Lukas 22

1IS ubutpotet u nasjapicnaig va nareto ti leven iran, nidan napaska: 2eris ahti jipe yin a ilpu atimi ahlap esjilid im ilpu atimi esege mika eri atgei yin, jam imtita atimi.

3Is ahei Jutas nupu Karyot a Satana, is atimi is ethi aien ira atimi is twelv iji ehki: 4is apan aien, um tas ehele ilpu atimi ahlap esjilid im ilpu atimi alupas, um asuptecnaig nedo ineig inyi aniv yin ehele ra vaig: 5eris imyiacitak ara, um ika eri alupai yin mune: 6is adai intas ura aien, um imyiiris naopan upene mika yi aniv yin ehele ra, an neti amenvaig ehelen atimi.

7Is wat lahlah an nadiat iyehki, eris asjapicnaig va nareto ti leven iran, eris ika eri atgei napaska iran, 8is abrai Pitrus aien im Joanes, um ika, Apan aijaurau um imyecrei napaska vai caija, mika ti caig akaija. 9Erus ika ehelen arau, Nai merit aiek vaig eda igca ecru imyecrei aijumrau? 10Is ika ehele rau aien, Aru wit apan an nuarin-pece itaup aijaurau, etpu idim ehtet iramirau natimi inyi ethi, um apos nipjinitai inyi amen inwai iran; arumu apitac yin aijaurau, um apan anliin neom ineig inyi apan iran aien: 11arumu asaig aijaurau ehele natimi alupas an neom, Et ika ehelum a Natimi esege, Nuarin-neom imi ilpu alaig yek eda, mika ki caig napaska iran ainyak im lep ilpu atimi atahaijeg nyak? 12Etpu asuptecnaig ehelemirau aien nuarin-neom ijinies um alupas, et amen niji itai iran: arumu imyecrei eahki aijaurau. 13Erus apan arau um ecetai et idivaig is asaig ehele rau aien: erus imyecrei napaska arau. 14Is wat yetpan nuarin-nadiat iyehki, is ehrateucse aien, im lep ilpu apostolo o un is twelv. 15Is ika ehele ra aien, Kis idim merit alupas ainyak incaigvaig napaska ineigki ehelemia, ja par mas: 16ek asaig ehelemia ainyak mika, Inki ti lep caig ainyak, um uhum pan naopan iyehki uhpu ehneijid an nelcau o Atua. 17Is leh nipjinitai aien, um naaurineig iran, um ika, Leh ineigki aijaua um edaig jipe iramia: 18ek asaig ehelemia ainyak mika, Inki ti umnyi nidi vaine ainyak, um uhum pan naopan iyehki etpu yetpam nelcau o Atua.

19Is leh nareto aien, um naaurineig iran, um aswaplec, um alaa ra, um ika, Nohuk ineigki eris ahtai vai caua: ago nedo ineigki aijaua par imyiehva nyak. 20Eris wat caig ara, is lep leh nipjinitai aien, um ika, Nipjinitai ineigki, et idivaig intas-etipup mat vai inja irak, eh mun atladwi vai caua. 21Ja et idim amen ehelek an nitai hag nikmai natimi ineig etpu aniv nyak aien. 22Et inivaijec ineig, et apan a Inhal o natimi, et idivaig eris upyi asaig vai yin: ja a’a, auwe vai nat naico etpu aniv yin aien! 23Eris tas jipe ara, um ika, Tah caija a di neigki etpu ago nedo ineigki?

24Eris lep imyiisjis jipe ara, um ika, Inyi esjilid tah caija a di? 25Is ika ehele ra aien, Era esjilid irai pece ura a ilpu atimarid irai iji pece; era lep anvi nidai ilpu atimi alupas ura ara par ika ilpu atimi ago nedo upene: 26jam jim ago nedo ineigki aijaua: aien et esjilid iramia aien, etmu idivaig inharei aien; aien et atimi alupas iramia aien, etmu idivaig naheca unyimia aien. 27Et esjilid a di, aien et ateuc aien um hag, ka aien et aheca o un aien? aien marom et ateuc aien um hag: ja ek amen ehelemia ainyak um idivaig naheca unyimia. 28Akis amen ehelek aijaua irai iji ohocred unyak. 29Ek ati nelcau imi caua ainyak, et idivaig is ati imi nyak a Etmak; 30mika aki hag aijaua um umnyi an nitai hag unyak an nelcau unyak, um ateuc irai dorona um asuptecnaig nimtan imi ilpu mapoi ilpu hal o Isreel et twelv.

31Is ika a Natimarid, Ak Saimona, ak Saimona, et idim merit vai caua a Satana, mika yi irara iramia et idivaig hwiit: 32ja ek mun alaigaheni vai euc ainyak, va yi jim auatialidi nimyiisjis ninivaijec unyum aiek: na wit adumoij aiek, namu ated emda ilpu etoam aiek. 33Is ika ehelen aien, Ak Natimarid, ek apena ainyak nahced euc vaig, um apan an neom ipjin, im lep inmasvaig. 34Is ika aien, Ek asaig ehelum ainyak, ak Pitrus, mika, napu ehceseij ateri nyak aiek an nadiat ineigki, ja etpu ahlaig injaa. 35Is ika ehele ra aien, Kis wat abraig pan caua ainyak is ti mune unyimia aijaua, im incat, im incedpoi eduomia, akis ihki atimi aijaua, ka o’o? Eris ika ara, O’o. 36Is ika ehele ra aien, Aien et eteuc mune o un an naopan ineig, etmu leucse aien, im lep incat o un: aien et eti eteuc mune o un, etmu ahtai napelumai o un aien, um auanimtan nauitoga: 37ek asaig ehelemia ainyak, mika uhpu ago vai nyak nitai iyehki eris aged, um ika, “Eris esvi pan yin irai ilpu atimi auatatimi:” er ehneijid irak niji itai eris aged vai nyak. 38Eris ika ara, Ak Natimarid, et idim amen igcaki nauitoga et ero. Is ika ehele ra aien, Et upene.

39IS alau ijo aien, um apan an nedoon Olivet, is idivaig nupyi edo o un; eris ahced yin a ilpu atimi atahaijeg yin. 40Is wat yetpan aien eahki, is ika ehele ra aien, Akumu alaigaheni aijaua va aki jim apan an nedo oop caua. 41Is ude ra aien um apan, et idivaig nuarin ethaig pan inhat iran, um atpuse, um alaigaheni, 42um ika, Ak Etmak, el et wat upene vai euc, el et mun atipagki nipjinitai ineigki ehelek: jai tup aiek marom, jim imyiaiji intas unyak. 43Is ehcohos ehelen a nagelo an nohatag is ethi, um ago emda yin. 44Is esjilid nohocred o un aien, is alaigaheni emda aien: is idivaig inja nihlup iran aien, um ahtahtise an nobohtan. 45Is alaigaheni ehni aien, ja par atidai, um apan ehele ilpu atimi atahaijeg yin, um ecet ra numjegvaig va nohocred ura, 46um ika ehele ra, Eka auri aijaua par umjeg? atidai aijaua um alaigaheni, va aki jim apan an nedo oop caua.

47Is wat tas aien, eris yetpan natimi is ahinag, is uhup ira ra tah is ethi ira atimi is twelv, nidan Jutas, is apan ubutpotet ehele Iesu aien mika yi aijumnyi yin. 48Is ika ehelen a Iesu, Ak Jutas, na mun aniv Inhal o natimi aiek an naijumnyi yin? 49Eris wat almoi nedo ura a ilpu atimi amen ehelen, eris ika ehelen ara, Ak Natimarid, ecri auud ra irai auitoga aijama, ka o’o? 50Is auud naheca o natimi esjilid an nahlap tah is ethi ira ra, um auudyialis intikgan inmatan. 51Is tas a Iesu, um ika, Akumu eropropse aijaua. Is atcei pan intikgan aien; is um lep ahtag. 52Is ika a Iesu ehele ilpu atimi ahlap esjilid, im ilpu atimi alupas an neom ahlap, im ilpu atimi tas alep, eris ahtag pan ehelen ara, Eka mun idim ham aijaua um auanedo an natimi ehneg itai irak, um apos nauitoga im nelop: 53kis wat amen ehelemia ainyak anliin neom ahlap irai iji adiat, akis eti arop irak aijaua: ja et nuarin-nadiat unyimia ineigki, im nemda o naupat.

54ERIS arop iran ara, um leh yin, um imyiapan yin an neom o natimi esjilid an nahlap. Is apitac yin a Pitrus, jam itac acen. 55Eris wat adnan cop ara juju an nimnim, um ateucse, is um ateucse an nibla ra a Pitrus. 56Is wat atijcop aien, is ecet yin a natahaig is ethi, um almuktit yin, um ika, Is lep ahced yin natimi ineigki. 57Is ateri yin aien, um ika, Ak intakata ineigki, ek eti ato yin ainyak. 58Is eti laulau is lep ecet yin intak atimi, um ika, Na atimi ira ra aiek. Is ika a Pitrus, O’o, ak natimi ineigki. 59Is wat ti pan itac aur is ethi, is imyiisjis emda intak atimi, um ika, Et inivaijec ineig, nikavaig, is lep amen ehelen a nat eigki; et upu Calili aien. 60Is ika a Pitrus, Ak natimi ineigki, ek eti ato intas ineigki ainyak na asaig aiek. Is wat tas aien, is um ahlaig injaa. 61Is ahidai yin a Natimarid, um umaharei Pitrus. Is imyiehva a Pitrus intas iyehki is upyi asaig ehelen a Natimarid, um ika, Napu ehceseij ateri nyak aiek, ja etpu ahlaig injaa. 62Is apan itac a Pitrus, um taig alupas.

63Eris imyiafakahcil Iesu a ilpu atimi asjiraig yin, um aredei yin. 64Eris atapanes nesganimtan ara, um ahpoi nesganimtan, um ahodai yin, um ika, Asuptecnaig aiek, et mun ahpoi euc a di? 65Eris asan tas has is ahinag vai yin ara is eche.

66Is wat lahlah, eris asjapicnaig a ilpu atimi tas alep an pece, im ilpu atimi ahlap esjilid, im ilpu atimi esege, eris imyiapan yin ara an nuarin asjapicnaig ura, um ika, 67Nai Kristo aiek, ka o’o? asuptecnaig aiek ehelema. Is ika ehele ra aien, El ek asuptecnaig ehelemia ainyak, el eka eti imyiisjis ninivaijec aijaua: 68el ek ahodai caua ainyak vai itai, el eka eti asuptecnaig ehelek aijaua, um eti atceijaig nyak. 69Etpu ateuc a Inhal o natimi an matai nemda o Atua an tak aopan. 70Eris ika ara asega, Nai Hal o Atua aiek, ka o’o? Is ika ehele ra aien, Eka mun asaig aijaua ek idim ucco ainyak. 71Eris ika ara, Inta auri akaija par lep ahilek ilpu atimi asuptecnaig vai yin? inta mun atahaijeg intas o un akaija.

বর্তমানে নির্বাচিত:

Lukas 22: ATY1863

হাইলাইট

কপি