Luk̆a 10

Yesok Sumeneçidovit Mamgurale Geçinadums

1Hantepeşk̆ule Mancek sumeneçidovit çkva mamgurale kogoşionu. Hentepe jur jur gamak̆atu do muk na idasen k̆at̆a noğaşa, k̆at̆a svaşa mendoşku. 2E do hentepes haşo uʒ̆u: “Maxsuli dido ren, mara madulye mʒika ren. Hemuşeni ki maxsulişi mances oxveʒ̆it, maxsuli moseluşeni çkva madulyepe moşkvas.

3Hayde igzalit! Tkva mçxurepesteri mgerepeşi oşkendaşa goşkumt. 4Varti kese, varti t̆urva, varti çapula giğut̆an, gzas çkar mitis selami mot meçamt. 5Ar oxorişa amaxtatşk̆ule ‘Ham oxoris misoba rt̆as!’-şo tkvit. 6Hek, misobaşi skiri miti korenna, hem misoba tkvani hem mitxanis gyoskidasen; va renna, tkvande goiktasen. 7Na amaxtaten oxoris dodgitit! Mutu mekçan hea ç̆k̆omit do şvit! Hemuşeni ki, na ç̆k̆indu madulyeşi iven. Oxorişen oxori mot gulurt!

8Ar noğaşa kamaxtatşk̆ule, dogik̆abulesna, na goʒ̆ogidvanen ç̆k̆omit. 9Hek na renan zabunepe dok̆ait do hentepes, ‘Ğormotişi Mapoba komeganç̆es’-şo uʒ̆vit. 10Mara ar noğaşa amaxtatşk̆ule tkva va gik̆abulesna, hem noğaşi cadaxepeşa gamaxtit do haşo tkvit: 11‘Noğa tkvanişen gamobulurt do k̆uçxepes na memasves let̆ati megopatxamt. Mara xoloti haya giçkit̆an, Ğormotişi Mapoba komeganç̆es.’ ” 12Ma haya giʒ̆umert, “k̆aoba do p̆at̆obapeşi ok̆oreʒxuşi ndğas, Sodomişi xali hem noğaşi xalişen mexondinoni ivasen.

13E çxome Xorazinişi xalk̆is! E çxome Vitsaidaşi xalk̆is! Tkvani k̆ala na ixenu mucizepe T̆iro do Sidonis divuk̆on, haʒ̆işa şali dolikunan do mt̆ut̆as doloxuneri Ğormotişa goiktanert̆u. 14Mara ok̆oreʒxuşi ndğas, T̆iro do Sidonişi xali tkvani xalişen mexondinoni ivasen. 15E Kafarnaumi, ʒaşa extarei? Var! T̆art̆arozişa gextare.

16Tkva na giucaman, muç̆o ma memiucuk̆osteri iven. Tkva na mogivares, ma momivaruk̆osteri iven. Ma na va momivaramsti, ma na momoşku moivaruk̆osteri iven.”

17Sumeneçidovitepek: “Mance çkuni, skani coxo elebişinatşk̆ule ç̆ink̆apekti çku domiceran”-ya do xelineri goiktes.

18Yesok hentepes haşo uʒ̆u: “Şeit̆ani ʒaşen mexisteri na melamt̆u kobz̆iri. 19Ma, ʒ̆iʒ̆ila do ak̆rep̆epe k̆uçxete mezuşeni do duşmanişi mteli menceli gecginuşeni xeʒala komekçit. Tkvanda mutu zarari var naçanen. 20Mara, pinti şurepek çku domiceran-ya do mot ixelt, coxope tkvani ʒas na ç̆arunşeni ixelit!”

Yesok Babas Uxvamams

21Hemdos, Yeso Şuriʒ̆k̆ondate empu do haşo tku: “Baba, dixa do ʒaşi Mance! Hantepe ç̆k̆veri do nosiari mitxanepeşen na ompuli do ç̆ut̆a berepes na gunʒ̆k̆işeni gixvamam. Ho, e Baba, si haya k̆ai giʒ̆onun.”

22“Baba çkimik iri-xolo ma komomçu. Skiri mi ren, haya Babaşen çkva mitis var açkinen. Baba mi ren, heati skirişen do skirik na gunʒ̆k̆u mitxanepeşen met̆i mitis var açkinen.”

23Uk̆ule mamguralepe muşişe goiktu do hentepes t̆k̆obaşa haşo uʒ̆u: “E şana bedi mutepeşis, tkvani noz̆iremepe na az̆iru tolepes! 24Haya giʒ̆umert, dido ambayocepe do mapapes tkva na gaz̆irespe oz̆iramu unt̆es, mara var az̆ires. Tkva na ognitpe ognapu unt̆es, mara var ognes.”

Oşveluşi Memgapura

25Ʒ̆k̆onda K̆anonepeşi mamgurapale ar mitxanik Yeso meʒaduşeni keiselu do haşo uʒ̆u: “Mamgurapale çkimi, uçodinu skidala mu p̆ik̆o momargen?”

26Yesok hemus, “Ʒ̆k̆onda K̆anonis mu ç̆arun?”-ya do k̆itxu, “Si hek mu ik̆itxam?”-ya.

27K̆oçik haşo uʒ̆u: “Ğormoti Mance skani mteli gurite, mteli şurite, mteli mencelite do mteli nosite gioropurt̆as. Manz̆ageri skaniti, ti skanisteri gioropurt̆as.”

28Yesok hemus, “İsa zop̆on”-ya uʒ̆u. “Haya dogaxenasna skidare.”

29Mara k̆oçik ti muşi omtilanuşeni Yesos haşo uʒ̆u: “Ho do, manz̆ageri çkimi mi ren?”

30Yesokti hemus: “Ar k̆oçi Yeruşalimişen Yerixoşa gyulurt̆uşi; abrek̆epeşi xes kodololu. E do hentepek k̆oçi goçves, dobaxes gverdi ğureri met̆k̆oçes do igzales. 31Ar p̆ap̆ak gzaşen golit̆uşk̆ule ham k̆oçis moxvadu. K̆oçi z̆iruşk̆ule p̆ap̆ak gzaşi melenk̆aleşa mek̆ilu. 32Ar Levuriti xolo hek mextu do k̆oçi z̆iruşi hemuti mek̆ilu. 33Hekole na golit̆u ar Samaruri do, k̆oçi na rt̆u svaşa moxtu do hea z̆iruşk̆ule guris naç̆u. 34K̆oçis nanç̆u do pupulepe muşis yaği do ğvini kodusuşk̆ule duk̆oru. Uk̆ule k̆oçi guruni muşis kogyoxunu, xanişa mendionu, hemus uci kogedu. 35Majurani ndğas jur dinari moşiğu do xancis komeçu. ‘Hamus k̆ai mendaʒ̆k̆edi. Hamuşen nak̆oti para oxmarare, gobiktaşk̆ule mekçare’-ya uʒ̆u.

36Ham sum k̆oçişi doloxe p̆ea namu, abrek̆epes na moxvadu k̆oçişi manz̆ageri ren?”

37Ʒ̆k̆onda K̆anonepeşi mamgurapalek, “Namuti guris naç̆u”-ya uʒ̆u.

Yesok, “İdi do siti heşo vi!”-ya.

Yeso, Marta do Mariaşi Oxoris Ren

38Yeso mamguralepe muşi k̆ala gzas naonu do ar oput̆eşa kamaxtes. Marta na coxons ar oxorcak hea musafiri kezdu. 39Hemus Maria na coxons ar dati kuonurt̆u. Maria Mances kogoʒ̆uxedu do hemus nuucamt̆u. 40Martati, dido dulya na uğurt̆uşeni tişi talaşi uğurt̆u. Yesoşa moxtu do, “E Mance çkimi, da çkimi oxorişi dulyapeşeni ma va memişvelams. Hamuşeni mutu va tkvarei? Uʒ̆vi do memişvelas”-ya uʒ̆u.

41Mancekti hemus haşo uʒ̆u: “Marta, Marta, si dido mutxanepeşeni megazmonen do talaşi ikom. 42Mara xvala ar mutxani uk̆orems. Mariak k̆ai na ren kogoşaʒxunu do hea var eiç̆opinasen.”

বর্তমানে নির্বাচিত:

Luk̆a 10: LZZ

হাইলাইট

কপি