Joanes 7

1Is wat ti pan itac nitai iji eigki, is atga sjipe a Iesu an pece Calili: is eti merit aien natga jipe vaig an pece Jutaia, va nitai ineig, nikavaig, eris ika a nupu Jutaia eri atgei yin. 2Is mun ubutpotet a nasjapicnaig u nupu Jutaia irai im muricai an naopan iyehki. 3Eris um ika ehelen a ilpu etoan, Atga unyum aiek, um apan Jutaia, mika eri lep almoi niji auritai iji eigki na ago aiek a ilpu atimi atahaijeg euc: 4et wat merit tah natimi mika eri ato yin atimi asega, et eti ago tah nitai aien um adenaig: el et ago nitai iji eigki aiek, namu ehvai euc aiek ehele atimi. 5Eris idim eti asgeig iran a ilpu etoan. 6Is um ika ehele ra a Iesu, Et mun eti fi yetpam naopan unyak: ja et eteuc naopan unyimia irai iji adiat: 7et ehka va atimi namcel vai caua vaig; ja era amcel vai nyak ara, va nedo unyak, nikavaig, ek acaiji nedo has ura ainyak: 8apan aijaua u nasjapicnaig ineig: inki ti apan ainyak u nasjapicnaig ineigki an naopan ineig; et pam eti fi yetpam naopan unyak. 9Is asan tas ineigki ehele ra aien, ja par amen Calili.

10Eris wat apan a ilpu etoan alaig u nasjapicnaig, is lep apitac ra aien, jam ateri natga o un, um eti asaig. 11Eris ahilek yin u nasjapicnaig a nupu Jutaia, um ika, An yek eda aien? 12Eris imyiisjis jipe yin natimi: eris ika nahaiji ra, Et atimi upene aien: ja eris ika nahaiji ra, O’o; et ago nedo efaifa aien va atimi. 13Ja is eti tas emda vai yin tah, eris imtitai upu Jutaia ara.

14Is apan a Iesu anliin neom ahlap, an nadiat is ethi juju an nasjapicnaig o atimi, um esege. 15Eris imyiali a nupu Jutaia, um ika, Et ato nitasvitai a natimi ineigki vai di, eris eti esege imi yin? 16Is tas ehele ra a Iesu, um ika, Et eti ahes ehelek nesege unyak, ja et ahes ehelen is abrai nyak aien. 17El et merit tah natimi nimyiaijivaig intas o un, inyi ato aien, kit is ahes ehele Atua nesege unyak, ka ek ispuk tas ainyak. 18Aien et ispun tas vai yin aien, et ahilek nimyiahpas yin aien: ja aien et ahilek nimyiahpas yin is abrai yin aien, et inivaijec aien, um atoh nedo o un. 19Is alupai caua intas alep a Moses, ja eka idim eti imyiaiji intas alep aijaua. Eka auri aijaua par ika aki atgei nyak? 20Eris tas natimi, um ika, Et amen ehelum a nagelo has: et ika a di yi atgei euc? 21Is tas a Iesu, um ika ehele ra, Kis ago nauritai is ethi ainyak, ja eka idim imyiali aijaua asega. 22Is asuptecnaig ehelemia naperitome a Moses; (ja is eti ahes ehele Moses, is ahes ehele ilpu retpoija;) eka aperitome ira atimi aijaua an nadiat atumop. 23Er aperitome ira atimi an nadiat atumop, va eri jim auahas intas alep o Moses; eka edemda vai nyak aijaua va nedo unyak, ka o’o, nikavaig, kis ago cehcehe asega natimi is ethi ainyak an nadiat atumop? 24Jim aktaktai va nesganimta atimi ache aijaua, etmu inivaijec naktaktai unyimia vai ra. 25Eris um ika nahaiji nupu Jerusalem, Aien aigki era ika ara eri atgei yin, ka o’o? 26et idim tas emda aien, ja era eti acaiji yin ara: era ato inivaijec a ilpu atimi alupas mika kit idim Kristo ineigki, ka o’o? 27inta ato akaija inuarin ineig is ahes iran a natimi ineigki: ja et wit ham a Kristo, inyi ti ato tah natimi inuarin ineig etpu ahes iran aien. 28Is efehtas a Iesu anliin neom ahlap an nesege o un, um ika, Eka ato nyak aijaua, im lep inuarin ineig kis ahes iran ainyak: kis eti tup ispuk ham ainyak, et inivaijec aien is abrai nyak aien, ja eka eti ato yin aijaua: 29ek idim ato yin ainyak; kis ahes ehelen ainyak, is abrai nyak aien. 30Eris merit ara narop iran vaig: ja is eti arahpan vai yin tah natimi, is eti fi yetpam naopan o un. 31Eris lep asgeig iran natimi is ahinag, eris tas ara, um ika, Et wit ham a Kristo, inyi ti ago niji auritai ehka aien inyi esjilid irai itai iji eigki et ago a natimi ineigki.

32Eris atahaijeg a ilpu Farisi, nikavaig, eris imyiisjis nitai iji eigki vai yin natimi; eris abrai ilpu aheca ura a ilpu Farisi im ilpu atimi ahlap esjilid mika eri arop iran ara. 33Is um ika ehele ra a Iesu, Etpu idim ipjidipjid namen unyak ehelemia, ekpu apan ehelen ainyak is abrai nyak aien: 34akupu ahilek nyak aijaua, jam eti ecet nyak: inyi ehka vai caua napanvaig an nuarin ineig ek amen iran ainyak. 35Eris tas jipe a nupu Jutaia, um ika, Etpu apan aien eda, mika inti eti lep ecet yin akaija? etpu apan aien ehele atimi era terimterim ara irai nupu Crisi, um esege imi nupu Crisi, ka o’o? 36neveh tas ineigki et mun asaig aien mika, Akupu ahilek nyak aijaua, jam eti ecet nyak? im lep ineig, Et ehka vai caua napanvaig an nuarin ineig ek amen iran ainyak?

37An nadiat apitac, nadiat esjilid an nasjapicnaig ura, is um atidai a Iesu um efehtas, um ika, El et ahvig wai tah natimi, etmu ham ehelek aien um umwig: 38aien et asgeig irak aien, etpu ahlau ohua alupas inwai umoh anliinmopon, et idivaig eris aged. 39(Is asan tas ineigki aien va Nesgan Upene, aien aigki erupu leh yin a ilpu atimi asgeig iran: eris pam eti alupa atimi Nesgan Upene an naopan iyehki; va nitai ineigki, nikavaig, eris eti fi ehvaig natimi alupas o Iesu.)

40Eris wat atahaijeg intas ineigki ara, eris ika natimi is ahinag, Et inivaijec ineig, nikavaig, et aprofeta iyehki aien. 41Eris lep ika nahaiji ra, Et Kristo aien. Ja eris ika nahaiji ra, Et eti ahes Calili a Kristo: 42eris aged, um ika, Etpu ahes ehele Tevit a Kristo, im lep an nuarin-pece Bedleem is amen iran a Tevit. 43Eris imyiisjis jipe yin natimi. 44Eris merit nahaiji ra narop iran vaig; ja is eti arahpan vai yin tah natimi.

45Eris lep apan ehele ilpu atimi ahlap esjilid im ilpu Farisi a ilpu aheca ura; eris um ika ehele ra ara, Eka auri aijaua par eti imyiapam yin? 46Eris um ika a ilpu aheca, Is idim eti tas tah natimi et idivaig natimi ineigki. 47Eris um ika ehele ra a ilpu Farisi, Eka mun idim lep ahnag aijaua: 48is idim eti asgeig iran tah ilpu atimi alupas, ka tah ilpu Farisi: 49ja era ilpu atimi er ika eri auahas ra natimi iji eigki, era eti ato intas alep ara. 50Is um ika ehele ra a Nikotimus, (aien aigki is han aien ehele Iesu an nepeig, is atimi is ethi ira ra aien,) 51Nedo an tas alep uja ineigki, nikavaig, inta upyi hup akaija um atahaijeg intas o atimi um ato nedo ura, ja par asuptecnaig nimtan. 52Eris tas ara, um ika ehelen, Nai lep upu Calili aiek, ka o’o? ahilek, um almoi: et eti ahes Calili tah naprofeta. 53Eris apan irai imnim ura natimi asega.

বর্তমানে নির্বাচিত:

Joanes 7: ATY1863

হাইলাইট

কপি