Johanes 15

De woara Wienstock

1Ekj sie de rechtja (woara) Wienstock, un mien Voda es de Wiengoadna. 2Jiedre Rank aun (en) mie, dee nich Frucht brinjt, dee nemt hee wajch; un jiedre, de Frucht brinjt, dee reinicht hee, om daut dee mea Frucht brinjt. 3Jie sent aul rein wäajen (derch) daut Wuat, daut ekj to junt jerät ha. 4Blieft en mie, un ekj en junt. Soo aus ne Rank nich ut sikj selfst Frucht brinjen kaun, wan dee nich aum Wienstock blift, aulsoo uk jie nich, wan jie nich en mie bliewen. 5Ekj sie de Wienstock, jie sent de Ranken. Wäa en mie blift un ekj en am, disa brinjt väl Frucht, dan onen mie kjenn jie nuscht doonen. 6Wan wäa nich en mie blift, soo woat hee rutjeschmäten aus ne Rank un vedrieecht; un dee saumelt maun toop un schmitt dee em Fia, un see vebrennen. 7Wan jie en mie bliewen un miene Wieed en junt bliewen, soo woa jie bedden, waut jie wellen, un daut woat junt jejäft woaren. 8Doaderch woat mien Voda veharlicht, daut jie väl Frucht brinjen, un jie woaren miene Jinja woaren.

Jesus jeef siene Nofolja daut Jeboot, daut see sullen Leew haben

9Soo aus de Voda mie jeleeft haft, ha uk ekj junt jeleeft; blieft en miene Leew. 10Wan jie miene Jebooten hoolen, soo woa jie en miene Leew bliewen, krakjt soo aus ekj mienem Voda siene Jebooten jehoolen ha un en siene Leew bliew. 11Dit ha ekj to junt jesajcht, om daut miene Freid en junt es un june Freid vollkomen woat. 12Dit es mien Jeboot, daut jie eenaunda leef haben, soo aus ekj junt jeleeft ha. 13Jratre Leew haft kjeena, aus dise, daut hee (wäa) sien Läwen hanjeft (lat) fa siene Frind. 14Jie sent miene Frind, wan jie doonen, wautemma ekj junt befäl. 15Ekj nan junt nich mea Kjnajchts, wiels de Kjnajcht weet nich, waut sien Har deit; oba ekj ha junt Frind jenant, wiels ekj aules, waut ekj von mienem Voda jehieet, ha ekj junt weeten loten. 16Jie ha mie nich utjewält, oba ekj ha junt utjewält un junt bestemt (jesat), om daut jie hangonen un Frucht brinjen, un june Frucht blift, om daut, wautemma jie däm Voda bedden woaren en mienem Nomen, woat hee junt jäwen. 17Dit befäl ekj junt; daut jie junt unjarenaunda leef haben.

De Welt woat Jesus siene Nofolja nich lieden kjennen

18Wan de Welt junt haust, soo weet, daut see mie ver junt (ea) jehaust haft. 19Wan jie vonne Welt wieren, wudd de Welt daut ieejne leef ha; oba wiels jie nich vonne Welt sent, oba ekj junt ute Welt utjewält ha, doarom haust junt de Welt.

20Denkjt aun daut Wuat, daut ekj junt jesajcht ha: Een Kjnajcht es nich jrata aus sien Har. Wan see mie vefolcht ha, woaren see uk junt vefoljen; wan see mien Wuat jehoolen ha, woaren see uk junt hoolen. 21Oba dit aules woaren see junt doonen (aundoonen) wäajen mienen Nomen, wiels see däm nich kjanen, dee mie jeschekjt haft. 22Wan ekj nich jekomen wia un to an jerät haud, soo hauden see kjeene Sind; oba nu ha see kjeene Uträd fa äare Sind. 23Wäa mie haust, haust uk mien Voda. 24Wan ekj unja an nich de Woakjen jedonen haud, dee kjeen aundra jedonen haft, dan hauden see kjeene Sinden; nu oba ha see jeseenen un haussen mie aus uk mien Voda. 25Oba om dautet Wuat erfelt woat, daut en äarem Jesaz jeschräwen steit: «See hausten mie onen Uasoak». {Ps.69,5} 26Wan oba de Sachvewaulta (Treesta) jekomen es, däm ekj junt vom Voda schekjen woa, däm Jeist de Woarheit, dee vom Voda kjemt, soo woat hee von mie zeijen. 27Oba uk jie woaren zeijen, wiels jie von Aunfank aun bie mie sent.

বর্তমানে নির্বাচিত:

Johanes 15: PBJHF

হাইলাইট

কপি