Gẹnẹsisi 5
5
1EHE wẹ owé whọndo Adam tọn tọn. To azán he gbè Jiwheyẹwhe dá gbẹtọ, to opajlẹ Jiwheyẹwhe tọn mẹ wẹ é dá ẹ, 2Asú po asi po wẹ é dá yé; bo dona yé, bo sọ ylọ oyín yetọn dọ Adam to azán he gbè yè dá yé.
3Adam sọ nọ̀ owhè kantọ̀nao, bo ji vi sunnu de to apajlẹ etọn titi mẹ, to bosiọ ede tọn mẹ; bo sọ ylọ oyín etọn dọ Seti: 4azán Adam tọn to godo he é ji ṣeti yín owhè fẹ̀nẹ; é sọ ji visunnu po viyọnnu po: 5azán Adam tọn lẹpo sọ yín owhè fẹnẹkantọ̀nao: é sọ kú.
6Ṣẹti sọ nò owhè kanwekoatọ́n, bo ji Enọsi: 7Ṣẹti sọ nò to godo he é ji Enọsi owhè fẹ̀nẹsinawe, é sọ ji visunnu po viyọnnu po: 8azán Ṣẹti tọn lẹpo sọ yín owhè fẹ̀nẹkanwegbànnukunawe: é sọ kú.
9Enọsi sọ nọ̀ owhè kanweao, bo ji Kenani: 10Enọsi sọ nọ̀ to godo he é ji Kenani owhè fẹ̀nẹfọtọ̀n, bo sọ ji visunnu po viyọnnu po: 11azán Enọsi ton lẹpo sọ yín owhè fẹ̀nẹkanwekoatọ́n: é sọ ku.
12Kenani sọ nọ̀ owhè kandegbàn, bo sọ ji Mahalaleli: 13Kenani sọ nọ to godo he é ji Mahalaleli owhè fẹ́nẹkande, bo sọ ji visunnu po viyọnnu po: 14azán Kenani tọn lẹpo sọ yín owhe fẹ̀nẹkanwegbàn: é sọ kú.
15Mahalaleli sọ nọ̀ owhè kandekoatọ́n, bo sọ ji Jalẹdi: 16Mahalaleli sọ nò to godo he é ji Jalẹdi, owhè fẹ́nẹgbàn, bo sọ ji visunnu po viyọnnu po: 17azán Mahalaleli tọn lẹpo sọ yín owhè fẹ̀nẹkanwefọtọ́n: é sọ kú.
18Jalẹdi sọ nò owhè kẹ̀nnẹnukunawe, bo ji Enọku: 19Jalẹdi sọ nò to godo he é ji Enọku, owhè fẹ̀nẹ, bo ji visunnu po viyọnnu po: 20azán Jalẹdi tọn lẹpo sọ yín owhè fẹ̀nẹkẹ̀nnẹnukunawe: é sọ kù.
21Enọku sọ nò owhè kandekoatọ́n, bo ji Mẹtusẹla: 22Enọku zinzọnlin hẹ Jiwheyẹwhe to godo he é ji Mẹtusẹla họ̀ owhè fọdekanweko, bo sọ ji visunnu po viyọnnu po: 23azán Enọku tọn sọ yín fọdekẹ̀nnẹatọ́n.
24Enọku zinzọnlin hẹ Jiwheyẹwhe: é ma sọ tin; na Jiwheyẹwhe yí i wutu. 25Mẹtusẹla sọ nò owhè kẹ̀nnẹkoatọ́nnukunawe, bo ji Lẹmẹki: 26Mẹtusẹla sọ nò to godo he é ji Lẹmẹki owhè núọntọ̀nkẹ̀nnẹkonukunawe, bo sọ ji visunnu po viyọnnu po: 27azán Mẹtusẹla tọn lẹpo sọ yín owhè fẹ̀nẹkẹnnesinẹnẹ: é sọ kú.
28Lẹmẹki sọ nọ owhè kènnẹkonukunawe, bo ji visunnu de: 29é sọ ylo oyín etọn dọ Noa, dọmọ, Ehe lọ wẹ na miọnhomẹna mí gbọn azọn mítọn podo na dẹnkúnkun alọ mítọn lẹ tọn he sọn aigba mẹ wá he OKLUNỌ ko hodèdo wutu. 30Lẹmẹki sọ tin to godo he é ji Noa, hò owhè fowekènnẹgbàntọ́n, é sọ ji visunnu po viyọnnu po: 31azán Lẹmeki tọn lẹpo sọ yín núọntònkènnẹfọtọ́nnukunawe: é sọ kú.
32Noa sọ yín owhè fowekanweko mẹho: Noa sọ ji Ṣẹm, Ham, po Jafẹti po.
বর্তমানে নির্বাচিত:
Gẹnẹsisi 5: BWL23
হাইলাইট
শেয়ার
কপি
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
