Luk̆a 13

Ğormotişa Goiktit

1Hem orapes, mitxanepe moxtes do Yesos ambai komuğes. Pilatek bazi Galilurepe na oğurinu do diʒxirepe mutepeşi, mutepek na nok̆vates tisyapeşi diʒxiris na ek̆unt̆alu dumeseles. 2Yesok hentepes haşo uʒ̆u: “Haşote na nʒ̆orums Galilurepe, majura mteli Galilurepeşen k̆rimoni ren-ya dogaʒ̆onenani? 3Tkva, var-ma giʒ̆umert. Mara Ğormotişa var goiktatna mteli-xolo heşo yeç̆k̆odaten. 4Siloamis na rt̆u k̆ule moiktuşk̆ule na ğures vit̆ovro k̆oçi, Yeruşalimis na skidun majura k̆oçepeşen k̆rimoni ren dogaʒ̆onenani? 5Tkva, var-ma giʒ̆umert. Mara Ğormotişa var goiktatna, mteli haşo yeç̆k̆odaten.”

Na Var İçanen Nca

6Yesok ham memgapura dup̆aramitu: “Ar k̆oçis baği muşis ar luği udgit̆u. K̆oçi mextu do ncas xila goru, mara var az̆iru. 7Mabağes, ‘Oʒ̆k̆edi, ma sum ʒ̆anaşen doni mobulur do ham ncas luği bgorum, var maz̆iren. Hea ek̆vati! Let̆as mʒudişi mot gedgit̆as’-ya. 8Mabağek, ‘Mance çkimi’-ya, ‘Nca ar ʒ̆ana xolo naşkvi, ma hemus gobuntxora do lazma gobubğa. 9Ʒ̆anaşe luği komeçasna k̆ai, var meçasna, ek̆vatare’-ya.”

Yesok Sap̆at̆oni Ndğas Ar Oxorca Ok̆aams

10Yesok Sap̆at̆oni Ndğas ar sinagogis doguramt̆u. 11Vit̆ovro ʒ̆anaşen doni pinti şuri na meşuxen ar oxorcati hek rt̆u. Ok̆odrak̆eri kort̆u do şka çkar var oxank̆anet̆u. 12Yesok hea z̆iruşi koducoxu. “Oxorca”-ya, “Zabunoba skanişen moçiti.” 13Yesok xepe muşi oxorcas kogedu. Oxorcak hem oras diisanu do Ğormotişi omʒkus kogyoç̆k̆u. 14Yesok, Sap̆at̆oni Ndğas zabuni na ok̆auşeni, sinagogişi tigemçanus guri komuxtu do hek na ok̆obğut̆espes “Dulya oxenuşeni aşi ndğa koren”-ya, “Hem ndğalepes moxtit do ik̆ait, Sap̆at̆oni Ndğas var!”-ya.

15Mancek hemus haşo uʒ̆u: “Ç̆e jurp̆iconepe! K̆at̆a-irik Sap̆at̆oni Ndğas xoci varna guruni tkvani otialeşen moʒ̆k̆umt do ʒ̆k̆arişa var ionamti? 16Ham ndğeni, vit̆ovro ʒ̆anaşen doni Şeit̆anis na nuk̆orut̆u Avraamişi osuri na ren ham oxorcati Sap̆at̆oni Ndğas bork̆ili muşişen muçitu var uk̆oremsi?” 17Yesok haşo tkuşk̆ule, hemus na goludgirt̆espes oncğore aves. Xalk̆ikti hemuk na vu mteli k̆aobaşeni ixelt̆es.

Xardalişi Tasi do P̆rozimi

18Yesok hentepes haşo uʒ̆u: “Ğormotişi Mapoba mus nugams, hea mus mebungapa? 19Ğormotişi Mapoba, ar k̆oçik ont̆ule muşis na xaçku xardalişi tasis nugams. Tasi domzgudun do nca diven, k̆inçepek hemuşi t̆ot̆epes gelaxedunan.”

20Yesok xolo, “Ğormotişi Mapoba mus mebungapa?”-ya. 21“Hea, ar oxorcaşi sum sumyari mkveris na uk̆atams p̆rozimis nugams. Uk̆açxe zimari konaven.”

Mʒ̆ule Nek̆na

22Yeso, Yeruşalimi k̆ele nulurt̆uşk̆ule noğa do oput̆epes doguramt̆u. 23Ar mitxanik hemus, “Mance çkimi, na moçitanenpe mʒika rt̆aneni?”-ya do k̆itxu.

Yesok hentepes haşo uʒ̆u: 24“Mʒ̆ule nek̆naşa amaxtimuşeni inç̆işit. Tkva giʒ̆umert, dido mitxanepes amaxtima unt̆asen, mara var amalasen. 25Oxormance eisela do nek̆na molazdaşk̆ule, gale na doskiditpek ‘Mance çkuni, nek̆na gominʒ̆k̆it!’-ya do nek̆na nuk̆ank̆aten. Hemukti tkva ‘Tkva mi ret, sole moxtit va miçkin’-ya giʒ̆vanoren; 26Hem oras, ‘Çku, skani ʒ̆oxle p̆ç̆k̆omit do pşvit. Siti cadaxepe çkunis doguramt̆i’-ya uʒ̆vaten. 27Hemukti tkva, ‘Mi ret, sole moxtit va miçkin, çkimden mendra dodgitit e p̆at̆oba na ikomanpe!’-ya giʒ̆vanen.

28Avraami, İsaak̆i, Yak̆ovi do majura mteli ambayocepe Ğormotişi Mapobas na ivanen, mara tkva hamuşi gale na gamit̆k̆oçit z̆iratşk̆ule, ibgaraten do k̆ibiri ğriç̆olaten. 29K̆oçepe yulvaşen, gyulvaşen, oinetişen do omjoratişen moxtanen do Ğormotişi Mapobas magidas doxedanoren. 30E do, haʒ̆i na ek̆askidespe iptineri ivanen do haʒ̆i iptineri na renanpeti ek̆askidanen.”

E Yeruşalimi!

31Hem oras teni Farisurepek Yesos, “Gamaxti do hakole igzali, çkva sotxaşa mendaxti. İrodis skani oğurinu guris uğun”-ya uʒ̆ves.

32Yesok hentepes, “İdit do hem mk̆yapus duʒ̆vit, ‘Handğa do oç̆ume ç̆ink̆a gamobionam, zabunepe bok̆aam. Masumani ndğas boçodinare.’ 33Mara, handğa, oç̆ume do gendğani gza çkimis mebaonare, hemuşeni ki, ar ambayoci Yeruşalimişi gale varti ğurun.

34E Yeruşalimi, Yeruşalimi! Ambayocepe oğurinam, skanda na moincğonupes kva muçxam. Monç̆vak muç̆o ʒ̆ip̆ilepe muşi msva muşis na eʒ̆ik̆orobamssteri mati nak̆o fara skani berepe ok̆obğuşeni binç̆işi, mara tkva var gint̆es. 35Oʒ̆k̆edit, oxori tkvani verane nişkvinasen! Tkva giʒ̆umert, ‘Manceşi coxote na moxtasen ʒ̆k̆onda ivas!’ var tkvatşa, ma arçkva var mz̆iraten.”

বর্তমানে নির্বাচিত:

Luk̆a 13: LZZ

হাইলাইট

কপি