Jɔn 20

Raŋ Cïnic Raan

(Math 28:1-8; Mak 16:1-8; Luk 24:1-12)

1Na wën, ë kööl tueŋ ë akööl kadhorou yiic, ke Meri Magdalene rial ɣɔn amiäk, të ŋootë piny ke col, le të nu raŋ, le ku tïŋ kuur acï nyaai ë raŋ thok. 2Ago kat, le tëde Thimon Petero, ku raan däŋ ë piööcë, raan nhiɛɛr Yecu, le ku lëk keek an, “Acïk Bɛ̈nydït jɔt ë raŋic, ku akucku të cï kek e tääu thïn?”

3Go Petero rɔt jɔt, kekë raan däŋ ë piööcë, lek të nu raŋ. 4Aake riŋ kaarou ëtök, go raan däŋ ë piööcë go Petero wöör ë riŋ, go kɔn ɣet të nu raŋ. 5Na wën, ke guŋ, luiit raŋic, ku tïŋ lupɔɔ linɔn ke ke dhɔt piny, ku akën lɔ thïn. 6Na wën, ke Thimon Petero löök bɛ̈n ë yecök, bï ku le ë raŋic, go lupɔɔ linɔn tïŋ ke ke dhɔt piny, 7ku tïŋ lupɔ wään nu ë yenɔm, ke cïï tɔ̈u kekë lupɔɔ linɔn ëtök, acï matic, ku tɔ̈u tëde etök. 8Go raan däŋ ë piööcë jɔ lɔ thïn aya, raan wën cï kɔn bɛ̈n të nu raŋ, go tïŋ, ku gɛm. 9(Aŋootkï ke ke kuc këcïgɔ̈ɔ̈r an, bï rɔt dhil jɔt ë kɔc cï thou yiic.) 10Go kɔcpiööcë kenïïm bɛ dhuöny paanden.

Yecu ë Tuöl tëde Meri Magdalene

(Math 28:9-10; Mak 16:9-11)

11Ku kääc Meri ë raŋ thok biic ke dhiau. Ku të dhiɛɛu en, ke jɔ guŋ luiit raŋic, 12go tuucnhial tïŋ kaarou, aceŋkï kaɣer, ke ke rɛ̈ɛ̈r, tök ë yenɔm, ku tök ë yecök, të wään cï guöp de Yecu tɔ̈ɔ̈u thïn. 13Gokï thiëëc an, “Tiiŋë, eeŋö dhiëëuwë?” Go lueel an, “Ee luɔi cï kek Bɛ̈nydït jɔt, ku akuöc të cï kek e tääu thïn!”

14Na wën, aacï kakë lueel, ke jɔ yekɔ̈u puk, ku tïŋ Yecu ke kääc, ku kuc nɔn ee yen Yecu. 15Go Yecu thiëëc an, “Tiiŋë eeŋö dhiëëuwë? Eeŋa kɔɔr?”

Go lueel ë yepiɔ̈u nɔn ee yen raan ë dom tiit, go lueel an, “Bɛ̈ny, të cï yïn e jɔt, ke yï lëk ɛn të cï yïn e tääu thïn, ke bä jɔt.”

16Go Yecu lueel an, “Meri!”

Go rɔt puk, ku lueel an, “Raboni!” (Yen aye “Bɛ̈nydiën ee wëët.”)

17Go Yecu yɔ̈ɔ̈k an, “Du ya jak guöp, yɛn ŋoot ke yɛn kën lɔ nhial tëde wäär. Jɔ lɔ tëde wɛ̈ɛ̈tamäthkuɔ, lɛ̈kë keek, an, Yɛn lɔ nhial tëde Wäär, ku ye Wuöördun, ku la tëde Nhialicdï, ku ye Nhialicdun.”

18Go Meri Magdalene bɛ̈n ku lëk kɔcpiööcë an, yɛn ë Bɛ̈nydït tïŋ, ayï luɔi cï en e lɛ̈k ee kakë.

Yecu Atul tëde Kɔckɛn ë Piööcë

(Math 28:16-20; Mak 16:14-18; Luk 24:36-49)

19Na ɣɔn thëën, ë köölmanë guöp, yen aye kööl tueŋ ë akööl kadhorou yiic, të cï ɣöt gäär, ɣön cï kɔcpiööcë guëër thïn, në riɔ̈ɔ̈c riɔ̈ɔ̈c kek ë Judai, ke Yecu bɔ̈ ku kɛ̈ɛ̈c ë ciɛɛlic, yöök keek, an, “Ë mät tɔ̈u ke week.” 20Na wën, aacï kënë lueel, ke ke jɔ nyuöth yecin ku yelɔ̈ɔ̈m. Go kɔcpiööcë piɔ̈ɔ̈th miɛt, wën cï kek Bɛ̈nydït tïŋ. 21Go Yecu ke bɛ yɔ̈ɔ̈k an, “Ë mät tɔ̈u ke week, cït man cï Wäär a tooc, yen atuɔɔc ɛn week aya.” 22Na wën, aacï kënë lueel, ke jɔ wëi ë kegup, ku yöök keek an, “Nämkï Wëidït ɣer. 23#Math 16:19; 18:18. Kɔc kedhie kɔc bäk keek päl karɛcken, ka bï ke päl keek, ku kɔc cäkï keek bï päl karɛcken, ka cïï keek bïï päl karɛcken.”

Yecu ku Thoma

24Ku Thoma, raan töŋ ë kɔc thiëër ku rou, raan cɔl Didima, aa liu ë keyiic wään bï Yecu. 25Ago kɔc kɔ̈k ë piööcë yɔ̈ɔ̈k an, “Wok ë Bɛ̈nydït tïŋ!”

Go keek yɔ̈ɔ̈k an, “Të ŋuɔɔt ɛn ke ya kën tëde wiɛth tïŋ ë yecin, aguɔ yaciin tääu tëde wiɛth, ku të ŋuɔɔt ɛn ke ya kën a ciin luöt ë yelɔ̈ɔ̈m, ka cä bï gam.”

26Na wën, aacï nïn aa bɛ̈t, ke kɔckɛn ë piööcë ke ke be guëër ɣöt, ku nu Thoma kekë keek. Na wën, ke Yecu bɔ̈, ku ɣöt acï gäär, bïï ku kɛ̈ɛ̈c ë ciɛɛlic, lueel an, “Ë mät tɔ̈u ke week.” 27Go Thoma yɔ̈ɔ̈k an, “Bɛ̈ɛ̈iyë yïciin eenë, ciin thiinë ku woi a cin, ku bɛ̈ɛ̈iyë yïciin, luötë ë yalɔ̈ɔ̈m: ku du gäm reec, gämë!”

28Go Thoma bɛ̈ɛ̈r, lueel an, “Bɛ̈nydiëndït, ku Nhialicdï.”

29Go Yecu yɔ̈ɔ̈k an, “Tïŋ cï yïn a tïŋ, Thoma, yen aa gɛ̈m yïn? Thieithieei ë kɔc cï gam, acakaa kek ë ke kën a tïŋ!”

Nɔm de Këcigɔ̈ɔ̈rë

30Göök juëc kɔ̈k aya acï Yecu ke looi ë kɔckɛn ë piööcë nïïm, ka kënë gɔ̈ɔ̈r në këcïgɔ̈ɔ̈rë yic. 31Ku kakë acï ke gɔ̈ɔ̈r në luɔi bä wek Yecu gam, nɔn ee yen Kërtho, Wën ë Nhialic, ku gäm gäm wek, yen abä wek dɛ pïïr në rinke.

বর্তমানে নির্বাচিত:

Jɔn 20: dip-JPB

হাইলাইট

কপি