Génesis 8
8
Diluviu yaku tsakishqan
1Tayta Diosqa manami qonqarqantsu Noéta y arcacho kaykaq uywakunatapis. Tsaymi yaku walkayänanpaq wayrätsimurqan. Tsay wayrawanmi yaku walkayayta qalaykurqan. 2Tsawraqa patsa rurincho kaq lamarpita pashtamuq yaku chawarqanna. Ciëlupita yaku yarqamunanpaq kicharaykaq punkupis wichqakäkurqanna.
3Tsaymi yaku walkayayta qalaykurqan. Pachak pitsqa chunka (150) junaqtanami 4arca takyarqan Araratcho kaykaq jirkaman. Tsay karqan qanchis kaq killa chunka qanchis junaqchömi. 5Tsaypita yaku waranlanta waranlanta walkayaptinnami chunka kaq killa qalaykunan junaq jirka puntakuna rikakarqanna.
6Tsaypita chusku chunka (40) junaq cumplirkuptinnami Noé kicharqan arcapa ventänanta. 7Nirkur juk cuervuta#8.7 Cuervuqa yukishpita mas jatun yanami kaykan. kacharqan yaku tsakishqanta o mana tsakishqantapis rikapakamunanpaq. Tsayno kaptinpis tsay cuervuqa manami kutirqantsu, sinöqa yaku jananpa wakpa kaypa pärir purirqan yaku tsakishqanyaq.
8Tsaypitanami kacharqan juk palumata yaku tsakishqanta o mana tsakishqantapis musyamunanpaq. 9Patsa janancho yaku juntaraptinmi maychöpis ratananpaq mana kaptin arcaman kutirqan. Tsaymi Noéqa makinta makyarqan paluma ratananpaq. Rataykuptinnami arcaman yaykatsirqan.
10Tsaypita qanchis junaqtanami palumata yapay Noé kacharqan. 11Patsa tsakaykaptinnami paluma kutirqan olïvu räman amushqa. Tsaynöpami Noé musyarqan yaku tsakiykashqantana. 12Kutishqanpita qanchis junaqtami yapay palumata kacharqan. Tsawraqa paluma manami kutirqannatsu.
13Soqta pachak juk (601) watayuq Noé kaykaptinmi yaku tsakirqanna. Tsay karqan mushuq wata qalaykunan junaqmi. Tsay junaqmi arcata kicharkur Noé rikarqan patsa tsakishqatana. 14Ishkay kaq killacho ishkay chunka qanchis (27) junaq kaykaptinmi kay patsa tsakishqana kaykarqan. 15Tsaymi Noéta Tayta Dios kayno nirqan: 16<<Kananqa warmikiwan, tsurikikunawan y lumtsuynikikunawan arcapita yarqupäkuyna. 17Tsaynöpis lapan casta uywakunata qarquyna ashmana kaqkunata, mana ashmana kaqkunata, pachalanpa, lätaypa puriqkunata y lapan casta päriqkunatapis maytsaypa aywar intëru patsacho mirananpaq>>.
18Tsayno niptinmi Noé yarqurqan warminwan, tsurinkunawan y lumtsuyninkunawanpis. 19Tsaynölami yarqupäkurqan ashmana kaq y mana ashmana kaq uywakuna, pachalanpa, lätaypa puriqkuna y lapan casta päriqkunapis. 20Yarqurkurnami Noé juk altarta perqarqan Tayta Diosta adorananpaq. Nirkurmi cada casta püru kaq uywakunapita y päriqkunapita pishtarkur altarcho sacrificiuta rupatsirqan.#Lev. 1.1-7. 21Tsayno rupatsiptinmi ali asyayninta#8.21 Wakin runakunaqa mushkuyninta nipäkun. mayar Tayta Dios kushikurqan. Tsaymi kayno nirqan: <<Runakunaqa wamra kashqanpita patsami shonqun munashqanno jutsata rurar kawapäkun. Tsayno kawaptinpis kay patsata yapayqa manami maldicionashaqtsu. Kanan ushakätsishqänöqa manami kay patsacho kawaqkunata ushakätsishaqnatsu.
22<<Kay patsa manaraq ushakashqanyaqqa runakuna murukunqami y cosechanqami.
Tsaynöpis kanqami qasaypis, shanaypis, usyapis, tamyapis, junaqpis y tsakaypis>>.
বর্তমানে নির্বাচিত:
Génesis 8: qvmB
হাইলাইট
শেয়ার
কপি
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
