Ɖúù 24

Jízɛ̀ɛ̀ gĩɔ-wóɖó-wóɖó

(Máfíò 28:1-10; Máà 16:1-8; Jɔ̃́ɔ́ 20:1-10)

1Wíkìɔ̀ wé kĩ́ín-kĩ́ínɔ̀ ɓaɖaa, màa ɓěɔ̀ dùnùìn ma ɖé xwɛ́-gmààɔ̀ wĩín, ké wa kpa ma cáná nɔ̀mɔ̀ nyɔ́ún ɓě ɓɛ́ wa ɖǎ ma ti dyéìn nyɛ. 2Kɛɛ wa dyéɛ kà sɔ́ɔ́-kpò ɓɛ́ ɔ nì ma kà ɓó xwɛ́-gmààɔ̀ wĩín nyɛɛ ɖǎ ma ɓó sɔ̀ kɛ. 3Ké wa dyá ma ɖé, kɛɛ wa se ma Jízɛ̀ɛ̀ xwɛ́ɔ̀ ɖé dyé. 4Ti wa nì ma ɖɛ nìà kɛ jè hwìɖǐi poɛ̌n nyɛɛ, wàɖà cá kɛɛ, gàa sɔ̃́ ɓɛ́ wa po ɖɔ wee múɛɛ nyànà ma ɓó wa wáún dyi. 5Ké màa ɓěɔ̀ fɛ̃̀ìn ma, ké wa taɓa ma dú hwuɖu. Ké gàa ɓěɔ̀ cɛ̃ɛ ma wa gbo, ké wa ɖá, “Ɖɛ́ kɔ̃̀ jè ɓě nìà nyɔ nì cĩ́ɛń nyɛɛ nyɔ ɓě ɖǎà mɛ́ɛ hwìɛ̀ dyi mɔ́uń wɛ̃́? 6Ti ɔ nì ma ɖé Gáɖàɖíì-ɓòɖòɔ̀ kɔ̃ keɛɛ, ɖɛ ɔ cɛ̃ ma kà ɓě gboɛɛ mɛ nì ɓě hwìɖǐi. Ɔ ɖá, 7‘Wa ɓéɖé ɓɛ́ wa ké mɔ̄ Nyɔǔn-dyùɛ̀ Dyú-gààɔ̀ nàmàǔn-nyɔ̀ ɓě xwáɖáún zàìn, ɓɛ́ wa ké ḿ kɔ́ɖɔ́sì kɔ̃in kɔ̀ìn, ɓɛ́ ḿ ké gĩɔ wóɖó ɓó wéɔ̀ tã nììnɔ̀ xwíníín.’ ”

8Púɛɛ, Jízɛ̀ wuɖu ɓěɔ̀ dyi ma màa ɓěɔ̀ hwìɖǐi, 9ké wa sɔ̀ ma ɓó xwɛ́-gmààɔ̀ wĩín, ké wa mu, ké wa cɛ̃ ma ɖɛ séín ɓě nìà kɛ ɖeín-nà-nyɔ̀ ɓaɖa-bùè sè dyúáɖò ɓěɔ̀ kè nyɔ tɔ̀ɔ̀ séín ɓěɔ̀ gbo. 10Màa ɓěɔ̀ mɔ̀ Meɖé sɔ̀à ɖé Máɖèɖà-hwɔ̀ɖɔ̀ɔ̀ múɛ kè Jòánà ɔ kè Meɖé mɔ̀à Jĩ́ìn ɖe kɛ. Wa kè màa tɔ̀ɔ̀ ɓě nì ma ɓó wa gboɛɛ cɛ̃ ma ɖɛ ɓě nìà kɛ àpɔ́sò ɓěɔ̀ gbo. 11Kɛɛ àpɔ́sò ɓěɔ̀ hwòɖǒ ɖá ɖɛ màa ɓěɔ̀ cɛ̃ ma kà kɛɛ mɔ̀ ma ɖɛ cá-cá, ké wa se ma wa jǎà po. [ 12Kɛɛ Píɖɛ̀ sɔ̀ ma ɓó wa hwìɛ̀, ké ɔ kpa ma ɖé xwɛ́-gmààɔ̀ gbo peɖeɛ. Ti ɔ nyini ma ɖéɛɛ, ɔ kíɖí, ké ɔ gmɔ̀ ma ɖé xwɛ́-gmààɔ̀ mú, ké ɔ dyé ma ɖénì-ɖɔ̀ ɓɛ́ wa bĩìn ma kà Jízɛ̀ dyiɛɛ ɖòùn. Ké ɔ mu ma taún ɖe, ké ɔ poìn ɖɛ ɖǎ ma kà kpáa jè hwìɖǐi.]

Wa kpa nàà ɖé Ìmédyà-hwɔ̀ɖɔ̀ɔ̀ mú

(Máà 16:12-13)

13Ɓó wé dyúáɖòɔ̀ xwíníín nyɛɛ, Jízɛ̀ɛ̀ ɖeín-nà-nyɔ̀ ɓěɔ̀ nyɔ sɔ̃́ nì ma hwɔɖɔ-dyù ɖò ɓɛ́ wa ɖáìn Ìmédyà kɛɛ mú muɛń. Sɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ mú ké ɖé Ìmédyà-hwɔ̀ɖɔ̀ɔ̀ mú muɛɛ ɓɛ́ìn nà-nàà áɓà sɔ̃́ jǔɛ. 14Wa nì ma ɖɛ séín ɓě ɖǎ ma kà kpáa jè cɛ̃ɛ kpauń. 15Ti wa sɔ̃́ɔ̀ nìɛ̀ ma cɛ̃iń, ké wa nìɛ̀ ma hwìɖǐi poɛ̌n kpauń wɛ̃ɛ, Jízɛ̀ mìɔùn xwɛ̃́ìn ma wa bũ̌in, ké ɔ kè wa nì ma muɛń. 16Wa dyé ma ɔ pū, kɛɛ wa se ma ɔ dyí dyuò. 17Ké Jízɛ̀ diè ma wa dyi, ké ɔ ɖá, “Ɖɛ́ kɔ̃̀ dɔ́ɔ́ ɓě nìà dèɛ̀ kpauń wɛ̃́?”

Ti ɓɛ́ wa wɔ̃́ ma ɔ wuɖuɔ̀ kɛɛ, wa nyànà ma dyi dĩin, ké wìì nì ma waà dyúa-kpà ɓěɔ̀ kɔ̃. 18Waà dyúáɖò kɔ̃̀ nyɛ́nɛ́ mɔ̀ ma Kíɖíópà kɛɛ diè ma ɔ dyi, ké ɔ ɖá, “M̀ ɖòùn mɔ̀ ɖéè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké m̀ seà ɖɛ ɓě ɖǎà kpá ɓó wéɔ̀ǔn wɛ̃ɛ dyí dyuò wɛɛ̀?”

19Ké Jízɛ̀ diè ma wa dyi, ké ɔ ɖá, “Ɖɛ́ ɓě kpáà kɛ́?”

Ké wa ɖá, “Ɔ mɔ̀ ɖɛ ɓě kpáà Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ múɛɛ gboɛ. Ɔ mɔ̀ ma kpáá-ɖɛ̀-cɛ̃-nyɔ̀ ɖò. Ɖé Gèɖèpɔ́ɔ̀ kè nyɔǔn séín ɓě gboɛɛ, ɔ dyuò ma wùɖùɛ̀ mìɔ, ké ɔ ɓéɖé ma kpé ɖé ɔ nyuu-ɖɛ̀ ɓěɔ̀ mú. 20À sáa-zà-nyɔ̀ kpa ɖɛ ɓěɔ̀ kè à wuɖuí-kɔ̃̀-nyɔ̀ ɓěɔ̀ zà ma ɔ xwáɖáún, ɓɛ́ wa ké ma ɔ zaa kpɔ̃̀ìn ɓó mɛ́ jè. Ké wa kɔ̀ìn ma ɔ kɔ́ɖɔ́sì kɔ̃in. 21À mɔ̀ùn dèɛ̀ ma hwòɖǒ kɔ̃ kà ɔ mu ma nyɔ ké ma kà Éézùɖùɛ̀-nyɔ̀ ɓěɔ̀ gbǎà kɛɛ jǔùn wɛ̃. Ké ɓó kɔ̃in ɖeɛɛ, ɖɛɔ̀ ɖǎ ma kpá kɛɛ, zɛ̃̌ɛ̀ poɛ wé tã. 22Ké màa ɓě mɔ̀à à nyɔ ɓěɔ̀ ɖò kɛɛ giniìn à dyi. Wa dùnùìn má ɖé xwɛ́-gmààɔ̀ wĩín, 23kɛɛ wa se má ɔ xwɛ́ɔ̀ dyéɛ ɓɛ́ìn. Wa dyi má ɖe, ké wa ɖá wa dyéɔ́ má dyí-tɛ̀mɛ̀ìn-ɖɛ̀ ɖò. Dyí-tɛ̀mɛ̀ìn-ɖɛ̀ɔ̀ mɔ̀ ínjà ɓě, ké wa cɛ̃ɛ kà ɓɛ́ ɔ nì cĩ́ɛń nyɛ. 24Nyɔ ɓě nì ma kà ɓó à gboɛɛ, ɖíɛ́ ɓě muɔ́ má ɖé xwɛ́-gmààɔ̀ wĩín ɖekè. Ké ti wa muɔ́ má ɖéɛɛ, kà màa ɓěɔ̀ nyuà à gbo cɛ̃ɛ kɛɛ, kǎà ɔ nì nyɛ̀nɛ̀ɛ̀. Kɛɛ wa se má ɖé ɔ dyé.”

25Púɛɛ, Jízɛ̀ cɛ̃ɛ ma wa gbo, ké ɔ ɖá, “Ɓě kàmà ɖɛ múin wɔ̃́uń wà! Ɓě kàmà ɖɛ séín ɓě ɓɛ́ kpáá-ɖɛ̀-cɛ̃-nyɔ̀ ɓěɔ̀ cɛ̃à kɛɛ hwìɖǐǐ taɓauń. 26Kɛ́ɖɛ́ìɔ̀ se ɓéɖé ɓɛ́ ɔ ké kǎà gǎ dyé, ɓɛ́ ɔ ké ɔ dĩ́ín-dĩ̀ìnɔ̀ dyí ɖúù?” 27Ké Jízɛ̀ zaìn ma ɖɛ séín ɓě nì ma Gèɖèpɔ́ɔ̀-cèè-ɖɛ̀ ɓěɔ̀ mú ɓá ɔ dyíɛɛ wa gbo kɔ̃in sɔ̀ìn Mózè nììn céè-ɖɛ̀ ɓěɔ̀ kè kpáá-ɖɛ̀-cɛ̃-nyɔ̀ séín ɓěɔ̀ nììn céè-ɖɛ̀ ɓěɔ̀ múɛ.

28Ti ɓɛ́ wa ɖǎ ma hwɔɖɔ-dyù kɔ̃̀ mú ɓɛ́ wa nì ma kà muɛń nyɛɛ dyi xwɛ̃́ìn nyɛɛ, púɛɛ, Jízɛ̀ nyuɛ ma pū kà nyɔ nìɔ̌ kà hwɔɖɔɔ̀ mú ziɛ́ muɛń nyɛ. 29Ké wa ɓaà ma ɔ, ké wa ɖá, “Pɛ̃́ dà ɓó à gbo, sepóɛɖé dyóɖóɔ̀ ɖǎ zi, ké tíe nìǎ kpɔ̃uń dyiɛń.” Ɔ jèɛɛ, ɔ mu ma, ɓɛ́ ɔ ké ma ɖé wa gbo pɛ̃́. 30Ké ɔ kè wa kò ma téɓèɖèɔ̀ gbɔ dyi. Ɔ ɖú ma bɛɖɛɛ̀ɔ̀ dyí, ké ɔ po ma Gèɖèpɔ́ɔ̀ zùo. Ké ɔ jaɖaìn ma bɛɖɛɛ̀ɔ̀ kpói, ké ɔ nyíɛ ma wa. 31Púɛɛ, waà dyéɖé ɓěɔ̀ kaà ma, ké wa dyuò ma ɔ dyí. Ké ɔ pa ma wa dyéɖé kɔ̃in. 32Ké wa cɛ̃ìn cɛ̃̀ìn ma gbo, ké wa ɖá, “Ti ɓɛ́ à kèɔ̀ kè nìɔ̌ kà hwìèɔ̀ kɔ̃, ké à nìɔ̌ kà wùɖùɛ̀ dyàǔn, ké ɔ nìɔ̌ kà ɖɛ nì ɖé Gèɖèpɔ́ɔ̀-cèè-ɖɛ̀ ɓěɔ̀ múɛɛ jè kɔ̃in zaǐn nyɛɛ, ɔ seɔ́ nì pū kà nyɛ nìɔ̌ kà nyɔ xwíníín wãuń wɛ̃ɛ̀?”

33Ti ɓɛ́ wa ɖǎ ma Jízɛ̀ dyéɛɛ, wa sɔ̀ ma dyí wàɖà, ké wa mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Ké wa dyɛ̀ìn ma ɖé ɖeín-nà-nyɔ̀ ɓaɖa-bùè sè dyúáɖòɔ̀ kè nyɔ tɔ̀ɔ̀ ɓěɔ̀ dyi. Wa séín poìn ma ɖé dyí, 34ké wa nìɛ̀ ma cɛ̃iń, ké wa ɖá, “Bounɓoɔ̀ ɖǎ gĩɔ wóɖó jǎà. Ɔ ɖǎ Sã́ɓò dyí wóɖóìn.”

35Ké nyɔ sɔ̃́ ɓěɔ̀ cɛ̃ ma ɖɛ kpá ma kà wa mɔ̀ùn gbo ɖé hwìèɔ̀ kɔ̃ɛ ɔ kè kà wa dyuò ma Bounɓoɔ̀ dyí, ti ɓɛ́ ɔ jaɖaìn ma kà bɛɖɛɛ̀ɔ̀ kpóiɛɛ wa gbo.

Jízɛ̀ wóɖóìn ɔ ɖeín-nà-nyɔ̀ ɓěɔ̀ dyí

(Máfíò 28:16-20; Máà 16:14-18; Jɔ̃́ɔ́ 20:19-23; Àpɔ́sò 1:6-8)

36Ti wa nì ma ɖɛ nìà kɛ cɛ̃iń nyɛɛ, Bounɓoɔ̀ mìɔùn nyànà ma ɓó wa hwìɛ̀ dyi, [ké ɔ ɖá, “Gìɖìǐ mɛ nì ɓě kɔ̃.”]

37Ké wa giniìn ma dyi, ké wa fɛ̃̀ìn ma mìɔ. Wa ɖáìn wa dyé ma gĩɔ-nyɔ̀. 38Kɛɛ ɔ diè ma wa dyi, ké ɔ ɖá, “Ɖɛ́ kɔ̃̀ jè fũ̀à-fṹá nyuà ɓěɛ́? Ɖɛ́ kɔ̃̀ jè dyi-diè-ɖɛ̀ kò-kò ɓě nìà ɓě hwòɖǒ bũ̌ɛ́? 39Ɓě gmɔ̀ ní xwaɔ̀ kè ní ɓoɔ̀, ɓɛ́ ɓě kéɛ dyé kà ɓɛ́ ɔ mɔ̀ ḿ mɔ̀ kɛ. Ɓě tìnììn ḿ dyi, ké ɓě muɛ dyéìn. Sepóɛɖé gĩɔ-nyɔ̀ ní ɓéɖé fɔ́ kè kpá kà ɓɛ́ ɓě dyéà ké ḿ ɓéɖéà kɛ.”

[ 40Ti ɓɛ́ ɔ cɛ̃ ma ɖɛ nìà kɛɛ, ɔ tɛ̀mɛ̀ìn ma ɔ xwaɔ̀ kè ɔ ɓoɔ̀ wa dyí.] 41Ké múà dyíìn ma wa múin, ké hwòɖǒ kpèìn ma wa kɔ̃in, ké wa seɛ ma jǎà poɛ ɓɛ́ìn. Ɔ jèɛɛ, ɔ diè ma wa dyi, ké ɔ ɖá, “Ɓě ɓéɖé nɔ̄ ɖɛ ɖò, ɓɛ́ nyɔ kéɛ ɖiì?” 42Ké wa nyí ma ɔ zimii ɓɛ́ wa ɖǎ ma pĩɛɛ ɖò. 43Ké ɔ ɖúɛ ma dyí, ké ɔ ɖiɛ ma ɓó wa dyéɖé waí.

44Hwɛ̀ ké ɔ cɛ̃ɛ ma wa gbo, ké ɔ ɖá, “Ti ḿ nì ma ɓě gbo keɛɛ, ɖɛ nìà kɛ ɖé ḿ cɛ̃ ma kà ɓě gboɛ̀. Ɖɛ séín ɓě céè ma ɖé Mózèɛ̀ gma-cèè-ɖɛ̀ɔ̀ mú kè ɖé kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ mú ɔ kè ɖé Wɛ́ɖɛ́-cèè-ɖɛ̀ɔ̀ múɛɛ ɓéɖé wa ké jǎà kpá.” 45Ké ɔ cɛ̃ ma wa hwòɖǒ kɔ̃in, ɓɛ́ wa ké Gèɖèpɔ́ɔ̀-cèè-ɖɛ̀ ɓěɔ̀ múin wɔ̃́. 46Ké ɔ cɛ̃ɛ ma wa gbo, ké ɔ ɖá, “Ɖɛ céèà kɛɛ kɛà kɛ̀. Ɔ mɔ̀, Kɛ́ɖɛ́ìɔ̀ ɓéɖé ɓɛ́ ɔ ké gǎ dyé, ɓɛ́ ɔ ké gĩɔ wóɖó ɓó wéɔ̀ tã nììnɔ̀ xwíníín. 47Ké dyììn ɖé ɔ nyɛ́nɛ́ɔ̀ múɛɛ, wa ɓéɖé ɓɛ́ wa ké bɔ̃̌ ɓá nàmàǔn-kpèɖè dyi táà jè kè bɔ̃̌ ɓá Gèɖèpɔ́ɔ̀ nàmàǔn kɔ̃in zĩ̀ìn jè dyíɛɛ nyɔ ɓě nì ɓóɖó-dù séín kɔ̃ɛɛ gbo cɛ̃. Ɔ ɓéɖé ɓɛ́ ɔ ké nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú gbɔ dèìn. 48Ɓě mɔ̀ ɖɛ ɓěa zàse. 49Ḿ ɖáo, ní mu ɖɛ ɓɛ́ ḿ Ɓǎ ɖáìn ma ɓě nyɛ́nɛ́ín nyɛɛ ɓě gbo tòùn. Kɛɛ ɓě mɛ fòìn nɔ̄ hwɔɖɔɛ̀ mú, ɓɛ́ kpé sɔ̀ìn ɖé dyɔún wɛ̃ɛ ké ɓě kɔ̃in ɓáìn hwɛ̀.”

Jízɛ̀ɛ̀ dyɔún-mu-mu

(Máà 16:19-20; Àpɔ́sò 1:9-11)

50Sɔ̀ìn ɓóɛ gboɛɛ, Jízɛ̀ kpa ma wa ɖé Bɛ́fènì-hwɔ̀ɖɔ̀ɔ̀ mú. Ké ɔ ɖú ma ɔ sɔ̃ ɓěɔ̀ dyií, ké ɔ po ma wa mana kɔ̃. 51Ti ɔ nì ma wa mana kɔ̃ poɛń nyɛɛ, púɛɛ, ɔ sɔ̀ ma ɓó wa gbo, ké Gèɖèpɔ́ɔ̀ kpa ma ɔ dyɔún. 52Ké wa kpá ma múàǔn mìɔ, ké wa mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. 53Ké wa ní hwɛ̀ ma ɖé Gèɖèpɔ́ɔ̀ gbǒɔ̀ mú dyi ɓó Gèɖèpɔ́ɔ̀ zùo po jè.

বর্তমানে নির্বাচিত:

Ɖúù 24: ƁB02

হাইলাইট

কপি