalola esipaapi sia Yorodani okhwola Soari nisili namaatsi amenji singa omukunda kwo MWAMI, nohomba singa esibala sie Misiri. Kano kaliho OMWAMI nasili okhumulula Sodoma nende Komora.#Okhuch. 2:10 11Kho Loti yamala niyeela esipaapi sia Yorodani siosi ni natsia ebukwe. Nimbwo abandu babili yabo babukhana. 12Aburamu nasikala musibala sia Kanaani, ne Loti namenya mumataala kali musipaapi nara liheemalie ahembi nende Sodoma. 13Ne abandu ba Sodoma bali ababi khandi bakholanga tsimbi imbeli wo MWAMI.
Aburamu yatsia Heburoni
14Loti namal'le khutsia, OMWAMI yabool'la Aburamu mbu, “Chinguula tsimonitsio aholi yaho ma ohenge bulahi tsimbeka tsiosi. 15Nakhuhelesie ibe nende olwibulolwo esibala siosi esiololanga, ne siakhabe esisio inziayo.#Ebikh. 7:5 16Ndakhakhuhelesie olwibulo olwinji okhusila, singa olukuukhi, ne abulaho owakhanyale okhubabasia bosi. Singa obwo lukuukhi luranyala okhubasibwa nimbwo olwibulolwo luranyala okhubalwa. 17Lunondi tsia olambuule esibala yisio siosi, sichila khuheye esibala yisio siosi.” 18Ma Aburamu nasimula liheemalie natsia okhumenya ahembi nende emisaala chie Miruba chia Mamure echili mu Heburoni, ma niyombokhelaho OMWAMI olusambwa.
বর্তমানে নির্বাচিত:
OKHUCHIAKA 13: EBAIBO
হাইলাইট
শেয়ার
কপি
Want to have your highlights saved across all your devices? Sign up or sign in
©Bible Society of Kenya, 2019
