Génesis 4
4
Cainwan Abelwan
1Adanqa warmin Evawan puñuykorqa, Evataj onqoj rikhurispa, uj qhari wawata paqarichikorqa. Suticharqataj “Caín” sutiwan: Tata Diospa yanapayninwan qhari wawayoj kani, nispa. 2Ujtawan wijsallikuspataj, Evaqa Cainpa sullk'antañataj paqarichikorqa, suticharqataj “Abel”, nispa. Abelqa ovejata uywaj karqa. Caintaj jallp'ata llank'aj karqa.
3Qhepanejman Cainqa jallp'ata llank'aspa, poqochisqanmanta Tata Diosman wakin imakunata jaywarqa.#4.3 Diosman jaywarqa: Pichus Diosman imatapis jaywaspa, yachayta qosharqa Diosta kasukoj sonqoyoj kasqanta, chayrí jatunchasqanta, yupaychasqanta ima. 4Abelpis Tata Diosman jaywananpaj apallarqataj, ovejanmanta phiwi uñakunamanta aswan sumajnin kajta. Jinapi Tata Diosqa Abelta, chantá jaywasqantapis sonqo junt'asqa jap'ikorqa. 5Caintarí, jinallataj imatachus jaywasqantapis Dios mana sonqo junt'asqachu qhawarqa. Chayrayku Cainqa maytapuni phiñakorqa, uyanpis uj jinayarqa.
6Chantá Tata Diosqa Cainta nerqa: Imaraykutaj chay jina phiñasqa, uj jinataj kashankiri? 7Sichus allinta ruwawaj chayqa, mana k'umuykachaspa puriwajchu. Manachus allin kajta ruwanki chayrí, juchaqa#1 P 5.8. jap'erqosunanpaj jina suyaykushasunki. Ama qanqa juchalliyta munanawan atipachikuychu, nispa.#4.7 Ama juchalliyta munanata atipachikuychu: Diosqa runaman yuyayta, yachayta qon allin kajta mana allin kajta ruwananta ajllayta atinanpaj. Imatachus ruwananta mana ruwananta ajllasqanmantataj runamin cuentayoj. Dt 30.15-20.
8Uj kuti Cainqa Abelta nerqa: Jaku campota puriykacharej rina, nispa. Chantá campopi kashajtinku, Cainqa wawqen Abelta maqaspa wañurparicherqa.
9Chantá Tata Dios Cainta taporqa: Maytaj wawqeyki Abelri? nispa. Caintaj kuticherqa: Mana yachanichu. Noqachu wawqey Abelta qhawanay karqa? nispa.
10Tata Diostajrí nerqa: Imatataj ruwarqankiri? Wawqeykej yawarnenqa jallp'amantapacha justicia ruwanayta qhaparimushawan. 11Chayrayku qanqa maldicisqa kanki, jinataj maypichus wawqeykej yawarninta jich'arqanki, chay jallp'amanta wijch'usqa kanki. 12Chajrata tarpojtiykipis, jallp'aqa manaña poqopusonqachu. Qantaj kay pachapi mana llajtayoj jina puriskiri kanki, nispa.
13Chantá Caín Tata Diosta nerqa: Ñak'arinayqa mana apay atinapaj jinachu. 14Kunan qanqa kay jallp'amanta qharqowanki, manañataj qayllaykipi ujtawan kayta atisajchu. Imamanta ayqekoj runa jina kay pachapi purisaj. Ajinaqa pipis tinkuwaspa, wañuchiwanqachari, nispa.
15Tata Diostajrí kuticherqa: Mana jinachu kanqa. Pipis qanta wañuchejqa qanchis kutita jasut'isqa kanqa, nispa. Chaymantataj Tata Diosqa Cainman uj señalta churarqa, pipis payta taripaspa, ama wañuchinanpaj. 16Ajinata Cainqa Tata Diosmanta karunchakuspa, Nodman tiyakoj riporqa. Nodqa Edenmanta inti llojsimuynejpi kashan.
Cainpa miraynin
17Caín warminwan puñuykorqa, warmintaj wijsayoj rikhurispa, churin Enocta paqarichikorqa. Chaypacha Cainqa uj llajtata sayaricherqa, chay llajtatataj churin Enocpa sutinwan suticharqa. 18Enocqa Iradpa tatan karqa, Iradtaj Mejuyaelpa tatan karqa. Mejuyaeltaj Metusaelpa tatan karqa, Metusaeltaj Lamecpa tatan karqa. 19Lamecqa iskay warmiyoj karqa. Ujninpata Ada sutin karqa, ujninpatataj Silá. 20Adaj churenqa Jabal karqa, Jabalpa miraynintaj toldopi tiyakojkuna karqanku, uywata uywajkuna ima. 21Sullk'anpa sutintaj Jubal karqa, chaypa wawankunataj arpata, qenatawan waqachiyta yachajkuna karqanku. 22Silapis wawayojllataj karqa, sutintaj Tubal Caín karqa. Payqa broncemanta, fierromanta ima tukuy imata ruwayta yacharqa. Tubal Cainpata panantaj Noamá karqa.
23Uj kuti Lamecqa warminkunata nerqa: Ada, Silá, imatachus nisqayta sumajta uyariwaychej:
Warmiykuna, noqaqa uj runata wañucherqani wajtawasqanrayku,
uj waynatapis wañuchillarqanitaj sajmawasqanrayku.
24Sichus Cainta wañuchejta qanchis kutita jasut'enqanku chayqa,
noqata wañuchiwajtaqa qanchis chunka qanchisniyoj kutita jasut'enqanku, nispa.
Setpa miraynin
25Adanqa ujtawan warminwan puñuykorqa, warmintaj wijsallikuspa, uj qhari wawata paqarichikorqa. Chantá payta suticharqa “Set” sutiwan: Diosqa uj qhari wawata qowan Abelpa cuentanmanta, pitachus Caín wañucherqa, chaymanta, nispa.
26Setpatapis churin kallarqataj, sutintaj Enós karqa. Chaymantapacha runakunaqa Tata Diospa sutinta oqharispa, payta yupaychayta qallarerqanku.
বর্তমানে নির্বাচিত:
Génesis 4: DQPC
হাইলাইট
শেয়ার
কপি
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
