Joanes 5

1Is wat ti pan itac nitai iji eigki, eris asjapicnaig a nupu Jutaia; is apan Jerusalem a Iesu. 2Is eteuc netpen Jerusalem ubutpotet u neucse nirahed u siip, nidan Hibru Bedesta, is faiv naiyu o un. 3Eris asjeuc ithan naiyu a ilpu atimi emehe is ahinag, ilpu atimi aupat nesganimtara, im ilpu atimi atga adjo, im ilpu atimi urauo, eris aitgaig nahcatina u inwai ara an tah naopan. 4Is asuol an netpen a nagelo an tah naopan um elucai an wai: aien is upyi hup aien um asuol, is wat ahcatina inwai, is edoaijaig iran nemehe o un.

5Is amen eahki natimi is ethi, is emehe aien irai mesese is dirte eet. 6Is wat alum yin a Iesu nasjeucvaig, um ato, nikavaig, is emehe aien itu acen, is um ika ehelen aien, Nai merit aiek incehcehevaig, ka o’o? 7Is um ika ehelen a natimi emehe, Ak natimi alupas, et eti amen ehelek tah natimi par atise nyak an netpen, an nahcatina u inwai: ek wat apan ainyak, et uhup irak tah um asuol. 8Is um ika ehelen a Iesu, Atidai aiek, um leh nitai ahled unyum, um atga unyum. 9Is um auroauro um cehcehe natimi iyehki, um leh nitai ahled o un, um atga o un: is idim adiat atumop iyehki.

10Eris um ika a nupu Jutaia ehele natimi iyehki eris ago cehcehe yin, Nadiat atumop ineigki: et itaup naposvaig nitai ahled unyum. 11Is um ika ehele ra aien, Aien is ago cehcehe nyak aien, is ika ehelek aien, Leh nitai ahled unyum aiek, um atga unyum. 12Eris ahodai yin ara, um ika, Natimi iyehki di, is ika ehelum aien, Leh nitai ahled unyum aiek, um atga unyum? 13Ja is eti ato yin a natimi iyehki is ago cehcehe yin: is um eklim tup tiblaitibla atimi eahki a Iesu um atga o un. 14Is wat ti pan itac nitai iji eigki, is ecet yin a Iesu anliin neom ahlap, um ika, Na mun idim cehcehe aiek: jam jim lep ago nedo has aiek, va yi jim lep yetpam iram tah nitai has inyi esjilid iran yehki. 15Is atga o un a natimi iyehki, um asuptecnaig ehele nupu Jutaia, um ika, Iesu iyehki is ago cehcehe nyak aien. 16Eris atmas vai Iesu a nupu Jutaia, um tas jipe mika eri atgei yin, va nedo o un, nikavaig, is ago nitai iji eigki aien an nadiat atumop.

17Is um ika ehele ra a Iesu, Is auritai a Etmak um imyihum pam naopan ineig, ek lep auritai ainyak. 18Eris tas emda jipe a nupu Jutaia mika eri atgei yin, va nedo o un, nikavaig, is auahas nadiat atumop aien, is lep ika aien, Et Etmak a Atua, um ika is apa vai Atua aien. 19Is tas a Iesu, um ika ehele ra, Et idim inivaijec ineig ek asaig ehelemia ainyak mika, Et ehka vai Inhal o Atua intup ispun ago tah nitai vaig, nitai iji eigki ache, et alum Etman aien nagovaig: nitai iji eigki asega et ago aien, et lep ago a Inhal o un. 20Et aiyu inliinmopoi Etmak vai Inhal o un, et ehvaig ehelen aien niji itai asega et ago aien: etpu lep ehvaig ehelen aien niji auritai inyi esjilid iran ji eigki, mika aki imyiali aijaua. 21Et idim imyiatidai ilpu atimi emesmas a Etmak, um imyiatamumoh ra; et um ucco et imyiatamumoh ra sji eigki a Inhal o un et merit vai ra aien. 22Et eti asuptecnaig nimtan im intah natimi a Etmak, ja is ati Inhal o un aien mika yi asuptecnaig nimtan imi ra asega aien, 23mika eri eccen vai Inhal o un natimi asega, et idivaig era eccen vai Etmak ara. Aien et eti eccen vai Inhal o un aien, et eti eccen aien vai Etman is abrai yin aien. 24Et idim inivaijec ineig ek asaig ehelemia ainyak mika, Aien et atahaijeg intas unyak aien, um asgeig iran is abrai nyak aien, et leh nitai umoh iran ineig aien inyi ti lep ti, inyi ti lep leh neru va nedo has o un aien; is aha vai inmas aien um leh nitai umoh iran. 25Et idim inivaijec ineig ek asaig ehelemia ainyak mika, Etpu yetpam naopan iyehki, et mun idim ham, eru wit atahaijeg nohrai Inhal o Atua a ilpu atimi emesmas: erupu umumoh ara era atahaijeg ara. 26Et idim amen nitai umoh iran ehele Etmak; et um ucco et alupai Inhal o un nitai umoh iran aien, mika yi amen ehelen; 27is lep ati yin aien mika yi asuptecnaig nimtan imi atimi aien, va nitai ineigki, nikavaig, et Hal o natimi aien. 28Jim imyiali nitai ineigki aijaua: va nitai ineigki, nikavaig, etpu yetpam naopan iyehki, eru wit atahaijeg nohran ara asega era amen irai ehpaiitai ara, 29um atidai; erupu anusjai a ilpu atimi upene, um leh nitai umoh iran; ja erupu anusjai a ilpu atimi auatatimi, um leh nimtan nedo has ura. 30Et ehka vai nyak intup ispuk agovaig tah nitai: ek idim atahaijeg ainyak, et um ucco ek lep asuptecnaig nimtan ainyak: et atoh intas asuptecnaig unyak; ek eti imyiaiji intas unyak ainyak, jai intas o Etmak is abrai nyak aien. 31El ek echim asuptecnaig nyak ainyak, el et eti inivaijec nasuptecnaig unyak.

32Et asuptecnaig nyak intak atimi; ek ato ainyak mika et inivaijec intas o un vai nyak. 33Akis abraig pan atimi ehele Joanes aijaua, is asuptecnaig intas inivaijec aien. 34Ja ek eti ika ainyak eri asuptecnaig nyak atimi: ja ek asaig nitai iji eigki ainyak, va uhpu imyiatamaig caua vaig. 35Is cop alahala aien, is lah um ememina: akis imyiacitak ipjidipjid aijaua vai inlah o un.

36Ja et eteuc nasuptecnaig nyak et esjilid irai Joanes: nauritai iji eigki is asaig ehelek a Etmak mika ki ago ehni ainyak, ek ago nauritai iji eigki ainyak par asuptecnaig nyak, mika is abrai nyak a Etmak. 37Is abrai nyak a Etmak, um lep asuptecnaig nyak. Akis eti atahaijeg nohran aijaua an tah naopan, um eti almoi nehcohos o un. 38Et eti amen anliinmopomia intas o un: eka eti eteuc an tas o un aijaua is abrai yin aien.

39Eka ahilek an tas eris aged aijaua; eka aktaktai aijaua mika aki leh iran nitai umoh iran ineig inyi ti lep ti: et idim asuptecnaig nyak intas ineigki. 40Ja eka esjum aijaua nahtag pam vaig ehelek, par leh nitai umoh iran. 41Ek eti leh nimyiahpas nyak o atimi ainyak. 42Ek idim ato caua ainyak, mika et eti aiyu inliinmopomia aijaua vai Atua. 43Ek ham ainyak an nidai Etmak, ja eka eti leh nyak aijaua: el et ham intak atimi an nidan ache, akupu leh yin aijaua. 44Et ehka vai caua nimyiisjis ninivaijec vaig, eka imyiahpas jipe caua aijaua, jam eti ahilek nimyiahpas ineig et ahes ehele Atua ineig et ethi ache aien. 45Jim ika aijaua ekpu ahiyi caua ehele Etmak ainyak: et idim ahiyi caua a Moses, aien aigki eka asgeig iran aijaua. 46Al ekis eteuc an tas o Moses aijaua, el eka lep eteuc an tas unyak aijaua: is aged intas vai nyak aien. 47El eka eti eteuc aijaua an tas ineig is aged aien, akupu eteuc an tas unyak aijaua um uauo?

বর্তমানে নির্বাচিত:

Joanes 5: ATY1863

হাইলাইট

কপি