ỌMWỤ ỌDADA 6
6
Egbeju Ọnyọọngịrị nya Ọngịnyị Ehe lụmẹ
1Lụka nya oyi nya iNuwa, ká angịnyị ehe juwa pyẹ lụmẹ-lụmẹ odehe ọlẹ, ị ma anyị anyang ju iru lụmẹ-lụmẹ ịnyịnyị. 2Ụka ọọwa ká anyị nya Ohe Oluhye yẹ jaabwọ ká anjwo ịyẹẹnọ ịwẹ há ụhị lụmẹ lẹ, ị juwa ye ịyẹẹnọ ịịwa nya ịhụ nyaa jaabwọ kọ háa kaka ba lẹlẹ. 3Ụka ọọwa, Amkpaa yẹkẹẹ, “Ọwa nyị́ ka dọmwụ ka ya iwe da ha olegu nyọwa Ohe Oluhye, nyị-ị juwa ẹ-ẹpwụ nya ọngịnyị ehe tata juwa maga jwoo timajẹ kaka. Lẹ, ehe oriri nya ọngịnyị ehe, nyị́ ka kpoye nya ẹka ohu ookpokpo da iwo imiiye kpong-kpong kaka.” 4Lụka ọọwa ọlẹ ká anyị nya Ohe Oluhye juwa ye anyị anyang nya angịnyị ehe, ị ma anyị ịlẹ kị wụrụ ala iNefilim. Ụka kọ nụwa ịnyịnyịịnyị, ala iNefilim ịwẹ yẹ ri angịlẹ kị la gogo lụmẹ gbee kị ru ohi ju ka ẹga myị ẹga wuu.
5Ụka ọọwa, Amkpaa yẹ jaabwọ ká angịnyị ehe la egbeju ọnyọọngịrị lụmẹ kaka kpoye. Irya omẹme ọlẹpwụ nya ọngịnyị ehe ụka ọọwa wuu, myị la ang onyobyi kem. 6Ụka ká Ohe Oluhye yẹ ang onyobyi ọhọhọ nya ọngịnyị ehe ịịwa chịng, ọ yẹkẹẹ, “Ó-ri kam dọmwụ họ ọngịnyị ehe ọhẹ-lọhẹ odehe ọlẹ ka, ịnọ ọ ka hám gụ ọlẹ lẹ. Chajị abwẹla onyobyi ọhọhọ nyaa tọm olujwo lụmẹ lẹ.” 7Ọọwa lẹ, Amkpaa-à yẹkẹẹ, “M̀ dọmwụ ka ta angịnyị ehe wuu ayịreji tụ iyo bala ịchịnụ wuu lẹ. Chajị Am Ohe Oluhye ayịdang, jam chị ijẹma u-uhye nya ang myị ang ọlẹ wuu kam họhọ lẹẹlẹẹ lẹ.” 8Ma, Amkpaa tị la ẹhị okpunyi ẹ-ẹga nya ọlẹng ọlẹ kị wụrụ iNuwa.
9Ọlẹ ri oja nya iNuwa bala alugbiyegu nyamwụ. INuwa ụbwọọmwụ a ri ọngịnyị ọnyịịla ọlẹ kọọ la abyị ka ẹ-ẹpwụ nya alụka nyamwụ ịkịla wuu lẹlẹ. Ọ jẹdịyẹ ẹ-ẹpwụ nya ihi ojuju nya Ohe Oluhye 10INuwa ma anyị alẹng angị ịta. Ị wụrụ ẹnyị nyaa ịChẹm bala Ham bala ịJafẹtị.
Ụgbọ nya Enyi Ọlẹ Ká INuwa Kọ
11Ụka ọọwa, abwẹla onyobyi ọhọhọ nya alodehe wuu chị Ohe Oluhye aga. Chajị ịwa wuu juwa la egbeju-ọngịrị kịlahị-ịlahị ẹ-ẹpwụ nya ang onyobyi ọhọhọ, juwa họ awụlẹ agbụrụ ju ka ẹga myị ẹga wuu. 12Ịnyị lẹ, Ohe Oluhye a yẹ jaabwọ ká odehe ọlẹ myị la ang onyobyi lụmẹ lẹlẹ. Chajị ang onyobyi ọhọhọ kem, alodehe ọlẹ wuu a juwa họ ụka ọọwa lẹlẹ. 13Ọọwa lẹ, Ohe Oluhye a byi iNuwa yẹkẹẹ, “INuwa, yẹ mẹ! M̀ jam ka ta angịnyị ehe wuu ayịreji hi odehe ọlẹ gbanggbang lẹ! Chajị agbụrụ ọ-họ awụlẹ họ kem, a ri ụkụrwọ nya alodehe ọlẹ wuu lẹlẹ. Lẹ, Am jam ka taa ayịreji bala ang myị ang ịkịla ilodehe ọlẹ wuu lẹ.” 14Amkpaa myịmyị byi iNuwa yẹkẹẹ, “INuwa, kele ka chị okoji nya igofa ká ya kọ akpa ọtụka-ọtụka ọlẹ kọ ka lala ụgbọ nya enyi mẹ. Aa chọọ apwụ lala apwụ nya ube ká kpụ̀ ọmọnyọ-ọmọnyọ nya ikorota kụrwọọ ẹ-ẹpwụ bala odehe nyamwụ wuu. 15INuwa, lẹ, aa họ ká udiyo ọlala nya ụgbọ nya enyi ọọwa, a lala apatẹ ohu ine da iwo ịrụ (450). Ká họ ká ẹpwụ ojuju nyamwụ a ri apatẹ iwo irwiye kụrụ ịrụ (75). Ká họ ká uhye ọlala nyamwụ a ri apatẹ iwo ine kụrụ ịrụ (45) ịnyịnyị mẹ. 16Á họ lẹ, aa nwụ ịnawụ kụrụ ụgbọ nya enyi ọwẹ ẹ-ẹpwayịrẹtẹ nyamwụ mẹ. Ká hi ẹga dụwa ẹ-ẹpwarịrị nya ụgbọnụ nya ugulọ bala ịnawụ kọ lala ẹpẹtẹ ookpokpo ba ẹhya mẹ. Aa chọọ apwụ ịta rịrị awụlẹ kele ka uhye-ọgba lala ube oluhye-ọgba ọ-chị apwụ ịta mẹ. Ká chị ọnang ịkịka nya ụgbọ ọọwa ịnyịnyị mẹ. 17Chajị am Ohe Oluhye juwa ka do ukpenyi ọtụka-ọtụka kaka ta angịnyị ehe wuu ayịreji bala ang myị ang ọlẹ wuu kọ la ọhịhị odehe ọlẹ lẹ. 18Ma, am Ohe Oluhye jam myị ọnụ hang bala alẹpwa nyang wuu, ahụ ayịdang bala ahụ nyang, anyị alẹng nyang wuu bala ịhụ nyaa wuu, kaanụ wuu ka rụ ju ka ẹpwụ nya ụgbọ nya enyi ọwẹ, kam byinu ya, ahụ nyị kọ mẹ. 19Aa wu anyị-iyo myị anyị-iyo wuu, ọnyang bala ọlẹng, nya ẹchẹ nya ụma ọnyị myị ọnyị nyaa wuu jịra ju kele lahị-lahị ba ịlọnụ mẹ. 20INuwa, aa wo myịmyị mẹ, aa wu ụma nya ịchịnụ myị ịchịnụ ọnyang bala ọlẹng wuu, ụma nya iyo myị iyo ọlụtụbwọ, tụ iyo ọlụchụ ọnyang bala ọlẹng nyaa wuu bala ụma nya iyo myị iyo ịlẹ wuu kị kaa kpa apwụ gbileji, ọnyang bala ọlẹng nyaa wuu ju kele ka ẹpwụ nya ụgbọ nya enyi ọwẹ ịnyịnyị mẹ. Chajị kị ka juwa ụ-ụwa tanụ, juwa ma anyị kele kịlahị-ịlahị ịnyịnyịịnyị mẹ. 21Á họ lẹ, a go ụma nya ang oriri, ọnyị myị ọnyị wuu ju ka ẹpwụ nya ụgbọ nya enyi ọwẹ kaanụ bala anyị-iyo ịwẹ wuu ka juwa kpa ri ịnyịnyị mẹ.” 22Ọọwa lẹ, iNuwa a họ ala ịwẹ wuu jaabwọ ká Ohe Oluhye byoo ya, nyị họ jịra lẹlẹ.
বর্তমানে নির্বাচিত:
ỌMWỤ ỌDADA 6: IBNO
হাইলাইট
শেয়ার
কপি
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
