Mateo 12

Yesu, uMweene wa Sabato

(Mk 2:23-28; Lk 6:1-5)

1Liyo kweene Yesu apita um-fyaalo uwaanda wa Sabato; aloondeshi yaakwe yalola ifisala, yataampa ukukuntoola imitwe ya ngano, yalupukusa yalulya. 2Afaliseo pano yalola, yannena, yati: “Lolini, aloondeshi yaako yaluchita ichiintu chino chitayiile ukuchitwa uwaanda wa Sabato.” 3Wayaneena, waati: “Mutaachili musome fino Daudi wachisile, pano wawiine isala, unkola na chaakwe? 4Fino wingile un-ng'anda yi Leesa, walya imikaate ya Ulangisho poonga nachaakwe, ino chitanjiile ukuilya naanti achaakwe, leelo kuli yakapela sile? 5Naanti mutachili musome un-Ntaambi, fino uwaanda wa Sabato yakapela, un-ng'anda-nkulu-iyi-Lesa, yakulushilula uwaanda wa Sabato naanti konoona? 6Leelo ndumuneena, fino alapa alipo wino alushile ing'anda-nkulu-iyi-Lesa. 7Leelo ngangi mumanyile ichili chaani amaswii ya; ‘Ndusita ukukumbukila, ntalushita ifipelo,’ mutangi muyelengule ifiyiifu yano yatononile. 8Kuno uMwaana-ntu aali uMweene wa waanda wa Sabato.”

Untu wino walemala ikasa

(Mk 3:1-6; Lk 6:6-11)

9Ataina kweneko, nga awingila un-ng'anda yao iyi Leesa. 10Nga lolini, mwali untu wino walemala ikasa. Yantondosya, yaati: “Chili ningo ukuposhaa untu uwaanda wa Sabato?” kuti yakalaande. 11Leelo wayaneena, wati: “Uwini pali mweemwe, wino ali ni fweele yoonga, fweele yio itiponela un-chiliina uwaanda wa Sabato, ataangi aileme nu kuifumya? 12Cheene! untu alushile ifweele luunga? Ichino chasiipa ukuchita ifisiifu uwaanda wa Sabato.” 13Apano waneena untu wiyo, waati: “Wolola ikasa lyaako.” Nawe wolola, lyapola, lyawa ipuma ndi fino ilya wuli. 14Leelo aFaliseo yao yafuma, yaya yaamba ifyaa kunaali, ukuti yamumoole.

Ulau wafikilila

15Nga Yesu lino wamanya isiintu fiyo, atiina kweeneko. Na aantu tupu yanndondela, wayaposa yooshi. 16Ayalesa kuti yatammanyisa. 17Ukuti liwe iswi lino wavwanzile kalausha Isaya, ukuti:

18“Lolini, umboofi waane, wino nasolola,

wino nakuunda, umweeso waane ukuchiimba kunalii.

Nanntela uMweeso waane panalii.

Nawe aluyumila imbila aya kuluukuwa uputushi wa milandu.

19Atalulemanila naanti ukuuma ichoongo.

Naanti untu atalupulika iswi lyaakwe un-nsila.

20Itete lino ipete, atalulifuna.

Naanti utaambi uno ulufumya ilyuushi, ataluushimya.

Ukufika lino kwaacha waleeta uputushi wa milaandu uku maka.

21Nishiina lyaakwe ayakuluukuwa yalulyiitaila.”

Yesu na Beelsebuli

(Mk 3:20-30; Lk 11:14-23)

22Liyo kweene yanndetela untu wa chiwa, umpofu nawe ichinuunu; wamposha, apaliinji chinuunu wiyo wafwaanga nu kulola. 23Amaumba yoooshi yasunguka, yaati: “Alawi, uushi umwaana Daudi?” 24Leelo aFaliseo, pano yapulika, yaati: “Untu wi ataluwiinga ifiwa, leelo uku maka yi Beelsebuli uwikolo wa fiwa.” 25Leelo Yesu wamanya amaleengushi yao, wayaneena, waati: “Uweene wooshi wuno wapaluunkana woonga ukushila, na kaili unsi naanti aya ng'anda yimwi yoonga, ngi yapaluunkana, italushala iwimilile. 26Na Shetani ngi wawiinga Shetani unnina, watalandaukana, uweene waakwe ukwimilila uli? 27Neene ngi nduwinga ifiwa uku maka yi Beelsebuli, nga na ayaana yiino yakuluwiinga uku maka yiini? Ichaleka yano yaluuwa aputushi yiino. 28Leelo neemwi ngi nawinga ifiwa uku Mweeso wi Leesa, alikuti uweene-wi-Lesa iumwisila. 29Naanti, Cheene! untu angingila un-ng'anda ya ntu wa maka uli, nu kulema ifiintu fyaakwe, ngi atatangwiile anyepe untu wiyo uwa maka? Apano aluyilema ing'anda yaakwe. 30Untu wino asi poonga neene, alunkaana, na wino atalukonganika poonga neene, alusambasha.

31“Ichaleka ndumuneena, amaifyo yooshi na amaswii ya misuli antu yalweleelwa. Leelo ngi yasalula uMweeso, yatalwelelwa. 32Nuntu weshi uwacha wafwaanga chimwi cha kupingula Mwaana-ntu, alweleelwa; leelo wino waacha wafwaanga chimwi cha kupingula Mweeso Nsweefu, atalwelelwa apa nsi ya kasalaka na yino ilwiisa. 33Ichiti ndi chasiipa, fisêke fyaakwe fyaasiipa, naanti ndi chayiipa, ni fisêke fyaakwe angi vyaipa. Kuno ichiti chikulumanyika uku fisêke fyaakwe. 34Mwe yaana ya soka, mungafwaanga uli ivizipe ndi mwaipa? Kuno unnomo ukuvwanga fino fili um-mweeso. 35Untu nsiipe, muli fino Wawiika ifiiipe, fikufuma ifiifu. Nuntu njipe, muli fino wawika ifiifu, fikufuma ifiifu. 36Nga namunena: iswi lyooshi ilya uweele-weele lino yalufwaanga antu, yalulaanda niingo apiswii liyo apa waanda wa uputushi wa milaandu. 37Kuno uku maswi yako ulwalilwa ichumi nu ku maswi yaako uluputwilwa imilaandu.”

Kusita ichilangisho

(Mk 8:11-12; Lk 11:16, 29-32)

38Apano yakaandika yamwi na aFaliseo yamfwaasha, yati: “Kasambilisha, tulusita ukulola chilangisho kunuuli.” 39Leelo wayaneena, waati: “Umpaanda wa uyiifu nupuundu ulusita ichilangisho, leelo utalupiwa ichilangisho, siku ichilangisho chi Yona Kalausha. 40Ndi fino Yona waali un-nda yi nyangumi amaanda yatatu, uusiku nu nsanya, ifino nu Mwana-ntu aluwa amaanda yatatu uushiku nu nsanya umweeso wa nsi. 41Aantu ya ku Ninave yalwimilila poonga na aantu ya mpaanda u, uwanda wa uputushi wa milaandu, nayo yaluyaputwila imilaandu fino ayonooni, kuno yao yafipeshile uku masuunde yi Yona; na pa alipo wino alusile Yona. 42Umweene mwanachi uwa ku katutu alwimilila poonga na antu ya mpaanda u apa waanda wa uputushi wa milaandu, nawe aluyaputwiila imilandu fino ayonooni, kuno weene wishile ukufuma isansa lya kumbali ilya nsi, kuti apulike amaano yi Salomoni, na pa alipo wino alusile Salomoni. 43Ichiwa ichiyiifu ndi chafuma um-ntu, chikulupitila kuno kushi maasi, angi chilushita apakuti chipuue, leelo chitapalola. 44Nga chiti: ‘Nansuwiila uku ng'anda yaane kuno nafumile; na pano chiisa, chisaana intupu, yimpyile, iyeefye. 45Liyo kweene ichipita, chiseenda ifiwa ifinina saba, fino fyayiipisha ukuchiluta; ifingila nu kwikala mweenemo; na amaanda ya chishila aya ntu wiyo yakuyiipa ukuluta aya nkoleelo. Ifino chiluuwa uku mpaanda u wuuno wayiipa.”

Yesu walaanda a luko lwaakwe

(Mk 3:31-35; Lk 8:19-21)

46Pano achili alufwaanga na amaumba, lolini nyina naniina yimiliile apaasi yalushita ukufwaanga nawe. 47Untu weenga wanneena, waati: “Lola, nyoko na nyonko yimiliile apaashi yalushita ukufwaanga newe.” 48Leelo wafwaanga nu kuneena wino walaanda fiyo, waati: “Mama uwini? Nachaane ayaani?” 49Asoonta nikasa alondeshi yaakwe, ati: “Lolini, mama na achaane. 50Kuno weeshi wino waacha wachita fino Taata uwa mwiyulu wakuunda, wiyo ali uwachaane nu nsiche waane na mama.”

বর্তমানে নির্বাচিত:

Mateo 12: FNT1988

হাইলাইট

কপি