Luc 1

Meswɨhlɨ

1Théophile, mɨ́ɔɔ́ wǎm!

Bisyɛ́ɛla bínɨ́nɨ́ɨ́ Nzyɛ̌m á sâ ɨ́ páʼ gá wɨ́ná bí, byé mû ó sí cɛmɔɔ nzɔ̂ʼ nzɔʼ. 2Byé á cɛmɔɔ ó mpʉ bʉ̂r o b'á be tɨ̂ʼ bá, bé á kala mɨná lɔ́ɔ́ bísyɛ́ɛla bé á bee e míh mɔ́ɔ́ ɨ́ menyɛ̌l bí. Bé ntémé mû báánâʼ ó, oboʼlo o tɨ̂ʼ le osyɛ̂l o mésâ ó lɔ́ɔ waá. 3Nó, dâ, mpʉ mé á byamle lɔ̌b waá lɨ́ esú ó, me gʉ́ŋaa wé ɨ́ pébébé, duho ɨ́ menyɛ̌l yɨ́, nó yé á ka pyâl me jwɨʼ mpâ ó, mɛm ntémé cɛ́maa go wǎ mpʉ bísâ byaá, byé á syɛ́ɛ yɨ́. 4Mě sá nó ó, go gʉ́ŋaa ó, sá bé á lɛ̂ʼle go ɨ́ lɔ̌b waá yɨ́, yé ó kwahaá tɨ̂.

Mpáŋla ebyɛ́l mé Yʉánɛs

5Yé á be ó e nyʉ́ʉ́ pára mé Nzyɛ̌m, díé lé Zacharie. Nye á be ó mʉr ngwár ɨ́ sɔ́má ópara ó mbɛ̌r bʉ̂r mé Abiâ, ɨ́ jɔʼ yaá, Erôd dína njwɨ́ɨ ɨ́ sí Yʉ́da. Nó Zacharie á be ó e mʉmá wé, Elisabeth. Elisabeth á byɛ̂l ntémé ó, ɨ́ mpóʼo mé Árɔn. 6Bɨ́bɛ̂h obá, bé á be ó otîtyěl o bʉ̂r ɨ́ míh mé Nzyɛ̌m, lɨ́ ebaʼle métié ndu e mempéné mé Nzyɛ̌m. Kʉ̌ tyen wɔ́ɔ́, abɨm ébɔ̌ʼ. 7Sâ gwár, bé á bé abe e mwân, ebě, Elisabeth á be ó kǔn mʉ́má. Ntémé bɨ́bɛ̂h mû minjʉ̌m.

8-9Ɨ́ lɨ̂ʼ dʉ́o nɛ́ɛ: Zacharie, bé e dyɛɛ́ yé yaá, nzě tóŋɔɔ ɨ́ yɔ́ɔ́ jɔʼ lɨ́ eséǎ syɛ́ɛ́ ɨ́ mpáh Nzyɛ̌m. Nó mpʉ bé á nze sâ esimá lɨ́ edû mpʉ ópara, bé á boo sɨ̂sa yɨ́, esimá ntɔ̂ʼ mɛ̂r Zacharie ó, nye ó mʉr jálá le enî mpáh Nzyɛ̌m, lɨ́ etó dîʼ ótú ó dúu lɨ́ alatâr nyá. 10Bʉr ɨ́ buo buo, bé á si lîʼ kʉ̌l lɨ́ ejɨʼla e Nzyɛ̌m ɨ́ jɔʼ nyé á be tʉ́ŋlʉ̌ mpáh Nzyɛ̌m lɨ́ edîʼ ótú ó dúu yɨ́.

11Tyé e tyé yaá, éngeles mé Nzyɛ̌m ntɔ̂ʼ pyâl Zacharie. Nye á tyɛ̂b tîtyěl ó, ɨ́ páʼ mbó éjʉ̂m lɨ́ alatâr, gúmó bé á didîʼ otú ó dúu yɨ́. 12Mbeá Zacharie á bee éngeles yɨ́, ekɛ̂n nzě swɨɨ nyé ɨ́ nyʉ̂l. Nye nzě bil bʉ́á. 13Nó ó éngeles waá á nze lɛ́ɛ e né ó: «Sá ajóʼo bʉ́á, Zacharie. Nzyɛ̌m, nyɨ́ jóʼo mínjɨʼla myô! Elisabeth, mʉmá gǒ, óbyâ gó mwân, mâ mʉrʉ̂m. Go ójwɨr nyé díe ó, Yʉánɛs. 14Go óbuú mɛɛla le esoho. Bɨ̌n e bʉr ɨ́ buo buo, bé óbuú soho ébyɛ́l lé. 15Ebě, nye óbe ó ánɨ̂nɨ̂n mʉr ɨ́ míh mé Dâ Nzyɛ̌m. Nye ákóʼó de ményoʼ me dí epura má. Nye óbe ó lwɨ́ŋlá e Sísǐm mé Nzyɛ̌m, nye dína ɨ́ mo nyɔ́ŋ. 16Nye ósâ ó, bʉr o b'Ɨ́zraɛ̂l ɨ́ buo buo, bé dwíraa milémé myɔ́ɔ́, dyɛ̂ʼwo e Dâ Nzyɛ̌m wɔ́ɔ́. 17Nye ó Nzyɛ̌m ngá lómo ésôʼ nyá. Nye óbe ó lwɨ́ŋlá e Sísǐm mé Nzyɛ̌m ndu e nkul, mbi ngwíha milɔ̌b Elie á be wɨ́. Nye ónzě sâ ó, osɔ́ŋ bé e bwân, bé kwɨ́mlɨɨ páʼ nyɔ́ɔ́. Nye ótɨ́e bʉ̂r o dí egbɔba e Nzyɛ̌m bá ó, bé twólwaa mpʉ ótîtyěl o bʉ̂r. Nó nyé ósâ ó, kúl bʉ̂r o b'Ɨ́zraɛ̂l, yé díʼee kʉmsá, lɨ́ egwá dwě Nzyɛ̌m kûm.»

18Zacharie ntɔ̂ʼ yala le éngeles ó: «Paá bee: bɨ̌h e mʉmá wǎm mû ó minjʉ̌m. Yé ngá lɛ̂ʼle mé ó, sá gó dí elɛ́ɛ̌ nɨ̌, yé óbánǎ syɛ́ɛ?» 19Éngeles ntɔ̂ʼ yala ó: «Yé ó mɛm, Gabriel, mʉr dí etyɛ̂b ɨ́ míh mé Nzyɛ̌m nyá! Me nzé ó ɨ́ lʉ́mlʉ́, ó me ntáa nzě lwib e go, lɨ́ enzě lɛ́ɛ gó Mbɨambɨa Lɔ́ɔ́ wɨ̂. 20Nó mpʉ gô bé abûʼla mpáŋla nyǎm yɨ́, go ákóʼó kǎ lwib! Go ódi ó le emúmó, tó kumo ɨ́ jɔʼ bísyɛ́ɛla mê lɛ́ɛ́ bínɨ̌ ngá syɛ́ɛ yɨ́. Mpáŋla mê nze lɛ́ɛ́ gó nyɨ̂, nye ókʉ́ dira ɨ́ jɔ̌ʼ Nzyɛ̌m ólɛ́ɛ ó, nye díraa yɨ́!»

21Jɔʼ bé le éngeles, bé á be lɨ́ elwib yɨ́, sɔ́má bʉ̂r o b'á be lɨ́ ebóno nyé kʉ̌l bá, bé á be ó lɨ́ ekâm beabeǎ diá nyé á di tʉ́ŋlʉ̌ mpáh Nzyɛ̌m yɨ́. 22Tœ́á nyé á ka tô kʉ̌l wɨ́, nye á bé abe e nkul lwíb e bê. Nye á jaa peble bé ó, njɨ mebô e mebô. Bé ntɔ̂ʼ gʉ́a ó, nye sí jala le ebee lʉ́ʉ́ ésimá é sɔ̂ʼ ɨ́ mpáh Nzyɛ̌m tʉ́ŋlʉ̌.

23Nó nyé á baʼa jâ gʉ̂ʼ mʉ́ʉ́ mélû, lɨ́ esîl syɛ́ɛ́ édîʼ ótú ó dúu ɨ́ mpáh Nzyɛ̌m. Nye ntɔ̂ʼ swîʼ, tô kwár nyé. 24Bé osí lɛŋ mʉ́ʉ́ mélû nɛ́ɛ: mʉmá wé, Elisabeth nzě kǎ nʉa ébum. Nó mpʉ nyé á jʉ̂ʼra ebum yɨ́, nye á bóno ó, ongɔn otɛ̂n, bé láŋaa. 25Nye á lɨ̂lɛɛ tʉ́ŋlʉ̌ léme ó: “Dâ Nzyɛ̌m, nyɨ́ sâ mé sá mpâ. Nyɨ́ dwɛ̂ʼ mê, lɨ́ epɛʼ mé ɨ́ sôn témé bʉr.”

Mpáŋla ebyɛ́l mé Yésʉs

26Ɨ́ ngɔn saman Elisabeth á be, nye mû le ebum nyá, nó ó Nzyɛ̌m á nze baʼa lómo éngeles wé Gabriel ɨ́ yʉ́ʉ́ nkana, díé lé, Nazarɛ̂t, ɨ́ sí Galilê. 27Nye á lómo nye ó kwá mé yʉ́ʉ́ bíŋ éséhe. Yé á be ó, bé e nyʉ́ʉ́ mʉ̂r mpóʼo mé David, díé lé Yóseb, bé óbɛ́a. Bíŋ éséhe yaá, yé á be e díe ó, Maria. 28Nó ó éngeles waá á nze pyâl kwá mé Maria. Nye e Maria ó: «Me lɨ́ esoho gô. Gʉ́ bi métyɛʼ me mpóm mé Dâ Nzyɛ̌m. Bɨ̌n e Dâ ó mû.»

29Mekǎn maá kʉ́ nzě tɨ̂l Maria mekʉ̌ sí. Nó nyé á nze toŋlo ɨ́ nye mʉr tɨ̂ʼ ó: «Wɨ́nɨ̌ mbi méswɨhlɨ, wé lɛ́ɛ́ yé ɛ́?» 30Nó éngeles á nze lɛ́ɛ e né ó: «Maria, ayɨ́ jóʼo bʉ́á. Gʉ́ bi métyɛʼ me mpóm mé Nzyɛ̌m. 31Go ónʉa ébum, gó obyâ mwân, gó ojwɨr nyé díe ó, Yésʉs. 32Nye óbe ó mʉ̌r nɨ́nɨ́ɨ́. Bʉr, bé ójébe nyé ó: “Mwân mé Nzyɛ̌m dí Lʉ́ bísá bíbyɛ̂h nyá.” Dâ Nzyɛ̌m ódil nyé ɨ́ diá jwɨ́ɨ mé sɔ́ŋ mpám wé David. 33Nye ójwɨ́ɨ bʉ̂r o mpóʼo mé Yákɔb njʉ̌m dǐ e njʉ̌m dǐ. Jwɨ́ɨ́ yé, yé óbe ó, abe le odumo.»

34Nó Maria á nze dî le éngeles ó: «Yé ópʉgʉ́ sâ náǎ nyá ɛ́? Ebě, me dína apǎ kúna e mʉrʉ̂m.»

35Nó ó éngeles á nze yala e né ó: «Yé óbe ó: Sísǐm mé Nzyɛ̌m ó ngá sulo ɨ́ go. Nzyɛ̌m dí Lʉ́ bísá bíbyɛ̂h nyá, nkul nyé, nye ógbâ gó sí pyóo nyé. Sá tɨ̂ʼ ó mwân ti gó óbyâ nyá, ójwɨrɔɔ “Mwân mé Nzyɛ̌m” yɨ́. 36Paá bee: Elisabeth, mɨ́ɔɔ́ gǒ, nye ntémé mû ó le ebum! Nye óbyâ mwân lɨ́ ojʉ̌m wé. Ngɔn saman wé waá ó dí kʉ́ nyâ, nyɨɛ mʉr bé á lwɨlwɨ́ɨ okǔn nyá. 37Ebě, yé abe e yʉ́ʉ́ sɔ̂ʼ dí ɨ́ kɔbla ɨ́ páʼ mé Nzyɛ̌m.»

38Maria nzě lɛ́ɛ e né ó: «Me wâʼ ó, syɛ̂l mesâ mé Dâ Nzyɛ̌m. Nó sá yɨ́yɛ̂h gô lɛ́ɛ́ yɨ́, yé syɛ́yɨɨ njɨ nó.»

Nó ó éngeles á nze baʼa tô, líʼe nyé náǎ.

Maria, nye lɨ́ etó beě Elisabeth

39Nó ɨ́ melû maá, léme, wé á be Maria ɨ́ báná báná ó, nyě tó ó sí Yʉ́da, sí mécwɨ̂ʼ. Nó nyé á nze mɔa, tô, tó pyâl ɨ́ yʉ́ʉ́ nkana tɨ̂. 40Nó nyé á to sul ɨ́ mbɛ̌r mé Zacharie, ntɔ̂ʼ soho mʉ́má wé, Elisabeth. 41Njóʼá Elisabeth á jóʼo meswɨhlɨ mé yɨ́, mwân nzě kubla nyé ɨ́ mo! Tyé e tyé yaá, Elisabeth á be ó, nye mû lwɨ́ŋlá e Sísǐm mé Nzyɛ̌m. 42Nye ntɔ̂ʼ bʉ̂ bítím le elɛ́ɛ ó: «Gʉ́ bi métyɛʼ me mpóm, laa bʉ́bá bɨ́bɛ̂h! Metyɛʼ me mpóm, mé díʼee e mwân dí go ɨ́ mo nyá. 43Nyɔ̌ŋ mé Tî wǎm bana nze bee mé ɨ́ yé ɛ́? 44Paá bee: le méswɨhlɨ mô kpáhlá mé ɨ́ megwǎl, le mwân ntɔ̂ʼ kubla mé ɨ́ mo ɨ́ bisʉhʉʉ! 45Metyɛʼ me mpóm, mé díʼee e gua, mʉr á kʉ bûʼla mpáŋlǎ Nzyɛ̌m á lɛ́ɛ go nyɨ́ nyá. Go á bûʼla ó, mpáŋla nyé nyaá, nye ódira.»

46Nó Maria á nze lɛ́ɛ ó:

«Lémé wâm, wé lɨ́ edwě Dâ Nzyɛ̌m kûm.

47Bisʉhʉʉ, byé ó me ɨ́ léme lwɨ́ŋlá, ɨ́ lɔ̌b mé Nzyɛ̌m, mʉr á tiʼ me nyá.

48Ebě, nye bé ó sí ntɨh médwôʼlʉ mé nkǒ syɛ̂l mesâ wé dí yɨ́.

Yé ó nó: píe mûh, mimyǎ mi bʉ̂r mímyɛ̂h,

myé ójaá lɨlɛ́ɛ ó, njɨ: “Metyɛʼ me mpóm, mé e mʉmá nɨ̌!”

49Ebě, mʉr dí e nkul nyɨnyɛ̂h nyá,

nye bé ó sí sâ mé bisá bínɨ́nɨ́ɨ́.

Díé lé, lé ó díé dí ti lɨ́.

50Nyě lɛ́ʼlé mpâm nyé ó, mimyǎ mi bʉ̂r mímyɛ̂h.

Nye lɨ́ ejɨ̂ʼ baá o dí edwáawo nyé bá nkoó.

51Nyɨ́ kɛm bʉ̂r bé e nkul nyé nyɨnyɛ̂h.

Nye á si gbah bʉr ó pyêh bɨ́bɛ̂h,

ti e bijwɨʼ bé á kukûhlo ɨ́ milémé myɔ́ɔ́ bí.

52Nye á si pɛʼ ojwɨ́ɨ ɨ́ bidiá byɔ́ɔ́.

Nó bʉr o dí ejɔr ményʉ́l mɔ́ɔ́ bá,

nyɨ́ dwe bé bidiá bi kʉ́.

53Nye á si kaale bʉr o ménza e bisá bí émbɨa,

njɨ okúmá ó bʉ̂r ó nyé á bwóolo mebô e mebô.

54Nye á si kɛm bʉ̂r o b'Ɨ́zraɛ̂l, bʉr o dí osyɛ̂l o mésá bé bá.

Nyɨ́ símsǎ mpʉ nyé á boo táare le elɨ̂lɛʼle bé mpam yɨ́.

55Yé ó mpʉ nyé á kɨkɛʼ bimpám gá bíná ó, nye ósɨsâ yɨ́.

Nye ócwɨ́a le Abraham, bé e mpóʼo nyé ó, njʉ̌m dǐ e njʉ̌m dǐ.»

56Nó Maria á nze jâ ɨ́ mbɛ̌r mé Elisabeth ongɔn olɛ̂l. Nye ntɔ̂ʼ swîʼ, tô kwár nyé.

Ebyɛ́l mé Yʉánɛs Ndubʉr

57Jɔʼ ébyâ mé Elisabeth lé á pyâl yɨ́, nó ó nyé á byâ mwân, mâ mʉrʉ̂m. 58Bʉr ó njoo yé ndu e mimbyɛ́l myé, bé ntɔ̂ʼ jóʼǒ lɔ́ɔ ó, Dâ Nzyɛ̌m á be ó sí jɨ̂ʼ nyé nkoó lɨ́ entɨh nyé mwân! Bɨ́bɛ̂h nzě sohǒ lɔ́ɔ waá. 59Lɨ́ elú é mwôm, bé ntɔ̂ʼ nze e né ó, bé sâʼ nye mpʉ́n, bé jwɨ́rɨɨ nye díé é sɔ́ŋ wé, Zacharie. 60Nó ó nyɔ́ŋ wé á nze lɛ́ɛ e bé ó: «Heʼé, nye ójébɔɔ ó “Yʉánɛs”.» 61Bɨ́bɛ̂h ntɔ̂ʼ kâm. Bé e né ó: «Abe e gúú mbyɛ́l gô dí e díé énɨ̌.»

62Bê nzě peble mébó mɔ́ɔ́, lɨ́ edî ó, Zacharie lɛ̂ʼlaa bé díé é mwân. 63Nó ó Zacharie á nze peble mebô lɨ́ ejébe ékóʼ lé étile. Nye ntɔ̂ʼ nʉa lê, nzě cɛma tɨ̂ʼ ó: «Díé lé, lé ó “Yʉánɛs.”» Bʉr bɨ́bɛ̂h ntɔ̂ʼ báʼǎ kâm díe laá. 64Tyé e tyé yaá, Nzyɛ̌m nzě tiʼ nyê, nye nzě báʼǎ lwib, lɨ́ edwě Nzyɛ̌m kûm. 65Ekɛ̂n nzě swɨɨ bʉ̂r ó sí yaá bɨ́bɛ̂h ɨ́ menyʉ̂l. Bʉr ó sí Yʉ́da, sí mécwɨ̂ʼ, bé á jaa lɨlɛ́ɛ ó, njɨ lɔ́ɔ waá. 66Bʉr o b'á jóʼo bá, bê nzě baʼle mílɔ̌b myaá ɨ́ milémé myɔ́ɔ́. Bê nzě díila páʼ nyɔ́ɔ́ ó: «Mwân nyâ, nye óbe wáǎ mbi mwân ɛ̌?»

Bʉr ntɔ̂ʼ dweʼe bíjwɨʼ ɨ́ twiʼ mé Yʉánɛs, le egʉ́a ó, nkul mé Nzyɛ̌m á kʉ be ó e né.

Nkɛ̌ʼ mé Nzyɛ̌m ɨ́ lɔ̌b mwân mé Zacharie

67Nó Zacharie, sɔ́ŋ wé, nye mû lwɨ́ŋlá e Sísǐm mé Nzyɛ̌m, á nze nyɛl egwîh milɔ̌b mé Nzyɛ̌m. Nye á lɛ́ɛ ó:

68«Mɨná dwêʼ gá Dâ, dí Nzyɛ̌m bʉ̂r o b'Ɨ́zraɛ̂l nyá, kûm,

ebě, nyɨ́ nzě kúl bʉ̂r yé ɨ́ menɔɔlʉ.

Nyɨ́ táǎ góo, le edwih mɨ́ná gá ɨ́ mpila mísyóm, pɛʼ mɨ́ná ɨ́ fá.

69Nyɨ́ ntɨh mɨ́ná gá tiʼbʉr dí ɨ́ lele nkûl nyá.

Nye ó mʉr mbɛ̌r bʉ̂r mé David, á be syɛ̂l mesâ mé Nzyɛ̌m nyá.

70Nyɨ́ sâ mpʉ nyé á boo lɛ́ɛ mélú mé épíhe ɨ́ nzɨ̌ ogwíha o mílɔ̌b bé, bʉr o dí ti bá yɨ́.

71Nyɨ́ nzě kɛm mɨ́ná gâ, lwímla le ontɨ̂m le obɨn gá bɨ́ná.

Nyɨ́ pɛʼ mɨ́ná gá ɨ́ mebó mé bʉ̂r o dí enwim mɨ́ná gá bá.

72Nyɨ́ jɨ̂ʼ bímpám gá bíná nkoó.

Nyɨ́ símsa sáá nyé á tyêl páʼ nyɔ́ɔ́ le Abraham nyɨ́.

73Nye á kɛʼ sɔ́ŋ mpám gá wɨ́ná Abraham, le entaa mínkâl ó,

74nye ókɛm mɨ́ná gâ, lwímla le ontɨ̂m le obɨn gá bɨ́ná.

Nó ó mɨ́ná ódwidwe gá nye kûm, akǎ kpɛ́ɛ bé yɨ́.

75Mɨná bé ógúmo gá ó e né.

Mɨná bé óbe gá ó, otîtyěl o bʉ̂r ɨ́ míh mé, tó pyâl ɨ́ twǐʼ njʉ̌m dǐ.

76Gua mwân wǎm nyâ,

go óbe ó ngwíha milɔ̌b mé Nzyɛ̌m dí Lʉ́ bísá bíbyɛ̂h nyá,

ebě, go ótô lɨ́ esóʼ mé Dâ Nzyɛ̌m, lɨ́ ekomlo nzɨ́ nyé ngá cɨɨ nyɨ́.

77Go ólɨlɛ̂ʼlě kúl bʉ̂r gá yɨ́ná ó, nye ó ngá tiʼ mɨ́ná gâ.

Nye ópɛʼ mɨ́ná gá bibaa bí ébébe nyé á niʼe mɨná gá bí.

78Ebě, Nzyɛ̌m gá wɨ́ná, nyɨ́ jɨ̂ʼ mɨ́ná gá nkoó.

Tiʼbʉr nyé ngá ntɨh nyá, ópyâl ɨ́ mɨná gâ, mpʉ dʉ́o dí epyâl kʉ́, kʉ̌n sí yɨ̂ʼ yɨ́yɛ̂h yɨ́.

79Nye ókʉn ntémé menzɨ̌ me bʉ̂r o b'á bɨbe lɨ́ edúrʉ́ʉ́ bá.

Baá bé á bɨbe ɨ́ ka sóo bá, bé mû ó, sí tiʼe.

Nye ólɛ̂ʼle mɨ́ná gá mpʉ mɨ́ná jálá le edûdu gá kʉ̌ tyen mpâ,

mɨ́ná gá le onɔ́ɔ́ nkʉ̂ didi ɨ́ mepyɛbla yɨ́.»

80Nó ó mwân waá á nze gwɨ́e le ebi mélele ɨ́ sísǐm. Nye á didi ó ɨ́ lʉá, tó pyâl ɨ́ dʉ́ó nyé á tyɛ̂b ɨ́ míh mé bʉ̂r o b'Ɨ́zraɛ̂l lɨ́ elɛ̂ʼle nyé mʉr tɨ̂ʼ yɨ́.

বর্তমানে নির্বাচিত:

Luc 1: ozm

হাইলাইট

কপি