Joanes 20

1AN nadiat uhup irai wiik is apan a Mere nupu Maktala u unmun nij an nuhihialeg, an naupataupat, um ecetai natipagkivaig inhat an mun nij. 2Is athut aien, um apan ehele Saimona Pitrus, im lep ehele natimi atahaijeg Iesu is ethi, aien is aiyu inliinmopon aien vai yin, um ika ehele rau, Eris atipagki Natimarid anliin mun nij ara, ja ecra eti ato aijama inuarin ineig eris ati yin iran. 3Is apan u unmun nij a Pitrus im lep natimi atahaijeg Iesu iyehki. 4Erus ehras athut arau: is um ahtaregdei Pitrus a natimi atahaijeg Iesu iyehki, is upyi uhup aien um yetpan u unmun nij. 5Is atpuse aien, um ecetai napelumai yilyil namenvaig; ja is eti apan iran aien. 6Is apitac yin a Saimona Pitrus, um apan anliin mun nij, um almoi napelumai yilyil namenvaig, 7im lep napelumai aso nidjinin iran, ja is eti amen u napelumai yilyil iji ehki, eris asvi um ati an taka uarin. 8Is lep apan iran a natimi atahaijeg Iesu iyehki, is upyi hup aien um yetpan u unmun nij, is wat ecetai aien, um imyiisjis ninivaijec. 9Eris eti ato ara an naopan iyehki intas eris upyi aged, um ika, Eris idim ika etpu lep nusjai aien vai inmas o un. 10Erus lep apan irai imnim urau ahwat atimi atahaijeg yin erahki.

11Ja is aiji a Mere u unmun nij, um taig: is wat taig aien, ja par atpuse, um easse anliin mun nij, 12um ecet nagelo is ero nateucvaig, is ahi napelumai ira rau, is ateucse is ethi u nidjinin, um lep is ethi u neduon, an nuarin iyehki eris ati nohui Iesu iran. 13Erus um ika ehelen arau, Ak intakata ineigki, na imyitaig inhe aiek? Is ika ehele rau aien, Eris atipagki Natimarid unyak, ja ek eti ato ainyak inuarin ineig eris ati yin iran. 14Is wat asan tas ineigki aien, is ahidai yin aien, um ecet Iesu naijivaig, ja is eti ato aien, nikavaig, Iesu iyehki. 15Is um ika ehelen a Iesu, Ak intakata ineigki, na imyitaig inhe aiek? na ahilek di aiek? Is aktaktai aien mika is atimi aminjinaig nekaro aien, um ika ehelen, Ak natimi alupas, el et imyiapan yin aiek, asuptecnaig ehelek inuarin ineig na ati yin iran aiek, ekpu atipagki yin ainyak. 16Is um ika ehelen a Iesu, Ak Mere. Is ahidai yin aien, um ika ehelen, Ak Rabonai; nesgan tas ineigki, Ak Natimi esege. 17Is um ika ehelen a Iesu, Jim atcei pam nyak aiek; ek pam eti fi aridjai ainyak ehele Etmak: jam apan aiek ehele ilpu etoak, um asaig ehele ra mika, ek aridjai ehele Etmak ainyak, im lep Etmamia; ehele Atua unyak, im lep Atua unyimia. 18Is apan a Mere nupu Maktala, um asuptecnaig ehele ilpu atimi atahaijeg yin, mika is ecet Natimarid aien, is lep asuptecnaig nitai iji eigki aien ehelen.

19An nadiat iyehki is wat jupura, nadiat uhup irai wiik, is ipjin intapanes an nuarin-neom iyehki eris asjapicnaig iran a ilpu atimi atahaijeg yin va nimtitai nupu Jutaia ura, is ehcohos pan a Iesu, um aiji an nuhup ura, um ika ehele ra, Etmu eteuc neigpa ehelemia. 20Is wat ucce intas o un, is ehvaig ehele ra aien nikman im lep nahaijin. Eris wat ecet Natimarid a ilpu atimi atahaijeg yin, eris imyiacitak ara. 21Is lep ika ehele ra a Iesu, Etmu eteuc neigpa ehelemia: is idim abraig pam nyak a Etmak, et um ucco ek abraig pan caua ainyak. 22Is asan tas ineigki aien, ja par ehledowa ra, um ika ehele ra, Akumu leh Nesgan Upene aijaua: 23uhpu iknipagki nedo has ura, eka iknipagki aijaua; ja eri eti iknipagki nedo has ura, eka eti iknipagki aijaua. 24Ja is wat ehcohos pan ehele ra a Iesu, is eti amen ehele ra a Tomas, tak idan Titimus, natimi is ethi ira atimi is twelv. 25Eris ika ehelen a ilpu atimi atahaijeg Iesu, Ecra mun ecet Natimarid aijama. Ja is ika ehele ra aien, El ek eti almoi nugnyan nel an nikman ainyak, um ati nupsikmak an nugnyan nel, um lep ati nikmak an nahaijin, inki ti imyiisjis ninivaijec ainyak.

26Is wat ti pan itac nadiat is eet, eris amen anliin neom a ilpu atimi atahaijeg yin, im lep Tomas: is ehcohos pan a Iesu, um aiji an nuhup ura, ja is ipjin intapanes, um ika, Etmu eteuc neigpa ehelemia. 27Is um ika ehele Tomas aien, Imyihio nupsikmam aiek, um almoi nikmak; um lep imyihio nikmam aiek, um ati an nahaijik: um jim imyiisjis nahcil aiek, jam imyiisjis ninivaijec. 28Is tas a Tomas, um ika ehelen, Ak Natimarid unyak, im lep Atua unyak. 29Is um ika ehelen a Iesu, Ak Tomas, na mun alum nyak aiek, um imyiisjis ninivaijec: era mun ahesmoij ara, era eti alum nyak ara, jam imyiisjis ninivaijec.

30Is idim ago niji auritai ehka is ahinag is eche a Iesu an nuhup o ilpu atimi atahaijeg yin, ja eris eti aged an nitasvitai ineigki: 31ja eris aged nitai iji eigki, mika aki imyiisjis ninivaijec aijaua, um ika et Kristo a Iesu, et lep Hal o Atua aien; um lep mika aki leh nitai umoh iran an nidan, an nimyiisjis ninivaijec vaig unyimia.

বর্তমানে নির্বাচিত:

Joanes 20: ATY1863

হাইলাইট

কপি