Jɛ́nɛ́sì 6
6
Ní-tòɔ̀
1Ti ɓɛ́ nyɔǔn-dyù nìǎ ma dyí vòɛ̌n ɓóɖó-kpàɔ̀ kɔ̃, ké wa nìǎ ma màa-dyù ɓě wóɖóɛ̌n nyɛɛ, 2Gèɖèpɔ́ɔ̀ dyú-gàà ɖíɛ́ ɓě#6:2 Gèɖèpɔ́ɔ̀ dyú-gàà ɓěɔ̀ ɓɛ́ìn ma ínjà ɓě jǔɛ. dyé ma nyɔǔn-dyùɛ̀ dyú-màà ɓěɔ̀ kà wa nɔ̀mɔ̀ ma kɔ̃in nyɛ, ké wa kpɔ̃ ma nyɔ́nɔ́ ɓě wa mɔ́ ma kɛɛ dyi. 3Hwɛ̀ ké Bounɓoɔ̀ cɛ̃ɛ ma, ké ɔ ɖá, “Ḿ se nyɔǔn dyi táǎ mu, ɓɛ́ wa ké hwèɖèìn ɖe. Wa mɔ̀ fɔ́ jèɛɛ, wa mu cĩ́ìn ɓó zɔ̃ hɔ̃dɛ̀ɖɛ̀ ɖò kè kpáɖá-nyɔ nyɛ̀nɛ̀ɛ̀.” 4Ɓó ti kɔ̃̀ ɓaɖa ɓɛ́ Gèɖèpɔ́ɔ̀ dyú-gàà ɓěɔ̀ kè nyɔǔn-dyùɛ̀ dyú-màà ɓěɔ̀ nì ma ɓó da, ké wa wóɖóìn ma dyú ɓěɛɛ, waà dyú ɓěɔ̀ kè waà nyúà-dyú ɓěɔ̀ mɔ̀ ma nyɔ ɓúá dyai ɓě ɓóɖó-kpàɔ̀ kɔ̃. Wa mɔ̀ ma kpé-ɓéɖé-nyɔ̀ ɓě nìǒ zɔ̃̌ɔ̀ ɓɛ́ wa kɔ̃̀ nyɛ́nɛ́ muó zɔ̃̌ɔ̀ kɛ. 5Ti ɓɛ́ Bounɓoɔ̀ dyéɛ kà nyɔǔn-dyùɛ̀ hwòɖǒ-kɔ̃in-nyìnììn-nyìnììn nyu ma kpéín ɓúáa ɓóɖó-kpàɔ̀ kɔ̃, ké kà waà hwìɖǐi-poìn-ɖɛ̀ séín mɔ̀ ma ɖɛ gbà kánáá pūɛɛ, 6ɔ kpá ma wìǐn. Ɔ hwòɖǒ kpá ma ɖé ɖei mìɔ ɓó nyɔǔn-dyù ɓě nìà ɓóɖó-kpàɔ̀ kɔ̃ɛɛ mɛ jè, 7ké ɔ ɖá, “Ní mu nyɔǔn kè nimii kè ɓíɖíi-dyi-nà-ɖɛ̀ ɔ kè naà séín ɓě ḿ mɛ ma kɛɛ ɓóɖó-kpàɔ̀ kɔ̃ dyi sámáùn, sepóɛɖé ní hwòɖǒ kpá ɖé ɖei ɓó wa mɛ jè.” 8Kɛɛ Bounɓoɔ̀ hwòɖǒ dèìn ma Nóà múin.
9Ɖɛ ɓě ɓá Nóà jè dyíɛɛ, wa kɛà kɛ̀. Nóà mɔ̀ ma dyí-sɛ́ɖɛ́ìn-nyɔ̀. Ɔ se ma kɛɛ ɖò ɓéɖé ɖé nyɔ ɓě nì ma cĩ́ɛń ɓó tia ɓaɖaa hwìɛ̀. Ké ɔ xwɛ̃́ìn ma Gèɖèpɔ́ɔ̀ bũ̌in mìɔ. 10Nóà wóɖóìn ma gàa-dyù tã. Waà nyɛ́nɛ́ mɔ̀ ma Cɛ̃́ìn kè Hɛ̃́ìn kè Jéfɛ̀. 11Ɓó tia ɓaɖaa, nyɔ séín ɓě nì ma ɓóɖó-kpàɔ̀ kɔ̃ɛɛ nyìnììn ma hwòɖǒ kɔ̃in ɖé Gèɖèpɔ́ɔ̀ dyéɖéín, ké wa zàìn ma waà mǔè ɓě ɖɛ gana xwa. 12Ké Gèɖèpɔ́ɔ̀ dyéɛ ma kà hwòɖǒ-kɔ̃in-nyìnììn-nyìnììn dyíìn ma ɓóɖó-kpàɔ̀ kɔ̃in nyɛ, sepóɛɖé nyɔ séín nì ɓóɖó-kpàɔ̀ kɔ̃ɛɛ nyìnììn ma hwòɖǒ kɔ̃in ɖé waà nyuu-ɖɛ̀ séín mú.
13Hwɛ̀ ké Gèɖèpɔ́ɔ̀ cɛ̃ɛ ma Nóà gbo, ké ɔ ɖá, “Ní mu nyɔ séín ɓěɔ̀ jè dyi zĩ̀ìn, sepóɛɖé wa nì ɖɛ gana xwa zaìn zàǐn. Ní muá wa kè ɓóɖó-kpàɔ̀ mú gbɔɔ̀ùn. 14Ɔ jèɛɛ, m̀ mɛ cɛ̃ cu ɓɛ́ ɔ nɔ̀mɔ̀ dyíin ɓó méè mú kɔ jèɛ, ɓɛ́ m̀ kéɛ méè vɛ̀nɛ̀ ɖò mú kɔ ɓó m̀ mìɔùn bìì. M̀ mɛ cɛ̃ɛ xwíníín, ɓɛ́ m̀ kéɛ kóò-táà#6:14 Kóò-táà kè Ɓǎsɔ́ɔ̀-nyɔ̀ nììn wé-cɛ̃̀ hwɔìn ní. bũ̌in kè xwíníín dyi sàmàìn. 15Kǎà m̀ mɛ nyuɛ kà. Ɔ tɔ̀mɔ̀-tɔ̀mɔ̀ɔ̀ mɛ mɔ̀ ɓáɖáa kpáɖá-nyɔ tã ɓaɖa-bùè sè hm̀m̌, ké ɔ xwíɖí-kùɔ̀ mɛ mɔ̀ ɓáɖáa ɓaɖa-bùè sè sɔ̃́ kè ɓɛ́ìn-hwìɛ̀, ké ɔ dya-tɔ̀mɔ̀-tɔ̀mɔ̀ɔ̀ mɛ mɔ̀ ɓáɖáa mɛ̀nɛ̌ìn-sɔ̃́ kè ɓɛ́ìn-hwìɛ̀. 16M̀ mɛ nyu gbǒ-pìɔ̌ ɓó méèɔ̀ bìì, ɓɛ́ m̀ ké pá ɓɛ́ìn ɓo-pìɔ̌ dyúáɖò kè ɓɛ́ìn-hwìɛ̀ kɛɛ ɓó gbǒ-pìɔ̌ɔ̀ kè ɔ dya-tɔ̀mɔ̀-tɔ̀mɔ̀ɔ̀ pṹa sè. Ɔ mɛ mɔ̀ gbǒ deìn kɔ̃in tã. Ké m̀ mɛ nyu gbǒ-wɔ̃̀ ɖò ɓóɛ bũ̌. 17Mɔ̄ mɔ̀ nyɔ mu ní-tò ɖé ɓóɖó-kpàɔ̀ kɔ̃ tòùn, ɓɛ́ ɔ ké ɖɛ séín ɓéɖé fɛ̀ɛ̀ ɖé ɓóɖó-kpàɔ̀ kɔ̃ɛɛ mú gbɔɔ̀. Ní mu ɖɛ séín jè dyi zĩ̀ìn. 18Kɛɛ ḿ kè mɔ̀ mu wuɖu dèìn. Ké nì mu méèɔ̀ mú dyáùn, m̀ kè nì gmàà kè nì dyú-gàà tã ɓěɔ̀ kè wa nììn gmàà tã ɓěɔ̀ ɖekè, ɓɛ́ ɓěɛ̀ fɛ̀ɛ̀ ké pó. 19M̀ mɛ dyáìn ɖɛ séín ɓéɖé fɛ̀ɛ̀ kɛɛ sɔ̃́-sɔ̃́ ɖé méèɔ̀ mú, ɓɛ́ wa nììn fɛ̀ɛ̀ ké pó ɖekè. M̀ mɛ dyáìn wa nyɔ́nɔ́ kè ɓíɔ́. 20Naà-dù kò-kò ɓěɔ̀ sɔ̃́-sɔ̃́ kè nimii-dù kò-kò ɓěɔ̀ sɔ̃́-sɔ̃́ kè ɓíɖíi-dyi-nà-ɖɛ̀-dù kò-kò ɓěɔ̀ sɔ̃́-sɔ̃́ mu m̀ gbo dyiìn, ɓɛ́ m̀ ké wa ɖé méèɔ̀ mú kpa, ɓɛ́ wa fɛ̀ɛ̀ ké pó. 21M̀ mɛ kpa ɖé ɖii-ɖɛ̀ kã̀ìn séín ɓó m̀ kè wa bìì.” 22Ké Nóà nyu ma ɖɛ séín ɓěɔ̀ nyɛ̀nɛ̀ɛ̀, kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ.
বর্তমানে নির্বাচিত:
Jɛ́nɛ́sì 6: ƁB02
হাইলাইট
শেয়ার
কপি
Want to have your highlights saved across all your devices? Sign up or sign in
Bassa Bible © Bible Society Liberia, 2002.
