Lukas 21

1IS eas pan aien, um alum ilpu atimi ikni itai niknivaig niji itai tup ahtai ura an nuarin ikni mune iran. 2Is lep ecet intakata ihki natimi is ethi aien is mas natamnyu un, is han atise nuari-mune haklin is ero aien eahki. 3Is ika aien, Et inivaijec ineig ek asaig ehelemia ainyak mika, Et esjilid nedo o intakata ihki natimi ineigki is mas natamnyu un ira ra asega: 4et minni inpadiaig ura ara asega, ja era ikni nahaijin ache nitai tup ahtai imi Atua; et ihki natimi aien, jam ikni asega inpadiaig o un.

5ERIS tas va neom ahlap nahaiji atimi, um ika, Et eklim upene neom vai hat esjilid iran im niji itai tup ahtai. Ja is ika aien, 6Eka almoi nitai iji eigki aijaua, ja etpu yetpam naopan iyehki, inyi ti amen inhat inyi ethi irai taka hat, ja uhpu alcapdicraig asega. 7Eris ahodai yin ara, um ika, Ak natimi esege, etpu yetpam nitai iji eigki an nahopan? inyi asjaaicnaig an napam u nitai iji eigki nevitai? 8Is ika aien, Aminjinai caua aijaua va yi jim imyiahnag caua tah natimi: erupu ham atimi inyi ahinag an nidak, um ika, Ek Kristo ainyak; et ubutpotet u naopan iyehki: va nitai ineig akumu jim apitac ra aijaua. 9Aku wit atahaijeg edoa aijaua im ehtauo, jam jim imtitaig: inyi upyi eteuc nitai iji ehki; ja inyi ti fi auroauro um ahni nitai. 10Is ika ehele ra aien, Erupu ati nedoa jipe vai ra nup urai iji pece, im lep nup urai iji elcau: 11etpu omoi alupas irai iji uari pece inyi ahinag, im lep umlaig has, im inmas; uhpu lep ecetai an nohatag niji itai iji eig er imtitaig, im niji itai asjaaicnaig esjilid.

12Erupu upyi hup ara, um atmas vai caua, um arop iramia, um ikni caua ehele ilpu atimi asjapicnaig, um lep ikni caua irai eom ipjin, erupu imyiapan caua ara an nuhup o ilpu atimarid im ilpu atimi alupas va nidak, ja etpu yetpam nitai iji ehki. 13Etpu asuptecnaig caua nitai iji eigki. 14Akumu apos anliinmopomia aijaua, mika aki jim upyi hup um aktaktai intas ineig aki asaig: 15ekpu alupai caua intas ainyak im narapakau, erupu auatialidi a ilpu atimi tak atimi iramia asega inwudyedivaig intas unyimia um imyiisjis. 16Erupu aniv caua a ilpu atmil unyimia, im ilpu etoamia, im ilpu atimi ehpan iramia, im ilpu apa unyimia; erupu ika ara eri atgei nahaijimia. 17Erupu amcel vai caua atimi asega va nidak. 18Ja eri idim eti auahas tah numri nidjinimia inyi ethi. 19Akumu aneijirai caua aijaua, um imyiatamaig nesgamia.

20Aku wit alum ilpu atimi ati nedoa aijaua um imyiarahed Jerusalem, akupu ato aijaua, nikavaig, et mun ubutpotet u nauahasvaig. 21Ara eri amen Jutaia ara, erumu aha pan ara irai lola edoon; erumu ude nuarin-pece ineig ara eri amen iran ara; erumu jim ham iran ara sji ehki era amen irai taka uarin ara. 22Uhpu aru nedo has an naopan iyehki, par ehneijid niji itai asega eris aged. 23Kaiheuc vai ra eri opouc ara, im lep ra eri alidai ilpu hal ura ara, ira adiat iji ehki! etpu esjilid nohocred an pece, im lep nedemda vai nup igcaki. 24Uhpu atgei ra irai auitoga, uhpu lep imyiapan ra irai iji pece asega mika eri aheca o atimi: erupu wehiepelaig Jerusalem a nup urai iji pece, um yetpan naopan iyehki etpu ahni naopan o nup urai iji pece.

25Etpu eteuc niji itai asjaaicnaig an nagesega, im lep an mohoc, im lep irai moijeuv; erupu ohocred a nup urai iji pece an nobohtan va netehto ura; etpu auoc alupas injop; 26etpu auatialidi inliinmopoi atimi va nimtitaig ura, eru wit almoi nitai iji eigki ara etpu yetpam an nobohtan: etpu ahcatina niji emda an nohatag. 27An naopan iyehki erupu ecet Inhal o natimi ara inhamvaig an nepeig an nemda o un, im lep an natimi alupas o un. 28Et wit yetpam nitai iji eigki, akumu ahlahusjai aijaua, um easji pan; etpu ubutpotet u nimyiatamaigvaig caua.

29Is ecsipece ehele ra aien, um ika, Almoi nateg aijaua im lep nauicai asega; 30et wat ehcodaig, eka almoi aijaua um ispamia ato, nikavaig, et mun ubutpotet u inlidija: 31et idim ucco, aku wit almoi nitai iji eigki aijaua, akumu ato aijaua, nikavaig, et mun ubutpotet u nelcau o Atua. 32Et inivaijec ineig ek asaig ehelemia ainyak mika, Inyi upyi hup um ahni nitai iji eigki asega, ja erupu emesmas natimi an naopan ineig. 33Etpu yetpan an tid iran nohatag im nobohtan; ja inyi ti yetpan an tid iran intas unyak. 34Aminjinai caua aijaua, um jim auahas inliinmopomia va nitai caig alupas, im nahnag vai kava, im naktaktai niji itai an nobohtan ineigki, va yi jim yetpam iramia nadiat iyehki, an neti aktaktaivaig unyimia. 35Etpu yetpam ira atimi asega amen an nobohtan asega, um idivaig nitai aprou itai. 36Akumu aiji aijaua, um alaigaheni, um jim atumop, va uhpu ika vai caua aki upene aijaua mika yi ti yetpam iramia tah nitai irai itai iji eigki eri yetpam; akupu lep atidai aijaua an nuhup u Inhal o natimi.

37Is esege aien anliin neom ahlap an nadiat; ja is wat epeig, is alau ijo aien, um amen an nedoon nidan Olivet. 38Is wat lahlah an nuhialeg, eris ahtag pan ehelen atimi asega anliin neom ahlap, mika eri atahaijeg yin.

বর্তমানে নির্বাচিত:

Lukas 21: ATY1863

হাইলাইট

কপি