Ɖúù 21

Jɔ̌ɔ̀-màà ɖòɛ̀ nyíí-ɖɛ̀

(Máà 12:41-44)

1Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ múɛɛ, ɔ gmɔìn ma dyi, ké ɔ dyé ma nyɔ ɓě ɓɛ́ wa ɓéɖé ma wíɖí kɛ, ké wa nì ma waà nyíí-ɖɛ̀ ɓěɔ̀ dɛ̀ ɓɛ́ nyɔ ɓěɔ̀ po ma wíɖí kɛɛ poɛń. 2Ké ɔ dyé ma jɔ̌ɔ̀-màà dyé gǎ ɖò ɖekè. Ɔ po ma ɖé jɛ̃̀-pĩ̀à sɔ̃́ ɓɛ́ìn kápà dyúáɖò kɛɛ ɖé. 3Ké Jízɛ̀ ɖá, “Ḿ cɛ̃ɛ ɓě jǎà gbo, jɔ̌ɔ̀-màà mɔ̀ gǎ-dyé-nyɔ̀ nìà kɛɛ, ɖɛ ɔ poà ɖéɛɛ ɓúá kpéín, ké ɔ zi nyɔ séín ɓě ɓɛ́ wa poà ɖé wíɖí kɛɛ dyí. 4Sepóɛɖé wa po ɖé waà wíɖíɔ̀ nyɔ seìn dyiɛɛ ɖò, kɛɛ màa ɓɛ́ ɔ seà ɖɛ ɖò ɓéɖé kɛɛ, ɔ po ɖé ɖɛ séín ɓɛ́ ɔ kéɔ́ ɖii-ɖɛ̀ mú dɔ̃ɛ.”

Jízɛ̀ cɛ̃ Gèɖèpɔ́ɔ̀-gbòɔ̀ wáɖá jè

(Máfíò 24:1-2; Máà 13:1-2)

5Ɓó tia ɓaɖaa, nyɔ ɖíɛ́ ɓě nìɛ̀ ma cɛ̃iń kà ɓɛ́ wa bɛ̃̀ìn ma Gèɖèpɔ́ɔ̀ gbǒɔ̀ sɔ́ɔ́ nɔ̀mɔ̀ kɔ̃in kè nyíí-ɖɛ̀ ɓě ɓɛ́ wa ɖǎ ma Gèɖèpɔ́ɔ̀ nyíɛ. Ké Jízɛ̀ ɖá, 6“Ɖɛ séín ɓě ɓɛ́ ɓě dyéà kɛɛ, ti ɖò mu dyiìn, ké sɔ́ɔ́-kpò ɓě nìà kɛ ɖò se ɔ mǔè ɖò kɔ̃ sèɛ̌ mu. Wa mu wa wáɖáùn séín nyɛ̀nɛ̀ɛ̀.”

Fũ̀à-fṹá-tì kè nyɔ-gǎ-dyéìn-dyéìn ɓě nì ɖé dyúa kɛɛ jè

(Máfíò 24:3-14; Máà 13:3-13)

7Ké wa diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, tiɔ̀ nyɛ́ ɖɛ ɓě nìà kɛ mu ná kpáùn wɛ̃́? Ɖɛ́ mɔ̀ dyí-tɛ̀mɛ̀ìn-ɖɛ̀ ɓě, ɓɛ́ wa kéɛ à dyí tɛ̀mɛ̀ìn kà ɖɛ ɓě nìà kɛ mu kpáùn wɛ̃́?”

8Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ma mú, ɓɛ́ nyɔ ɖò ní kɔ̃̀ ɖà ɓě cá. Sepóɛɖé nyɔ pàɖǎ mu dyiìn, ɓɛ́ wa kéɛ cɛ̃ kà wa mɔ̀ mɔ̄ kɛ kè kà tiɔ̀ ɖǎ dyi xwɛ̃́ìn nyɛ. Ɓě ní sí wa kíɖíí. 9Ɓě dyi to ɓě xwɛ̃́ìn dyiɛ kè ɖíɛ́ ɓě tɔ̀mɔ̀ gboɛɛ bɔ̃̌ wɔ̃́ ní, nìí, ɓě ní ɖá ɓɛ́ ɓě ké fɛ̃̀ìn. Ɖɛ ɓěɛ̀ ɓéɖé wa ké kpá kĩ́ín, kɛɛ nìí, ɖɛ séín mánáín-hwɛ̀ìn-naín séè ɓó nyini ke.”

10Ké ɔ cɛ̃ɛ ma wa gbo ɖe, ké ɔ ɖá, “Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn. 11Ɓóɖó-kpàà dyi-túò-túò vɛ̀nɛ̀-vɛ̀nɛ̀ ɓě mu nììn, ké mɔ́ mu kpáùn, ké wɛ́-dù kò-kò ɓě mu nyɔǔn-dyù kpɔ̃ùn ɖé dà pàɖǎ ɓě. Fã̀à-ɖɛ̀ ɓě mu kpáùn, ké ɖàɓàìn-ɖɛ̀ vɛ̀nɛ̀-vɛ̀nɛ̀ ɓě mu ɖé dyɔɔ̀ dyí nììn. 12Kɛɛ hwɛ̀ ɓɛ́ ɖɛ séín ɓěa ké kpáa, wa mu ɓě kpɔ̃ùn, ké wa mu ɓě gǎ dyéìn. Wa mu ɓě Júù-nyɔ̀ ɓěɔ̀ xwaún dyi poùn, ɓɛ́ wa ké ɓěɛ̀ zaa ɓě wɔ̃ po ɖé waà cɔ́cì-gbò ɓěɔ̀ mú, ké wa mu ɓě kpɔɖɔ ɖeín poùn. Wa mu ɓě kã́á ɓě kè gɔ̌mànà-nyɔ̀ ɓě dyúa kpaùn ɓó ní jè. 13Nìí, ɔ mu ɓěɛ̀ ti jǔùn, ɓɛ́ ɓě ké bɔ̃̌ nɔ̀mɔ̀ dyíinɔ̀ wa gbo cɛ̃. 14Ɔ jèɛɛ, ɓěǐn ɖá ɓɛ́ ɓě ké hwòɖǒ dyií gbǎìn ɓá kà ɓě ké ɓě mìɔùn jè kɔ̃in zaìn nyuɛ jè dyí. 15Sepóɛɖé ní mu ɓě wɔ̃ kè fɔ̀nɔ̀-hwòɖǒ nyíìn, ké ɓěɛ̀ mú-nyɛ́-nyɔ̀ ɓěɔ̀ wɔ̃ se ɓě ɖuɛ ɓɛ́ǐn mu, ké wa se ɓě gbo dòǐn zàà ɓɛ́ǐn mu. 16Ɓěɛ̀ wóɖóìn-nyɔ̀ ɓě kè ɓěɛ̀ ɖíí-gàà ɓě kè ɓěɛ̀ nyɔ ɓě ɔ kè ɓě mǔè ɓě mu ɓě nyɔǔn xwaún poùn, ké wa mu ɓě ɖíɛ́ ɓě ɖáɓáùn. 17Nyɔǔn séín mu ɓě mú nyɛ́ìn ɓó ní jè, 18kɛɛ ɓěɛ̀ mí-wɔ́ɖɔ́ nìà ɓě dúɛɛ ɖò se xwáɖáún sèɛ̌ mu. 19Ɓě mɛ ku hwòɖǒ kánáá pū, nìí, ɔ muɛ nyuùn ɓɛ́ ɓě ké ɓěɛ̀ fɛ̀ɛ̀ɔ̀ póìn.

Jízɛ̀ cɛ̃ Jùɖúsɛ̀ɖɛ̀ìn-hwɔ̀ɖɔ̀ɔ̀ mú gbɔɔ̀ jè

(Máfíò 24:15-21; Máà 13:14-19)

20“Ɔ jǔ ké ɓě dyiɛ dyé, ké to-vɔ̃-nyɔ̀ kúɖúú ɓě dyi Jùɖúsɛ̀ɖɛ̀ìn-hwɔ̀ɖɔ̀ɔ̀ wɔ̃ gbǎìn ní, nìí, ɓě mɛ dyuòɛ̀ kà ɓɛ́ ɔ mú-gbɔɔ̀-tìɔ̀ ɖǎ dyi xwɛ̃́ìn nyɛ. 21Nìí, nyɔ ɓě nì ɖé Júɖìà-ɓòɖòɔ̀ kɔ̃ɛɛ mɛ gbǔ, ɓɛ́ wa ké ɖé toɖo ɓěɔ̀ dya mu. Nyɔ ɓě nì Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mɛ sɔ̀ ɖé, ké nyɔ ɓě nì ɖé hwɔɖɔɔ̀ ɖeiɛɛ ní ɖá ɓɛ́ wa ké ɖé hwɔɖɔɔ̀ mú dyá. 22Sepóɛɖé wé ɓě nìà kɛ mɔ̀ nyɔǔn gǎ-dyéìn-wè ɓě, ɓɛ́ ɔ kéɛ nyu ɓɛ́ ɖɛ séín ɓě céèà ɖé Gèɖèpɔ́ɔ̀-cèè-ɖɛ̀ɔ̀ múɛɛ ké jǎà kpá. 23Màa ɓě nì zùù kɔ̃ɛ kè nyɔ ɓě nì dyú nyáǐn ɓó tia ɓaɖaa, ééɓàa, wa jè mu wìì-ɖɛ̀ jǔùn. Gǎ-dyé-dyé vɛ̀nɛ̀ mu ɓóɖóɛ̀ kɔ̃ dyiìn, ké Gèɖèpɔ́ɔ̀ mu nyɔ ɓě nìà kɛ dyoɖoún kpáìn. 24Wa mu wa ɖíɛ́ ɓě gàsíà dyí ɖáɓáùn, ké wa mu wa ɖíɛ́ ɓě toɛ̀-kpɔ̃-nyɔ̀ ɓě mú nyuùn, ɓɛ́ wa ké wa ɓóɖó séín kɔ̃ kpa. Ké ɓóɖó-dù kà kò ɖò ɓěɛ̀ nyɔ ɓěɔ̀ mu Jùɖúsɛ̀ɖɛ̀ìn-nyɔ̀ ɓěɔ̀ wɔ̃ ziìn, ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ tiɔ̀ ké ɖé hwɛ̀ hwɛ̀.

Nyɔǔn-dyùɛ̀ Dyú-gààɔ̀ dyi jè

(Máfíò 24:29-31; Máà 13:24-27)

25“Ɓó tia ɓaɖaa, ɖàɓàìn-ɖɛ̀ ɓě mu ɖé dyóɖóɔ̀ kè dɛ̀nɛ̀ɔ̀ ɔ kè dɛ̀nɛ̀ mɛ́nɛ́ɛ́ ɓěɔ̀ mú nììn. Ɓóɖó-dù ɓě nì dà ɓóɖó-kpàà kɔ̃ɛɛ se ɖɛ ɓě ɓɛ́ wa ké nyuɛɛ dyí dyuòɛ̌ mu. Wa mu dyóóɔ̀ kuɖu-wùɖù kè dyóóɔ̀ jɛ̀ɖɛ̀-jɛ̀ɖɛ̀ fɛ̃̀ìn. 26Nyɔ ɓěɔ̀ dyi ɖɛ ɓě mu ɓóɖó-kpàà kɔ̃ dyiìn nyɛɛ fòɛ̌n nìǐn, fã̀à mu wa nyuùn, ɓɛ́ wa ké kṹún kpá, sepóɛɖé ɖɛ séín nì ɖé dyɔɔ̀ dyíɛɛ mu dyi túòùn. 27Nìí, wa mu mɔ̄ Nyɔǔn-dyùɛ̀ Dyú-gààɔ̀ dyéìn, ɓɛ́ ḿ ké ní-kpò ɖò mú dyìɛ̌n nì ɖé kpé kè dĩ́ín-dĩ̀ìn vɛ̀nɛ̀ mú. 28Ti ɓɛ́ ɖɛ ɓě nìà kɛ mu kpáa gbɔ dèìn nyɛɛ, ɓě mɛ ɖú dú dyií, ɓɛ́ ɓě ké dyí sɔ̀, sepóɛɖé ɓěɛ̀ pó-póɔ̀ ɖǎ dyi xwɛ̃́ìn.”

Tɛ̀mɛ̀ìn-ɖɛ̀ ɓá féè-cù jè dyíɛ

(Máfíò 24:32-35; Máà 13:28-31)

29Ké Jízɛ̀ po ma wa nɔ́ɔ́ nìà kɛ gbo, ké ɔ ɖá, “Féè-cùɔ̀ kè cu tɔ̀ɔ̀ séín ɓěɔ̀ jè mɛ nì ɓě hwìɖǐi. 30Ɓě dyiɛ dyé, ké wa dyiá mí poɛń nìǐn, nìí, ɓě mɛ dyuòɛ̀ dyí kà ní-tì nìǎ dyi xwɛ̃́ǐn nyɛ. 31Kà dyúáɖòɔ̀ kǎà ɓě dyi ɖɛ ɓě nìà kɛ dyéɛń nìǐn, ɓě mɛ dyuòɛ̀ dyí kà Gèɖèpɔ́ɔ̀ kã́á-ɓòɖòɔ̀ ɖǎ dyi xwɛ̃́ìn nyɛ.

32“Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ, wa se mɛ́ɛ hwɛ̀ɛ̌ mu, ké ɖɛ séín ɓěɛ̀ kpá hwɛ̀. 33Dyɔɔ̀ kè ɓóɖó-kpàà mu dyi ziìn, kɛɛ ní wuɖu ɓěɔ̀ se dyi ziɛ́ mu.

Ɓě ɓéɖé ɓě ké ɓɛ́ɖɛ́ kɔ̃ nì

34“Ɓě mɛ màìn ɓě mìɔùn mú. Ɓěǐn ɖá ɓɛ́ ɓěɛ̀ hwòɖǒ ké hwɔ-pa-pa kè nɔmɔɔ-ná-ná ɔ kè ɖɛ ɓě ɓɛ́ nyɔ ɓě poìn jè hwìɖǐi mìɔ nɔ̄ ɓóɖó-kpàà kɔ̃ɛɛ jè gbo kɔ̃̀ mìɔ, ɓɛ́ wéa ní kɔ̃̀ ɖà ɓě kɔ̃ún gèìn wàɖà kà xwáɖá-gbǎ-mú kpɔ̃à nyɔɛ. 35Sepóɛɖé ɔ mu nyɔǔn séín ɓě nì ɓóɖó-kpàà dà séín nyɛɛ kɔ̃ dyiìn. 36Ɓě mɛ nì ɓɛ́ɖɛ́ kɔ̃ ti séín. Ɓě mɛ ɓaà, ɓɛ́ ɓě ké kpé ɓéɖé, ɓɛ́ ɓě ké ɖɛ séín ɓě mu kpáùn wɛ̃ɛ xwaún pó, ɓɛ́ ɓě ké mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ dyúa dyi nyànà.”

37Ɓó wé ɓěa ɓaɖaa, Jízɛ̀ nì ma nyɔǔn ɓěɔ̀ ɖɛ tɛ̀mɛ̀ǐn ɖé Gèɖèpɔ́ɔ̀ gbǒɔ̀ mú. Tíe dyi ma kpɔ̃ ní, ɔ mu ma ɖé Ɔ́ɖè-tòɖòɔ̀ dya, ké ɔ nyu ma ɖé máaún-hwùɖùɔ̀. 38Zɔ̃ zɔ̃ kà nyɛ̀nɛ̀ɛ̀ ní, nyɔ séín ɓěɔ̀ mu ɖé Gèɖèpɔ́ɔ̀ gbǒɔ̀ mú, ɓɛ́ wa ké Jízɛ̀ wuɖu ɓěɔ̀ ɖùǔ gbo tò.

বর্তমানে নির্বাচিত:

Ɖúù 21: ƁB02

হাইলাইট

কপি