Mateo 26

Ayikolo yamba kamumooha Yesu

(Mk 14:1-2; Lk 22:1-2; Yn 11:45-53)

1Nga chali pano Yesu wamalila amaswi yao yooshi, wanenile alondeshi yaakwe, waati 2“Mumanyile fino ichisila cha maanda yaili iluwa iPasaka, nu Mwaana-ntu alufimwa aumoolwe.” 3Lili kweene ayikolo iyakapela na ayikolo ya aantu yakongaana unnsolo wi Kapela nkulu, ishiina lyaakwe i Kayafa. 4Yaamba ichapoonga ukuti yanneme Yesu uku uchenjesu nu kumumoola. 5Leelo yaatile: “Chitawa uwaanda ukulu, kutache kuwe impansheela unjaantu.”

Malia wapaka Yesu mafuta

(Mk 14:3-9; Yn 12:1-8)

6Nga Yesu lino waali uku Betania un-ng'anda yi Simoni uwa ntana, 7awisa umwanachi umwi ali nu nsasi wa mafuta aya mpia tupu, ampalamila awitulwiila apa ntwe waakwe, pano ali apa chakulya. 8Alondeshi yaakwe pano yalola, yakalipa, yaati: “Ichili chaani uonooni u? 9Kuno amafuta ya, yali yakaliwe uku mpia tupu, yapiwe apina.” 10Yesu pano wamanya, wayaneena, waati: “Nga fino muluchusha umwanchi wiyo? 11Kuno watanchitila chino chasipa kuli neene; kuno manda yooshi muli napina, leelo muushi neene maanda yooshi. 12Kuno uku kungitila amafuta yao uku mwilii waane, achisile fiyo uku kunteya uku kushikwa kwane. 13Umweneemo ndumunena: pooshi pano palusuundwa iswii-isiifu li un-nsi yooshi, ichiintu chi chino wachita wi, chilulaandwa kayili uku mwiusya.”

Yuda wasita ukufima Yesu

(Mk 14:10-11; Lk 22:3-6; Yn 13:2, 27; 6:70-71)

14Liyo kweene weenga pali yaaya ikumi na yayili ishiina lyaakwe i Yuda Iskaliote, wayiile uku yikolo iyakapela, 15waati: “Mungaampa chaani ngi namfiima kuno muli?” Nga yampangila impia amakumi yatatu. 16Fuma liyo kweene washaala alushita uwasa wakuti angamfima.

Uwaanda wa Pasaka

(Mk 14:12-21; Lk 22:7-14, 21-23; Yn 13:21-30)

17Nu waanda wa ntangulo uwa mikaate isi ni sasho, alondeshi yaakwe yaaya kuli Yesu, yannena, yaati: “Ukwi kuno ukashiime tukakuteye ulye iPasaka?” 18Nawe waati: “Yangini uku nsi uku ntu umwi, mukanneene, muti: ‘Kasambilisha aluuti: Amaanda yaane yapalamila; nandyile ukwako iPasaka poonga na alondeshi yaane.”’ 19Alondeshi yachita fino Yesu ayanenile, yateya iPasaka. 20Nga pano yawa amaangushi awikala pa chakulya poonga na yaaya ikumi na yayili. 21Nayo pano yalulya, wafwaanga, waati: “Umweneemo ndumuneena: weenga pali mweemwe wanfiima.” 22Nga yalola ichikoonko nkaani, yatampa ukuntondosha weenga weenga; “Ineene mweene?” 23Wayanena, waati: “Wino wasoonda poonga nene un-ndwesoo, uwino wanfima. 24Umwana-ntu wapita ndi fino waandikilwe, leelo akalaanda kaakwe untu wiyo wino wanfiima uMwaana-ntu. Yaliwe inkata yaakwe untu wiyo, ndi ataali afyalwe.” 25Yuda wiyo wino wamfiima, wafwaanga, waati: “Ineene Labi?” Wannena, waati: “Uweewe walaanda.”

Ichakulya cha Mweene

(Mk 14:22-26; Lk 22:14-20; 1 Akoli 11:23-25)

26Nga pano yalyaanga, Yesu watoshile unkaate, aupepelela, aukunyula, ayapa alondeshi yaakwe, afwaanga, aati: “Tolini mulye, alau uli mwiili waane.”

27Atola nu ntoonto, asamalisha ayapa, afwaanga, aati: “Nwelini mweshi muli u. 28Kuno u uli waashi waane uwa Upangano, uno ulwitika uku yaantu tupu, uku meeleelo ya maifyo. 29Leelo ndumunena, ntalunwa kayili naanti uche, fuma li kweene amaasi ya aya nsabibu, shiko uwaanda wuuwu uno nduunwa amapya apoonga neemwe um-weene wi Taata.” 30Nga pano yamala ukuluunda, yafuma apaashzi, yaaya uku mwaamba wa Miseituni.

Yesu walaanda fino Petlo wammkana

(Mk 14:27-31; Lk 22:31-34; Yn 13:36-38)

31Apano Yesu wayaneena, waati: Mwemwe mweeshi nene nanndeka muchituwe uushiku wu; kuno chaandikwe:

Namuuma unchemi,

nufyo wa fweele wansambaala.’

32Leelo apa kututuluka kwaane ndumukoleelela ukuya uku Galilea.” 33Petlo wannena, waati: “Naanti wanndeka yachituwe yooshi, neemwi poole naanti uche!” 34Yesu wannena, waati: ‘Umweneno ndukunena weewe: ushiku wu pano nkolwe achili alile, wannkana amaila yatatu.” 35Petlo wannena, waati: “Naanti ukufwa, ndufwa neewe, nsukukana naanti uche!’ Na alondeshi yooshi yalaanda fiyo kweene.

Yesu um-Getsemane

(Mk 14:32-42; Lk 22:39-46)

36Apano Yesu ayaa poonga nayo uku chaalo chino yakuluti: ‘Getsemane,’ wayanena alondeshi yaakwe, waati: “Wikalini pa, inje kuuku nkapepe.” 37Waseenda Petlo na yaaya yayili ana yi Sebedeo, ngi chikoonko chinnema, ayongoka. 38Apano wayaneena, waati: “Ndi ni chikoonko nkaani um-mweeso waane, piipi nu kufwa; wikalini pa, mutachilaala angi mulamwike ponga neene.” 39Aya pa nkolelo uche, apona apeaashi afupiime, aloomba, aati: “Taata, ngi chingawa, untoonto u untiine; leelo asi fino nkasiime nene, leelo fino ukasiime weewe.” 40Nga awisa kuli yaalye alondeshi, wazana iyalala, wanena Petlo, waati: Cheene! mutalamwiike naanti isaa yoonga poonga neene? 41Lankini, angi mululoomba, mutise mwingile um-masosho; umweeso ukasiime, leelo umwiili utonsile.” 42Waya kayili ilya uwili, waloomba waati: “Taata, ngi chitangi chiwele untoonto u untiine ngi ntanwiile, fino ukasi fiombeke.” 43Nga awisa kayili asaana iyalaala, kuno amaaso yao iyalemeka nutulo. 44Ayasha kayili, aya aloomba ilya utatu, afwaanga amaswii yaaya kweene. 45Apano awisa uku alondeshi yaakwe, ayaneena, aati: “Ali lalini, mupuuse; lolini isaa itipalamila, nu Mwaana-ntu alupiwa um-makasa ayi yamaifyo. 46Katukiini tupite; lolini, wino alunfima, watapalamila.”

Yalema Yesu

(Mk 14:43-50; Lk 22:47-53; Yn 18:3-12)

47Nga pano achili alufwaanga, lolini, Yuda, weenga pali yaaya ikumi na yayili, wiisa poonga niumba ikulu yali ni mpaanga ni noonga, yafuma uku yikolo iyakapela na yikolo ya aantu. 48Na wilye wino alunfima, walile atayapa akamanyililo, aati: “Ndi wino natoswela, uwiyo kweene wino innema yi.” 49Liyo kweene wanja pali Yesu, wannena, waati: “Ndukulaula, Labi.” Wanntoswela. 50Yesu wannena, waati: “Katane, wombaa chino uwisile.” Yanja yakatusya makasa yao, yannema Yesu. 51Na lolini, weenga pali yano yali na Yesu akatusya ikasa, asomola impaanga yaakwe, akoma umuofi wi Kapela-nkulu, wasesula ikutwi. 52Apano Yesu wannena, waati: “Suwisha impaanga un-chipata chaakwe, kuno yooshi yano yalulema impaanga, yalufwila uku mpaanga. 53Palimwi uluti ntaangi nndaombe Tata, nawe angandetela li kweene ukuluta maumba ikumi na yaili ai yamalaika? 54Yakuwa uli, fwaandi, aMaandiko fino ifino chilingine ukuwa?” 55liyo kweene Yesu wanena amaumba, waati: “Cheene! umufuma ni mpaanga ni nonga kunti mufumile ukuyulema wino akulupoka fya antu, mwisilu ndema neene? Maanda yooshi naali un-ng'anda-nkulu-iyi-Leesa angi ndusambilisha, leelo mutandema. 56Leelo ichaleta ya yooshi, ukuti aMaandiko ya malau yatasimba ukuwa.” Apano alondeshi yooshi yansha, yituka.

Yesu umwitengo

(Mk 14:53-65; Lk 22:54-55, 63-71; Yn 18:13-14, 19-24)

57Yano yanndemile Yesu, yantwala kwi Kayafa, Kapela-nkulu, kuno yalile iyakongana yakaandika na yikolo. 58Na Petlo wanndondile lwa patali, afika unnduselelo wi Kapela-nkulu, wingile mwenemo. Wikala poonga naomfi, kuti alole fino chikuusila.

59Nga yikolo iyakapela na amwitengo yooshi yashita usyuta wa ufi kuli Yesu, ukuti yamumoole. 60Wutaloleka naanti fino yalolike yashuuta yaufi tupu. 61Ichisila yayili yaloleka, yaati: “Alawi wafwaansile, ukuti: “Ingapomola ng'anda-nkulu-iyi-Leesa nu kuyikula uku maanda yatatu.” 62Apano Kapela-nkulu wimilila, wannena, waati: “Utalufwaanga chimwi; alaya yalukutakila chaani?” 63Leelo Yesu atusha. Kapela-nkulu wannena, waati: “Nakulafya kuli Leesa uwa upuma, utuneene ndi weewe uli Klisto umwaana wi Leesa.” 64Yesu wannena, waati: “Wewe walaanda, Leelo ndumunena, ukufuma li kweene mulunnola uMwaana-ntu ateesi ikasa ilya kwilunji ilya Maka, alwisa apa mapufi ya mwiyulu.” 65Apano Kapela-nkulu walepola imyeenda yaakwe, waati: “Wafwaanga unsalula kuli Leesa; tulusitila yashuuta chaani kayili? Lolini, mwapulika unsalula waakwe. 66Mwalola uli neemwe?” Yalaanda yaati: “Chilingiine aumoolwe.”

67Apano yamputila amati uku maaso, yamtimbola, na yamwi yamuma amakoofi, 68angi yaluti “We, Klisto, tuineene wini wino wakuma?”

Petlo wankaana Yesu

(Mk 14:66-72; Lk 22:56-62; Yn 18:15-18, 25-27)

69Na Petlo wateesi apashi unduselelo; unsungu weenga umuofi awisa kunalii, annena, ati: “Neewe kweene wali poonga na Yesu wa ku Galilea.” 70Wakana apa maaso yi yooshi, waati: “Ntamanyile chino ululaanda.” 71Nga. pano wafuma apaashi, unduselelo, umwanachi wuunji wansana, wanena aantu yano yali penepo waati: “Alawi wali poonga na Yesu wa ku Nasaleti.” 72Wakana kayili nu kulapa, aati: “Ntammanyile untu wi.” 73Kashiimbo kache yano yimilile penepo yiisa, yannena Petlo, yaati: “Umwenemo, neewe kweene wenniina wao, kuno nu mfwaango wako kweene ulukumanyisha.” 74Apano watampa ukuitipwila nu kulapa, ati: “Ntammanyile untu wi!” Nu nkolwe walila liyo kweene. 75Petlo weleengula iswii liili lino Yesu walashii, ukuti: “Pano nkolwe achili alile, wankana amaila yatatu.” Nga afuma apaashi, alila na moososi.

বর্তমানে নির্বাচিত:

Mateo 26: FNT1988

হাইলাইট

কপি