Mathiơ 12

Ngă Bruă Lăm Hơrơi Sa'bat

(Mak 2:23-28; Luka 6:1-5)

1Tŭ nư̆n, iơŭ lăm hơrơi sa'bat, Yàng Jêsu nau găn 'blàng hơma bơdai, du mơnih tui-mơgru Pô lơpa tŭng, nư̆n buơl guñu rơhòt du ơmùng bơdai bloh 'bơ̆ng. 2Du mơnih Pharisi 'buh yơu nư̆n, đờm sơ̆ng Pô: “C̆ơ dih, du mơnih tui-mơgru Pô-Pơto ngă pơnuaĭ 'buh hũ gơnuăr ngă lăm hơrơi sa'bat.”

3Bloh Pô đờm sơ̆ng buơl guñu: “Buơl guhã ka pơrpoh-c̆ơ mư̆ng bruă pơtau Đabit hũ ngă, tŭ pơtau găm sơ̆ng du mơnih nau tui pơtau lơpa tŭng ơu? 4Pơtau tơma lăm sàng Yàng Pô Lơngì, 'bơ̆ng pah sơc̆ih-sri ràng tơ ngŏ sơbàn duh-dơlbăt, la pah bloh pơtau sơ̆ng du mơnih nau tui 'buh hũ gơnuăr 'bơ̆ng, mĭn pioh krơi tơ du mơnih gơnuăr pơyă phơ̆n duh-dơlbăt soh. 5Halài buơl guhã ka pơrpoh-c̆ơ lăm bơ-àr pơnuaĭ adăt-adia lài, lăm hơrơi sa'bat, du mơnih gơnuăr pơyă phơ̆n duh-dơlbăt duh bruă lăm sàng duh-dơlbăt, nư̆n 'buh ngă sŭng adăt hơrơi sa'bat sơ̆ng kŭng 'buh kŏng kơđòng glài-sơnoh ơu? 6Bloh Kơu đờm tơ buơl guhã thơu, tơ anih ni, hũ sa Pô prŏng-màng rơlau tơ sàng duh-dơlbăt wơ̆. 7Yah buơl guhã wờng jiơ̆ng kơtha-pơnuaĭ jơlàn ni: ‘Kơu khiăng hơtai-hơtiàn anĭt-rơnăm, bloh 'buh iơŭ phơ̆n sì c̆ĕ-pơyơ̆r duh-dơlbăt,’ nư̆n buơl guhã rơŭ 'buh ngă nìn-glài tơgrơ̆ mơnih 'buh hũ glài. 8Kơyoa Anà Mơnih la Yàng hơrơi sa'bat.”

Yàng Jêsu Pơsồ-Pơsaih Tơ Mơnih Srĕt-Mơtai Tơngàn

(Mak 3:1-6; Luka 6:6-11)

9Yàng Jêsu nau klàh mư̆ng anih nư̆n, sơ̆ng tơma lăm sàng pơtòm. 10Tơ anih nư̆n, hũ sa aràng mơnih srĕt-mơtai sa gah plà tơngàn. Buơl guñu tơnia Pô lài: “Lăm hơrơi sa'bat hũ gơnuăr pơsồ-pơsaih lơ-ơ̆n lơngoh rơwă-sơkì ơu?” Buơl guñu tơnia yơu nư̆n la tô duah pơnuaĭ yă Pô. 11Pô đờm sơ̆ng buơl guñu: “Aràng sơi lăm buơl guhã hũ sa drơi abo, yah lăm hơrơi sa'bat, kơđòng lĕ lăm sơlŭng, nư̆n 'buh kơtŭng ñu đì ơu? 12Đờm hơgĕ anà mơnih la c̆ơk-màng rơlau tơ abo thơu hơdùm! Yơu nư̆n, lăm hơrơi sa'bat hũ gơnuăr ngă bruă siàm.” 13Bloh nư̆n Pô đờm sơ̆ng mơnih srĕt-mơtai tơngàn: “Yơ̆r bĕ tơngàn hã tơbiă!” Mơnih nư̆n yơ̆r tơngàn tơbiă, nư̆n tơngàn hũ pơsồ-pơsaih, jiơ̆ng bơhiàn siàm yơu tơngàn dih. 14Du mơnih Pharisi tơbiă nau, tămbơyai sơ̆ng gơŭ, tô duah pơnuaĭ pơmơtai Yàng Jêsu.

15Bloh Yàng Jêsu thơu pơnuaĭ nư̆n, Pô pleh klàh mư̆ng anih nư̆n. Hũ lô mơnih nau tui Pô, sơ̆ng Pô pơsồ-pơsaih tơ abih tơgrơ̆ mơnih lơ-ơ̆n lơngoh rơwă-sơkì. 16Pô pơkơŭ buơl guñu juơi brơi aràng sơi thơu mư̆ng Pô. 17Pơnuaĭ ni ngă iơŭ tơpă pơnuaĭ mơnih gơnuăr-hwơ̆r Êsai hũ đờm lài:

18“Ni la mơnih hơlŭn-hơlă Kơu hũ rơwah,

Mơnih bloh Kơu uơ̆n-rơnăm, siàm hơtai Kơu lăm abih tơgrơ̆ mơta.

Kơu rơŭ brơi Bơngă Sơc̆ih-Sri Kơu dò tơ ngŏ Ñu,

Ñu rơŭ pơto-akhàn pơnuaĭ-tơpă tơ buơl làng agàh.

19Ñu rơŭ 'buh tăm-mơsau, 'buh kơmrào driau,

'Buh aràng sơi mơhư̆ săp Ñu tơ agàh jơlàn rơya.

20Ñu rơŭ 'buh joh gai pơrbo kơjĕ joh,

'Buh pơmơtai apui-đèng kơjĕ luĭ,

Tơ̆l truh tŭ Ñu ba pơnuaĭ rĭng-tơpă truh pha-jai rơlau.

21Sơ̆ng tơgrơ̆ buơl làng agàh rơŭ c̆àng-gơnừm tơ angăn Ñu.” #12:21 Êsai 42:1-4.

Yàng Jêsu Sơ̆ng Kơmlài Beelsebul

(Mak 3:20-30; Luka 11:14-23)

22Tŭ nư̆n, aràng ba truh tơ Yàng Jêsu sa aràng mơnih kơđòng kơmlài ngă; kơmlài ngă tơ mơnih nư̆n jiơ̆ng bồm sơ̆ng kơmlo. Pô pơsồ-pơsaih tơ mơnih nư̆n, ngă tơ mơnih nư̆n đờm jiơ̆ng sơ̆ng 'buh jiơ̆ng. 23Abih buơl làng mă ngă c̆rih-takơtuă biă, sơ̆ng đờm: “Mơnih ni 'buh iơŭ la anà-tơc̆o pơtau Đabit ơu?” 24Bloh tŭ mơhư̆ yơu nư̆n, du mơnih Pharisi đờm lài: “Mơnih ni 'buh tŭ lơi pơtrơh kơmlài jiơ̆ng yah 'buh gơnừm tơ Beelsebul la pơtau kơmlài.” 25Yàng Jêsu thơu pơnuaĭ lăm hơtai-akŏ buơl guñu sơnư̆ng, nư̆n đờm: “Sa lơgăr bloh pơc̆ơrlah krơi duă gơŭ drơi wơ̆, nư̆n rơŭ kơđòng pơluĭ-pơlơhiă. Sa plơi-prŏng halài sa boh sàng bloh pơc̆ơrlah krơi duă gơŭ drơi wơ̆, nư̆n rơŭ 'buh dò dơ̆ng kơjăp jiơ̆ng. 26Yah kơmlài Satăn pơtrơh kơmlài Satăn, nư̆n la rùp-phŭn ñu pơc̆ơrlah krơi sơ̆ng rùp-phŭn drơi wơ̆; ngă hơyơu lơgăr ñu dò dơ̆ng kơjăp jiơ̆ng? 27Yah Kơu gơnừm tơ Beelsebul tô pơtrơh kơmlài, nư̆n anà buơl guhã gơnừm tơ aràng sơi tô pơtrơh kơmlài? Kơyoa nư̆n, rùp-phŭn buơl guñu rơŭ la mơnih c̆ahrơña buơl guhã. 28Bloh yah Kơu gơnừm tơ Bơngă Sơc̆ih-Sri Yàng Pô Lơngì tô pơtrơh kơmlài, nư̆n lơgăr Yàng Pô Lơngì hũ truh sơ̆ng buơl guhã bơjơ.

29Halài, ngă hơyơu aràng hũ rơgơi tơma lăm sàng sa aràng mơnih khăng-pràn tô tămblah-mă phơ̆n-bơna ñu jiơ̆ng, yah dơlhơu biă 'buh mă c̆aŭ mơnih pràn-khăng nư̆n wơ̆? Păl c̆aŭ mơnih nư̆n dơlhơu, bloh nư̆n ka tămblah-mă phơ̆n-bơna lăm sàng ñu jiơ̆ng. 30Aràng sơi 'buh dò sơ̆ng Kơu, nư̆n tămdră-wơ̆ sơ̆ng Kơu; aràng sơi 'buh pơgùm-pơtòm sơ̆ng Kơu, nư̆n kơprah-kơprĭng. 31Kơyoa nư̆n, Kơu đờm tơ buơl guhã thơu: Tơgrơ̆ pơnuaĭ glài-sơnoh găm sơ̆ng pơnuaĭ đờm sơk-sơrbĭl khĭn-dơmĭn, kŭng rơŭ hũ anĭt toh-luơi tơ jơi anà mơnih, bloh pơnuaĭ đờm sơk-sơrbĭl khĭn-dơmĭn truh Bơngă Sơc̆ih-Sri, nư̆n rơŭ 'buh hũ anĭt toh-luơi ơu. 32Aràng sơi đờm tămdră-wơ̆ sơ̆ng Anà Mơnih, nư̆n rơŭ hũ anĭt toh-luơi; bloh aràng sơi đờm tămdră-wơ̆ sơ̆ng Yàng Bơngă Sơc̆ih-sri, nư̆n yah rài ni halài rài hơdơi kŭng rơŭ 'buh hũ anĭt toh-luơi.”

Kơyơu Sơ̆ng Boh

33“Yah la kơyơu siàm, nư̆n boh kŭng siàm, yah la kơyơu jơhà, nư̆n boh kŭng jơhà; kơyoa c̆ơ boh nư̆n thơu kơyơu. 34Ơ jơi-pơtiàn ala mơsak-jơhà dih! Ngă hơyơu buơl guhã hũ rơgơi đờm tơbiă jiơ̆ng pơnuaĭ siàm lăm tŭ hơtai-hơtiàn buơl guhã jơhà? Kơyoa hũ baŭ-bèng lăm hơtai-hơtiàn nư̆n ka bơbah đờm tơbiă. 35Mơnih siàm, kơyoa tơrgùm-pioh pơnuaĭ siàm lăm hơtai-hơtiàn bloh pơtơbiă pơnuaĭ siàm; mơnih jơhà, kơyoa tơrgùm-pioh pơnuaĭ mơsak-jơhà lăm hơtai-hơtiàn bloh pơtơbiă pơnuaĭ mơsak-jơhà. 36Bloh Kơu đờm tơ buơl kơi thơu, truh hơrơi c̆ahrơña, aràng rơŭ păl akhàn-tơbiă abih tơgrơ̆ pơnuaĭ 'buh kwơ-màng bloh drơi hũ đờm tơbiă. 37Kơyoa pơnuaĭ đờm bloh hã rơŭ hũ angăn la rĭng-tơpă; kŭng kơyoa pơnuaĭ đờm bloh hã rơŭ kŏng ngă nìn-glài.”

Nàl-C̆rih Mơnih Gơnuăr-Hwơ̆r Jôna

(Mak 8:11,12; Luka 11:29-32)

38Tŭ nư̆n hũ du mơnih gơnuăr-pơto pơnuaĭ adăt-adia sơ̆ng du mơnih Pharisi đờm sơ̆ng Yàng Jêsu lài: “Ơ Pô-Pơto, buơl dơlhă khiăng c̆ơ Pô-Pơto ngă sa nàl-c̆rih.” 39Yàng Jêsu đờm: “Jơi-pơtiàn mơsak-jơhà sơ̆ng klĕ sơdiŭ-aràng pơsàng-gơŭ ni yòng sa nàl-c̆rih, bloh rơŭ 'buh đồ-mă hũ sa nàl-c̆rih lơi pơkơ̆n, rơlau tơ nàl-c̆rih mơnih gơnuăr-hwơ̆r Jôna. 40Kơyoa yơu Jôna hũ dò lăm tŭng akàn prŏng klơu hơrơi klơu mơlăm, nư̆n Anà Mơnih kŭng rơŭ dò lăm dơrlăm lơ̆n klơu hơrơi klơu mơlăm yơu nư̆n rơi. 41Lăm hơrơi c̆ahrơña, buơl làng Ninibe rơŭ tơgồ dơ̆ng găm sơ̆ng jơi-pơtiàn ni bloh ngă nìn-glài buơl guñu, kơyoa buơl làng nư̆n hũ păng pơnuaĭ Jôna pơto-akhàn sơ̆ng mơbai prah-luơi glài-sơnoh, bloh tơ anih ni, hũ sa Pô prŏng-màng rơlau tơ Jôna! 42Lăm hơrơi c̆ahrơña, mơnih pơtau-kơmơi gah yù rơŭ tơgồ dơ̆ng găm sơ̆ng jơi-pơtiàn ni bloh ngă nìn-glài buơl guñu; kơyoa ñu hũ mư̆ng anih luĭ-dŭt boh tơnah truh păng pơnuaĭ jak-khờh pơtau Salômôn; bloh tơ anih ni, hũ Pô prŏng-màng rơlau Salômôn!

43Tŭ kơmlài sơŭ-sơnoh tơbiă klàh mư̆ng sa aràng mơnih, ñu nau găn du anih thu-thàng tô duah anih dò pơgleh, bloh duah 'buh hũ. 44Bloh nư̆n ñu đờm: ‘Kơu rơŭ gài mơrai wơ̆ tơ sàng bloh kơu pơrpa tơbiă nau.’ Tŭ mơrai wơ̆ truh anih, ñu 'buh sàng nư̆n dò soh, hũ bah uă goh, sơ̆ng pơsăng rơdaŭ siàm. 45Nư̆n ñu nau mư, ba mơrai tơjuh kơmlài pơkơ̆n mơsak-jơhà rơlau tơ ñu wơ̆, tơma dò lăm sàng nư̆n. Yơu nư̆n, rài hơdiŭ mơnih nư̆n hơdơi ni dò jơhà rơlau tơ dơlhơu wơ̆. Jơi-pơtiàn mơsak-jơhà ni kŭng rơŭ yơu nư̆n rơi.”

Ame Sơ̆ng Adơi-Ai Yàng Jêsu

(Mak 3:31-35; Luka 8:19-31)

46Tŭ Yàng Jêsu dò đờm sơ̆ng buơl làng, nư̆n ame sơ̆ng adơi-ai Pô truh, dò dơ̆ng tơ agàh, khiăng đờm glai sơ̆ng Pô. 47Hũ mơnih đờm sơ̆ng Pô lài: “Ơ Pô-Pơto, hũ ame sơ̆ng adơi-ai Pô dò dơ̆ng tơ agàh, khiăng đờm glai sơ̆ng Pô-Pơto.” 48Pô đờm: “Aràng sơi la ame Kơu, aràng sơi la adơi-ai Kơu?” 49Bloh nư̆n Pô yơ̆r tơngàn sơc̆ê tơ du mơnih tui-mơgru Pô sơ̆ng đờm: “Ni la ame Kơu sơ̆ng adơi-ai Kơu! 50Kơyoa yah aràng sơi ngă tui hơtai-khiăng Ama Kơu dò tơ ngŏ lơngì, mơnih nư̆n la adơi-ai, gơŭ kơmơi, sơ̆ng la ame Kơu.”

বর্তমানে নির্বাচিত:

Mathiơ 12: CNT15

হাইলাইট

কপি