Yohanes 13

O Yesus Awi muri-muri manga dohu watiodo

1O Paskah ma Wange ma Rarame gena he yaadoka, so ma langino de o rarame ma ino yaodo, de o Yesus gena wanakoka Awi orasi imasidiadoka, ma ngale Una o dunia manena bilasu wodongosa de woliho wokahie ma Babaye. Una Awi muri-muri masirete igogoge o duniaka, ona magena wadodaraka so kanaga Una Awi edekati wasikelelo Awi muri-murika to Una Awi dodara gena foloisi ilamo onaka.

2So daputuku de kanaga ona yoodo de o Iblis idomaka o Yudaska, ena gena o Simon Iskariot ma ngopa, gena wiaka dabolo so wisigurubuka, o aturu datotorou moi kanaga awi sininga ma rabaka itemo, “Ngohi aku o Yesus towisiija.” 3Duma o Yesus wanakoka kanaga ma Baba Gikimoi wihike dabolo Unaka o kuasa so aku o bi moi-moi dangodu wapareta, de Una lo wanakoka Awi sihino o Gikimoino so kanaga asa woliho Unaka. 4So kagena ona yangodu ka yoodosi, de Una womaoko de Awi baju wahoi so wahadoku, de o handok wadehe so Awi doino wosipilikuka. 5Wosipilikuka, de o ake wadehe de woguse o bokolku de womaaka maro o gogilalo moi, so Una Awi muri-muri manga dohu watiodo de Awi handok lo wosieseka.

6So wahino o Simon Petruska, de Awi muri una magena wotemo, “Jou, dadoohaso Ngona notemo maro to ngohi ai dohu de Ngona natiodo.”

7De Una wotemo, “O kia taaaka kanaga de ma ngale, de ngaroko magena ngona nanako waasi, duma done ma duuruka ngona asa nanako.”

8Kagena de Awi muri wotemo, “Idadiwa! Ka o orasi moi lo tonisimahawa, so upa Ngona de to ngohi ai dohu natiodo.”

Kagena de Una wotemo, “Nakoso ngona la Ngohi tonitiodowa, de ngona magena ngaroko to Ngohi Ai nyawa imomote, duma ma duhutu kawa.”

9So Awi muri una magena wotemo kali, “We, Jou! Nako komagena, de upa ka to ngohi ai dohu duma bilasu de ai sahe de ai gia lo natiodo.”

10Komagena de Una wotemo Awi murika, “Nakoso o nyawa la kanaga imaosi dabolo, manga rohe datebi so o ngekoka itagi-tagi de ilihono de ka cawali manga dohu bilasu yatiodo. De ngini kanena nia sidongirabaka, nako nia sininga ma dorou gena ningodu niatebika, ka cawali una womatengo watebi waasi.” 11Komagena wotemo onaka, sababu una womatengo done asa wisiiija magena, naguuna gena Una he wanakoka.

12Watiodo daboloka, de Awi baju gena wadehe so womasitibaka, de Awi rihoka womatami kali. So womatamika, de wotemo onaka, “Idodooha o kia Ngohi taaaka nginika gena ma ngale tanu nisihodaka. 13Ngini kanena niaso Ngohika nia Guru, eko nia Jou, de nako Ngohi komagena, gena itiai so nibicara lo ka daloha Ngohika. 14Ma sababu Ngohi ngaroko to ngini nia Guru de nia Jou, duma nia dohu gena tatiodoka, so ngini lo bilasu nia dohu nimateketiodo so nimahadoku bai! 15Sababu Ngohi taaka komagena, ma ngale aku ngini tinisikelelo, maro idodooha Ngohi tiniaka nginika, komagena ngini lo bilasu nimahadoku nimatekeleleani moi de moika. 16O nyawa la idadi ileleleani, ona igogou yaakuwa itemo, ‘Nako ngohi de ai tuangi woipopareta, ngohi foloi ilamo,’ magena yaakuwa isibicara. De komagena lo nakoso o nyawa moi de kanaga wisulo awi dodiaoka wotemo, ‘Notagi ai demo naaho de nadedemo onaka,’ so una wotagi wadedemo gena, waakuwa womasihie wotemo, ‘Nakoso ngohi de kanaga woisusulo gena, ngohi masirete foloi tolamo.’ 17De magena o dodoto manena ngini kanaga nianako itiaika, so ngini asa igogou nisanangi, nakoso ngini nimahadoku de nimatekeleleani moi de moika.

18O kia naga Ngohi tinidedemo nginika gena nia sininga ma dorou yatiodoka, kanaga tinisidumu duma ningoduwa. Kanaga moi una o nyawa ma dorou, una towisidumuwa, sababu o nyawa nagoona Ngohi tahihirika, ona magena igogou Ngohi tanako. Duma Ngohi tinidedemo komagena, la ma ngale isiganapu maro o kia isilelefo idomaka o Gikimoi Awi Jaji ma Buku ma rabaka itemo, ‘Kanaga o nyawa moi woodo dede Ngohi, una magena done asa womadadi to Ngohi Ai lawangi.’ 19De magena idadi waasi de kanaga Ngohi tinisingangasu idoma nginika, la o orasi magena yaadoka, de ngini asa nipiricaya igogou, Ngohi manena o Salamati ma Kolano. 20O nyawa Ngohi tasusulo so itagi o nyawaka, la nakoso ona magena yadehe daloha, magena imatero de ona lo Ngohi idehe daloha. So o nyawa nagoona la Ngohi idehe daloha, ona manga dehe ma manara magena lo ma meta Ai Babaka, sababu Ngohi Una woisulo so tahino.”

O Yudas wotagi womajobo ona wadongosa

(Matius 26:20-25, Markus 14:17-21, Lukas 22:21-23)

21So o Yesus wasitemo daboloka, de Una Awi sininga asa foloisi ipeleso, de asa wotemo wosingangasu kali onaka, “Igogou-gogou o nyawa moi kanaga to ngini nia sidongirabano asa Ngohi woisiija Ai lawangika.”

22Ato yoise Awi demo magegena, de Awi muri-muri imatatamiye gena yogamamu icarawa. So kanaga manga sininga ma rabaka itemo, “Ma ngale o nyawa naguuna sidago Awi demo komagena.” 23De kanaga o muri moi, una o Yesus Awi dodiao widododara gena, womatamiye o Yesus Awi dateka, 24so una magenaka o Simon Petrus wisidoginano de wotemo, “Hika ngona nosano una magena naguuna.”

25So una o Yesus Awi dateka, de wotemo Unaka, “Jou, naguuna done asa Ngona wonisiija Ani lawangika.”

26Kagena de Una wotemo, “Nakoso o roti manena la tongadoka de towihike unaka gena, he una magena dabolo.” So wotemo komagena dabolo de Una o roti moi wadehe de wongado o lelengaku de wihike o Yudaska, una o Simon Iskariot ma ngopa. 27O Yudas wadeheka, de kagena asa o Iblis unaka wingosa de iwipareta.

De o Yesus wotemo unaka, “O kia naga ngona notetemo la naaka gena, taika la naaka kasi.” 28Awi demo komagena, duma ona o meja yosigogilolino moi lo yanakowa Awi demo ma ngale ma diai o Yudaska. 29De ma sababu to ona manga manara ma pipi wisicoho unaka, so yamuruo naga imafikiri manga siningaka itemo, “Nagala una wotagi la ma ngale ngone nanga rarame ma ino woija,” de ma binuka manga siningaka itemo, “Igogou, wisulo la wotagi ma ngale o pipi o nyawa isususaka wahike.”

30So o roti wadehe de o Iblis wingosaka so una womajoboka, o orasi magena he daputuka.

O sulo ma demo damomuane moi

(Matius 26:31-35, Markus 14:27-31, Lukas 22:31-34)

31So o Yudas womajoboka, de o Yesus Awi muri-murika wotemo, “Kanaga o orasi manena de Ngohi o Nyawa ma Duhutu gena Ai Baba Awi simaka, de asa isimulia. De ma sababu Ngohi o Gikimoi towisigise itiai, so asa tosone, so Una magegena lo asa wisimuliaka. 32Nakoso magena taaka so o Gikimoi wisimuliaka, de lo Ngohi masirete gena dede o Gikimoi so asa Ngohi woisimuliaka, so ma cunusi de igogou magena asa waaka.

33Ngini maro Ai ngopa-ngopa tinisosininga, bilasu ngini nianako ma cunusi Ngohi dede ngini he kanena kawa. De done asa ngini Ngohi nisari duma imatero maro o kia Ngohi totetemo o Yahudi manga roririka gena, komagena lo Ngohi tinidedemo nginika, gena ngini lo niaaku waasi niakahika o riho magegenaka, kiaka Ngohi asa kagena tokahika. 34De kanaga o sulo ma demo damomuane moi tinihike nginika, ena gena ngini bilasu nimatekedodara moi de moika. La imatero maro Ngohi tinidodara nginika, komagena lo ngini bilasu nimatekedodara moi de moika. 35Mutuwade de ma ngale ngini nimatekedodara moi de moika, so o bi nyawa yangodu asa yanako ngini nidadi to Ngohi Ai nyawa tinisusulo.” Komagena to Una Awi gogolo onaka.

36Magena de o Simon Petrus wotemo, “Jou, kiaka notagi.”

So Una wotemo, “O riho kiaka kagena Ngohi totagi gena ngona naaku waasi noimote, duma done ma orasika de kagena lo ngona asa noimote kiaka Ngohi tokahika.”

37“Jou, o kiaso Ngona notemo ngohi taakuwa Ngona tonimote o orasi manena. Dohaka, ma ngale Ngona toniriwo la ngohi bilasu ai oho tahike de ngohi lo tosanangi tomaaka komagena.”

38De Una wosango wotemo unaka, “Nakoso igogou ngona notemo nosanangi nosone ma ngale Ngohi noiriwo, ce, Ngohi tonisingangasu ngonaka, sutusi o toko isore waasi, de igogou ngona asa o nyawa manga simaka nomanosu, notemo Ngohi noinakowa sidago lo ma para ma saange.”

বর্তমানে নির্বাচিত:

Yohanes 13: LAIGBI

হাইলাইট

কপি