Yn. 4

Yesu no mukhasi Omusamaria

1Bafarisayo baulila bali Yesu ali ne babeeka bakali lundi abatiisiisie babaandu bakali khukhila Yoana. 2(Kang'ali Yesu omwene se abatiisiakho omundu yesi yesi tawe, babeeka bewe bong'ene nibo ba babatiisianga.) 3Nio nga Yesu aulila kakaba ne kalomwa arura e Buyuda akobola e Kalilaya, 4khu lukeendo lwewe khukhwola beele abirire mu Samaria.

5 # Lir. 33.19; Yosh. 24.32 Mu Samaria, ola mu lukoba lulaangwa bali Sika, lwaba siimbi ne lusaambu nilwo Yakobo aelesia omwana wewe Yosefu. 6Esebele eya Yakobo yaba abwenao, ne Yesu aba aluile khu lukeendo mala ekhala a sebele. Yaba embi chisa sita che kumuusi.

7Omukhasi Musamaria echa khutaa kameechi, mala Yesu amusaba ali, “Mbekho kameechi nywe.” 8(Babeeka bewe baba bachiile mu lukoba khukula siakhulia.)

9 # Esr. 4.1-5; Neh. 4.1-2 Omukhasi oyo amukobosia ali, “Ewe oli Omuyaudi, ne ese ndi omukhasi musamaria, nono onyala wasaba ese kameechi ke khunywa oriena?” (Bayaudi beele se banyala barumikhira bikoombe ne bibuumba nibio Omusamaria arumikhiire tawe.) 10Yesu amukobosia ali, “Abanga omanyile nisio Wele aananga ne khumanya naanu olakhusabanga ewe kameechi, andi omusabile mala akhuelesia kameechi ke bulamu.”

11Omukhasi chana aloma ali, “Omwami, se oli ne sisiindu sie khutailamo kameechi tawe, mala liloo lie sebele lileeyi. Olanyoola waena kameechi ke bulamu ako? 12Kuuka wefwe Yakobo niye owakhuelesia efwe esebele yino; niye ne babaana bewe banywechanga muno alala ne bibiaayo biewe, wibaasia oli ewe omukali khukhila Yakobo?”

13Nio Yesu amukobosia ali, “Omundu yesi yesi onywa kameechi kano, bulesia buli mulia lundi; 14ne kakhali yesi yesi onywa kameechi niko khamuelesie, se aliba ne bulesia lundi tawe. Kameechi niko ndamuelesia kalaba emoni eye kameechi ke bulamu mu niye, mala kalamuelesia bulamu bwa mindali.”

15Omukhasi chana amuboolela ali, “Omwami, mbekho kameechi chana ako nywe! Nio bulesia bukhandia lundi tawe, namwe khecha lundi khutaa ano kameechi tawe.”

16Yesu amuboolela ali, “Khoche olaange omuseecha wowo mala okobole ano.”

17Akobosia ali, “Se ndi no museecha tawe.” Yesu naye amukobosia ali, “Kali ng'ali khuloma oli se oli no museecha tawe. 18Wachiile khu baseecha baraano ne akhaba omuseecha niye omenyile naye luno se ali owowo tawe. Khwako niko oloma kali ka ng'ali.”

19Omukhasi chana aboolela Yesu ali, “Omwami, mbona ndi ewe oli Omung'oosi. 20Bakuuka base Basamaria basaayanga Wele khu sikulu sino, ne kakhali enywe Bayaudi muloma muli khukhwola khusaaye Wele ne khuli mu Yerusalemu.”

21Yesu aamuboolela ali, “Mukhasi ewe, suubile ese, esaa eleecha, se mulasaaya Paapa ne muli khu sikulu sino namwe e Yerusalemu tawe. 22Enywe Basamaria ng'ali se mumanyile niye musaayanga tawe; ne kakhali efwe Bayaudi khumanyile niye khusaayanga, sikila buonia bwama mu Bayaudi. 23Ne kakhali esaa elikho yiicha mala niyo yino, khubirira mu maani ka Roho owa Wele babaandu bakhasaaye Paapa nga ne ali, bakhamusaaye niye mu bung'ali nga enya. 24Wele ali Roho, ne abo bamusaaya khukhwola bamusaaye mu Roho ne mu bung'ali.”

25Omukhasi oyo amuboolela ali, “Ese manyile ndi Kristo akheeche, ne nga akheeche alikhuboolela koosi.”

26Yesu amukobosia ali, “Niise, olikho olomaloma ne nawe.”

27Ao ne nao babeeka ba Yesu bakobola, mala bauka lukali nga bamunyoola ne alikho alomaloma no mukhasi. Ne kakhali se abao owareeba ali, “Wenya siina?” Namwe areeba Yesu ali, “Siina sikila ne olikho okachula naye?” Tawe.

28Nio omukhasi chana alekha esoongo akobola mu lukoba, mala aboolelayo babaandu ali, 29“Yiicha mubone Omundu oumbooleele buli siindu nisio nakhola. Sanyala aaba nali Kristo tawe ku?” 30Khwako barura mu lukoba bacha niio Yesu aba.

31Mu siise sienesio babeeka baba balikho bekoonjelela Yesu bali, “Omwekisia liakho siakhulia!”

32Ne kakhali abakobosia ali, “Ndi ne siakhulia nisio enywe mukhamanyile tawe.”

33Nio babeeka barakikha khureebana bali, “Wakana omundu amurereere siakhulia?”

34Yesu ababoolela ali, “Siakhulia siase sili khukhola lilienya lioyo owanduma ne khumala kimilimo nikio ambelesia khukhola. 35Mulomanga muli, ‘Kiaramire kimieesi kine nio likesa liole.’ Ne kakhali ese muboolela enywe ndi, loleelesia chisaambu bulayi; luno bibiaamo biaalabile mala biolile likesa! 36Omundu okesa anyoola kumuruungo lundi abuta kamatuunda ke bulamu bwa mindali, khwako omiicha nende okesa boosi bekhoyela. 37Lusimo luboola ng'ali luli, ‘Omundu mulala amiicha, okundi aakesa.’ 38Namurumire enywe khukesa biakhulia mu masaamba niko mukhakholamo kimilimo tawe. Babaandi bakholamo, mala enywe mwanyoolile bukhala khukhwama khu milimo kiabwe.”

39Basamaria bakali mu lukoba olwo basuubila mu Yesu sikila omukhasi oyo aba aboolile ali, “Amboleele buli siindu nisio nakhola.” 40Nio nga Basamaria chana ne beecha khu Yesu bamwikoonjelela amenye nabo, mala Yesu abaayo chindaalo chibili.

41Basamaria babaandi bakali basuubila sikila burume bwa Yesu. 42Mala baboolela omukhasi chana bali, “Luno khwasuubiile ne se lili sikila niko ewe okhuboolele tawe, ne kakhali fwabeene khwamuuliile niye Omwene, mala khwamanyile khuli ng'ali ali Omuonia owe sibala.”

Yesu aonia omwana owo Omwimeelesi

43Enyuma we khubayo chindaalo chibili, Yesu arekukha mala acha Kalilaya. 44#Mat. 13.57; Mk. 6.4; Lk. 4.24 Sikila Yesu omwene aba aalomile ali, “Omung'oosi sanyoolanga liria mu sibala siewe tawe.” 45#Yn. 2.23 Babaandu ba Kalilaya bamwakaanila nga ne olayo sikila baba bakoboole khukhwama mu Naikara eye Pasaka mu Yerusalemu mala baba babone buli siindu nisio aaba nakholile mu ndaalo cha Naikara echo.

46 # Yn. 2.1-11 Nio Yesu akobola Kana eli mu Kalilaya, niio akaluukhasiliayo kameechi kekela endali. Omwimeelesi mulala aba no mwana wewe omulwale mu Kaperinaumu. 47Nga naulila ali Yesu echile Kalilaya khukhwama e Buyuda, amuchakho, amusaba ali ache Kaperinaumu aonie omwana wewe owaba siimbi khufwa. 48Yesu amuboolela ali, “Se aliio khwinywe olisuubila nakhaboone kamayia ne kamakhuwa ke khuukia tawe.”

49Omwimeelesi oyo amukobosia ali, “Omwami khuche fwembi omwana wase nakhafwa tawe.”

50Yesu amuboolela ali, “Khoche omwana wowo alamenya!” Omundu oyo asuubila kamakhuwa ka Yesu mala aacha. 51Oli ali khu lukeendo acha engo, bakholi bewe bamwakaanila ne likhuwa bali, “Omwana wowo aonile!”

52Aabareeba esaa niyo aonelemo, mala bamukobosia bali, “Aaonile likolooba esaa eya saba kumuusi.” 53Nio raraawe aakhebulila ali yabeele esaa ng'eneyo ne ng'ene niyo Yesu aamuboolela ali, “Omwana wowo alamenya.” Khwako niye nende be nju yewe boosi basuubila.

54Kano kaba kamayia ke khabili niko Yesu akhola enyuma we khukhwicha Kalilaya khukhwama e Buyuda.

বর্তমানে নির্বাচিত:

Yn. 4: LUBUKUSU

হাইলাইট

কপি