Lukas 15

1Eris ahtag pan ehelen a ilpu atimi akwanaham asega im ilpu atimi auatatimi, mika eri atahaijeg intas o un. 2Eris tas upoupo a ilpu Farisi im ilpu atimi esege, um ika, Et aiheuc vai ilpu atimi auatatimi natimi ineigki, um hag ehele ra. 3Is ecsipece ehele ra aien, um ika, 4El et eteuc siip et wun huntret o un tah natimi iramia, el et eti ecetai et ethi ira ra aien, el et ude nainte nain an lelitai aien, um ahilek ineig is melga, um uhum pan naopan ineig et ecetai aien: 5et wat ecetai aien, et ahelwei aien, um imyiacitak: 6et wat apan an nimnim o un aien, et asjapicnaig ilpu etoan aien im ilpu atimi eblaamnem o un, um ika ehele ra, Ti ehrimyiacitak siip unyak akaija is melga; ek mun ecetai ainyak. 7Ek asaig ehelemia ainyak mika, Et idim ucco, etpu alupas nimyiacitak an nohatag vaig tah natimi auatatimi et adumoij anliinmopon aien, jam tintin nimyiacitak va natimi upene et nainte nain, eris eti ika vai ra eri adumoij anliinmopura ara.

8El et eteuc nuari silver et ten o un tah intakata, el et etjo nuarin el et ethi, et atni incop alahala aien, um ahre neom, um ahilek emda um uhum pan naopan ineig-et ecetai aien: 9et wat ecetai aien, et asjapicnaig ilpu etoan aien im ilpu atimi eblaamnem o un, um ika, Ti ehrimyiacitak nuari silver unyak akaija is etjo; ek mun ecetai ainyak. 10Et idim ucco, ek asaig ehelemia ainyak mika, Et eteuc nimyiacitak an nuhup o ilpu agelo o Atua vaig tah natimi auatatimi et adumoij anliinmopon aien.

11Is lep ika aien, Is eteuc natimi is ethi, is ero inhalav atamaig o un. 12Is ika a inharei ehele etman, Ak etmak, alupai nyak nahaiji padiaig unyum aiek yi imtak. Is atiakoai ira rau inpadiaig o un aien. 13Is wat ti pan itac nadiat is eti elpat, is asjapicnaig niji itai asega o un a inharei, um atga o un, um apan an pece itac acen, um eduaraprap irai padiaig o un an nedo auatiahnag. 14Is wat eduraprap ehni iran aien, is um eteuc numlaig has esjilid an pece iyehki; is um ihki natimi aien. 15Is apan aien um amen ehele natimi is ethi an pece iyehki; is abrai yin aien mika yi apan uman um alayi picad. 16Is merit aien inhegaigvaig narasitai iji eig eris hegaig picad: eris eti alaan itai tah natimi. 17Is wat eteuc lelen aien, is ika aien, Era amen ehele etmak a ilpu aheca o un va nimtan et ahinag, um hag, jam eti etahni; ja ek mas ainyak va numlaig: 18ekpu atidai ainyak um han ehele etmak, um ika ehelen, Ak etmak, kis mun ago nedo has ainyak va nohatag, im lep an nuhup unyum, 19et eti upene nanvi nidak vaig mika inhal unyum: namu ika aiek ki idivaig tah naheca unyum va nimtan ainyak. 20Is atidai aien um han ehele etman. Is wat ehgin yetpan vaig aien, is ecet yin a etman, um aiheuc vai yin, um athut, um ablaijiraig pam yin, um aijumnyi yin. 21Is ika ehelen a inhal o un, Ak etmak, kis mun ago nedo has ainyak va nohatag, im lep an nuhup unyum, et eti upene nanvi nidak vaig mika inhal unyum. 22Is ika ehele ilpu aheca o un a etman, Akumu leh pame napelumai esjilid aijaua, um atohwai yin iran; um atise rig an nikman, um atohwai eduon a su: 23im lep leh pame inhakli kurimatau upene, um atgei; ti hegaig akaija, um imyiacitak: 24et idivaig is mas a inhal unyak ineigki, jam lep umoh; is tup ti aien, ja eris lep ecet yin. Eris imyiacitak ara. 25Is amen an Ielitai a inhal’o un inmetto: is wat apan ubutpotet u neom aien, is ahgei nohranitai ura aien im nadikjai ura. 26Is ahlaig va naheca is ethi aien, um ika, Inhe sji eigki? 27Is ika ehelen aien, Et mun ham a etoam; et mun atgei inhakli kurimatau upene a etmam, va nitai ineig et mun ecet yin aien incehcehe upene vaig. 28Is edemda aien, um esjum napanvaig anliin neom: is alau ijo a etman, um acaiji yin. 29Is tas aien, um ika ehele etman, Kis aheca unyum ainyak irai mesese is ahinag, um eti imyipalea tah intas unyum irai iji adiat; ja as eti alupai nyak tah inhaklin nanin aiek, mika ki imyiacitak ehele ilpu apa unyak ainyak: 30ja is wat ham a inhal unyum ineigki, is eduaraprap irai padiaig unyum aien irai ilpu takata has, na mun atgei inhakli kurimatau upene vai yin aiek. 31Is ika ehelen aien, Ak inhal unyak, na amen ehelek aiek irai iji mesese, et unyum niji itai asega unyak: 32et upene vai caija nimyiacitakvaig, um cediaig: et idivaig is mas a etoam ineigki, jam lep umoh; is tup ti aien, ja eris lep ecet yin.

বর্তমানে নির্বাচিত:

Lukas 15: ATY1863

হাইলাইট

কপি