Malko 1
1
Yoane Kabatisha wasunda
(Mt 3:1-12; Lk 3:1-18; Yn 1:19-28)
1Intangulo yi iswi-sifu li Yesu Klisto, uMwana wi Leesa. 2Vino chaandikwe muli ilau Isaya:
“Lolini, natuma untu wane inkolelo yako,
akukuteyanyisisha insila yako.
3Iswi lyi umwi lilulaisha un-nyika:
Teyanyangini insila ya Mwene.
Ololini muno alupita.”
4Yoane wisile wabatishanga un-nyika nu kusunda lubatisyo lwa ufyusi wa kwelela amaifyo. 5Nga yooshi yasi ya aYudea na ya m-Yelusalemu yooshi yayile kunali, ayabatisha un-nusi lwa Yodani, pano yafipela amaifyo yao. 6Na Yoane waswiite mafumbu ya mtwanga-mwendo nu nkowa wa nkwela um-nsana, walyanga makanta nu wuchi wa nchundu. 7Wasundile, nati: “Wamwisa uku chishila chane, wino ali na maka ukunduta nene, wino nemwi ntalingine nu kwinama ntolompole imikowa ya nfwato shaakwe. 8Nemwi namubatisisha um-maasi, leelo wene alumubatisha nu Mweeso Nswefu.”
Yesu wabatishiwa nu kweshiwa un-nyika
(Mt 3:4-11; Lk 3:21-22; 4:1-13)
9Nga chali um-manda yalye, Yesu wishile ukufuma uku Nasaleti ya m-Galilea, abatishiwa na Yoane um-Yodani. 10Nga liyo kwene, lino alufuma um-maasi, alola iyulu lyalepuka, nu Mweeso alumwikila panali wa nkuunda. 11Niswii liifuma umwiyulu, liti: “Wewe mwanane nkundwa, nduchimba newe.” 12Liyo kwene Mweeso wantisya waya uku nyika. 13Nga wawa kuwo un-nyika amanda amakumi yani, angalweshiwa na Shetani, nawe wali ponga ni nyama sha nchundu. Na yamalaika yamwaswanga.
Yesu watampa kusuunda nu kwita alondeshi yani
(Mt 4:12-22; Lk 4:14-15; 5:1-11)
14Nga lino Yoane wanyepelwe uku nyololo, Yesu waile uku Galilea angalusunda iswi-isifu ili Leesa, 15ati: “Amanda iyafika nu wene-wi-Leesa iupalamila; vipelini nu kuzumila iswi lya mene.” 16Nga pano wapitanga umbali yi yeemba wa Galilea, walola Simoni na Andelea unnina wi Simoni, yalusumba masumbu muli yemba, kuno yeelanga. 17Nga Yesu ayanena, ati: “Nguni mundondele, nene ndumuchita yakela ya yantu.” 18Liyo kwene yasya masumbu yao, yannondela. 19Waile inkolelo wuche, alola Yakobo umwana wi Sebedeo na Yoane unnina, nayo kwene yali um-wato angi yalulimba amasumbu yao. 20Liyo kwene wayita; yasya isi wao Sebedeo um-wato ponga na aluomba kunali, yapita ukunndondela.
Yesu waposha ntu wa chiwa uku Kapenaumu
(Lk 4:31-37)
21Yalondela insila yafika uku Kapenaumu; na liyo kwene uwanda wa Sabato, aingila un-ng'anda yi Leesa, asambilisha. 22Yazunguka leka uku masambilisho yaakwe, kuno wayasambilishanga kanti untu wa maka, asi wi yakaandika.
23Liyo kwene pali untu wa mweso wa chiwa un-ng'anda yi Leesa, waangile, 24waati: “Yesu wa ku Nasaleti, tuli na chani newe? Chene! uwisa ukwisa tonona? Nkumanyile wewe wini: Wenswefu wi Leesa.” 25Yesu wamkalipila, waati: “Tusha, fuma muliwi!” 26Umwenso wa chiwa wanfulukusha kanti uwa chifumfumi, walila ukwiswi ikulu nu kufuma. 27Yasungwike yooshi nu kutondoshana, ukuti: “Ichani chi? Amasambilisho mapya kuno uku maka! Aluchensela imyenso ya chiwa, nayo impulika.” 28Liyo kwene fino aluwomba na maswi yaakwe, yamanyishwa konsi nu mbali mbali ya Galilea.
Yesu waposha aluale ingi un-ng'anda yi Petlo
(Mt 8:14-17; Lk 4:38-41)
29Liyo kwene yafumile un-ng'anda yi Leesa, ingila un-ng'anda yi Simoni na Andelea, ponga na Yakobo na Yoane. 30Na nyina-fyala wi Simoni wali apa chitala unwale insusi, yannena amaswi yaakwe. 31Awisa annema ikasa, ankatusha; ni nsusi insila, anjaombela. 32Amangusi pano ilansi lyasyutukila, yannetile yooshi yano yali alwale na ya myenso ya chiwa. 33Na ya umunsi yooshi yakonganile apa nnyango. 34Aposha inji yano yali ni ndwala sha misangano, wafumya ifiwa tupu, atachili aleke vifwaange, kuno fyammanyile. 35Untondo-ntondo lino uchili usiku, afuma ukuya kuno kusi antu, ukuyupepa. 36Simoni nanina yannondela. 37Pano yannola, yannena yaati: “Antu yooshi yalukusita.” 38Wayanena, waati: “Tuyini nu kunji, imisi ya pipi, kuti nkasunde na ko kwene; kuno nafyo kwene nafishile.” 39Ayasunda iswi-sifu un-ng'anda syao isi Leesa, isha m-Galilea monsi, nu kufumya imyenso ya chiwa.
Yesu waposha ntu wa ntana
(Mt 8:1-4; Lk 5:12-16)
40Awiza kunali untu wa ntana, afukama nu kupapata, ati: “Ndukasime, unganswefya.” 41Nga annolela inkumbu, akatusya ikasa lyaakwe, amwemya, annena, ati: “Nkasi, uswepe.” 42Liyo kwene intana yansila, waswepa. 43Amsokezya uku maka, amwinga liyo kwene. 44Annena, ati: “Ulole utanena untu iswi limwi. Leelo yanga ukawulangizye kuli kapela, ukafime fino wamunenile Mose uku kuswepa kwako, chiwe usyuta uku yakola.” 45Leelo wafuma nu kulanda amaswi tupu, apalinji Yesu atachili awingile kaili umunzi apatiswe. Leelo wali apashi kuno kusi antu. Na antu yaya kunali ukufuma konsi konsi.
বর্তমানে নির্বাচিত:
Malko 1: FNT1988
হাইলাইট
শেয়ার
কপি
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
