Yn. 6

Yesu aliisia babaandu chielefu chiraano

(Mat. 14.13-21; Mk. 6.30-44; Lk. 9.10-17)

1Enyuma wa kano, Yesu ambukha Enyanja eya Kalilaya (lundi elaangwa bali Tiberia.) 2Babaandu bakali bamuloondakho sikila baba baboone kamayia kewe ke khuonia balwale. 3Yesu aniina khu sikulu mala ekhala aasi ne babeeka bewe. 4Siise sia Naikara eye Pasaka siaba sili siimbi. 5Yesu alola eyi neyi mala abona babaandu bakali ne balikho becha niio ali, nio areeba Filipo ali, “Khunyala khwakula wae siakhulia sisioola khuliisia babaandu bano boosi?” 6(Aloma kano khukhaka Filipo, ng'ali aba amanyile khale nisio alakhola.) 7Filipo amukobosia ali, “Kenyekhana khube ne chirupia chibira chimia chibili khukula siakhulia, nio buli mundu anyoolekho sitiiti.” 8Mulala khu beeka bewe, Andereya, owaba wandaaye owa Simoni Petero aboola ali, 9“Omwana omusoleeli ali ano ne kimikaati kiraano kie eshayiri ne ching'eeni chibili. Kakhaba kario se binyala biola babaandu bano boosi tawe!”

10Yesu ababoolela ali, “Yikhasia babaandu aasi. Nio babaandu boosi bekhala aasi.” Be siseecha baba embi chielefu chiraano. 11Nio Yesu abukula kimikaati, apa orio khu Wele, mala aelesia babaandu ba baba ne bekhaleo. Akhola ario akhaba ching'eeni, mala boosi balia nga beenya. 12Oli boosi bekura aboolela babeeka bewe ali, “Buusia bitonyi biramire bioosi, mukhabisaakaniakho tawe.” 13Nio babibuusia bioosi mala bechusia bikono ekhumi na bibili khukhwama khu mikaati kie shayiri nikio babaandu balia ekio. 14Nga babaandu bao babona kamayia niko Yesu akhola baboola bali, “Ng'ali yuno ali Omung'oosi owaba owicha mu sibala!” 15Yesu amanya ali baba siimbi khukhwicha bamutiile bamuelesie bubwami ne kamaani, nio acha mu sikulu yeng'ene.

Yesu akeenda khu meechi

(Mat. 14.22-33; Mk. 6.45-52)

16Oli ekolooba, babeeka ba Yesu beekha sia nyanja, 17baniina mu liaaro mala barakikha khukhwambukha enyanja bache Kaperinaumu. Siilo siola Yesu nakhakobola niio bali tawe. 18Khu siise sienesio ekhuungu engali yaba elikho euucha ne ekhola bibuli khu meechi. 19Babeeka baba bafukile liliaaro chi kilomita chiraano namwe sita, mala babona Yesu nakeenda khu meechi ne echa siimbi ne liliaaro, baria lukali po. 20Yesu ababoolela ali, “Mukharia tawe niise!” 21Mala bafukiilila khu mwakaanila khu liaaro ne khangu liliaaro liola khu sikiingi abuundu niio baba ne balikho bacha.

Babaandu bayiima Yesu

22Endaalo eloondakho babaandu bakali babarama sikelekha babona bali liliaaro lilala liong'ene liliabao. Bamanya bali Yesu se achiile ne babeeka bewe tawe, baba bachiile bong'ene. 23Kaamaro kakaandi khukhwama Tiberia kecha khu sikiingi siimbi ne abuundu niio babaandu abo baliila kimikaati enyuma wo Mwami khu khupila Wele orio. 24Nga babaandu bakali abo ne babona bali Yesu ne babeeka bewe se baliio tawe, baniina mu maaro mala bacha Kaperinaumu khu muyiima.

Yesu Niye Kumukaati kwe bulamu

25Nga babaandu banyoola Yesu e sikelekha, bamureeba bali, “Omwekisia wolile ano chisa chinga?” 26Yesu abakobosia ali, “Ndikho muboolela bung'ali ndi, mulikho mumbenja sikila mwaliile kimikaati mwekura seli sikila mwamanyile sifuno sie kamayia kase tawe. 27Mukhakholela kimilimo siakhulia sinyala siabola tawe, ne kakhali kholela siakhulia simenya khulwe bulamu bwa mindali. Sino sili siakhulia nisio Omwana wo Mundu akhamuelesie, sikila Wele, Paapa amurakho simanyilo siewe sie khumufukiilila.” 28Nio bamureeba bali, “Khukhola siina nio khukhole niko Wele enya khukhole?” 29Yesu abakobosia ali, “Niko Wele enya enywe mukhole kali khusuubila mu Mundu niye aruma.” 30Bamukobosia bali, “Mayia siina niko ewe olakhola nio khubone mala khukhusuubile? Olakhola siina? 31#Khur. 16.4,15; Chiny. 78.24 Bakuuka befwe balia mana mu sichiimi, nga liiandiko ne liboolanga lili, ‘Wele abaelesia kumukaati khukhwama mwikulu balie.’ ” 32Yesu aababoolela ali, “Ndikho muboolela bung'ali kumukaati nikwo Musa amuelesia enywe se kwaba kumukaati khukhwama mwikulu tawe; Paapa wase niye omuelesianga enywe kumukaati kwa ng'ali khukhwama mwikulu. 33Sikila kumukaati nikwo Wele aananga kuli oyo owama mwikulu mala aana bulamu khu sibala.” 34Bamusaba bali, “Omwami khuelesie kumukaati kuno buli lwosi.” 35Yesu ababoolela ali, “Ese niise kumukaati kwe bulamu. Abo babecha khwise se baliba ne njala tawe; abo basuubila mwise se baliba ne bulesia tawe.

36“Ne kakhali ese muboolela enywe ndi mwamboone mala se musuubila tawe; 37boosi nibo Paapa wase amba balanjichila. Se ndi timania yesi yesi ounjichakho tawe. 38Sikila se necha khukhwama mwikulu khukhola lilienya liase samwene tawe, ne kakhali lilienya lioyo owanduma. 39Lili lilienya lioyo owanduma ese, bali, khatibia yesi yesi khwaabo boosi nibo ambelesia tawe; ne kakhali mbalamusie khu ndaalo emaliilisi. 40Nisio Paapa wase enya sili bali, boosi babona Omwana ne khumusuubila babe ne bulamu bwa mindali, mala ndibalamusia khu ndaalo emaliilisi.” 41Babaandu barakikha khu khweng'ulung'unya, sikila aaloma ali, “Ese ndi kumukaati kukwekha khukhwama mwikulu.” 42Nio baloma bali, “Omundu yuno se ali Yesu okhwa Yosefu tawe ku? Khumanyile raraawe ne maawe. Nono aloma ariena ali ekha aasi khukhwama mwikulu?” 43Yesu abakobosia ali, “Enywe lekha khu khweng'ulung'unya. 44Se aliio omundu onyala echa khwise Paapa owanduma ese nakhamureerire khwise tawe; mala khu ndaalo emaliilisi ndimulamusia. 45#Isa. 54.13 Bang'oosi baandika bali, ‘Buli mundu aliekisibwa ne Wele.’ Buli mundu oulila ka Paapa ne khukhweyika khu niye echa khwise. 46Lino se liboola lili omundu yesi yesi aabona Paapa tawe, ne kakhali oyo owama khu Wele yeng'ene niye owabona Paapa. 47Ndikho muboolela enywe bung'ali. Oyo osuubila, ali ne bulamu bwa mindali. 48Ese ndi kumukaati kwe bulamu. 49Bakuuka benywe balia mana mu sichiimi, ne kakhaba kario bafwa. 50Ne kumukaati kukwikha khukhwama mwikulu kuli kwe lukano luluundi, yesi yesi nakulia salifwa tawe. 51Ese ndi kumukaati kwe bulamu kukwekha khukhwama mwikulu. Omundu yesi yesi aba nalia kumukaati kuno, alimenya mindali na mindali. Kumukaati nikwo ndamuelesia kuli kumubili kwase nikwo mbaana khulwe bulamu bwe sibala.”

52Kano kakholeelesia kamayiingamo akari wabwe. Bareeba bali, “Omundu yuno anyala ariena khukhuelesia efwe kumubili kwewe khulie?” 53Yesu aababoolela ali, “Ese ndikho muboolela enywe bung'ali! Mwaba ne mukhalia kumubili kwo Mwana wo Mundu ne khunywa kamafuki kewe, se mulaba ne bulamu mwinywe tawe. 54Abo balia kumubili kwase ne khunywa kamafuki kaase bali ne bulamu bwa mindali, mala khabalamusie khu ndaalo emaliilisi. 55Sikila kumubili kwase ne kamafuki bili siakhulia sia ng'ali. 56Omundu yesi yesi olia kumubili kwase ne khunywa kamafuki kase, amenyile mwise, ne ese menyile mu niye. 57Paapa oomenyile anduma ese, ne sesi menyile sikila niye. Mu ngila ng'eneyo yesi yesi olia kumubili kwase alamenya sikila ese. 58Nono kuno kuli kumukaati kukwekha aasi khukhwama mwikulu; se kuli nga kumukaati nikwo bakuuka benywe balia mala bakelao bafwa tawe. Omundu olia kumukaati kuno alamenya mindali na mindali.”

59Yesu alomaloma kano nga aba ne ekisia mu sinakooki mu Kaperinaumu.

Kamakhuwa ke Bulamu bwa mindali

60Baloondi bewe bakali baulila kano mala baloma bali, “Kamekisio kano kali kamaandalafu lukali. Naanu onyala wakarekeeresia?” 61Yesu amanya ali balikho belung'unya khulwa kano, akhaba nakhabolelwa tawe nio abareeba ali, “Kano kakilile mufwa kimiooyo? 62Kalaba kariena nono ne mubona Omwana wo Mundu naniina niio aba khale? 63Roho owa Wele niye oanaanga bulamu; bunyali bwo Mundu se buli na siosi tawe. Kamakhuwa niko nama khu muboolela enywe kano kali Roho lundi bulamu. 64Ne kakhaba kario balala khwinywe se basuubila tawe.” (Yesu amanya khukhwama mu khurakikha balala siina bakhalisuubila tawe, ne mulala siina olimuchaama.) 65Mala atasakho ali, “Sino nisio sifuno sisiakila ne muboolela enywe ndi, se aliio onyala echa khwise Paapa nakhakholile kanyalikha tawe.”

66Baloondi ba Yesu bakali beela enyuma khulwe kamakhuwa kano mala khukeenda naye lundi tawe. 67Nio areeba babeeka ekhumi na babili ali, “Ne enywe, mwesi mwenya murekukhe?” 68#Mat. 16.16; Mk. 8.29; Lk. 9.20 Simoni Petero amukobosia ali, “Omwami khuche khu naanu? Ewe oli ne kamakhuwa ke bulamu bwa mindali. 69Ne luno khwasuubiile mala khwamanyile khuli ewe oli Omutakatifu, oyo wichile khukhwama khu Wele.”

70Yesu akobosia ali, “Ese namurobora enywe ekhumi na babili, ne mulala khwinywe se ali Sietani?” 71Alomalomanga ka Yuda, okhwa Simoni Isikarioti. Sikila akhaba Yuda naaba mulala khu beeka ekhumi na babili, aba alikho acha khumuchaama.

বর্তমানে নির্বাচিত:

Yn. 6: LUBUKUSU

হাইলাইট

কপি