Mateo 8

Yesu waposha untu wa ntana

(Mk 1:40-45; Lk 5:12-16)

1Nga pano watentenka um-mwaamba, amaumba tupu yanndondela. 2Nga lolini, awiisa untu wa ntana, anfukamila, ati: “Mweene, ndi ukasi, ungansweefya.” 3Nga Yesu aolola ikasa amwemya, ati: “Nkasi, usweepe.” Nga liyo kweene intana yaakwe insweepa. 4Nga Yesu annena, ati: “Ulole utaneena untu naanti umwi; leelo pitaanga ukaulaange kuli kapela, ukafima isamaalisho ndi fino Mose watashile, iwe ushuuta kuno yali.”

Yesu waposha momvi wa wikolo wa salifi

(Lk 7:1-10)

5Nga pano wingila um-Kapenaumu, unkulu wa yasifi umwi awisa kunalii, 6apapata, ati: “Mweene, umuofi waane undwaale wikali tenda, aluwaika nkaani.” 7Yesu annena, ati: “Namwisa mposhe?” 8Unkulu wa asalifi wiyo wannena, waati: “Mweene, ntaine kuti weewe ungiza uku ng'anda ukwaane, leelo laanda iswii lyoonga sile, nu momfi waane wampola. 9Kuno neene kweene neene ntu ntumwa ndi nasalifi; ngi naneena umwi, nati: ‘Pita!’ apita; nawi: ‘Nguna!’ awisa; nunsha waane: ‘Omba fi!’ aomba.” 10Yesu pano wapulika amaswi ya, asunguka, aneena yano yanndondile, ati: “Umwenemo, ndumuneena: Ntachili ndole ukusumila nkaani ndi ku kuli weeshi um-Islaeli. 11Neemwi ndumuneena fino ainji yalwisa ukufuma uku kafuma ndaaka nu ku kawa ndaaka, nayo yalwikala poonga na Ablaamu na Isaka na Yakobo um-wenewa-mwiyulu. 12Leelo ana ya weene yalusumbilwa ukufika un-chaanda; kweneko ukuluwa ukulila ku kuchecheta amiino.”

13Nga Yesu aneena unkulu wa asalifi, ati: “Pitaanga, fino usumile ifino chiombeke.” Umuofi waakwe apola liyo kweene.

Antu tupu yaposiwa

(Mk 1:29-34; Lk 4:38-41)

14Nga lino Yesu waya uku ng'anda kwi Petlo, asaana nyinafyala wi Petlo, nyina wa nchi, awiisi apa chitala undwaale isuushi. 15Amwemye ikasa, isuushi isiila, nawe akatuka ukuyaombela.

16Na pano yawa mangushi, yannletela ainji aya fiwa. Awiinga ifiwa ukwiswii lyaakwe, aposha yooshi yano yalwiile. 17Kuti liwe lino lyafwansilwe na kalausha Isaya, ukuti:

“Unkola watoshile imbombo shiitu,

aseenda ni ndwaala shiitu.”

Kulondela Yesu

(Lk 9:57-62)

18Nga Yesu pano walola iumba lyanndisha, alaanda kuti yalaambe ukuya umbalama. 19Kaandika weenga aya kunah, anneena, ati: “Kasambilisha, nankulondela kooshi kuno waya.” 20Yesu annena, ati: “Yankusa yali na machele, ni fyuuni fya mwiyulu fili ni fisaanzo, leelo Mwana-ntu atakwiite naanti apa kusamila untwe waakwe.” 21Umwi apa alondesha yaakwe wannena, wati: “Mweene, ntane nkashike tata.” 22Leelo Yesu annena, ati: “Ndondela, leka afwi yashiikane.”

Yesu wamyalasha chipupu pali yeemba

(Mk 5:1-20; Lk 8:26-39)

23Akwela um-waato, alondeshi yaakwe yanndondela. 24Ngi ipuunga ikulu likatuka muli yeemba, apalinji amawimbi yakupikishu wato, wene wawisi utulo. 25Apano yaya yanndansha, yati: “Mweene, tutule, twafwa!” 26Ayaneena, ati: “Nga fino muli ni ngofi, mwe ya usumilo uche?” Akatuka liyo kweene, akalipila unsa na yeemba, kuwa chele. 27Na antu yazunguka, yati: “Ngu ntu wi ali uli, wino ipuunga na yeemba filumpulika?”

Yesu waposha antu yaili a fiwa

(Mk 5:1-20; Lk 8:26-39)

28Nga pano wafika umbalama un-nsi ya a Gadala, aantu yaili aya fiwa yakomeengine nawe; yafuma uku malindi, yakalipa leka, kuushi umwi wino angapita isila yiyo. 29Nga lolini, yuma ichoongo, yati: “Tuli na chaani neewe, mwaana wi Leesa? Cheene! Uwishile ukwisu kutuchusha, amaanda yitu yachili yafike?” 30Nga kwaali ufyo wi yakapoli yalulya lwapatali. 31Ifiwa fyampapata, fyaati: “Ngi watuwinga utute tukingile um-ufyo ulye uwi yakapooli.” 32Nga afinena, ati: “Yangai!” Nga fifuma fingila muli yakapoli; nga ufyo wooshi utentenkela uku lwilo muli yeemba, yanweela. 33Weene achemi yitwike ulwilo ukuya ukufika, yalaanda fyooshi, ni fya kuli yaya aya fiwa kweene. 34Nga lolini, unsi wooshi wafuma ukuyukomaanya Yesu, nga pano yanndola, yampapata kuti atiine un-nsi yao.

বর্তমানে নির্বাচিত:

Mateo 8: FNT1988

হাইলাইট

কপি