Matthieu 1

Bimpám mé Yésʉs

1Bimpám mé Yésʉs-Krîst, byé ó bî: Yésʉs-Krîst á be ó mwân mé David, bé le Abraham.

2Abraham á byâ ó Isaac.

Isaac byâ Yákɔb.

Yákɔb byâ Yʉ́da, bé e bɨ́ɔɔ́ bé.

3Yʉ́da, bé e mʉmá wé, Tamâr, bé á byâ ó Parɛ̂s le Zára.

Parɛ̂s á byâ ó Esrɔ̂m.

Esrɔ̂m byâ Áram.

4Áram byâ Aminadâb.

Aminadâb byâ Naasɔ̂n.

Naasɔ̂n byâ Salmɔ̂n.

5Salmɔ̂n, bé e mʉmá wé, Rahâb, bé á byâ ó Bôaz.

Bôaz, bé e mʉmá wé, Rwɨ̂t, bé á byâ ó Óbed.

Óbed á byâ ó Yesê.

6Yesê byâ njwɨ́ɨ David.

David, bé e mʉmá á be kúhó mé Urías nyá, bé á byâ ó, Salomɔ̂ŋ.

7Salomɔ̂ŋ byâ Robwâm.

Robwâm byâ Abiâ.

Abiâ byâ Ása.

8Ása byâ Yosáfat.

Yosáfat byâ Yorâm.

Yorâm byâ Ozías.

9Ozías byâ Yoatâm.

Yoatâm byâ Akâz.

Akâz byâ Ezekyâs.

10Ezekyâs byâ Manasê.

Manasê byâ Amôn.

Amôn byâ Yósias.

11Yósias byâ Yekonías, bé e bɨ́ɔɔ́ bé, ɨ́ jɔʼ bé á tô ɨ́ mikómó Babilɔ̂n yɨ́.

12Tœ́á míkómó Babilɔ̂n, wé osí laa, Yekonías á byâ ó Salátyɛl.

Salátyɛl byâ Zorobabɛ̂l.

13Zorobabɛ̂l byâ Abyûd.

Abyûd byâ Eliakîm.

Eliakîm byâ Azɔ̂r.

14Azɔ̂r byâ Sadôk.

Sadôk byâ Akîm.

Akîm byâ Élyʉ̂d.

15Élyʉ̂d byâ Eléazar.

Eléazar byâ Matân.

Matân byâ Yákɔb.

16Yákɔb byâ Yóseb, njʉ̂m mé Maria.

Maria ó b'á byâ Yésʉs, bé dí ejébě “Krîst”. Díe laá, lé páʼlɔ́ɔ́ ó, Mʉ̌r Nzyɛ̌m á lœm múló mé jwɨ́ɨ nyá. 17Mimyǎ mi bʉ̂r bé mímyɛ̂h ó mî. Táare lɨ́ Abraham, tó pyâl ɨ́ jɔʼ mé David, mimyǎ mi bʉ̂r myaá, myé á be ó kám e minâ. Táare ɨ́ jɔʼ mé David, tó pyâl ɨ́ jɔʼ bé á tô ɨ́ mikómó ɨ́ Babilɔ̂n yɨ́, mimyǎ mi bʉ̂r, myé á be ó kám e minâ. Táare ɨ́ jɔʼ bé á be lɨ́ okómó Babilɔ̂n yɨ́, tó pyâl lɨ́ ebyɛ́l mé Krîst, mimyǎ mi bʉ̂r, myé á be ntémé ó, kám e minâ.

Ebyɛ́l mé Yésʉs-Krîst

(Luc 2.1-7)

18Yésʉs-Krîst á byɛ̂l ó, mbi wɨ̂: Maria, nyɔ̌ŋ wé, bé e Yóseb, bé á be le etié ó, bé óbɛ́a. Bé dína apǎ syɛŋa nɛ́ɛ: Maria nzě nʉa ébum ɨ́ nkul Sísǐm mé Nzyɛ̌m. 19Njʉ̂m wé, Yóseb, á be ó tîtyěl mʉr. Nye ntémé á bé akpɛl ésámle nyé témé bʉr. Nó nyé á jwɨʼ ɨ́ lémé wé ó, nye óbîr nyé ɨ́ mesǒ, bʉr agʉ́a yɨ́. 20Nye dína lɨ́ ejwɨʼ nó nɛ́ɛ: nye nzě bee éngeles mé Dâ ɨ́ líma. Éngeles waá nzě lɛ́ɛ e né ó: «Yóseb, mâ nta mé David, alíʼa lɨ́ enʉǎ Maria, mʉmá gǒ, ebě, nye nʉa ébum ó e nkul Sísǐm mé Nzyɛ̌m. 21Nye óbyâ mâ mʉrʉ̂m. Go ójwɨr nyé “Yésʉs”, ebě, nye ó ngá tǐʼ kúl yé, lɨ́ etáǎ góo, le edwih yé ɨ́ mpila mísyóm, pɛʼ yé ɨ́ fá.»

22Bisâ byaá bíbyɛ̂h, byé á syɛ́ɛ nó ó, lɨ́ elóŋlo ékǎn Dâ Nzyɛ̌m á boo lɛ́ɛ ɨ́ nzɨ̌ mé ngwíha milɔ̌b wé, ó:

23“Bíŋ éséhe, yé ónʉa ébum, byâ mâ mʉrʉ̂m.

Bé ójwɨr nyé ó Emmanuel.”

(Nó yé páʼlɔ́ɔ́ ó: “Mɨná gá e boo Nzyɛ̌m ó mû.”)

24Jɔ̌ʼ Yóseb á jɨma ɨ́ jô yɨ́, nye ntɔ̂ʼ sâ mpʉ éngeles mé Dâ Nzyɛ̌m á lɛ́ɛ nye yɨ́. Nye ntɔ̂ʼ nʉǎ Maria, dil nyé ɨ́ mbɛ̌r wé. 25Nye á bé asyɛŋa e né, tó pyâl ɨ́ jɔʼ nyé á byâ mwân waá yɨ́. Nye ntɔ̂ʼ jwɨr nyé díe ó, Yésʉs.

বর্তমানে নির্বাচিত:

Matthieu 1: ozm

হাইলাইট

কপি