Johani 3

Jesu ni Nikodhemo

1Ku ti ni m'thu wa Mufarisi, ditina dakwe i nga ti Nikodemo; mfumeli wa Vajudha. 2A to ta ka Jesu ni wusiku, a txi ta khene kwakwe:

“Rabbi, ha tiziva ti to u M'gondisi wu a humako ngu ka Txizimu, nguko kha nga ho m'thu wu a sikotako kumaha sidiwukiso si u si mahako, ngako Txizimu txi si nga ni nene.”

3Jesu a to xamula a txi khene kwakwe:

“Ngu ditshuri, ngu ditshuri, na kugela ku khani: Ngako m'thu asi velekwi da wumbidi, kha na kusikota kuwona Mfumo wa Txizimu.”

4Nikodhemo a txi khene kwakwe:

“M'thu, ngako a di kumbile, a nga velekiswa kutxani? Ina a nga tshumelela mndani ka mame wakwe, e tshumela e velekwa da wumbidi kani?”

5Jesu a to xamula a txi khene kwakwe:

“Ngu ditshuri, ngu ditshuri, na kugela ku khani: Ngako m'thu asi velekwi ngu mati ni Moya, kha na kusikota kuwulela Mfumoni ka Txizimu. 6Asi si nga velekwa ngu mmidi i mmidi kambe asi si nga velekwa ngu Moya i moya. 7U nga xamale ngu kuva ni di kugete ku khani: Mi fanete kuvelekwa da wumbidi.#3:7 Da wumbidi: Vamwani va bhalisite ku: “Ngu ta txitimwi”. 8Diphuho di futeta mu di randako kona, se u pfa txiwudi txa dona, aniko khu ti zivi ti to di ta ngu hani ni ti to di ya hani. Ngu toneto, ti mahekako ni ka votshe va va nga velekwa ngu Moya wa Txizimu.”

9Nikodhemo a to mxamula a txi khene: “Ti nga mahisa kutxani toneto kani?”

10Jesu a to mu xamula a txi khene:

“Awe u m'gondisi wa Israyeli, se khu ti zivi timhaka tiya kani? 11Ngu ditshuri, ngu ditshuri, na kugela ku khani: Hi womba ti hi ti zivako, hi fakaza ati hi nga ti wona, aniko kha mi amukeli wufakazi wathu. 12Eko ni mi gelako timhaka ta ha mafuni, mi si tumeli, mi na tumelisa kutxani, ngako ni txi mi gela ta nzumani kani? 13Kha ku na m'thu wu a nga kwela nzumani, hahanze ka wule a nga txhika ngu nzumani, i ku Mwanana wa M'thu.

14Nga kule Mosi a nga hayeka mnyoka txiwulani, kufana ni toneto nene Mwanana wa M'thu a na hayekwa, 15kasiku awule a kholwako kwakwe a na mana wutomi wo mbi guma.” 16Nguko Txizimu txi kombile lirando ka vathu, ahawa txi nga za txi ningela Mwanana wa txona wa Mmweyo ekha, kufela ku, votshe va va no kholwa kwakwe, va si lovi, aniko va na mana wutomi wo mbi guma. 17Nguko Txizimu kha txa rumela Mwanana wa txona ku ta abanisa ditiko, aniko txi mrumete ti to ditiko di ta mana kuhanyiswa ngu ngene.

18Awule a kholwako kwakwe, kha na mbi abaniswa, aniko awule asi kholwiko, se a abanisilwe, nguko kha tumela ditinani ka Mwanana wa Mmweyo ekha wa Txizimu. 19Txigelo txa kuabaniswa ngu txiya: Kuwonekela kutile ha mafuni, aniko vathu va randile ngutu txidema kupinda kuwonekela, nguko mithumo yawe i ti yo biha. 20Nguko wuhi ni wuhi a mahako kubiha a nyenyana ni kuwonekela, kambe kha ti kuwonekelani, kufela ku mithumo yakwe yi si landulwi. 21Aniko awule a mahako ti i ku ta tinene, a tshuketela ha kuwonekelani, ti taku mithumo yakwe yi txi woneka ha kubasani, nguko a yi maha ngu tifanelo ta mlayo wa Txizimu.

Jesu ni Johani Mubhabhatisi

22Msana ka toneto, Jesu a to ya ditikoni ka Judheya, a di ni vagondiswa vakwe, se a txi ya zumba navo e bhabhatisa vathu. 23Johani nene a ti bhabhatisa Enoni, hafuhi ni Salimi, nguko ku ti ni mati amangi koneyo, ni vathu vavangi va txi ya koneyo veya bhabhatiswa. 24#Wona ni ka: Mat. 14:3; Mar. 6:17; Luk. 3:19-20. Johani a ti sinzi kukhotelwa mkorani.

25Se ku to humelela kukanetisana ngu mhaka ya ku ti basisa hagari ka vagondiswa va Johani ni ujudha wokari. 26Va to tsula ka Johani va txi ya mu gela ku kha vona:

“M'gondisi, awu u nga ti nayo mtxhatuko kheya ka Jordhani, awu u nga fakaza ngu ngene, wa bhabhatisa nene, se votshe va ya kwakwe.”

27Johani a to xamula a txi khene:

“M'thu kha sikoti kumana txilo ni txa tximwetxo, ngako a sa ningwa ngu nzuma. 28#Wona ni ka: Joh. 1:20. Anu mipune mi tifakazi ta ti ni nga womba ni txi khani: ‘Hi nga ani Mesiya, ni to rumelwa kuthangela masoni kwakwe.’ 29Nyamne wa msikati ngu mteki, se pheleketi ya mteki yo mu bangalata ni ku mu engisa, yi tsaka ngu kutsaka ka hombe, ngako yi txi pfa dipswi da mteki: Aliya ngu lona litsako langu, lona li hetisekile. 30Ene a fanete kukula, ani ni txi va hahatshi.”

Awule a tako ngu nzumani

31Awu a tako ngu txitimwi, a txitimwi ka votshelele; awu a tako ngu ha mafuni, mbwa mafu, se a womba-womba ngu ta mafuni. Awu a tako ngu nzumani, 32a fakaza ngu ti a nga ti wona ni ti a nga tiengisa, aniko kha ku na m'thu wu a amukelako wufakazi wakwe. 33Awu a amukelako wufakazi wakwe wa tsanisa ti to Txizimu txi thembekile. 34Awu a nga rumwa ngu Txizimu a womba-womba mapswi a Txizimu, nguko ngu txona txi nga mninga Moya i si nga ngu mpimo. 35#Wona ni ka: Mat. 11:27; Luk. 10:22. Tate wa randa Mwanana, a vekile sotshe manzani kwakwe. 36Awu a kholwako ka Mwanana, a ni wutomi wo mbi guma. Awu asi engisiko Mwanana, kha na mbi wona wutomi, aniko kuhenya ka Txizimu ku txitimwi kwakwe.

বর্তমানে নির্বাচিত:

Johani 3: BEC2016

হাইলাইট

কপি