WƖAA DƖ-SUOMUŊ 7
7
1Ŋɩɩ nɛ La TƖƖNA bʋla pɩ Nowa, “Ŋ dɩ ŋ dɩa nɩaa kala jʋʋ lɩɩŋ daboro-la, bɛɛ wɩaa ma lɛɛlɛ nɩaa kala tʋɔŋ ŋ dʋndʋŋa nɛ mɩ na dɩ ŋ ŋaa tʋɔpʋl tɩɩna. 2To kɛŋ pʋsʋ-la ma sɩ bɩ kɩsɛ belliŋ arɩ nɩɩnɩŋ balɩpɛ balɩpɛ aŋ kɛŋ pʋsʋ-la ma sɩɩ kɩsɛ balɩa-balɩa dɩ ba doho sɩ́ dɛrʋ 3aŋ bɩra kɛŋ fillee arɩ zaaraa, belliŋ arɩ nɩɩnɩŋ balɩpɛ balɩpɛ dɩ ba doho sɩ́ dɛrʋ. 4A lɩɩ jɩnɩŋ kaa mʋ tapʋlaa balɩpɛ chɛɛŋ, mɩ jaŋ leŋ dɩ duonuŋ nɩɩ tapʋlɩɩ na-kala wɩɩhɛyɛ arɩ tɩtaŋɩŋ tapʋlaa mahɩŋ balɩa a kpʋ kʋŋ na-kala mɩ sɩ ŋaa ʋ kɛŋ mɩɩsɩŋ dʋnɩa lɛ.”
5Ŋɩɩ nɛ Nowa ŋaa wɩalɩŋ kala Wɩa sɩ sɩ ʋ ŋaa.
6Nowa fa ŋaa jɩsɩŋ zɔɔ-balɩdʋ nɛ, ka Wɩa leŋ lɩɩŋ kʋ dii dʋnɩa. 7Ŋɩɩ nɛ Nowa arɩ ʋ haala arɩ ʋ hambolibiisiŋ arɩ ʋ bii-haalaa kala jʋʋ lɩɩŋ daboro-la dɩ lɩɩ-la sɩ́ ba kpʋ. 8Pʋsʋŋ arɩ bagɩlaa, kɩalɩŋ ba sɩɩ kɩsʋ arɩ kɩalɩŋ ba sɩ bɩ kɩsɛ, fillee arɩ zaaraa arɩ tinteeŋ tuuroo kala jʋʋ lɩɩŋ daboro-la. 9Ŋɩɩ nɛ kʋŋ na-kala doho, bele arɩ nɩɩŋ to Nowa harɩŋ a jʋʋ lɩɩŋ daboro-la arɩ ŋɩɩ Wɩa sɩ bʋla pɩ Nowa. 10Tapʋlaa balɩpɛ harɩŋ, lɩɩŋ kʋ su dʋnɩa.
11Nowa sɩ ŋaa jɩsɩŋ zɔɔ-balɩdʋ, chɛŋ-lɩamɩŋ tapʋl-fii arɩ balɩpɛ chɛɛŋ, wɩa-nyuŋ suri, lɩɩŋ chuchuuri aŋ pɛ bulo lɩlɩɩ tinteeŋ. 12Ŋɩɩ nɛ duonuŋ nɩɩ ŋɩɩ halɩɩ tapʋlaa mahɩŋ balɩa, wɩɩhɛyɛ arɩ tɩtaŋɩŋ kala.
13Tapʋlɩɩ-la tɩtɩa, Nowa arɩ ʋ biiriŋ Sɛm, Ham arɩ Jafɛf arɩ ʋ haala arɩ ʋ bii-haalaa batori kala jʋʋ lɩɩŋ daboro-la. 14Ba to kɛŋ bagɩlaa arɩ pʋŋ-doho na-kala arɩ tinteeŋ tuuroo arɩ fillee arɩ zaaraa kala. 15Ŋɩɩ nɛ kʋŋ na-kala doho sɩ kɛŋ mɩɩsɩŋ, ba balɩa balɩa to Nowa harɩŋ a jʋʋ lɩɩŋ daboro-la. 16Pʋsʋ-la kala sɩ to jʋʋ lɩɩŋ daboro-la ŋaa belliŋ arɩ nɩɩnɩŋ nɛ, arɩ ŋɩɩ Wɩa sɩ bʋla pɩ Nowa. Ŋɩɩ nɛ La TƖƖNA kɛŋ lɩɩŋ daboro-la boiŋ tɔ.
17Lɩɩŋ tɔ dʋnɩa halɩɩ tapʋlaa mahɩŋ balɩa, lɩɩŋ daboro-la jɩla daŋ lɩɩŋ nyuŋ. 18Lɩɩ-la pʋŋa pɛ a tɔ tinteeŋ kala. Ka lɩɩŋ daboro-la didelli lɩɩŋ nyuŋ. 19Lɩɩ-la sɩ tɔ tinteeŋ lɛ ŋɩɩ, ʋ tɔ peelee arɩ kʋŋkala sɩ hɛ tinteeŋ lɛ nɛ. 20Lɩɩ-la sɩ su tinteeŋ ŋɩɩ a tɔ peelee nyuŋ, ʋ ha kieli peele-la nyuŋ a yi naakieliŋ bʋlɩpɛ nɛ. 21Kʋŋ na-kala sɩ kɛŋ mɩɩsɩŋ a hɛ dʋnɩa lɛ sʋʋ: Bagɩlaa, pʋsʋŋ, diibiisiŋ arɩ fillee arɩ nuhuobiine kala. 22Kʋŋ na-kala sɩ hɛ tinteeŋ a kɛŋ mɩɩsɩŋ a wiwiesi kala sʋʋ. 23Lɩɩŋ kpʋ nuhuobiinee, bagɩlaa, pʋsʋŋ, arɩ tinteeŋ tuuroo arɩ fillee kala, see Nowa, ʋ dɩa nɩaa arɩ kɩalɩŋ kala fa sɩ jʋʋ lɩɩŋ daboro-la dʋndʋŋa nɛ fa ka.
24Lɩɩ-la fa tɔ tinteeŋ a yi tapʋlaa zɔlɔ arɩ mahɩŋ balɩa arɩ fii nɛ.
বর্তমানে নির্বাচিত:
WƖAA DƖ-SUOMUŊ 7: SIS
হাইলাইট
শেয়ার
কপি
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
